Zeremi 24:1-10
-
Bann bon fig ek bann fig ki pa bon (1-10)
24 Apre Zeova ti montre mwan de pannyen fig ki ti devan tanp Zeova. Sa ti apre ki Neboukadnezar* lerwa Babilonn ti’n anmenn Zekonya* garson Zeoyakim, lerwa Zida an egzil ansanm avek bann prens Zida, bann artizan ek bann forzron.* I ti fer zot sorti Zerizalenm e i ti anmenn zot Babilonn.
2 Dan en pannyen, i ti annan bann fig ki ti vreman bon, parey bann premye fig. Dan sa lot pannyen, i ti annan bann fig ki ti vreman pa bon, zot ti sitan pa bon ki personn pa ti kapab manze.
3 Apre Zeova ti demann mwan: “Zeremi, ki ou vwar?” Mon ti reponn: “Mon vwar bann fig. I annan bann bon fig ki vreman bon, me i annan bann fig ki vreman pa bon, zot sitan pa bon ki personn pa kapab manze.”
4 Apre Zeova ti koz avek mwan e i ti dir:
5 “La sa ki Zeova Bondye Izrael i dir, ‘Mon pou konsider bann dimoun Zida ki’n al an egzil konman bann bon dimoun parey sa bann bon fig, sa bann dimoun ki mon ti fer zot kit sa landrwa e al dan pei bann Kaldeen.
6 Mon pou vey zot byen pour zot prop byennet e mon pou fer zot retourn dan sa pei. Mon pou konstri zot e mon pa pou kraz zot. Mon pou plant zot e mon pa pou derasin zot.
7 Mon pou donn zot en leker ki pou fer zot konnen ki mwan mon Zeova. Zot pou vin mon pep e mon pou vin zot Bondye, parski zot pou retourn kot mwan avek tou zot leker.
8 “‘Me la sa ki Zeova i dir konsernan sa bann fig ki sitan pa bon ki personn pa kapab manze: “Mon pou konsider Lerwa Zedekya, son bann prens, larestan dimoun Zerizalenm ki’n reste dan sa pei ek bann dimoun ki pe reste Lezip, parey sa bann fig.
9 Tou bann rwayonm lo later pou soke ler zot pou vwar sa maler ki pou arive avek zot. Zot pou ganny imilye, zot pou fer zot vin en proverb, zot pou monk zot e zot pou ganny konsidere konman en malediksyon dan tou sa bann landrwa kot mon pou dispers zot.
10 Mon pou anvoy en lepe kont zot e osi lafanmin ek lepidemi* ziska ki zot tou zot mor dan sa pei ki mon ti donn zot ek zot bann zanset.”’”
Bann not
^ Literalman, “Neboukadrezar.” Sa i en lot fason ekri sa non.
^ I ti osi ganny apele Zeoyakin e Konya.
^ En dimoun ki travay avek metal. Oubyen posibleman, “bann ki konstri bann gro miray lavil.”
^ Oubyen “maladi.”
