1-3. Lekel nou lennmi, e akoz i en soulazman pour konn sa ki Labib i dir lo li?

METON enn ou lennmi pe tay deryer ou pour fer ou malis. I pli for ki ou e i tay pli vit ki ou. Ou konnen i en kriminel akoz ou’n deza vwar li touy ou bann zanmi. Kantmenm ou sey tay pli vit ki ou kapab, ou santi li lanmenm deryer ou. Ou pa kapab fer nanryen. Me en sel kou, en dimoun i vini pour ed ou. I pli for ki ou lennmi e i asir ou i pou ed ou. Pa ou pou santi ou soulaze?

² Dan en sans, ou annan en lennmi ki pe vini deryer ou. I lennmi avek nou tou. Parey nou ti vwar dan sa sapit avan, Labib i apel lanmor nou lennmi. Napa personn ki kapab tay li oubyen reziste li. Preski nou tou nou’n vwar nou lennmi pran lavi en dimoun ki nou ti pros avek. Me Zeova li i bokou pli for ki nou lennmi, lanmor. Zis li ki kapab sov nou e defet nou lennmi. I’n deza montre i kapab fer sa. Deplis i’n promet ki i pou detrir nou lennmi, lanmor, enn fwa pour tou. Labib i dir: “Dernyen lennmi ki pou ganny detri, se lanmor.” (1 Korentyen 15:26) Pa sa i en bon nouvel!

 ³ Annou vwar en pe ki mannyer nou lennmi lanmor i afekte nou. Sa pou ed nou realiz en keksoz ki pou fer nou kontan. Ou konnen, Zeova in promet ki bann dimoun mor pou reviv ankor. (Izai 26:19) Zot pou reganny lavi. Savedir nou annan lespwar pour revwar zot ankor.

4. (a) Akoz fason ki Zezi ti reazir anver lanmor en dimoun pros i montre nou ki mannyer Zeova i santi li osi? (b) Avek ki Zezi ti vin bon zanmi?

⁴ Eski lanmor in deza pran en dimoun ki ou kontan? Sa douler, sagrinasyon, ek dezespwar i kapab paret tro for pour siporte. Se la ki nou bezwen rod rekonfor dan Parol Bondye. (2 Korentyen 1:3, 4) Labib i fer nou vwar ki mannyer Zeova ek Zezi i santi konsernan lanmor. Zezi ki parey son Papa, ti konn douler ki lanmor i anmennen. (Zan 14:9) Kan i ti Zerizalenm, Zezi ti abitye al rann vizit Lazar ek son de ser, Mari ek Mart, ki ti reste pros lanmenm dan lavil Betani. Zot ti vin bann zanmi pros. Labib i dir: “Zezi ti kontan Mart, son ser Mari, ek son frer Lazar.” (Zan 11:5) Me parey nou ti vwar dan sapit avan, Lazar ti mor.

5, 6. (a) Ki mannyer Zezi ti santi ler i ti parmi bann fanmiy ek zanmi Lazar ki ti pe plere? (b) Akoz fason ki Zezi ti santi i ankourazan pour nou?

⁵ Ki mannyer Zezi ti santi ler i ti aprann i’n perdi son zanmi? Labib i dir ki Zezi ti al kot bann fanmiy ek zanmi Lazar ti’n reini. Zot ti pe plere. Ler Zezi ti vwar zot, “son leker ti touse e i ti emosyonnen.” Apre, Labib i dir, “Zezi ti plere.” (Zan 11:33, 35) Me eski sa i vedir Zezi ti napa okenn lespwar? Non. Zezi li menm ti byen konnen ki en keksoz enkrwayab ti pe al arive. (Zan 11:3, 4) Kantmenm sa, i ti santi douler ek latristes ki lanmor i anmennen.

 ⁶ Dan en sans, fason ki Zezi ti santi i ankourazan pour nou. I montre nou ki Zezi ek son Papa i deteste lanmor. Me Zeova i kapab konbat e ganny laviktwar lo nou lennmi lanmor! Annou vwar ki Bondye ti fer Zezi fer.

7, 8. Akoz pour bann dimoun ki ti la prezan ti napa nanryen pour fer pour Lazar, me ki Zezi ti fer?

⁷ Lekor Lazar ti dan en kavern, e Zezi ti demann zot pour tir sa ros dan larantre sa kavern. Mart pa ti oule akoz i ti mazinen lekor Lazar in konmans pouri, vi ki ti fer kat zour depi i’n mor. (Zan 11:39) Pour bann dimoun ki ti la prezan, nanryen pa ti kapab ganny fer la.

⁸ Zot ti tir sa ros, e Zezi ti kriye: “Lazar, sorti!” Ki ti arive? “Sa zonm mor ti sorti.” (Zan 11:43, 44) Mazin lazwa sa bann dimoun ki ti la! Zot ti kapab son fanmiy, son zanmi, ouswa son vwazen, e zot tou zot ti konnen ki Lazar ti’n mor. Pourtan sanmenm sa Lazar ki zot ti konnen, ti pe debout la devan zot. Ti difisil pour krwar me ti vre. Telman zot ti kontan, zot ti san dout antour Lazar e may li. Pa sa i en laviktwar lo lanmor!

9, 10. (a) Ki mannyer Zezi ti montre kote son pouvwar pour resisit Lazar ti sorti? (b) Ki byenfe nou gannyen ler nou lir lo bann rezireksyon ki’n ganny raporte dan Labib?

⁹ Zezi pa ti fer konmsi i’n fer sa mirak par son prop pouvwar. Ler i ti pe priye zis avan kriy Lazar, i ti fer kler ki Zeova ki pou donn li pouvwar pour fer sa rezireksyon. (Zan 11:41, 42) Lazar pa ti sel dimoun ki ti ganny resisite par pouvwar Zeova. Rezireksyon Lazar i zis enn parmi nef rezireksyon ki’n ganny raporte dan Parol Bondye. * I en plezir pour lir e etidye sa bann resi dan  Labib. Lefe ki zenn konman vye, zonm konman fanm, e Izraelit ensi ki lezot nasyon ti ganny resisite, sa i montre ki Bondye pa fer lapliferans. Deplis, Labib i dekrir lazwa sa bann dimoun! Par egzanp, kan Zezi ti resisit en pti fiy, son paran ti “dan en gran letonnman.” (Mark 5:42) Zot ti annan tou rezon pour kontan. Sa ti en keksoz ki zot pa ti pou zanmen bliye.

¹⁰ Byensir, sa bann dimoun ki Zezi ti resisite ti mor ankor plitar. Eski sa i vedir ti napa en sans pour resisit zot? Non. Sa bann rezireksyon ki’n ganny raporte dan Labib i siport sa ki Labib i dir lo lanmor e i donn nou en lespwar.

11. Ki mannyer leksperyans Lazar i siport sa ki Eklezyast 9:5 i dir?

¹¹ Labib i dir bann mor “pa konn nanryen ditou.” Zot nepli vivan e zot pa egziste okenn par. Leksperyans Lazar i konfirm sa. Ler Lazar ti reganny lavi, eski i ti rakont bann dimoun ki mannyer dan lesyel i gou? Eski i ti fer zot per avek en bann zistwar efreyan lo lanfer? Non, Labib pa dir sa. Pandan sa kat zour ki Lazar ti’n mor, i pa ti “konn nanryen ditou.” (Eklezyast 9:5) I ti parey en dimoun ki pe dormi.—Zan 11:11.

12. Akoz nou asire ki Lazar ti vreman resisite?

¹² Leksperyans Lazar i osi montre nou ki rezireksyon pa zis en zistwar, me i en realite. Zezi ti lev Lazar lanmenm devan en lafoul dimoun. Menm bann sef pret ki ti ay Zezi pa ti oze dir sa pa ti arive. Okontrer, zot ti dir: “Ki fodre nou fer? Get sa kantite mirak ki sa zonm [Zezi] pe fer.” (Zan 11:47) Bokou dimoun ti al vwar sa zonm ki zot ti’n tande in resisite. Sa ti fer bokou plis dimoun met lafwa dan Zezi. Pour zot, Lazar ti en laprev vivan ki Zezi  ti’n ganny anvoye par Bondye. Sa laprev ti telman konvenkan ki serten sef pret Zwif ti fer plan pour touy tou le de, Zezi ek Lazar.—Zan 11:53; 12:9-11.

13. Ki sa ki fer nou krwar Zeova i vreman kapab resisit bann mor?

¹³ Eski i bet pour nou krwar dan rezireksyon? Non, parski Zezi ti dir ki en zour “tou bann mor ki dan tonbo” pou resisite. (Zan 5:28) Zeova in kree tou sa ki vivan. Eski i difisil pour krwar ki i kapab re-kree zot? I vre ki bokou pou depan lo sa ki i kapab mazinen. Eski i kapab mazin nou bann defen? Be get tou sa kantite zetwal ki ranpli liniver. Zeova i nonm zot tou par zot non! (Izai 40:26) Alors i kapab mazin tou pti detay lo nou bann defen, e i kapab redonn zot lavi.

14, 15. Dapre sa ki Zob ti dir, eski Zeova i vreman anvi resisit bann mor?

¹⁴ Me eski Zeova li menm i anvi resisit bann mor? Labib i dir i vreman anvi fer sa. Zob ki ti en zonm fidel ti demande: “Si en zonm kosto i mor, eski i kapab viv ankor?” Zob ti pe mazin sa moman ki i bezwen espere dan lanmor ziska Bondye i mazin li. I ti dir avek Zeova: “Ou pou apel mwan, e mon pou reponn ou. Ou pou anvi vwar travay ou lanmen.”—Zob 14:13-15.

¹⁵ Zis mazinen! Zeova i vreman anvi redonn lavi bann ki’n mor. Pa i rekonfortan pour konnen Zeova i santi koumsa? Me konsernan sa rezireksyon ki pou arive dan lavenir, lekel ki pou resisite? Kote zot pou resisite?

16. Kote bann mor pou resisite e viv?

¹⁶ Bann rezireksyon ki’n ganny raporte dan Labib i dir nou bokou lo sa rezireksyon ki pe vini alavenir. Bann dimoun ki ti reganny lavi isi lo later ti retrouv  zot ankor parmi zot bann fanmiy ek zanmi pros. Sa rezireksyon alavenir pou parey. Zis ki li, i pou annan plis lavantaz. Parey nou’n vwar dan Sapit 3, plan Bondye i ki later antye i vin en paradi. Alors bann mor pa pou resisite pour viv dan en lemonn ranpli avek lager, krim, ek maladi. Plito, zot pou annan posibilite pour viv pour touzour isi lo later, kot pou annan lape e gou pour viv.

17. Ki kantite dimoun pou resisite?

¹⁷ Lekel ki pou resisite? Zezi ti dir “tou bann mor ki dan tonbo pou tann son lavwa [lavwa Zezi], e zot pou sorti.” (Zan 5:28, 29; nou ki’n met an italik.) Revelasyon 20:13 osi i dir: “Lanmor ek lemonn lanmor ti rann son bann mor.” “Lemonn lanmor” oubyen “Lades” i en landrwa senbolik kot bann mor i ete. (Vwar “Kisisa Seol ek Lades?” anba Lezot lenformasyon.) Savedir pou nepli annan dimoun mor. Tou sa bilyon dimoun mor pou reganny lavi. Zapot Pol ti ekrir: “Tou dimoun bon konman move, pour resisite.” (Akt 24:15) Ki sa i vedir?

18. Lekel sa bann “bon” dimoun ki pou resisite? Ki lefe sa lespwar pour resisite i annan lo ou personnelman?

¹⁸ Bann “bon” dimoun i enkli bann avan lepok Zezi ki Labib i koz lo zot. Petet ou pe mazin Noe, Abraam, Sara, Moiz, Rit, Ester, ek plizyer lezot ankor. Sapit 11 dan liv Ebre i koz lo serten sa bann zonm ek fanm ki ti annan en lafwa for dan Bondye. Me bann “bon” dimoun i osi enkli bann serviter Zeova ki’n mor dan nou letan. Granmersi nou annan sa lespwar pour resisite en zour, ki fer nou pa per lanmor.—Ebre 2:15.

19. Lekel sa bann “move” dimoun, e ki loportinite Zeova i donn zot akoz son labonte?

¹⁹ Me ki pou arive avek tou sa dimoun ki pa’n zanmen servi oubyen obeir Bondye akoz zot pa ti konn li? Zot parmi sa bann bilyon “move” dimoun ki pa pou  ganny oubliye. Zot osi zot pou ganny resisite e zot pou aprann konn sa vre Bondye e servi li. Bann mor pou resisite dan en lespas letan ki dir pour mil an. Zot pou ganny loportinite pour servi Zeova ansanm avek bann dimoun fidel lo later. Sa pou en letan inoubliyab. Labib i apel sa letan Zour Zizman. *

20. Kwa sa Zeenn, e lekel ki al dan Zeenn?

²⁰ Eski sa i vedir tou dimoun ki’n deza viv pou resisite? Non. Labib i dir serten bann mor i dan “Zeenn,” ki’n ganny tradwir “lanfer” dan Nouvo Testaman. (Lik 12:5) Oparavan Zeenn ti non en landrwa kot bann dimoun ti zet salte dan ansyen Zerizalenm. Bann lekor mor ki dapre bann Zwif pa ti merit en lanterman e en rezireksyon ti ganny brile ansanm avek salte laba. Alors Zeenn i en senbol apropriye pour reprezant destriksyon konplet. Menm si Zezi in ganny sa rol pour ziz bann vivan ek bann mor, desizyon final i dan lanmen Zeova. (Akt 10:42) I pa pou zanmen resisit bann dimoun mesan ki pa pare pour sanze.

21, 22. (a) Ki sa lot rezireksyon Labib i koz lo la? (b) Lekel premye dimoun pour resisit konman en lespri?

²¹ Labib i osi koz lo en lot rezireksyon. Sa i en rezireksyon pour al viv dan lesyel konman en lespri. I annan zis enn sa kalite rezireksyon ki’n ganny raporte dan Labib. Sa i rezireksyon Zezi Kri.

²² Apre ki Zezi ti’n mor konman en imen, Zeova pa ti les Son garson fidel reste koumsa menm. (Psonm 16:10; Akt 13:34, 35) I ti resisit Zezi, me pa konman en imen. Zapot Pyer ti eksplike ki “zot ti touy son lekor  fizik [lekor Zezi], me i ti revin vivan [konman] Lespri.” (1 Pyer 3:18) Sa ti en mirak vreman remarkab. Zezi ti revin vivan ankor konman en lespri pwisan! (1 Korentyen 15:3-6) I ti premye dimoun pour ganny sa kalite rezireksyon manifik. (Zan 3:13) Me ti pou annan ankor lezot.

23, 24. Lekel ki form parti “pti troupo” Zezi, e konbyen zot i annan?

²³ Zezi ti konnen ki byento i pou retourn dan lesyel. I ti dir son bann disip fidel ki i pe al “prepar en plas” pour zot laba. (Zan 14:2) Zezi ti apel bann ki pe al dan lesyel son “pti troupo.” (Lik 12:32) Savedir zot en pti group. Ki kantite zot i annan? Dapre Revelasyon 14:1, zapot Zan i dir: “Apre mon ti gete, e mon ti war Lanyo [Zezi Kri] pe debout lo montanny Siyon e avek li 144,000 dimoun, ki ti port son non ek non son Papa ekri lo zot fron.”

²⁴ Sa 144,000 Kretyen, ki enkli bann zapot fidel Zezi, i ganny resisite pour al viv dan lesyel. Kan ki zot resisite? Zapot Pol ti ekrir ki sa pou ariv dan prezans Kris. (1 Korentyen 15:23) Dan Sapit 9, ou pou aprann ki nou deza pe viv dan sa letan. Alors larestan sa 144,000 ki ankor lo later, i resisit deswit apre zot lanmor pour al dan lesyel. (1 Korentyen 15:51-55) Me laplipar dimoun pou resisite plitar dan paradi isi lo later.

25. Ki nou pou diskite dan lot sapit?

²⁵ Wi, Zeova pou vreman defet nou lennmi lanmor, e zanmen nou pou vwar li ankor! (Izai 25:8) Me petet ou kapab demande, ‘Ki sa bann dimoun ki pou al viv dan lesyel pou fer laba?’ Zot pou form parti en Rwayonm, andotmo en gouvernman dan lesyel. Nou pou aprann plis lo sa gouvernman dan lot sapit.