OU KONNEN lekel sa zonm ki’n tonm ater e ki’n met son lanmen devan son lizye. Se Sol, ki ti vey lenz sa bann zonm ki ti saboul Etyenn avek ros. Get sa lalimyer ki pe klere! Ki pe arive?

Apre ki Etyenn ti’n mor, Sol ti konmans persekit bann disip Zezi. I ti antre dan bann lakaz enn apre lot e trenn sa bann dimoun e zet zot dan prizon. En kantite disip ti al dan lezot lavil e konmans koz lo sa “bonn nouvel.” Me Sol ti al dan lezot lavil pour rod bann disip Zezi. Aprezan i ti pe al Damas. Me pandan ki i ti pe ale, en keksoz merveye ti arive.

Toudenkou, en lalimyer sorti dan lesyel ti kler Sol. I ti tonm ater, parey nou vwar la. Apre en lavwa ti dir: ‘Sol, Sol! Akoz ou pe persekit mwan?’ Sa bann zonm ki ti avek Sol ti vwar sa lalimyer e antann sa lavwa, me zot pa ti konpran ki i ti pe dir.

‘Lekel ou, Senyer?’ Sol ti demande.

‘Mwan Zezi ki ou pe persekite,’ sa lavwa ti dir. Zezi ti dir sa akoz kan Sol ti pe persekit son bann disip, Zezi ti santi konmsi Sol ti pe persekit li.

Sol ti demande: ‘Ki mon devret fer, Senyer?’

‘Leve e al Damas,’ Zezi ti dir. ‘Laba ou pou ganny dir ki ou devret fer.’ Kan Sol ti leve e ouver son lizye, i pa ti kapab vwar nanryen. I pa ti vwar kler! Alor sa bann zonm ki ti avek li ti atrap son lanmen e anmenn li Damas.

Aprezan, Zezi ti koz avek enn son disip an Damas. I ti dir li: ‘Leve Ananyas. Al dan sa semen ki apel Drwat. Demande pour vwar en zonm ki apel Sol dan lakaz Zida. Mon’n swazir li pour vin enn mon serviter spesyal.’

Ananyas ti obeir. Kan i ti trouv Sol, i ti met son lanmen lo li e i ti dir: ‘Senyer in anvoy mwan kot ou pour ki ou revwar kler e ki ou ranpli avek lespri sen.’ Toudswit en keksoz ki ti resanble bann lekay ti sorti dan lizye Sol, e i ti kapab revwar kler ankor.

Avek tou son lafors Sol ti konmans koz lo sa “bonn nouvel” avek bann dimoun dan plizyer pei. I ti konmans ganny apele zapot Pol. Nou pou aprann en kantite lo li plitar. Me pour konmanse, annou vwar kote ki Bondye ti anvoy Pyer.