ESKI ou konnen ki sa batiman ki la? I en latant spesyal pour ador Zeova. I osi apel tabernak. Bann dimoun ti konstri li enn an apre ki zot ti’n kit Lezip. Eski ou konnen lekel ki ti deside pour konstri li?

Se Zeova ki ti deside pour fer konstri sa latant. Pandan ki Moiz ti lo montanny Sinai, Zeova ti dir li konman pour konstri sa latant. Zeova ti demann li pour fer li dan en fason ki fasil pour demonte. Dan sa fason, zot ti pou kapab anmenn son bann bout dan en lot landrwa, e dan sa landrwa zot ti pou kapab re-azout bann bout ansanm. Alor kan bann Izraelit ti sorti dan en landrwa pour al dan en lot landrwa dan dezer, zot ti anmenn sa latant avek zot.

Si ou get dan sa pti lasanm lo bout latant, ou kapab vwar en bwat, oubyen en kof. Sa i apel lars lalyans. Lo son de bout i annan en lanz oubyen seriben ki’n ganny fer avek lor. Bondye ti’n ekrir ankor sa Dis Komannman lo de ros plat, akoz Moiz ti’n kas sa de premye. E sa de ros ti ganny garde dan lars lalyans. Osi, en potao ki annan lamann ladan ti ganny garde dan lars lalyans. Eski ou mazinen kisisa lamann?

Frer Moiz, Aaron ti sa enn ki Zeova ti’n swazir pour vin gran pret. I ti gid bann pep pour ador Zeova. E son bann garson osi ti pret.

Aprezan get sa pli gran lasanm dan latant. I de fwa pli gran ki sa pti lasanm. Eski ou vwar sa bwat, oubyen sa pti kof, ki lafimen pe sorti avek li? Sa i lotel kot bann pret i bril en kalite lapoud ki apel lansan. I annan en sandelye ki annan set lalanp. E trwazyenm keksoz dan sa lasanm i en latab. Lo sa latab i annan 12 dipen.

Dan lakour toultour sa tabernak i annan en gro resipyan, oubyen basen, ki ranpli avek delo. Bann pret i servi sa delo pour lav zot avek. I annan osi en gran lotel. La bann zannimo i ganny brile konman en lofrann pour Zeova. Latant i zis dan milye kan, e bann Izraelit i viv dan zot latant toultour.