OU KAS en zoli ponm mir lo en brans. Ou santi son loder avan ki ou met li dan pannyen avek lezot. I fer en pe letan ki ou pe travay, me ou ankor annan lafors e ou pare pour fer plis travay ankor. Ou manman i kot en lot pye pa tro lwen, i pe travay dan lazwa e pe sante ansanm avek lezot manm fanmir ek zanmi ki pe partisip dan rekolt. I ankor byen zenn, zis parey ou rapel li ler ou ti ankor pti tou sa letan pase. I difisil pour mazinen ki ou ti vwar li vyeyi dan sa lemonn ki lontan in disparet. Ou ti vwar li ganny atake avek maladi, ou ti pe tyonbo son lanmen ler i ti pran son dernyen souf e ou ti plere kot son latonm. Pourtan, la aprezan, ansanm avek plizyer lezot, i vivan e an bonn sante ankor!

Nou kapab asire ki sa bann zour pou vreman arive. Nou konnen akoz promes Bondye i toultan vin vre. Dan sa seksyon nou pou egzaminen konman ki bann promes Rwayonm pou ganny akonplir byento ziska Armagedon. Nou pou osi revwar serten promes ekstraordiner ki pou ganny akonplir apre sa. Pa nou pou vreman kontan pour vwar sa letan ler Rwayonm Bondye pou diriz lo later antye e refer tou keksoz nouvo.