Kan en madanm Kretyen i devret kouver son latet an rapor avek son ladorasyon e akoz? Annou egzamin sa ki zapot Pol ti ganny enspire pour ekrir lo sa size. I donn nou sa gidans ki nou bezwen pour nou kapab fer bann bon desizyon ki onor Bondye. (1 Korentyen 11:3-16) Pol i revel trwa fakter pour reflesir lo la: (1) bann aktivite kot en madanm i merit kouver son latet, (2) sirkonstans kot i merit kouver son latet e (3) rezon pour li kouver son latet.

Aktivite. Pol i mansyonn de aktivite: lapriyer ek profetize. (Verse 4, 5) Byensir lapriyer i en akt ladorasyon kot ou koz avek Zeova. Pour en Kretyen denozour, profetize i enplik nenport form kot i pe ansenny bann keksoz baze lo Labib. Eski Pol pe sizere ki en madanm i devret kouver son latet sak fwa ki i priye oubyen ansenny laverite dan Labib? Non. Sirkonstans en madanm ler i pe priye oubyen ansennyen i permet li pour swa kouver son latet oubyen pour pa kouver.

Sirkonstans. Parol zapot Pol i sizer de sirkonstans oubyen landrwa. Sa i dan lafanmir ek kongregasyon. I dir: “En mari i sef son madanm. . . . Si en madanm i pa kouver son latet,  ler i pe priye, ou ler i pe profetize i dezonnor son sef.” (Verse 3, 5) Dan laranzman lafanmir, Zeova in apwent en msye konman sef son madanm. En madanm i devret rekonnet lotorite son msye, si non i pou dezonnor son msye si i pran responsabilite ki Zeova in donn son msye. Par egzanp, si i ti pou bezwen kondwir en letid Labib dan prezans son msye, i ti pou bezwen kouver son latet pour montre ki i rekonnet lotorite son msye. Ki swa son msye i batize oubyen non i ti pou bezwen kouver son latet vi ki son msye i sef lafanmir. a Si i ti pou fer lapriyer oubyen ansennyen dan prezans son garson ki’n batize me ki anba laz, i ti pou osi bezwen kouver son latet, me pa akoz i sef lafanmir, me plito akoz sa lotorite ki tou bann frer batize dan kongregasyon Kretyen i gannyen.

Zapot Pol i mansyonn sitiasyon kongregasyon par dir: “Si i annan dimoun ki oule diskite [“an faver en lot koutim,” NW], nou napa sa labitid, ni [“kongregasyon,” NW] Bondye.” (Verse 16) Se bann frer batize ki annan lotorite dan kongregasyon Kretyen. (1 Timote 2:11-14; Ebre 13:17) Zis bann frer ki ganny apwente konman bann ansyen ek asistan ministeryel ki Bondye in donn sa responsabilite pour pran swen avek son troupo. (Akt 20:28) Me parfwa, sirkonstans i kapab permet en madanm Kretyen pour fer en travay ki normalman ganny fer par en frer kalifye. Par egzanp, en ser i kapab kondwir renyon predikasyon si napa en frer kalifye. Oubyen i kapab kondwir en letid Labib dan prezans en frer batize. Me vi ki bann tel aktivite i an realite form par travay kongregasyon Kretyen, sa ser pou bezwen kouver son latet pour rekonnet ki i pe fer en travay ki normalman en frer i fer.

De lot kote, i annan bokou laspe nou ladorasyon kot en ser pa bezwen kouver son latet. Par egzanp, i pa bezwen kouver son latet ler i pe fer komanter pandan  renyon, pres portanport avek son msye oubyen en lot frer, oubyen ler i pe fer letid oubyen lapriyer avek son zanfan ki pa ankor batize. I vre i annan lezot kestyon ki kapab ganny souleve, me si en ser pa asire konsernan en keksoz lo sa size i kapab fer plis resers. b Si i pa asire menm e son konsyans i pous li pour kouver son latet, i pa mal si i fer li, parey sa portre i montre.

Rezon. Nou trouv de rezon dan verse 10 akoz en madanm Kretyen ti pou anvi kouver son latet: “Bann madanm i devre kouver zot latet [oubyen met “sa siny soumisyon lo zot latet,” NW] se akoz bann lanz.” Premyerman, remark sa lekspresyon “sa siny soumisyon.” Kan en madanm i kouver son latet, sa i en fason pour li montre ki i rekonnet lotorite ki Zeova in donn bann frer batize dan kongregasyon. Alors dan sa ka i montre son lanmour ek fidelite anver Zeova Bondye. En dezyenm rezon i ganny trouve dan sa parol “akoz bann lanz.” Ki mannyer ler en madanm i kouver son latet, sa i annan en lefe lo bann kreatir spirityel?

I enteres bann lanz ler zot vwar ki lorganizasyon Zeova dan lesyel ek lo later i rekonnet son lotorite. Zot osi benefisye atraver legzanp bann imen enparfe dan sa domenn. Apre tou, zot osi bezwen soumet avek laranzman Zeova e sa i en tes ki en bon pti pe lanz ti fel dan lepase. (Zid 6) Par egzanp, bann lanz i kapab obzerv serten ka kot en ser i pli eksperyanse, annan plis konnesans e pli entelizan ki en frer batize dan kongregasyon; me kantmenm sa i volonterman soumet avek son lotorite. Dan serten sitiasyon sa ser i kapab en Kretyen  swazir ki pli tar pou vin en zeritye ansanm avek Kris. Sa ser pou menm servi dan en pozisyon pli o ki sa enn ki bann lanz i annan e i pou dirize ansanm avek Kris dan lesyel. Pa sa i en zoli legzanp pour bann lanz obzerve la konmela! Vreman i en gran privilez pour tou bann ser demontre lobeisans avek limilite par zot fidelite ek soumisyon devan plizyer milyon lanz fidel.