Ekiseló chék Satan me néún kewe chónláng mi ngaw are timon resap chúen otupu aramas. Jiowa a fen otururetiw seni láng. (Pwärätä 12:9) Nge arapakkan chék, Kot epwe féri pwal och mettóch ngeni Satan me néún kewe chónláng mi ngaw. Lón eú lángipwi seni Kot, ewe aposel Johannes a apasa: “Mürin üa küna eman chon läng a feitiu seni läng, nge a amwöchü lepöün efoch kien ewe pwang mi alolol, pwal efoch selimächä mi fokun chou. Iwe, a turufi ewe trakon, ewe serepenitin lom, iei i ewe Tefil ika Satan, a föti pwe epwe föfö lon ükükün engeröü ier. Iwe, ewe chon läng a aturalong i lon ewe pwang mi alolol, a lokeela o pwauni, pwe esap chüen tongeni tufichin atupu chon ekewe mwü tori ekewe engeröü ier repwe sopola.” (Pwärätä 20:1-3) Ekiseló mwirin ena, Jiowa epwe nieló ewe Tefil me néún kewe chónláng mi ngaw me repwe máló fóchófóch.​—Pwärätä 20:10.

Ekkewe aramas mi ngaw wóón fénúfan repwe pwal rosoló.​—Kölfel 37:9, 10; Lukas 13:5.

Mwirin án Jiowa nieló Satan me néún kewe chónláng mi ngaw, iwe i epwe aworato chómmóng feiéch ngeni aramas. Ka chechchemeni pwe ekkewe mi máló ese chúen sópwósópwóló manawer, ese chúen wor manaw rer. Jesus a erá pwe máló a usun chék án emén annutochou, nge ese ttan. (Johannes 11:11-14) A eáni ena áwewe pún a silei pwe epwe war ewe fansoun lupwen ekkewe mi annut lón máló repwe neló ngeni manaw. A erá: “Epwe war ewe fansoun lupwen ekewe sotup meinisin repwe . . . towu seni peiaser.”​—Johannes 5:28, 29; aléllé ngeni Föför 24:15.

Repwe manawsefál wóón fénúfan. Esap chúen wor pwóróus esilesil ren ié kewe ra máló, nge fen ekkewe pwóróus mi apwapwa ren ié kewe ra manawsefál! A ifa me apwapwaan ena fansoun sipwele souni attongach kewe mi manawsefál!