Ngeni Ekkewe Chón Rom 5:1-21
5 Ren lúkú, sia aramas pwúng me ren Kot. Ina minne, sipwe nónnóm lón eú riri mi kinamwe* ngeni Kot ren ach we Samol Jises Kraist.
2 Ren enletin, pokiten ach lúkú lón i, a suuk ngenikich eú al pwe sipwe angei ewe kirekiréch mi somwoló seni Kot, me iei sia angei an we kirekiréch. Ina minne, sipwe pwapwa* atun sia witiwiti án Kot epwe átekiakichetá.
3 Esap chék ina, nge sipwe pwal pwapwa* atun sia riáfféú pokiten sia silei pwe riáfféú epwe efisatá likiitú,
4 nge likiitú epwe efisatá ach nóm lón án Kot chen, me ei epwe ngenikich ápilúkúlúk,
5 me ewe ápilúkúlúk esap emmwen ngeni lichippúng, pokiten ewe tongen Kot a fen ninilóng lón letipach me ren ewe ngún mi fel, ewe a kawor ngenikich.
6 Lón án Kot we fansoun mi kefililó, Kraist a máló fán iten chón tipis. A féri ei, atun sia chúen apwangapwang.
7 Pún mi weires an epwe wor emén epwe máló fán iten emén aramas pwúng. Nge eli emén epwe mochen máló fán iten emén aramas mi múrinné.
8 Nge Kot a pwáári an we tong ngenikich lón ei napanap: Kraist a máló fán itach lupwen sia chúen tipis.
9 Ina minne, pokiten sia aramas pwúng me ren Kot ren chchaan Kraist we, sia lúkúlúk pwe ena epwe amanawakich seni án Kot song.
10 Pún iká sia fen chásefál ngeni Kot ren málóón Néún we atun sia chón oputa, epwele fen ifan me lapólóón ach kúna amanaw pokiten i a manaw, pwe iei sia fen chásefál.
11 Esap chék ina, nge sia pwal pwapwa lón Kot ren ach Samol Jises Kraist, ewe ren i sia angei ach chásefál.
12 Ina minne, ren emén aramas, tipis a tolong lón fénúfan, me máló a tolong ren ena tipis, iei ussun máló a tori aramas meinisin pokiten iir meinisin ra tipis—.
13 Pún tipis a fen nóm lón fénúfan mwen ewe Allúk, nge tipis esap etipisi emén lupwen ese wor allúk.
14 Nge máló a nemenem ussun king seni Atam ngeni Moses, pwal mwo nge wóón chókkewe rese eáni ewe esin tipis ren Atam, ewe mi léllé ngeni ewe emén epwe feito.
15 Nge án Kot liffang, ese léllé ngeni ewe tipis. Pún ren án emén mwán tipis chómmóng ra máló, pwal ina chék ussun ren ewe kirekiréch mi somwoló án Jises Kraist, chómmóng aramas ra angei án Kot we kirekiréch mi somwoló me an we liffang ese kamé.
16 Pwal och, ewe feiéch aramas ra kúna seni ewe liffang ese kamé, ese léllé ngeni sópwólóón án ena mwán tipis. Pún ren ei eú tipis, a efisi kapwúngún aramas, nge Kot a awora ewe liffang mwirin án chómmóng aramas ra tipis, iwe pokiten ena, aramas ra kúna pwúng me ren Kot.
17 Ren tipisin ewe emén mwán, máló a nemenem ussun king. Nge án Kot kirekiréch mi somwoló me an we liffang ese kamé fán itach pwe sipwe aramas pwúng a kon watte me múrinné. Chókkewe mi angei ekkeei mettóch repwe manaw me repwe nemenem ussun king pokiten ewe emén, Jises Kraist.
18 Ina minne, ren eú tipis, meinisin sókkun aramas ra kúna kapwúng, iwe ren pwal eú féfférún pwúng, meinisin sókkun aramas ra kúna pwúng fán iten manaw.
19 Pún ussun chék ren án ewe emén aramas álleasolap, chómmóng ra wiliiti chón tipis, iwe pwal ren án ewe emén álleasochis, chómmóng repwe wiliiti aramas pwúng.
20 Kot a awora ewe Allúk pwe aramas repwe silei pwe ra féri chómmóng tipis. Nge lupwen aramas ra féri chómmóng tipis, Kot a pwal alapaaló an kirekiréch mi somwoló ngeniir.
21 Ren met popun? Tipis me máló ra nemenem ussun king. Pwal ina ussun, án Kot we kirekiréch a nemenem ussun king pwe aramas repwe kúna pwúng me ren. A iei ussun pwe aramas repwe tongeni angei manaw esemuch pokiten ach Samol Jises Kraist.
Footnote
^ Are ese mwáál, “a wor ach kinamwe.”
^ Ese mwáál, “sia pwapwa.”
^ Ese mwáál, “sia pwal pwapwa.”
