Eski i touzour fasil pour obei manmi ek dadi?— Par ler i difisil. Eski ou ti konnen ki Zezi ti obei Zeova e osi son paran?— Son legzanp i kapab ed ou pour obei manmi ek dadi menm kan i pa fasil. Annou koz plis lo la.

Avan ki Zezi ti vin lo later, i ti dan lesyel avek son Papa, Zeova. Me Zezi ti osi annan paran lo later. Zot ti apel Zozef ek Mari. Eski ou konnen ki mannyer zot ti vin son paran?—

Zeova ti pran Zezi dan lesyel e met li dan vant Mari pour ki Zezi i kapab ne e viv lo later. Sa ti en mirak! Zezi ti grosi dan vant Mari parey tou pti baba i grosi dan vant zot manman. Apepre nef mwan pli tar, Zezi ti ne. Koumsanmenm ki Mari ek son msye Zozef ti vin paran Zezi lo later.

Kan Zezi ti annan 12 an, i ti fer en keksoz ki montre ki kantite i ti kontan son Papa Zeova. Sa ti arive ler Zezi ek son fanmir ti fer en gran vwayaz pour al Lapak Zerizalenm. Ler zot ti pe retournen, Zozef ek Mari pa ti trouv Zezi okenn par. Eski ou konnen kote i ti ete?—

Zozef ek Mari ti depese pour retourn Zerizalenm e zot ti rod Zezi partou. Zot ti vreman enkyet akoz zot pa ti kapab vwar li. Me apre trwa zour, zot ti vwar li dan tanp! Eski ou konnen akoz Zezi ti dan tanp?— Parski i ti anvi konn plis lo son Papa Zeova. I ti kontan Zeova e i ti anvi konnen konman pour fer li plezir. Menm ler i ti vin gran, Zezi ti touzour obei Zeova. I ti obei menm ler i ti difisil e i ti bezwen soufer pour obei Zeova. Eski Zezi ti osi obei Zozef ek Mari?— Wi, Labib i dir ki i ti obei zot.

Ki ou kapab aprann avek legzanp Zezi?— Ou bezwen obei manmi ek dadi, menm ler i pa fasil. Eski ou pou fer sa?—