Izai 1:1-31
1 La sa vizyon ki Izai* garson Amoz ti gannyen konsernan Zida ek Zerizalenm dan letan ki Ouzya, Zotam, Aaz ek Ezekya ti lerwa Zida:
2 Lesyel, ekoute. Later, ekout byen.
Parski Zeova in koze e i’n dir:
“Mon’n elve bann garson,Me zot in revolte kont mwan.
3 En toro i konn byen sa dimoun ki’n aste liE en bourik i konn sa dimoun ki donn li manze.
Me Izrael pa konn mwan,*Mon prop pep pa montre ki zot entelizan.”
4 Maler pour sa nasyon ki fer pese,Sa pep ki lour akoz son bann fot,En kantite move dimoun, bann move zanfan!
Zot in abandonn Zeova,Zot in mank respe pour sa Enn ki Sen Izrael.
Zot in vir zot ledo avek li.
5 Kote mon pou tap zot ankor vi ki zot pe kontinyen rebele?
Zot latet antye i maladE zot leker antye i malad.
6 Depi zot plak lipye ziska zot latet, napa nanryen ki an bonn sante.
Zot annan bann blesir, bann mark ek bann boubou ki pa ankor geri.
Personn pa’n netway* zot oubyen met pansman lo zot oubyen pas delwil lo zot.
7 Zot pei in ganny abandonnen.
Zot bann lavil in ganny brile.
Bann etranze pe devor sa ki dan zot pei devan zot.
Zot pei i parey en dezer ki bann etranze in detri.
8 Zot in kit fiy Siyon parey en pti payot dan en plantasyon rezen,Parey en payot dan en plantasyon kokonm,Parey en lavil ki pe ganny anserkle.
9 Si Zeova Sef larme pa ti’n les detrwa nou vivan,Nou ti pou’n vin parey SodonmE nou ti pou’n vin parey Gomor.
10 Bann diktater* Sodonm, ekout sa ki Zeova i dir.
Bann dimoun Gomor, obei lalwa* nou Bondye.
11 La sa ki Zeova i dir, “Ki byenfe mon gannyen avek zot ta sakrifis?
Mon’n fatige avek zot bann mal mouton ki zot ofer konman lofrann brile* ek lagres bann zannimo ki’n ganny byen nouri.
Mon pa pran okenn plezir dan disan bann zenn toro, disan bann pti mouton ek disan bann kabri.
12 Ler zot vin devan mwan,Lekel ki’n demann zot pour fer sa,Pour vin pil pile dan mon bann lakour?
13 Aret anmenn bann lofrann lagrenn* ki pa vo nanryen.
Zot lansan i degoutan pour mwan.
Zot selebre bann nouvellin, bann lalwa ek bann lasanble,Me mon pa kapab siport bann mazik ki zot fer ler zot fer zot lasanble spesyal.
14 Mon ay zot bann lafet nouvellin ek zot bann lezot lafet.
Sa bann keksoz in vin en fardo pour mwan.
Mon fatige siport sa bann keksoz.
15 Ler zot lev zot lanmen anler,Mon kasyet mon lizye pour mwan pa vwar zot.
Menm si zot fer en kantite lapriyer,Mon pa pe ekoute.
Zot lanmen i ranpli avek disan.
16 Lav zot, fer zot prop.
Aret fer bann move keksoz devan mwan.
Aret fer sa ki mal.
17 Aprann fer sa ki byen, rod lazistis,Koriz sa enn ki fer lezot soufer,Defann drwa sa zanfan ki napa papa*E defann sa vev.”
18 La sa ki Zeova i dir, “Aprezan vini e annou aranz keksoz antre nou.
Menm si zot bann pese i rouz,Zot pou vin blan parey lanez.
Menm si zot rouz parey latwal ki kouler rouz fonse,Zot pou vin parey lalenn.
19 Si zot pare pour obei e ekoute,Zot pou manz bann bon keksoz dan sa pei.
20 Me si zot pa oule ekoute e zot rebele,En lepe pou detri zot,Parski Zeova ki’n dir sa.”
21 Sa lavil ki fidel in vin en prostitye!
I ti annan lazistis partou dan sa lavil.
I ti abitye annan ladrwatir laba,Me aprezan i annan bann mertriye.
22 Zot larzan* in vin salteE zot labyer* in ganny melanze avek delo.
23 Zot bann prens i antete e zot travay ansanm avek bann voler.
Zot tou zot kontan gous e zot toultan anvi bann kado.
Zot pa fer bann dimoun ki napa papa* ganny lazistisE zot pa zanmen ed bann vev ki annan bann problenm legal.
24 Alor la sa ki sa vre Senyer, Zeova Sef larme,Sa Enn Pwisan Izrael i dir:
“Gete! Mon pou fer mon bann lennmi aleE mon pou revanze lo mon bann lennmi.
25 Mon pou pini ou,Mon pou servi savon pour tir salte lo ouE mon pou tir tou sa ki fer ou enpir.
26 Mon pou met bann ziz ankor parey ou ti annan o konmansmanE mon pou met bann konseye ankor parey ou ti annan o konmansman.
Apre sa, ou pou ganny apele Lavil ladrwatir, Lavil ki fidel.
27 Lazistis pou fer Siyon ganny sove*E ladrwatir pou fer son pep ki retournen ganny sove.
28 Bann rebel ek bann dimoun ki fer pese pou ganny kraze ansanmE bann dimoun ki pe kit Zeova pou ganny detrir.
29 Parski zot pou onte akoz sa bann gran pye dibwa ki zot ti kontanE zot pou onte akoz sa bann zarden* ki zot ti swazir.
30 Parski zot pou vin parey en gro pye dibwa ki son bann fey pe sekE parey en zarden ki napa delo.
31 Sa zonm for pou vin parey difil*E son travay pou vin parey en pti dife.
Zot tou le de zot pou flanbe ansanmE i pou napa personn pour tenny sa dife.”
Bann not
^ Sa non i vedir “Delivrans sorti kot Zeova.”
^ Oubyen “son met.”
^ Literalman, “pez.”
^ Oubyen “dirizan.”
^ Oubyen “lenstriksyon.”
^ Vwar Leksplikasyon bann mo.
^ Vwar Leksplikasyon bann mo.
^ Oubyen “sa orfelen.”
^ Larzan, sa metal.
^ Oubyen “labyer ki’n ganny fer avek dible.”
^ Oubyen “bann orfelen.”
^ Oubyen “reaste.”
^ Aparaman, sa ti bann pye dibwa ek bann zarden ki ti annan pour fer avek ladorasyon zidol.
^ Sa i en kalite filas ki zot ti servi pour fer difil ki bril fasilman.
