KI OU pli kontan fer, travay oubyen zwe?— Napa nanryen mal avek zwe. Labib i dir ki bann landrwa piblik Zerizalenm ti ‘ranpli avek bann pti garson ek bann pti fiy pe zwe.’​—Zekarya 8:5.

Sa Gran Ansennyan ti kontan get bann zanfan pe zwe. Avan vin lo later, i ti dir: ‘Mon ti konman en travayer abil akote Bondye, . . . mon ti toultan rezwir devan li.’ Nou vwar la ki Zezi ti travay avek Zeova dan lesyel. I kontinyen par dir: ‘Bann keksoz ki mon ti vreman kontan i bann dimoun lo later.’ Parey nou’n vwar avan sa, sa Gran Ansennyan ti vreman enterese avek tou dimoun, menm bann zanfan.​—Proverb 8:30, 31.

 Ou krwar Zezi ti zwe ler i ti ptipti?— Petet wi. Me dan lesyel i ti en ‘travayer abil.’ Eski i ti travay osi lo later?— Dimoun ti apel Zezi “garson sa sarpantye.” Me i ti osi ganny apele “sarpantye.” Ki sa i montre?— Zozef ki ti pran swen avek Zezi konman son garson, ti’n bezwen montre li travay pour li vin en sarpantye li osi.​—Matye 13:55; Mark 6:3.

Ki kalite sarpantye Zezi ti ete?— Dan lesyel, Zezi ti en travayer abil. Savedir i ti fer byen son travay. Ou pa krwar i ti fer byen son louvraz sarpantye osi lo later?— Sa letan bann sarpantye ti bezwen travay dir. Premyerman, zot ti bezwen al koup en pye  dibwa, koup sa dibwa an morso, e anmenn dan lakour. Apre la, zot ti kapab travay avek sa dibwa pour fer latab, ban, ek lezot keksoz.

Ou krwar Zezi ti kontan fer sa travay?— Ou ti pou kontan si ou ti kapab fer bann bon sez ek latab ek lezot keksoz pour dimoun servi?— Labib i dir i bon pour en dimoun ‘trouv plezir dan son travay.’ Travay i donn nou en kalite plezir ki nou pa gannyen dan zwe.​—Eklezyast 3:22.

Travay i bon pour nou lespri ek nou lekor. Bokou manrmay i zis asize get televizyon, oubyen zwe bann zwe video. Sa i fer zot vin tro gro e zot napa lafors. Deplis, zot pa vreman zwaye e zot pa ni fer lezot dimoun zwaye. Ki nou bezwen fer pour nou zwaye?—

Dan Sapit 17, nou ti aprann ki pour nou zwaye nou bezwen donnen e fer keksoz pour ed lezot. (Akt 20:35) Labib i dir ki Zeova i en ‘Bondye ki zwaye.’ (1 Timote 1:11, NW) E parey nou vwar dan Proverb, Zezi ti “toultan rezwir devan li.” Akoz Zezi ti zwaye?— I ti donn en rezon akoz ler i ti dir: “Mon Papa i touzour pe travay, e mwan osi mon travay.”​—Zan 5:17.

Ler Zezi ti lo later, i pa ti fer sa louvraz sarpantye tou son lavi. Zeova ti donn li en travay spesyal pour fer lo later. Ou konnen kwa?— Zezi ti dir: “Mon bezwen anons Bonn Nouvel konsernan Rwayonm Bondye . . . parski se pour sa, ki Bondye in anvoy mwan.” (Lik 4:43) Parfwa ler Zezi ti pres avek bann dimoun, zot ti krwar li e zot ti al rakont lezot sa ki i ti’n dir. Sa madanm Samariten ki ou vwar la ti fer sa.​—Zan 4:7-15, 27-30.

Ki mannyer Zezi ti santi ler i ti fer sa travay? Ou krwar i ti  anvi fer li?— Zezi ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Pa ou kontan ler ou pe manz ou manze prefere?— Be Zezi ti santi koumsa ler i ti pe fer sa travay ki Bondye ti’n donn li.

Bondye in fer nou en fason ki ler nou aprann travay, nou zwaye. I dir ki en dimoun i devret “trouv plezir dan son travay dir.” Sa i en kado ki i’n donn nou. Alors si ou aprann travay depi ptipti, ou pou pli zwaye dan lavi.​—Eklezyast 5:19.

Sa pa vedir ki en pti manrmay i kapab fer travay en gran dimoun. Me nou tou nou kapab fer serten travay. Petet ou paran i al travay toulezour pour ganny larzan pour aste manze e en lakaz pour reste ladan. Parey ou konnen, i annan en kantite louvraz ki bezwen ganny fer dan en lakour pour kit li prop e annord.

Ki louvraz ou kapab fer ki pou benefisye lafanmiy antye?— Ou kapab ede prepar latab pour manze, lav bann zafer sal, vid bin, netway ou lasanm, e anmas ou bann zouzou. Petet ou pe deza fer sa bann keksoz e i benefisye lafanmiy antye.

Annou vwar ki mannyer ou fanmiy i benefisye. Ou bezwen anmas ou bann zouzou ler ou fini zwe. Akoz ou krwar i enportan fer sa?— I ede pour kit lakour annord, e i osi anpes bann aksidan. Si ou pa anmas ou bann zouzou, en zour ou manman i kapab vini, son lanmen plen avek konmisyon, e mont lo en zouzou. I kapab glise, tonbe, e ganny dimal. Petet i pou bezwen reste lopital osi. Pa gou sa, non?— Alors si ou met ou zouzou laba ler ou fini zwe, sa pou benefisye tou dimoun.

 Bann zanfan i annan lezot kalite travay pour fer. Par egzanp zot leson kot lekol. Kot lekol ou aprann lir. I annan zanfan ki kontan lir, me i annan ki vwar li difisil. Kantmenm i kapab difisil okonmansman, ou pou kontan ler ou’n konn lir. Ler ou konn lir, ou kapab aprann en kantite keksoz enteresan. Ou pou menm kapab lir liv Bondye, Labib, lo ou menm. Alors ou pou benefisye ler ou fer ou leson byen, pa i vre?—

I annan dimoun ki pa oule travay. Petet ou konn en dimoun ki koumsa. Me Bondye in fer nou pour travay. Alors nou bezwen aprann kontan travay. Ki kantite kontan son travay Zezi ti kontan son travay?— I ti konmsi i pe manz son manze prefere. E ki travay i ti pe koz lo la?— Sa travay pour koz avek lezot lo Zeova e ki mannyer zot kapab ganny lavi eternel.

La en konsey ki kapab ed nou kontan travay. Demann ou lekor, ‘Akoz sa travay i bezwen ganny fer?’ I pli fasil pour fer en keksoz ler ou konnen akoz i enportan pour fer li. Pa gete si sa travay i gro oubyen pti, fer li byen toultan. Si ou fer sa, ou pou pran plezir dan ou travay, zis parey sa Gran Ansennyan.