KI MANNYER nou kapab fer Bondye kontan? Eski nou kapab donn li en keksoz?— Zeova i dir: “Tou zannimo sovaz dan lafore i pour mwan.” I osi dir: “Larzan i pour mwan, e lor i pour mwan.” (Psonm 24:1; 50:10; Agai 2:8) Selman i annan en keksoz ki nou kapab donn Bondye. Ou konnen kwa?—

Zeova i les nou swazir nou menm si nou pou servi li oubyen non. I pa fors nou pour fer sa ki li i oule nou fer. Annou vwar akoz Bondye i les nou swazir?

Ou konnen kisisa en robot? I en masin ki’n ganny fer pour fer nenport kwa ki sa dimoun ki’n fer li i anvi i fer. Alors sa robot pa kapab deside li menm ki i pou fer. Zeova ti’n kapab fer nou tou parey bann robot. I ti’n kapab fer nou pour ki nou fer zis sa ki i anvi nou fer. Me Bondye pa’n fer sa. Ou konnen akoz?— Get bann zouzou ki parey robot. Ou pez en bouton, zot fer sa ki zot in ganny progranmen pour fer. Ou’n deza vwar en zouzou koumsa?— Selman, apre  en serten letan, ou konmans fatige avek sa zouzou, non? Be Bondye pa oule nou obeir li akoz nou parey bann robot ki’n ganny progranmen pour servi li. I anvi nou servi li akoz nou kontan li e akoz nou anvi obeir li.

Ki mannyer ou krwar nou Papa dan lesyel i santi ler nou obeir li akoz nou anvi?— Be ki mannyer ou paran i santi ler ou fer sa ki byen e ler ou fer sa ki mal?— Labib i dir en bon garson i “fer [son] papa kontan,” me en garson ki fer bann keksoz bet i ‘fer sagren son manman.’ (Proverb 10:1) Ou’n remarke ki mannyer manmi ek dadi i kontan ler ou fer sa ki zot demann ou pour fer?— Be ki mannyer zot santi ler ou dezobei zot?—

Aprezan annou retourn lo nou Papa dan lesyel, Zeova. I dir nou ki mannyer nou kapab fer li kontan. Pran ou Labib e ouver li dan Proverb 27:11. La Bondye pe koz avek nou. I dir: “Vin saz, mon garson [oubyen mon fiy], e rezwir mon leker, pour ki mon a kapab reponn sa enn ki pe provok mwan.” Ou konnen ki savedir provok en dimoun?— En dimoun i provok ou ler i riy ou e dir ou pa kapab fer sa ki ou dir ou kapab fer. Be ki mannyer Satan i provok Zeova?— Annou vwar.

 Dan Sapit 8 nou ti vwar ki Satan i anvi vin pli enportan ki tou e i anvi tou dimoun obeir li. Satan i dir ki dimoun i ador Zeova zis akoz Zeova pou donn zot lavi eternel si zot ador li. Apre ki Satan ti fer Adan ek Ev dezobei Zeova, Satan ti atak Bondye. I ti dir Bondye: ‘Dimoun i servi ou zis pour ganny sa ki zot anvi avek ou. Zis donn mwan en sans, ou a vwar si mon pa fer tou dimoun vir kont ou.’

I vre ki sa parol pa dan Labib mo pour mo. Me ler nou lir lo Zob, i kler ki Satan ti dir en keksoz koumsa avek Bondye. Eski Zob ti pou reste fidel avek Zeova? Larepons sa kestyon ti tre enportan pour tou le de, Satan ek Zeova. Annou ouver nou Labib dan Zob sapit 1 ek 2 pour nou vwar ki ti arive.

Dan sapit 1, nou vwar ki Satan ti la dan lesyel ler bann lanz ti vin vwar Zeova. Alors Zeova ti demann  Satan: “Kote ou sorti?” Satan ti reponn ki i sorti gete ki pe pase lo later. Alors Zeova ti demann li: ‘Ou’n remark Zob? I servi mwan e pa fer nanryen mal?’—Zob 1:6-8.

Deswit Satan ti konmans rod leskiz. I ti dir: ‘Zob napa okenn problenm, sanmenm i ador ou. Aret protez li, aret beni li, ou a vwar si i pa ensilte ou dan ou figir.’ Zeova ti reponn: ‘Oke Satan, ou kapab fer sa ki ou anvi avek Zob, zis pa fer li okenn ditor.’​—Zob 1:9-12.

Ki Satan ti fer?— I ti fer bann voler vol bann bef ek bourik Zob e touy bann dimoun ki ti okip zot. Apre zekler ti touy son bann mouton ek zot berze. Plitar, dimoun ti vin vol son bann samo e touy bann ki ti okip zot osi. Finalman, Satan ti fer en gro tanpet divan detrir en lakaz kot sa dis zanfan Zob ti ete, e zot tou zot ti mor. Kantmenm tousala ti arive, Zob ti kontinyen servi Zeova.​—Zob 1:13-22.

Ler Zeova ti revwar Satan, i ti dir Satan ki Zob i ankor touzour fidel. Satan ti rod en lot leskiz e dir: ‘Si ou les mwan fer li malad, ou a vwar si i pa  ensilte ou dan ou figir.’ Alors Zeova ti les Satan fer Zob malad, me i ti anpes li touy Zob.

Satan ti fer Zob ganny en ta boubou partou lo son lekor. Sa bann boubou ti sitan pi ki personn pa ti oule vin obor Zob. Menm son madanm ti dir li: ‘Ensilte Bondye e mor!’ Bann swadizan zanmi Zob ti vin rann li vizit e zot ti pli dekouraz li ankor. Zot ti dir ki i’n bezwen fer en pese byen grav, sanmenm i pe ganny tou sa problenm. Me kantmenm Satan ti fer Zob ganny tou sa problenm e fer li soufer en kantite, Zob ti kontinyen servi Zeova fidelman.​—Zob 2:1-13; 7:5; 19:13-20.

Ki mannyer ou krwar Zeova ti santi ler i ti vwar Zob reste fidel?— I ti kontan akoz i ti kapab dir avek Satan: ‘Get Zob! I servi mwan akoz i anvi servi mwan.’ Be ou, eski ou parey Zob? Eski Zeova i kapab montre ledwa lo ou e dir menm keksoz?— I en gran loner pour nou montre ki Satan i mal, i pa kapab fer nou aret servi Zeova. Zezi osi ti vwar sa konman en gran loner.

Sa Gran Ansennyan pa ti zanmen les Satan fer li fer okenn keksoz mal. Zis mazinen ki mannyer son legzanp ti fer son Papa kontan! Zeova ti kapab montre ledwa lo Zezi e dir Satan: ‘Get mon Garson! I’n reste fidel avek mwan dan en fason parfe akoz i kontan mwan!’ Mazin osi sa lazwa ki Zezi ti santi ler i ti fer son Papa kontan. Sa lazwa ti osi ed Zezi aksepte pour mor lo en poto.​—Ebre 12:2.

Ou ti a kontan vin parey nou Gran Ansennyan e fer Zeova kontan?— Alors kontinyen aprann ki Zeova i oule ou fer, e fer li kontan par obeir li!