LEKEL pli bon serviter Bondye ki’n deza viv?— Wi, i Zezi Kri. Ou krwar nou kapab vin parey li?— Labib i dir i’n kit en legzanp pour nou swiv. E i envit nou pour vin son bann disip.

Ou konnen ki savedir vin en disip Zezi?— I vedir plizyer keksoz. Premyerman, nou bezwen aprann avek li. Me pa zis sa. Nou bezwen osi vreman krwar sa ki i dir. Si nou krwar, nou pou fer sa ki i dir nou.

Bokou dimoun i dir zot krwar dan Zezi. Eski ou krwar zot tou zot vreman son disip?— Laplipar zot non. Petet zot al legliz. Me bokou zot pa’n zanmen pran letan pour aprann sa ki Zezi ti ansennyen. Zis bann ki swiv legzanp Zezi ki vreman son disip.

Annou koz lo bann ki ti vin disip Zezi ler i ti lo later. Filip ti parmi bann premye disip Zezi. Filip ti al rod son zanmi Natanael (ki osi apel Bartelemi), ki ou vwar pe asize la anba en pye dibwa. Kan Natanael ti vin kot Zezi, Zezi ti dir: ‘La en vre Izraelit, en bon dimoun.’ Natanael ti sirprann e i ti demande: “Konman ou konn mwan?”

Zezi ti dir: “Avan menm ki Filip ti vin koz  avek ou mon ti war ou anba sa pye fig.” Natanael ti sirprann akoz Zezi ti konnen kote i ti ete. Alors i ti dir: “Oumenm Garson Bondye, oumenm lerwa pep Izrael.”​—Zan 1:49.

Ti annan lezot ki ti vin disip Zezi son zour avan Filip ek Natanael ti vin disip. Sa ti Andre ek son frer Pyer. Ti osi annan Zan e petet son frer osi, Zak. (Zan 1:35-51) Me plitar sa kat zonm ti repran zot travay lapes parey avan. Apre en zour kan Zezi ti pe marse obor Lanmer Galile, i ti vwar Pyer ek Andre pe pas lasenn dan delo. Zezi ti kriy zot e dir: “Swiv mwan.”

En pe pli lwen, Zezi ti vwar Zak ek Zan. Zot ti dan en bato  avek zot papa pe aranz en lasenn. Zezi ti dir zot swiv li zot osi. Ki ou ti pou’n fer si Zezi ti kriy ou? Eski ou ti pou’n al avek li deswit?— Sa bann zonm ti konnen ki Zezi ti ete. Zot ti konnen Bondye ki ti’n anvoy li. Alors deswit zot ti kit zot travay lapes e swiv Zezi.​—Matye 4:18-22.

Ler sa bann zonm ti vin disip Zezi, eski zot ti toultan fer sa ki byen apre?— Non. Petet ou rapel ler zot ti dispit antre zot lekel ki pli enportan. Me zot ti ekout Zezi e zot ti anvi sanz zot latitid. Si nou anvi sanze, nou osi nou kapab vin disip Zezi.

Zezi ti envit tou kalite dimoun pour vin son disip. En fwa, en sef byen ris ti vin kot Zezi e demann li ki i pou fer pour ganny lavi eternel. Sa sef ti dir ki i pe obeir komannman Bondye depi ptipti. Alor Zezi ti dir li: “Swiv mwan.” Ou konnen ki ti arive?—

Ler sa zonm ti aprann ki vin en disip Zezi i pli enportan ki vin ris, i pa ti kontan. I pa ti vin disip Zezi akoz i ti kontan son larzan plis ki Bondye.​—Lik 18:18-25.

Apre ki Zezi ti’n pres pour preski enn an edmi, i ti swazir 12 son bann disip pour vin zapot. Bann zapot i bann ki i ti anvoy zot fer en travay spesyal. Ou konn zot non?— Annou aprann zot non. Get la lo portre, e sey dir zot non. Apre sey rapel zot non san get lo portre.

Finalman, enn sa 12 zapot ti vin move. Sa ti Zida Iskaryot. Plitar en lot disip ti ganny swazir pour ranplas li. Ou konnen ki mannyer i ti apele?— Matyas. Plitar, Pol ek Barnabas  ti osi vin zapot, me zot zot pa ti form parti avek sa group 12.​—Akt 1:23-26; 14:14.

Parey nou ti aprann dan Sapit 1, Zezi ti enterese avek bann pti manrmay. Akoz sa?— Akoz i ti konnen zot ti kapab vin son disip zot osi. Souvan bann zanfan i kapab dir bann keksoz en fason ki menm bann gran dimoun i kapab ekoute e anvi aprann plis lo sa Gran Ansennyan.

Bokou madanm ti osi vin disip Zezi. Serten zot ti al avek li ler i ti al dan lezot lavil pour prese. Par egzanp, Mari Madlenn, Zann, ek  Sizann. Petet zot ti osi ede pour prepar son manze e lav son lenz.​—Lik 8:1-3.

Ou anvi vin en disip Zezi ou?— Pa bliye, pour vin en disip Zezi, nou pa zis dir nou enn son disip. Nou bezwen konport nou parey enn son disip partou kot nou ete, pa zis ler nou dan renyon. Ou kapab mazin ennde landrwa kot nou devret konport nou parey en disip Zezi?—

Wi, dan lakour. Me kot lekol osi. Ou ek mwan nou bezwen rapel ki pour vin en vre disip Zezi, nou bezwen konport nou parey Zezi tou lazournen, toulezour, nenport landrwa kot nou ete.