LESEN 50
Ifa Usun Óm Famili Epwe Pwapwa?—Kinikin 2
Semirit iir liffang me ren Jiowa. A mochen án ekkewe sam me in repwe túmúnúfichi liffanger na. Jiowa a awora kapasen emmwen mi fókkun múrinné mi tongeni álisiir le féri ena. An kapasen emmwen a pwal pwári met ekkewe semirit ra tongeni féri pwe repwe álisatá pwapwa lón ar famili.
1. Ifa án Jiowa kapasen emmwen ngeni sam me in?
Jiowa a mochen sam me in repwe tongei néúr kewe me awora ngeniir watteen fansoun. A pwal mochen ar repwe túmúnú néúr kewe seni feiengaw, me a mochen repwe alónga ar asukuler wóón án Paipel kewe kapasen emmwen. (Än Salomon Fos 1:8) A ereni ekkewe sam: ‘Oupwe tümwünüöchü [néúmi kewe] fän ämi . . . öüröürer lon ach Samol.’ (Álleani Efisos 6:4.) Jiowa a pwapwa atun sam me in ra álleasochisi an emmwen le pwisin túttúmúnú néúr kewe nge rese ewisa ngeni emén an epwe wisen féri.
2. Ifa án Jiowa kapasen emmwen ngeni semirit?
Iei án Jiowa éúréúr ngeni ekkewe nau: “Oupwe aleasochisi sememi me inemi.” (Álleani Kolose 3:20.) Atun ekkewe nau ra súféliti me álleasochisi semer kewe me iner, ra apwapwaai Jiowa me semer kewe me iner. (Än Salomon Fos 23:22-25) Lekúkkúnún Jesus, a isetiw leenien áppirú mi múrinné. Inaamwo ika a unuséch, nge a álleasochisi me súféliti seman kewe me inan.—Lukas 2:51, 52.
3. Ifa usun óm famili a tongeni ririéch ngeni Kot?
Ika en emén sam are in, ese mwáál ka mochen án noum kewe repwe pwal tongei Jiowa usun óm tongei. Ifa usun ka tongeni álisiir le féri ena? Ren óm apwénúetá alon Paipel ei: “Kopwe achocho le aiti ngeni noum kewe [án Jiowa] kapas, kopwe pwal fos usur lupwen kopwe mot lon imwom pwal lupwen kopwe fetal won al.” (Tuteronomi 6:7) Ei kapas “achocho le aiti,” a wewe ngeni ach sipwe ekkenniwili ngeni emén och mettóch sia áiti ngeni. Ese mwáál, ka silei pwe a lamot óm kopwe ekkenniwili ngeni noum kewe och mettóch pwe repwe chechchemeni. Ena wokisin a wewe ngeni pwe a lamot óm kopwe akkawora fansoun le fóffós ngeni noum kewe usun Jiowa. A éch óm kopwe awora fansoun iteiten wiik le féri ámi káéén Paipel lón ámi famili. Nge ika ese wor noum, ka chúen tongeni kúna álillis seni óm awora fansoun iteiten wiik le káé án Kot we Kapas.
KÚTTAFICHI
Ppii ekkóch minen álillis repwe tongeni álisi meinisin lón ámi we famili le meefi pwapwa me núkúnúkéch.
4. Asukula noum kewe fán tong
Óm asukula noum kewe, a tongeni áweires. Nge ifa usun ewe Paipel a tongeni álisuk? Álleani James 1:19, 20, me mwirin pwóróusfengen wóón ekkeei kapas eis:
-
Atun ekkewe sam me in ra fós ngeni néúr kewe, ifa usun repwe pwári ngeniir pwe ra tongeer?
-
Atun emén sam are in a song, pwata esap ina ewe atun epwe apwúngú néún kewe? a
5. Túmúnú noum kewe
Ren óm kopwe túmúnú noum kewe, a lamot óm kopwe fós ngeni emén me emén leir usun ewe mettóch lisowu. Eli epwe ekis weires. Fichi ei VIDEO, me mwirin pwóróusfengen wóón ekkeei kapas eis.
-
Pwata a weires ngeni ekkóch sam me in ar repwe fós ngeni néúr kewe usun ewe mettóch lisowu?
-
Ifa usun ekkóch sam me in ra fós ngeni néúr kewe usun lisowu?
Paipel a fen oesini pwe án Satan ei ótót epwe ngangngawoló. Álleani 2 Timoty 3:1, 13, me mwirin pwóróusfengen wóón ei kapas eis:
-
Ekkóch ekkewe aramasangaw ei wokisin 13 a fósun, iir chókkewe mi kirikiringaw ngeni semirit. Iwe, pwata a lamot án ekkewe sam me in repwe asukula néúr kewe usun ewe mettóch lisowu me usun ar repwe túmúnúúr seni chókkewe mi kirikiringaw ngeni semirit?
En mi silei?
Chón Pwáraatá Jiowa ra awora chómmóng minen álillis mi tongeni álisi sam me in le asukula néúr kewe usun ewe mettóch lisowu me ifa usun repwe túmúnúúr seni chókkewe mi mochen kirikiringaw ngeniir. Áwewe chék, ppii:
-
Protect Your Children (video)
-
“Teaching Your Child About Sex” (Awake! No. 5 2016)
6. Súféliti sememi me inemi
Ekkewe kúkkún me teenage ra tongeni pwári ar súféliti semer kewe me iner ren napanapen ar fós ngeniir. Fichi ei VIDEO, me mwirin pwóróusfengen wóón ekkeei kapas eis.
-
Pwata mi fich án emén kúkkún are teenage epwe fós ngeni seman kewe me inan fán súfél?
-
Ifa usun epwe tongeni fós ngeniir lón ewe esin napanap mi pwári an asamoluur?
Álleani Än Salomon Fos 1:8, me mwirin pwóróusfengen wóón ei kapas eis:
-
Epwe ifa féfférún emén kúkkún are teenage atun seman kewe me inan ra ereni met epwe féri?
7. Awora fansoun le káéfengen ewe Paipel
Ekkewe famili iir Chón Pwáraatá Jiowa, ra kan áimuoló eú fansoun iteiten wiik pwe repwe fel ngeni Jiowa. Met ra kan féri lón ena atun? Fichi ei VIDEO, me mwirin pwóróusfengen wóón ekkeei kapas eis.
-
Ifa usun chón eú famili ra tongeni efisi ar Famili Fel iteiten wiik?
-
Met sam me in ra tongeni féri pwe ar famili fel epwe álilliséch me apwapwa?—Ppii ewe sasing lepoputáán ei lesen.
-
Met a tongeni áweiresi ámi káéfengen?
Lón Israel lóóm, Jiowa a mochen chón eú famili repwe fóffós usun an we Kapas. Álleani Tuteronomi 6:6, 7, me mwirin pwóróusfengen wóón ei kapas eis:
-
Ifa usun ka tongeni apwénúetá ei kapasen emmwen?
Minne ka tongeni féri atun famili fel:
-
Ammólnatá ekkewe mwich.
-
Álleani me pwóróusfengen wóón eú pwóróus lón Paipel óm we famili epwe sani.
-
Ika a wor noum semirit, download are printinawú eú ekkewe lesen fán iter wóón jw.org.
-
Ika a wor noum teenage, pwóróusfengen wóón eú ekkewe lesen fán iter wóón jw.org.
-
Oupwe pwomweni eú pwóróus seni Paipel.
-
Katol me pwóróusfengen wóón eché ekkewe video wóón jw.org.
EKKÓCH RA ERÁ: “A mmen weires án semirit repwe weweiti ewe Paipel.”
-
Met kopwe erá?
MENLAPAN
Jiowa a mochen án sam me in repwe tongei, asukula, me túmúnú néúr kewe. A mochen án semirit repwe súféliti me álleasochisi semer me iner. A pwal mochen án unusen chón ewe famili repwe fel ngeni i.
Enniwili
-
Ifa usun ekkewe sam me in ra tongeni asukula me túmúnú néúr kewe?
-
Ifa usun semirit ra tongeni asamolu semer kewe me iner?
-
Met feiéchún án eú famili áimuoló eú fansoun iteiten wiik pwe repwe féri ar famili fel?
PWAL EKKÓCH PWÓRÓUS
Met epwe álisi noum we le mmólnetá ngeni an epwele wakkattetá?
Ppii ekkóch án Paipel kewe kapasen emmwen fán iten chókkewe mi túttúmúnú iner kewe me semer mi chinnap.
“What Does the Bible Say About Caregiving for Elderly Parents?” (Web article)
Katol ifa usun emén mwán a wiliti emén sam mi múrinné inaamwo ika me mwan ese silei ifa usun epwe túmúnú néún kewe.
Ppii ifa usun ekkewe sam ra tongeni apéchékkúla ar riri ngeni néúr kewe át.
“Ifa usun ekkewe Sam Repwe Pacheöch ngeni Nöür kewe Ät?” (Ewe Leenien Mas, December 1, 2011)
a Lón ewe Paipel, ewe kapas ‘apwüng’ a wewe ngeni ach asukula, emmweni, me álisi emén semirit le ekkesiwili an ekiek are féffér ese pwúng. Ese fókkun wewe ngeni apwúng mi kon ssenúk are ekirikiringaw.—Än Salomon Fos 19:18.
