Ngeni Ekkewe Chón Rom 13:1-14
13 Nemenemen ekkewe néúwis a feito seni Kot, ina popun a lamot án aramas meinisin repwe álleasochisi ekkewe néúwis. Kot a eleenia emén me emén leir lón wiser.
2 Ina minne, ié a ú ngeni ewe nemenem, i a ú ngeni án Kot kókkót. Chókkewe mi ú ngeni repwe angei kapwúngúúr.
3 Pún chókkewe mi wisen nemenem iir minen eniwokkus ngeni féffér mi ngaw nge esap féffér mi múrinné. Ka mochen ngaseló seni niwokkusun ekkewe néúwis? Kopwe sópweeló le féri minne mi múrinné, me repwe mwareituk ren.
4 Pún iir néún Kot chón angang fán iten minne mi múrinné ngonuk. Nge iká ka féri minne mi ngaw, kopwe niwokkus, pún a wor popun ar uwei ewe ketilas. Iir néún Kot chón angang, chón liiwini pwe repwe pwáári án Kot song* ngeni ewe mi éérenaaló le féfféri minne mi ngaw.
5 Ina minne, a lamot ámi oupwe onómukemi fán ar nemenem, esap chék pokiten án Kot na song nge pwal pokiten mwelien letipemi.
6 Ina popun, oua méénatiw takises. Iir ra angang fansoun meinisin fán iten aramas meinisin, iwe ren ei, iir néún Kot chón angang.
7 Oupwe ngeni meinisin minne mi fichiiti: Takises, ngeni ewe chón angei takises. Liiwin, ngeni ewe chón angei liiwin. Álleasochis, ngeni ewe mi mochen kopwe álleasochisi. Súfél, ngeni ewe mi mochen kúna súfél.
8 Ousap liwinimmang ngeni emén och mettóch, lúkún chék ámi tongfengen lefilemi. Pún ié a tongei ekkewe ekkóch a apwénúetá ewe allúk.
9 Pún ekkeei allúk ra apasa, “Kosap lisowumwáál, kosap nimanaw, kosap solá, kosap mochenia,” me pwal ekkewe ekkóch allúk, ra pinúkfengen lón ei allúk: “Kopwe tongei chón órum ussun óm tongei pwisin en.”
10 Tong ese féri minne mi ngaw ngeni chón órun. Ina minne, tong a aunusaaló ewe Allúk.
11 A lamot oupwe pwal féri ekkeei mettóch úa erenikemi pokiten a tori fansoun ámi oupwe neló seni méúr. Pún iei, ach amanaw a arapoto lap seni ewe atun sia wiliiti chón lúkú.
12 Ewe pwiin epwele wes, ewe rán a arapoto. Ina minne, sipwe péútaaló ekkewe féffér mi riri ngeni rochopwak me sipwe úféúfolong ekkewe pisekin maun án ewe saram.
13 Sipwe manaweni eú manaw mi pwúng ussun lerán, eú manaw ese wor pari mi ngaw me únnúpuch lón, ese wor lisowumwáál me angolossá* lón, ese wor ánini me lólówó lón.
14 Nge sipwe áppirú ewe Samol Jises Kraist, me sisap akkótaaló fán iten mochenin futuk.
Footnote
^ Are “uweato kapwúng.”
