Premye liv Kronik 20:1-8
20 Konmansman lannen,* sa letan kot bann lerwa ti abitye al lo bann kanpanny militer, Zoab ti diriz bann solda pour al lager e i ti detri pei bann Amonnit. I ti al Raba e anserkle sa lavil, me David li, i ti reste Zerizalenm. Zoab ti atak Raba e detri li.
2 Apre, David ti pran sa kouronn ki ti lo latet Malkam. Sa kouronn ti pez en talan* lor e i ti annan bann pyer presye dan sa kouronn. Zot ti met sa kouronn lo latet David. David ti osi pran en gran kantite lezot keksoz dan sa lavil.
3 I ti pran sa bann dimoun ki ti dan sa lavil e fer zot fer diferan travay, parey koup ros e travay avek bann zouti an fer ki’n ganny fite ek bann lars. David ti fer sa avek tou dimoun ki ti dan bann lavil bann Amonnit. Finalman, David ek tou son bann solda ti retourn Zerizalenm.
4 Apre sa, i ti annan lager Gezer avek bann Filisten. Sa letan, Sibekay, en Ousatit ti touy Sipay ki ti en desandans bann Refaim. Zot ti ganny laviktwar lo bann Filisten.
5 Ankor enn fwa, i ti annan lager avek bann Filisten. Elanann garson Zair ti touy Lami frer Golyat en Gitit ki ti annan en lans ki son lanmans ti gro parey sa bout dibwa ki dimoun i servi pour fer latwal avek.
6 Ankor enn fwa, i ti annan lager dan lavil Gat. I ti annan en zonm ki ti vreman gran, i ti annan 6 ledwa lo sak lanmen e 6 ledwa lo sak lipye, 24 ledwa an tou. Li osi i ti en desandans bann Refaim.
7 I ti kontinyen provok Izrael. Alor Zonatan garson Simea ki frer David ti touy li.
8 Sa ti bann desandans bann Refaim ki sorti dan lavil Gat. David ek son bann serviter ti touy zot.
