Pour ou ki kontan Zeova:

Zezi ti dir: “Zot a konn laverite e laverite i ava fer zot lib.” (Zan 8:32) Pa sa parol i vreman ankourazan! Wi, i posib pour konn laverite menm pandan sa bann “dernyen zour” ki vreman difisil e plen avek mansonz. (2 Timote 3:1) Eski ou rapel sa premye fwa ki ou ti rekonnet laverite ki ganny eksplike dan Parol Bondye? Pa sa ti en leksperyans eksitan!

Parkont, menm si i enportan pour konn laverite setadir sa konnesans egzakt e pour partaz sa konnesans avek lezot regilyerman, nou osi bezwen viv nou lavi an armoni avek laverite. Pour fer sa, nou bezwen reste dan lanmour Bondye. Ki sa i enplike? Parol ki Zezi ti dir sa zour swar avan son lanmor i reponn sa kestyon. I ti dir son bann zapot fidel: “Si zot obei mon bann komannman, zot pou reste dan mon lanmour, parey mwan, mon’n obei komannman mon Papa e mon reste dan son lanmour.”​—Zan 15:10.

Remarke ki Zezi ti reste dan lanmour Bondye par obeir komannman son Papa. Ozordi sa i aplik pour nou osi. Pour reste dan lanmour Bondye, nou bezwen viv an armoni avek laverite dan nou lavi tou le zour. Sa menm zour swar Zezi ti dir: “Aprezan ki zot konn sa, zot ere si zot met li an pratik.”​—Zan 13:17.

Nou senserman swete ki sa liv pou ed ou kontinyen viv annakor avek laverite e an retour reste dan “lanmour Bondye, an atandan . . . lavi eternel.”​—Zid 21.