OU KONTAN ler en dimoun i rann ou en pti servis?— Lezot dimoun osi i kontan ler nou rann zot en pti servis. Nou tou nou kontan sa. Sa gran ansennyan ti konn sa, e i ti toultan fer keksoz pour dimoun. I ti dir: ‘Mon pa’n vin pour ganny servi, me pour servi.’—Matye 20:28.

Si nou anvi vin parey sa Gran Ansennyan, ki nou bezwen fer?— Nou bezwen servi lezot. Nou bezwen fer keksoz pour lezot. I vre napa bokou dimoun ki fer sa. Okontrer bokou dimoun i toultan anvi lezot servi zot. En letan, menm bann disip Zezi ti koumsa. Zot tou zot ti oule vin pli enportan.

En zour Zezi ti pe vwayaze avek son bann disip. Ler zot ti ariv dan lavil Kapernaoum, pros avek Lanmer Galile, zot ti antre dan en lakaz. La Zezi ti demann zot en kestyon: “Ki zot ti pe diskite dan semen?” Zot ti reste trankil akoz dan semen zot ti pe diskite lekel ki pli enportan parmi zot.​—Mark 9:33, 34.

Zezi ti konnen i pa byen pour okenn son bann disip krwar  i pli enportan ki lezot. Parey nou ti vwar dan premye sapit sa liv, i ti met en zanfan debout devan son bann disip e dir zot ki zot devret vin parey sa zanfan. Me zot pa ti ekoute. Alors zis avan son lanmor, Zezi ti ansenny zot en leson ki zot pa ti pou oubliye. Ki i ti fer?—

Ler zot ti pe manze ansanm, Zezi ti leve lo latab, pran en servyet e anmar otour son leren. Apre i ti pran en kivet e met delo ladan. Petet son bann disip ti pe sey mazinen ki i pe al fer. Zezi ti fer letour avek son kivet kot zot tou, bese, e lav zot lipye. Apre i ti eswiy zot lipye avek servyet. Zis mazin sa! Si ou ti la, ki mannyer ou ti pou santi?—

Son bann disip pa ti krwar i byen pour sa Gran Ansennyan servi zot dan sa fason. Zot ti’n tou kanmi kanmi. Pyer li pa ti oule Zezi fer sa pour li. Me Zezi ti dir i enportan pour li fer sa.

Konmela nou pa lav lipye kanmarad. Me kan Zezi ti lo later, zot ti abitye fer sa. Ou konnen akoz?— Akoz dan sa pei kot Zezi ek son bann disip ti reste, dimoun ti abitye met sandalet dan zot lipye. Aprezan dan semen ti annan en ta lapousyer e sa ti sali zot lipye. Alors kan en dimoun ti vin rann zot vizit, i ti byen pour lav son lipye.

Me sa zour ni en disip Zezi pa ti ofer pour lav lipye lezot. Alors Zezi ti fer li menm. Par fer sa, Zezi ti ansenny son bann disip en bon leson. Zot ti bezwen aprann sa leson. Sa i en leson ki nou osi ozordi nou bezwen aprann.

Ou konnen ki leson sa?— Apre ki Zezi ti repran son plas atab, i ti eksplike: “Eski zot in konpran ki savedir sa ki mon’n fek fer? Zot apel mwan Met ek Senyer, e zot annan rezon,  akoz sanmenm ki mon ete. Alor, si mwan zot Senyer e zot Met, mon’n lav zot lipye, zot osi, zot devre lav lipye kanmarad.”​—Zan 13:2-14.

Sa Gran Ansennyan ti pe montre ki i ti anvi son bann disip servi kanmarad. I pa ti anvi zot mazin zis zot menm. I pa ti anvi zot mazinen ki zot tro enportan, ki lezot i bezwen toultan servi zot. I ti anvi zot servi lezot avek tou zot leker.

Pa sa i en bon leson?— Eski ou ti a kontan vin parey sa Gran Ansennyan e servi lezot dimoun?— Nou tou nou kapab fer keksoz pour lezot. Sa pou fer zot kontan. Me pli enportan ankor, i pou fer Zezi ek son Papa kontan.

I pa difisil pour servi lezot dimoun. Si ou reflesir, ou pou vwar bokou keksoz ki ou kapab fer pour lezot. Reflesir: Eski i annan okenn keksoz ou ti kapab fer pour ed ou manman? Ou manman i fer bokou keksoz pour ou e pour larestan fanmiy. Ou kapab ed li?— Akoz ou pa demann li?

 Petet ou kapab met lasyet ek kwiyer lo latab avan manze. Oubyen ou kapab tir bann lasyet sal lo latab apre repa. Serten zanfan i ede par vid bin toulezour. Nenport keksoz ki ou kapab fer pour ede, i montre ki ou pe servi lezot parey Zezi ti fer.

Ou annan pti frer oubyen pti ser ki ou kapab rann en servis? Pa bliye Zezi ki ti en Gran Ansennyan ti menm servi son bann disip. Ou fer parey Zezi ler ou rann servis ou pti frer oubyen pti ser. Ki ou kapab fer pour zot?— Petet ou kapab ed zot aprann met zot zouzou dan son plas kan zot fini zwe. Oubyen petet ou kapab ed zot met zot lenz. Oubyen ou kapab ed zot aranz zot lili. Ou kapab mazin lezot fason ankor ki ou kapab ed zot?—  Zot pou pli kontan ou si ou fer sa bann keksoz pour zot, zis parey bann disip Zezi ti kontan li.

Kot lekol osi ou kapab rann servis lezot dimoun. Petet ou kapab rann en servis ou bann kanmarad laklas oubyen ou mis. Si liv i tonbe avek en dimoun, i byen pour ed li anmase. Ou kapab ofer pour efas tablo oubyen pour fer en lot keksoz pour ou mis. Menm tenir laport pour en dimoun pase i en bon fason pour rann en pti servis.

Petet parfwa pou annan dimoun ki pa pou dir nou mersi pour sa ki nou’n fer pour zot. Ou krwar sa i merit fer ou arete fer sa ki byen?— Non! Bokou dimoun pa ti remersye Zezi pour son bon travay. Me sa pa ti anpes li kontinyen fer sa ki byen.

Alors pa zanmen arete rann servis lezot dimoun. Annou toultan mazin sa Gran Ansennyan e sey swiv son legzanp.