1, 2. Ki mannyer Balaam ti esey fer ditor pep Zeova?

 EN PESER i al kot i konnen i kapab ganny en kalite pwason ki i kontan. I swazir son labwet e anvoy laliny dan delo. Avek pasyans, i espere ziska ler pwason i morde, i redi laliny e kros sa pwason.

² Pareyman, dimoun i kapab ganny anbete pour fer sa ki mal. Par egzanp, ler bann Izraelit ti pros pour antre dan Later Promiz, zot ti kanpe dan Laplenn Moab. Lerwa Moab ti promet pour donn en zonm ki apel Balaam en kantite larzan si i ti anmenn malediksyon lo bann Izraelit. Balaam ti trouv en fason pour ki bann Izraelit i anmenn malediksyon lo zot prop lekor. I ti swazir byen son labwet. I ti anvoy bann zenn madanm Moabit dan kan bann Izraelit pour sedwir bann Izraelit pour fer sa ki mal.​—Nonm 22:1-7; 31:15, 16; Revelasyon 2:14.

3. Ki mannyer bann Izraelit ti tonm dan latrap Balaam?

³ Eski labwet Balaam ti marse? Wi, plizyer milye  zonm Izraelit ti komet imoralite seksyel avek bann madanm Moabit. Zot ti osi konmans ador bann fo bondye, enkli Baal-Peor ki ti en bondye sèks degoutan. Akoz sa, 24,000 Izraelit ti mor zis avan zot antre dan Later Promiz.​—Nonm 25:1-9.

4. Akoz plizyer milye Izraelit ti komet imoralite seksyel?

⁴ Akoz sa kantite Izraelit ti tonm dan latrap Balaam? Zot ti pe zis mazin satisfer zot prop dezir e zot ti bliy tou sa ki Zeova ti’n fer pour zot. Bann Izraelit ti annan en kantite rezon pour zot reste fidel avek Zeova. I ti’n liber zot dan lesklavaz Lezip, donn zot manze dan dezer e anmenn zot sen en sof o bor Later Promiz. (Ebre 3:12) Kantmenm sa, zot ti tonm dan imoralite seksyel. Zapot Pol ti ekri: “Annou pa pratik imoralite seksyel parey serten zot ti komet imoralite seksyel” e en kantite zot ti mor.​—1 Korentyen 10:8.

5, 6. Ki nou kapab aprann atraver sa ki ti arive lo Laplenn Moab?

⁵ Sa nouvo lemonn ki Bondye in promet i byen pros. Alor, dan en sans nou parey bann Izraelit ki ti o bor Later Promiz. (1 Korentyen 10:11) Dan sa lemonn ki nou pe viv ladan ozordi, keksoz in vin pli pir, dimoun i mazin zis sèks. Sa leta lespri i kapab fasilman afekte pep Zeova. Anfet, imoralite seksyel i labwet ki Dyab i servi ki mars pli byen.​—Nonm 25:6, 14; 2 Korentyen 2:11; Zid 4.

⁶ Demann ou lekor, ‘Eski mon ti a pli kontan satisfer mon dezir seksyel zis pour ganny en pti moman plezir oubyen eski mon ti a pli kontan viv ere  e pour touzour dan nouvo lemonn?’ Pa i vreman vo lapenn obei sa lord Zeova: “Sov lwen avek imoralite seksyel”?​—1 Korentyen 6:18.

7, 8. Kisisa imoralite seksyel? Akoz sa i en keksoz vreman serye?

⁷ En kantite dimoun ozordi i vreman visye e zot pa kasyet ni onte pour kas lalwa Bondye lo sèks. Dan Labib, imoralite seksyel pe refer avek sèks ant de dimoun ki pa’n marye dapre bann prensip Labib. Sa i enkli sèks ant de msye oubyen de madanm e sèks ant imen ek zannimo. Imoralite seksyel i kapab relasyon seksyel, sèks par labous, sèks par deryer e osi ler dimoun i zwe avek lorgann seksyel en lot dimoun.​—Vwar Lezot lenformasyon nimero 23.

⁸ Labib i montre klerman ki si en dimoun i kontinyen pratik imoralite seksyel, i pa pou kapab reste dan kongregasyon. (1 Korentyen 6:9; Revelasyon 22:15) Deplis, en dimoun ki pratik imoralite seksyel i napa respe pour son prop lekor e lezot i nepli annan konfyans dan li. Imoralite i toultan anmenn en kantite problenm. Souvan konsyans sa dimoun i fatig li. En madanm i kapab tonm ansent, dimoun i ganny problenm dan maryaz, i kapab malad oubyen menm mor. (Lir Galat 6:7, 8.) Si en dimoun ti reflesir lo bann konsekans imoralite seksyel, i tre probab ki zot pa ti pou kas lalwa Bondye lo sèks. Me souvandfwa, dimoun i zis mazin satisfer son prop dezir ler i fer sa premye pa pour komet imoralite seksyel. Sa premye pa i souvan pornografi.

9. Akoz pornografi i danzere?

⁹ Pornografi i ganny fer pour eksit dezir seksyel. Konmela, pornografi i partou kote, dan magazin, liv, lanmizik, progranm televizyon e lo Enternet. En kantite dimoun i krwar ki napa nanryen mal avek pornografi, me an realite i vreman danzere. I kapab fer en dimoun adikt avek sèks e devlop bann dezir degoutan. En fwa ki en dimoun in konmans get pornografi, i devlop labitid pour fer mastirbasyon. Pornografi i kree problenm dan maryaz e i menm kapab anmenn divors.​—Romen 1:24-27; Efezyen 4:19; vwar Lezot lenformasyon nimero 24.

10. Ki mannyer sa prensip dan Zak 1:14, 15 i kapab ed nou pour rezet imoralite seksyel?

¹⁰ I enportan pour nou konpran sa ki kapab fer nou tonm dan imoralite seksyel. Get sa lavertisman dan Zak 1:14, 15: “En dimoun i ganny teste ler i ganny atire e anbete par son prop dezir. Apre sa, ler sa dezir i vin pli for, i fer sa dimoun fer pese e ler i’n fini fer pese, sa i anmenn lanmor.” Alor, ler bann move panse i vin dan ou lespri, rezet zot deswit. Si san ekspekte ou vwar bann portre oubyen senn sèks, deswit vir ou figir! Tenny ou konpiter oubyen sanz progranm televizyon! Rezet bann move dezir deswit, si non, zot pou vin sitan for e i pou vreman difisil pour ou kontrol zot.​—Lir Matye 5:29, 30.

11. Ki mannyer Zeova i kapab ed nou ler nou mazin bann move keksoz?

¹¹ Zeova i konn nou pli byen ki nou konn nou  prop lekor. Alor i konnen ki kantite nou enparfe. Me i osi konnen ki nou kapab rezet sa bann move dezir. Zeova i dir nou: “Met amor zot bann move dezir ki annan pour fer avek imoralite seksyel, lenpirte, move dezir seksyel san kontrol, dezir pour fer sa ki mal ek vorasite, ki en form ladorasyon zidol.” (Kolosyen 3:5) Menm si i pa fasil, Zeova i annan pasyans avek nou e i pou ed nou. (Psonm 68:19) En zenn frer ti devlop labitid pour get pornografi e fer mastirbasyon. Son bann zanmi lekol ti dir ki sa ti en keksoz normal pour fer konman en adolesan. Sa frer ti dir: “Sa ti fatig mon konsyans e mon ti konmans viv en lavi imoral.” I ti realize ki i ti bezwen kontrol son bann dezir e avek led Zeova, i ti reisi aret sa move labitid. Si ou mazin bann keksoz imoral, demann Zeova pour donn ou sa lafors “ki  pli pwisan ki [ou] prop lafors” pour gard ou panse prop.​—2 Korentyen 4:7; 1 Korentyen 9:27.

12. Akoz nou bezwen ‘vey nou leker’?

¹² Salomon ti ekri: “Sirtou, vey ou leker, akoz i sours lavi.” (Proverb 4:23) Nou “leker” i reprezant sa ki nou ete anndan, sa dimoun ki Zeova i vwar. Sa ki nou gete i kapab afekte nou seryezman. Zob ki ti fidel ti dir: “Mon ti’n fer en promes avek mon lizye. Pour pa regard en zenn fiy avek dezir.” (Zob 31:1) Parey Zob, nou bezwen kontrol sa ki nou gete e mazinen. Nou osi imit legzanp en psalmis ki ti priye: “Anpes mon lizye kontinyen get sa ki napa valer.”​—Psonm 119:37, NWT.

13. Ki kalite zanmi Dina ti swazir?

¹³ Nou bann zanmi i kapab enfliyans nou en kantite, swa dan en bon oubyen move fason. Si ou swazir bann zanmi ki swiv standar Bondye, zot kapab ankouraz ou pour fer parey. (Proverb 13:20, NWT; lir 1 Korentyen 15:33.) Legzanp Dina, enn bann fiy Zakob i ed nou vwar akoz byen swazir nou zanmi i vreman enportan. I ti grandi dan en fanmir ki ti ador Zeova. Dina pa ti en dimoun imoral, me i ti vin zanmi pros avek bann fiy Kananeen ki pa ti ador Zeova. Bann Kananeen ti napa menm pwennvi lo sèks avek pep Bondye e zot ti renonmen konman bann dimoun imoral. (Levitik 18:6-25) Ler Dina ti avek son bann zanmi, i ti zwenn en zenn onm Kananeen ki ti apel Sekenm. Sekenm ti vwar ki Dina ti en zoli  fiy. Menm si Sekenm ti ganny konsidere konman en dimoun ki ti pli onorab dan son fanmir, i pa ti kontan Zeova.​—Zenez 34:18, 19, NWT.

14. Ki ti arive avek Dina?

¹⁴ Sekenm ti fer sa ki ti normal e akseptab dapre li. Vi ki i ti santi li atire par Dina, i ti “atrap li e dormi avek li.” (Lir Zenez 34:1-4.) Sa sityasyon ti kree en kantite lezot problenm grav ki ti fer Dina ek tou son fanmir soufer.​—Zenez 34:7, 25-31; Galat 6:7, 8.

15, 16. Ki mannyer nou kapab vin saz?

¹⁵ Nou pa bezwen fer menm fot ki Dina ti fer pour nou realize ki bann standar moral Zeova i pour nou prop dibyen. “Sa ki mars avek dimoun saz pou vin saz, me sa ki frekant en lenbesil pou mal pase.” (Proverb 13:20, NWT) Fer li ou lobzektif pour konpran tou sa ki byen e ou pou ganny eparnyen avek bann douler ek soufrans ki pa neseser.​—Proverb 2:6-9, NWT; Psonm 1:1-3.

¹⁶ Nou kapab vin saz par etidye Parol Bondye, priye avan nou fer okenn desizyon e swiv bann bon konsey ki sorti kot lesklav fidel e pridan. (Matye 24:45; Zak 1:5) Byensir, nou tou nou konnen ki nou enparfe e ki nou fasilman fer pese. (Zeremi 17:9, NWT) Me ki ou pou fer si en dimoun i konsey ou akoz ou dan en sityasyon danzere kot ou kapab komet imoralite? Eski ou pou ofanse oubyen avek limilite ou pou aksepte led?​—2 Lerwa 22:18, 19.

17. Donn en legzanp pour montre ki mannyer konsey nou bann frer ek ser i kapab ed nou.

¹⁷ Mazin sa sityasyon. Meton kot en ser i travay,  en msye i konmans donn li en latansyon spesyal e i envit li dinen. I pa pe servi Zeova, me i vreman zantiy e i en bon dimoun. En lot ser i vwar zot ansanm e i sey konsey li. Ki sa premye ser pou fer? Eski i pou defann son lekor oubyen eski i pou pran sa konsey aker? Petet sa ser i kontan Zeova e i anvi fer sa ki byen. Me si i al dinen avek sa msye, eski i pe vreman “sov lwen avek imoralite seksyel” oubyen eski i pe “fer konfyans dan son prop zizman”?​—Proverb 22:3; 28:26; Matye 6:13; 26:41.

18, 19. Eksplike ki mannyer Zozef ti sov lwen avek imoralite seksyel.

¹⁸ Konman en zenn onm, Zozef ti en lesklav Lezip. Zour apre zour, madanm son met ti demann li pour fer sèks avek li. Me Zozef ti konnen ki i ti pou  mal fer sa. I ti kontan Zeova e i ti anvi fer li plezir. Alor, sak fwa sa madanm ti esey sedwir Zozef, i ti refize. Vi ki i ti en lesklav, i pa ti kapab zis kit son met. En zour ler madanm son met ti esey fors li pour fer sèks avek li, “i ti tay deor.”​—Lir Zenez 39:7-12.

¹⁹ Sa sityasyon ti kapab vreman diferan si Zozef ti abitye mazin bann keksoz imoral oubyen si depi avan, i ti’n mazin li avek sa madanm. Me relasyon ki Zozef ti annan avek Zeova ti pli enportan pour li ki okenn lezot keksoz. I ti dir sa madanm: “Mon met . . . in konfye mwan tou eksepte ou, akoz ou son [madanm]. Ki mannyer . . . mon pou kapab fer en keksoz osi mal e komet en pese kont Bondye?”​—Zenez 39:8, 9.

20. Ki mannyer Zeova ti santi konsernan sa ki Zozef ti fer?

²⁰ Menm si Zozef ti lwen avek son fanmir ek lakour, i ti toultan fidel avek Bondye e Zeova ti beni li. (Zenez 41:39-49) Zeova ti vreman kontan akoz Zozef ti fidel. (Proverb 27:11) I kapab difisil pour reziste imoralite seksyel. Me mazin sa parol: “Ou ki kontan [Zeova]! Deteste lemal. I vey lo lavi bann ki obei li; i delivre zot dan lanmen bann malfeter.”​—Psonm 97:10.

21. Ki mannyer en frer ti imit legzanp Zozef?

²¹ Avek kouraz, tou le zour, pep Zeova i montre ki zot “ay sa ki mal” e ki zot “kontan sa ki byen.” (Amos 5:15) Nenport laz ki ou annan, ou kapab reste fidel avek Zeova. Lafwa en zenn frer ti ganny teste kot lekol. En fiy ti dir li ki i ti pou fer sèks avek li si i ti ed li avek son legzanmen matematik. Ki sa frer  ti fer? I ti fer parey Zozef. I dir: “Deswit mon ti refize. Par gard mon fidelite, mon’n osi gard mon dinyite ek respe pour mon lekor.” Menm si imoralite seksyel i kapab gou “pour zis en serten letan,” i souvan anmenn douler ek en kantite problenm. (Ebre 11:25) Ler nou obei Zeova, nou pou toultan santi nou ere.​—Proverb 10:22.

22, 23. Ki mannyer Zeova i kapab ed nou menm si nou fer en pese grav?

²² Satan pou esey servi imoralite seksyel pour fer nou tonm dan son latrap e i kapab difisil pour nou reste fidel. Nou tou nou kapab annan bann move panse detanzaot. (Romen 7:21-25) Zeova i konpran sa e i rapel “ki nou zis lapousyer.” (Psonm 103:14) Alor, ki pou arive si en Kretyen i komet imoralite seksyel? Eski i pou napa okenn lespwar? Non. Si en dimoun i vreman repantir, Zeova pou ed li. Bondye i “pare pour pardonnen.”​—Psonm 86:5; Zak 5:16; lir Proverb 28:13.

²³ Zeova i osi donn nou “bann zonm konman kado,” setadir bann ansyen ki vreman enterese avek nou. (Efezyen 4:8, 12; Zak 5:14, 15) I’n donn nou bann ansyen pour ed nou reganny en bon relasyon avek li.​—Proverb 15:32.

24, 25. Ki mannyer bon zizman i kapab ed nou rezet imoralite seksyel?

²⁴ Pour nou kapab fer bann bon desizyon, nou  bezwen konpran ki mannyer bann lalwa Zeova i benefisye nou. Nou pa anvi vin parey sa zenn onm ki Proverb 7:6-23 i koz lo la. I ti napa bon zizman, alor i ti tonm dan latrap imoralite seksyel. En dimoun ki annan bon zizman i pa zis entelizan me i osi esey konpran pwennvi Bondye e aplik li dan son lavi. “Sa enn ki’n ganny lasazes [oubyen bon zizman] i trouv boner. Sa enn ki annan disernman i viv ere.”​—Proverb 19:8.

²⁵ Eski ou vreman konvenki ki bann standar Bondye i bon? Eski ou vreman krwar ki si ou swiv sa bann standar ou pou pli ere? (Psonm 19:7-10; Izai 48:17, 18, NWT) Si ou ankor annan serten dout, mazin tou bann bon keksoz ki Zeova in fer pour ou. “Goute e gete konman [Zeova] i bon!” (Psonm 34:8) Ou pou vwar ki pli ou fer sa, pli ou pou kontan Zeova. Kontan sa ki i kontan e deteste sa ki i deteste. Ranpli ou lespri avek bann bon keksoz, “tou sa ki vre, tou sa ki serye, tou sa ki drwat, tou sa ki pir, tou sa ki ankouraz pour annan lanmour, tou sa ki onorab, tou sa ki byen.” (Filipyen 4:8, 9) Nou kapab vin parey Zozef ki ti ganny beni gras a lasazes Zeova.​—Izai 64:8.

26. Ki nou pou diskite dan lot sapit?

²⁶ Ki swa ou selibater oubyen ou’n marye, Zeova i anvi ou viv en lavi ki gou e ere. Dan sa de sapit ki swiv, nou pou trouv bann lenformasyon ki kapab ed nou reisi dan nou lavi maryaz.