SA I en liv ki kontyen bann vre zistwar ki’n ganny retire dan sa pli bon liv dan lemonn, Labib. Sa bann zistwar i rakont bann levennman ki’n arive dan lemonn depi kreasyon ziska nou letan. I osi koz lo bann keksoz ki Bondye in promet pour fer dan lavenir.

Ou pou kapab aprann en bon pe keksoz ki annan dan Labib. I koz lo bann personnaz Biblik e lo bann keksoz ki zot ti fer. Ou pou dekouver sa lespwar manifik ki Bondye in ofer imen: sa lespwar pour viv pour touzour dan paradi lo later.

I annan 116 zistwar dan sa liv. Zot in ganny groupe dan 8 parti. Okonmansman sak parti i annan en rezimen an bref lo bann keksoz ki ou pou kapab lir dan sa parti. Sa bann zistwar in ganny met dan lord ki bann levennman ti arive dan listwar. Sa pou ed ou pour aprann kan, an relasyon avek lezot levennman ki bann keksoz ti arive dan listwar.

I’n ganny ekrir dan en langaz senp. Donk, menm si ou en zanfan i pou fasil pour ou lir sa liv lo ou menm. Konman en paran, ou pou dekouver ki ou bann pli pti zanfan pou kontan antann sa bann zistwar souvan. Ou pou osi dekouver ki serten pwen pou enteres bann adilt osi byen ki bann zenn.

Bann pasaz Labib in ganny mete alafen sak zistwar. Zot ganny ankouraze pour lir sa bann porsyon Labib lo ki sa bann zistwar i baze.