1, 2. (a) Ki mannyer Frer Russell ti reponn en paster ki ti anvi konnen ki mannyer aktivite bann Etidyan Labib ti ganny finanse? (b) Ki nou pou egzaminen dan sa sapit?

 EN FWA, en pret Reformed Church ti apros Frer Charles Russell e demann li ki mannyer aktivite bann Etidyan Labib ti pe ganny finanse.

 Frer Russell ti eksplike: “Nou pa zanmen pas laket.”

 Sa pret ti demande: “Be, kot zot ganny larzan?”

 Frer Russell ti reponn: “Si mon dir ou laverite, ou pa pou le krwar. Kan bann dimoun i vin nou renyon, zot pa trouv okenn pannyen pe pase devan zot. Me zot vwar ki i annan bann depans. Zot dir dan zot menm, ‘Sa landrwa i koute . . . Ki mannyer mon kapab donn en pti larzan pour sa?’”

 Sa pret pa ti oule krwar Frer Russell.

 Frer Russell ti kontinyen an dizan: “Mon pe dir ou laverite. Zot osi zot demann mwan sa menm kestyon. ‘Ki mannyer mon kapab kontribye?’ Kan en dimoun i resevwar benediksyon e i annan sa larzan, i anvi servi li pour Senyer. Si i napa larzan, akfer nou pou fors li pour donnen?” a

² Frer Russell ti sirman pe dir “laverite.” Depi byen lontan pep Bondye in fer bann kontribisyon volonter pour siport vre ladorasyon. Dan sa sapit, nou pou egzamin serten legzanp dan letan lontan dan Labib lo sa size ensi ki bann legzanp dan nou letan. Anmezir nou egzaminen ki mannyer aktivite Rwayonm in ganny finanse ozordi, sakenn ant nou i devret demann son lekor, ‘Ki mannyer mon kapab siport sa Rwayonm?’

3, 4. (a) Ki konfyans Zeova i annan dan son bann adorater? (b) Ki mannyer bann Izraelit ti demontre zot sipor pour konstriksyon tabernak?

³ Zeova i annan konfyans dan son bann vre adorater. I konnen ki si zot annan sa loportinite, zot pou kontan pour demontre zot devosyon atraver bann kontribisyon volonter. Annou egzamin de legzanp dan listwar pep Izrael.

 ⁴ Apre ki i ti’n retir bann Izraelit Lezip, Zeova ti dir zot konstri en latant ouswa tabernak pour ladorasyon. I ti neseser pour annan en bon pe resours pour son striktir ek dekorasyon. Zeova ti demann Moiz pour donn sa pep loportinite pour siport sa proze an dizan: “Tou bann ki anvi fer en kontribisyon avek tou zot leker, anmennen.” (Egz. 35:5) Ki mannyer sa pep ki pa tro lontan ti pe rente “dan bann kondisyon difisil konman lesklav” ti reazir? (Egz. 1:14) Zot ti donn tou zot sipor. Zot ti anmenn zot lor, larzan ek lezot keksoz valer ki laplipar zot ti’n pran avek bann Ezipsyen ki ti zot met avan sa. (Egz. 12:35, 36) Bann Izraelit ti donn plis ki sa ki ti neseser e zot ti bezwen ganny “anpese pour anmenn okenn lezot keksoz.”​—Egz. 36:4-7.

5. Ki mannyer bann Izraelit ti reazir ler David ti donn zot loportinite pour kontribye anver konstriksyon tanp?

⁵ Apepre 475 an pli tar, David ti servi son prop larzan pour finans konstriksyon tanp, premye sant ladorasyon permanan lo later. Apre sa, i ti donn loportinite son bann kanmarad Izraelit pour donnen par demann zot: “Lekel ki volonter ozordi pour anmenn en kado pour Zeova?” An repons, lepep ti fer “lofrann volonter pour Zeova avek en leker konplet.” (1 Kron. 29:3-9) David ti rekonnet ki se Zeova ki ti sours sa bann kontribisyon, alor i ti dir sa parol dan son lapriyer: “Tou keksoz i sorti kot ou e nou’n donn ou sa ki sorti dan ou prop lanmen menm.”​—1 Kron. 29:14.

6. Akoz larzan i neseser pour akonplir sa travay Rwayonm ozordi e ki kestyon ki ganny souleve?

⁶ Ni Moiz, ni David pa ti fors pep Bondye pour donnen. Plito, sa pep ti donn volonterman avek zot leker. Me nou ozordi? Nou konn tre byen ki sa travay ki Rwayonm Bondye pe fer i koute. Bokou larzan i neseser pour pibliye e distribye Labib ek bann piblikasyon baze lo Labib, pour konstri e mentenir bann landrwa ladorasyon ek fasilite biro brans e pour ofer nou bann frer ek ser led sekour dan letan dezas. Alor, serten kestyon enportan i ganny souleve: Kote nou ganny sa larzan neseser? Eski bann disip sa Lerwa i bezwen ganny forse pour donnen?

7, 8. Akoz pep Zeova pa mandyan ouswa demann dimoun larzan?

⁷ Frer Russell ek son bann asosye pa ti oule imit bann legliz Kretyen pour demann larzan dimoun. Dan dezyenm nimero Watch Tower anba tit “Do You Want ‘Zion’s Watch Tower’?” Russell ti dir: “‘Zion’s Watch Tower’ i annan ZEOVA konman sa enn ki par deryer e tan ki sa i leka, i pa pou zanmen mandyan ouswa demann sipor zonm. Ler sa Enn ki dir: ‘Tou lor ek larzan bann montanny i pour mwan’ pa reisi donn sa finans neseser, nou pou konpran ki nou pou bezwen aret pibliy sa bann piblikasyon.” (Aga. 2:7-9) Plis  ki 130 an pli tar, The Watchtower ek sa lorganizasyon ki pibliy li i ankor pe fonksyonnen.

⁸ Pep Zeova pa mandyan larzan. Zot pa pas laket ouswa anvoy let pour demann larzan. Zot pa servi ni bingo, fennsifer ouswa tiket lotri pour anmas larzan. Zot siport sa ki Watch Tower ti’n dir depi byen lontan: “Nou pa’n zanmen vwar li byen pour demann larzan pour Senyer, parey lezot larelizyon i fer . . . Nou panse ki sa larzan ki ganny mandyan e ganny anmase o non Senyer dan diferan fason pa akseptab pour li e ki si i leka i pa pou beni bann ki donnen e sa travay osi.” b

9, 10. Akoz nou fer kontribisyon volonter?

⁹ Konman bann sitwayen Rwayonm ozordi, nou pa devret ganny forse pour donnen. Plito, nou kontan pour donn nou larzan ek lezot resours pour siport bann aktivite Rwayonm Bondye. Akoz nou kontan pour donnen volonterman? Get trwa rezon.

¹⁰ Premyerman, nou fer bann kontribisyon volonter akoz nou kontan Zeova e nou anvi “fer sa ki fer li plezir.” (1 Zan 3:22) Zeova i sirman kontan kan enn son adorater i donn li avek tou son leker. Annou egzamin parol zapot Pol konsernan lafason ki en Kretyen i merit donnen. (Lir 2 Korentyen 9:7.) En vre Kretyen pa tike pour donnen, ni donnen akoz i ganny forse. Plito, i donnen akoz se sanmenm ki i’n deside dan son leker pour donnen. c Andotmo, i donnen apre ki i’n trouv en bezwen e vwar konman i kapab konble sa bezwen. Zeova i kontan bann dimoun ki donn koumsa akoz i en ‘Bondye ki kontan sa enn ki donn avek lazwa.’ En lot tradiksyon i lir koumsa: “Bondye i kontan dimoun ki kontan donnen.”

11. Kwa ki pous nou pour donn Zeova nou pli bon kado posib?

¹¹ Dezyenmman, nou fer bann kontribisyon materyel konman en fason pour remersye Zeova pour tou bann benediksyon ki nou gannyen. Get sa prensip vreman profon dan Lalwa Moiz. (Lir Deterononm 16:16, 17.) Ler zot ti al asiste sa trwa lafet pandan lannen, sak zonm Izraelit ti devret donn en kado “dapre benediksyon ki Zeova” ti’n donn li. Alor, avan asiste en lafet, sak zonm ti bezwen konte ki kantite benediksyon i ti’n gannyen, egzamin son leker, epi deside ki pli bon kado i ti kapab anmennen. Dan sa menm fason, kan nou reflesir lo sa plizyer fason ki Zeova in beni nou, nou santi nou motive pour donn li nou meyer kado posib. Kado ki nou donn avek tou nou leker ki enkli bann kontribisyon materyel i reflekte lakantite ki nou apresye benediksyon ki Zeova i vers lo nou.​—2 Kor. 8:12-15.

12, 13. Ki mannyer nou kontribisyon volonter i demontre nou lanmour pour nou Lerwa e ki kantite sak dimoun i donnen?

 ¹² Trwazyenmman, atraver nou bann kontribisyon volonter, nou demontre nou lanmour pour nou Lerwa Zezi Kri. Ki mannyer? Get sa ki Zezi ti dir son bann disip dernyen zour swar son lavi lo later. (Lir Zan 14:23.) Zezi ti dir: “Si en dimoun i kontan mwan, i ava obei mon lansennyman.” “Lansennyman” Zezi i enkli sa lord pour pres sa bon nouvel Rwayonm lo later antye. (Mat. 24:14; 28:19, 20) Nou obei sa “lansennyman” ler nou fer tou sa ki nou kapab, depans nou letan, lenerzi ek resours materyel pour promot predikasyon, sa travay Rwayonm. Dan sa fason, nou demontre nou lanmour pour nou Lerwa.

¹³ Konman sitwayen fidel Rwayonm Bondye, avek tou nou leker nou anvi demontre nou sipor pour sa Rwayonm par fer bann kontribisyon materyel. Ki mannyer nou fer sa? Sa i en desizyon personnel. Sak dimoun i donn dapre sa ki i vreman kapab. Me, bokou nou bann frer ek ser  Kretyen napa bokou dan sa lemonn. (Mat. 19:23, 24; Zak 2:5) Kantmenm sa, zot ganny rekonforte pour konnen ki Zeova ek son Garson i apresye menm sa ptigin kontribisyon ki zot fer avek tou zot leker.​—Mark 12:41-44.

14. Pour plizyer lannen, lo ki baz Temwen Zeova ti ofer piblikasyon?

¹⁴ Pour plizyer lannen, Temwen Zeova in ofer piblikasyon baze lo Labib si en dimoun ti fer kontribisyon. Kontribisyon ki ti ganny demande pa ti bokou pour ki bann dimoun ki ti napa bokou larzan ti pou kapab donn en kontribisyon e ganny bann piblikasyon. Byensir, si en met lakour ti enterese me i ti napa larzan pour kontribye, bann proklanmater ti pare pour kit piblikasyon avek li. Zot ti annan sa gran dezir pour donn piblikasyon avek bann dimoun senser ki ti kapab lir e benefisye avek zot.

15, 16. (a) Konmansman 1990, ki azisteman Konsey Direkter ti fer konsernan lafason ki nou ofer nou bann piblikasyon? (b) Ki mannyer sa bann kontribisyon volonter i ganny anvoye? (Vwar osi bwat “ Kote nou kontribisyon i ale?”)

¹⁵ An 1990, Konsey Direkter ti konmans aziste lafason ki nou ti ofer piblikasyon. Konmansman sa lannen Leta-z-ini, tou piblikasyon ti ganny donnen avek piblik san demann kontribisyon. En let pour tou kongregasyon dan sa pei ti eksplike: “Bann proklanmater ensi ki manm piblik ki enterese pour ganny magazin ek piblikasyon pa devret ganny demande pour fer kontribisyon oubyen ganny sizere en serten kontribisyon pour zot ganny sa piblikasyon. . . . Nenport ki ki anvi fer en kontribisyon pour kouver depans sa travay edikasyonnel i kapab fer li, me zot kapab ganny sa bann piblikasyon ki swa zot in fer en kontribisyon oubyen non.” Sa laranzman ti ede pour klarifye nou travay e fer li kler ki nou pa bann marsan ki pe vann parol Bondye. (2 Kor. 2:17) Avek letan, laranzman konsernan fer kontribisyon volonter ti ganny enplimante dan tou biro brans dan lemonn.

¹⁶ Ki mannyer sa bann kontribisyon volonter i ganny anvoye? Dan bann Lasal Rwayonm, i annan bann bwat kontribisyon. Bann endividi i osi kapab anvoy kontribisyon direkteman avek en lasosyasyon ki Temwen Zeova i servi. Tou le-z-an i annan en lartik dan Latour Veyer ki donn detay lo lafason ki sa bann kontribisyon ouswa donasyon volonter i kapab ganny fer.

17-19. Eksplike ki mannyer bann kontribisyon i ganny servi pour (a) travay predikasyon mondyal, (b) konstriksyon mondyal bann Lasal Rwayonm e (c) depans kongregasyon lokal.

¹⁷ Travay mondyal. Sa larzan i ganny servi pour bann depans ki ganny fer pour akonpli sa travay predikasyon dan lemonn. Sa bann depans i enkli prodwir bann piblikasyon pour distribye dan lemonn, konstri e mentenir  bann biro brans ek Betel e osi met an plas bann diferan lekol teokratik. An plis ki sa, sa larzan i osi ganny servi pour pran swen avek bann misyonner, sirveyan rezyonal e distrik ek pionye spesyal. Sa bann kontribisyon i osi ganny servi pour ofer led sekour nou bann frer ek ser dan bann moman dezas. d

¹⁸ Konstriksyon mondyal bann Lasal Rwayonm. Sa larzan i ganny servi pour ed bann kongregasyon pour konstrir oubyen repar en Lasal Rwayonm. Anmezir bann kontribisyon i ganny fer, sa i permet ki lezot kongregasyon i benefisye. e

¹⁹ Depans kongregasyon. Sa larzan i ganny servi pour bann depans ek mentenans Lasal Rwayonm. Bann ansyen i kapab sizere ki serten sa larzan i ganny anvoye kot biro brans pour ki i ganny servi pour sa travay predikasyon mondyal. Dan bann ka parey, bann ansyen pou prezant en rezolisyon avek kongregasyon. Si i ganny aprouve, sa larzan ki’n ganny aprouve pou ganny anvoye. Sak mwan, sa frer ki responsab kont kongregasyon i prepar en rapor kont ki ganny lir avek kongregasyon.

20. Ki mannyer ou kapab onor Zeova avek ou bann “keksoz valer”?

²⁰ Kan nou egzamin tou sa ki enplike pour akonpli sa travay predikasyon e fer disip dan lemonn antye, nou santi nou motive pour “onor Zeova avek [nou] bann keksoz valer.” (Prov. 3:9, 10) Nou bann keksoz valer i enplik bann laspe fizik, mantal e spirityel. Nou sirman anvi servi sa bann keksoz plennman dan sa travay Rwayonm. Me, pa oubliye ki nou bann keksoz valer i osi enplik nou bann keksoz materyel. Annou reste determinen pour donn sa ki nou kapab, kan nou kapab. Nou bann kontribisyon volonter i onor Zeova e i demontre nou sipor anverRwayonm Bondye.