Pour kontan Bondye ek nou prosen i sa de komannman pli enportan anba Lalwa Moiz. Menm si bann Kretyen nepli anba Lalwa, sa de komannman pli enportan i ankor kapab ed nou konpran sa ki Zeova i ekspekte nou fer. (Mt 22:37-39) Nou pa ne avek sa kalite lanmour. Nou bezwen devlop li. Ki mannyer? En fason enportan pour devlop sa kalite lanmour i ler nou lir Labib toulezour. Ler nou konpran bann diferan laspe personnalite Bondye parey i montre dan Labib, nou kapab admir “labote [Zeova].” (Ps 27:4) Sa i fer ki nou lanmour pour li i ogmante e nou konmans mazin parey i mazinen. Sa i motiv nou pour obeir komannman Bondye ki enkli sa komannman pour met lentere lezot avan sa ki pour nou. (Zan 13:34, 35; 1Zan 5:3) Sa trwa sizesyon pour fer ou lektir Labib enteresan:

• Servi ou limazinasyon ek ou bann sans. Imazinen ki ou dan sa landrwa. Ki ou kapab vwar, tande e santi? Ki mannyer sa bann dimoun i santi?

• Esey diferan lapros. La detrwa opsyon: Lir aotvwa oubyen swiv ansanm anmezir ou ekout en lanrezistreman odyo. Lir lo en personnaz oubyen lo en size plito ki lir bann sapit dan lord. Par egzanp, servi latab 4-A, 4-G ek 4-H dan sa pti liv En led pour etidye Parol Bondye pour lir lo lavi Zezi. Lir sa sapit antye dan ki teks pour lazournen in ganny tire. Lir Labib dan lord ki in ganny ekrir.

• Lir pour konpran. I pli bon pour lir, esey konpran e medit lo zis en sapit toulezour, dan plas zis lir en ta sapit pour fini. Esey vwar konteks e analiz bann detay. Servi byen bann map ek referans. Fer resers lo omwen en pwen ki ou pa’n konpran. Si posib, pas apepre menm kantite letan pour medite parey ou’n fer pour lir.