Ziz 1:1-36
1 Apre lanmor Zozye, bann Izraelit* ti demann Zeova: “Lekel premye parmi nou ki pou al lager avek bann Kananeen?”
2 Zeova ti reponn zot: “Tribi Zida ki pou ale. Gete! Mon pe donn* li sa pei.”
3 Tribi Zida ti dir tribi Simeon zot bann frer: “Mont avek nou dan sa teritwar ki nou’n gannyen pour lager avek bann Kananeen. Apre, nou pou al avek zot dan sa teritwar ki zot in gannyen.” Alor tribi Simeon ti al avek zot.
4 Ler tribi Zida ti monte, Zeova ti livre bann Kananeen ek Perizit dan zot lanmen e zot ti defet 10,000 zonm dan lavil Bese.
5 Zot ti trouv Adoni-Besek dan lavil Besek. Zot ti lager avek li e zot ti ganny laviktwar lo bann Kananeen ek Perizit.
6 Ler Adoni-Besek ti sove, zot ti tay deryer li e tyonbo li. Zot ti koup son de pous lanmen ek son de gro pous lipye.
7 Apre, Adoni-Besek ti dir: “I annan 70 lerwa ki zot pous lanmen ek zot gro pous lipye in ganny koupe e ki pe anmas manze anba mon latab. Zis parey mon’n fer avek zot, Bondye in rann mwan laparey.” Apre sa, zot ti anmenn li Zerizalenm e i ti mor laba menm.
8 An plis, bann zonm Zida ti atak Zerizalenm e zot ti pran sa lavil. Zot ti touy bann zabitan avek lepe e met dife dan sa lavil.
9 Apre sa, bann zonm Zida ti desann pour al lager avek bann Kananeen ki ti pe reste dan bann montanny, Negeb ek Sefela.
10 Alor, Zida ti atak bann Kananeen ki ti pe reste Ebronn (avan sa, Ebronn ti apel Kiryat-Arba) e zot ti touy Sesay, Aimann ek Talmay.
11 Zot ti kit sa landrwa e al atak bann zabitan Debir. (Avan sa, Debir ti apel Kiryat-Sefer.)
12 Apre Kaleb ti dir: “Sa zonm ki atak Kiryat-Sefer e pran sa lavil pou marye avek mon fiy Aksa.”
13 Otnyel garson Kenaz, pti frer Kaleb ti pran sa lavil. Alor Kaleb ti fer Otnyel marye avek son fiy Aksa.
14 Ler Aksa ti pe al kot lakaz son msye, Aksa ti sipliy Otnyel pour demann son papa Kaleb en bout later. Apre, Aksa ti desann lo son bourik* e Kaleb ti demann li: “Ki ou anvi?”
15 Aksa ti reponn li: “Silvouple beni mwan. Vi ki ou’n donn mwan en bout later dan sid,* donn mwan Goulot-Maim* osi.” Alor Kaleb ti donn li Goulot Anler ek Goulot Anba.
16 Bann desandans Kenit, boper Moiz ansanm avek pep Zida ti kit lavil pye palm* e zot ti al dan dezer Zida ki dan sid Arad. Zot ti reste parmi sa bann dimoun ki ti laba.
17 Me tribi Zida ek tribi Simeon zot bann frer ti al atak bann Kananeen ki ti pe reste Zefat e detri sa lavil konpletman. Alor zot ti apel sa lavil Orma.*
18 Apre, Zida ti pran Gaza ek son teritwar, Askelonn ek son teritwar e Ekronn ek son teritwar.
19 Zeova ti avek Zida e zot ti pran bann teritwar dan bann montanny me zot pa ti kapab pous bann zabitan ki ti pe reste dan laplenn akoz zot ti annan bann saret lager an fer.*
20 Zot ti donn Kaleb lavil Ebronn, zis parey Moiz ti’n promet. I ti pous sa trwa garson Anak ki ti pe reste laba.
21 Me bann Benzamennit pa ti pous bann Zebouzit ki ti pe reste Zerizalenm. Sanmenm sa, bann Zebouzit i ankor pe reste Zerizalenm avek bann Benzamennit ziska ozordi.
22 Antretan, bann desandans Zozef ti al atak Betel e Zeova ti avek zot.
23 Ler bann desandans Zozef ti pe espyonn Betel (anfet, avan sa, sa lavil ti apel Louz),
24 bann espyon ti vwar en zonm pe sorti dan lavil. Zot ti dir li: “Silvouple, montre nou semen ki al dan lavil e nou pou tret ou byen.”*
25 Alor sa zonm ti montre zot semen ki al dan lavil e zot ti touy tou dimoun ki ti dan sa lavil avek lepe, me zot ti les sa zonm ek tou son fanmir ale.
26 Sa zonm ti al dan pei bann Itit e konstri en lavil ki i ti apel Louz. Sa lavil i ankor apel Louz ziska ozordi.
27 Tribi Manase pa ti pran Bet-Seann ek son bann lavil dan zalantour, Taanak ek son bann lavil dan zalantour, bann zabitan Dor ek son bann lavil dan zalantour, bann zabitan Ibleam ek son bann lavil dan zalantour e bann zabitan Megido ek son bann lavil dan zalantour. Bann Kananeen ti kontinyen reste dan sa pei.
28 Ler bann Izraelit ti vin pli for, zot ti fer bann Kananeen travay dir konman lesklav me zot pa ti pous zot net dan sa pei.
29 Tribi Efraim pa ti pous bann Kananeen ki ti pe reste Gezer. Bann Kananeen ti kontinyen reste Gezer parmi zot.
30 Tribi Zeboulonn pa ti pous bann zabitan Kitronn ek bann zabitan Naalol. Bann Kananeen ti kontinyen reste parmi zot e zot ti fer bann Kananeen travay dir konman lesklav.
31 Tribi Aser pa ti pous bann zabitan Ako ek bann zabitan Sidon, Alab, Akzib, Elba, Afik ek Reob.
32 Alor, bann Aserit ti kontinyen reste parmi bann Kananeen ki ti pe reste dan sa pei parski zot pa ti’n pous bann Kananeen.
33 Tribi Naftali pa ti pous bann zabitan Bet-Semes ek bann zabitan Bet-Anat me zot ti kontinyen reste parmi bann Kananeen ki ti pe reste dan sa pei. Zot ti fer bann zabitan Bet-Semes ek Bet-Anat travay dir konman lesklav.
34 Bann Amorit ti fors bann Dannit pour reste lo bann montanny parski bann Amorit ti anpes zot desann dan laplenn.
35 Alor, bann Amorit ti kontinyen reste lo Montanny Eres, Azalonn ek Saalbim. Me ler desandans Zozef ti vin pli for,* zot ti fer bann Amorit travay dir konman lesklav.
36 Teritwar bann Amorit ti konmans depi kot montanny Akrabim, depi Sela e kontinyen an montan.
Bann not
^ Literalman, “bann garson Izrael.”
^ Oubyen “Mon’n donn.”
^ Oubyen posibleman, “i ti bat lanmen ler i ti lo bourik.”
^ Oubyen “Negeb.”
^ Sa non i vedir, “Bann basen (Bann bol) Delo.”
^ Setadir, Zeriko.
^ Sa non i vedir, “En landrwa ki pou ganny detrir konpletman.”
^ Oubyen “saret lager ki annan kouto feray dan zot larou.”
^ Literalman, “demontre lanmour fidel anver ou.”
^ Literalman, “ler lanmen lakaz Zozef ti vin pli lour.”
