1, 2. (a) Parfwa ki nou kapab demann nou lekor ler nou vwar bann nouvo koup marye e akoz? (b) Ki kestyon nou pou egzaminen dan sa sapit?

 ESKI ou kontan al maryaz? En kantite dimoun i kontan akoz sa i en lokazyon ki kapab vreman gou. Sa zour sa koup in met zot pli zoli resanz. E pa zis sa, zot dan en gran lazwa! Sa zour zot vreman ere e i paret ki zot lavenir i ranpli avek lespwar.

² Me kantmenm sa, nou bezwen aksepte ki ozordi dan plizyer laspe dimoun i dan konfizyon konsernan maryaz. Menm si nou swet boner pour sa nouvo koup marye, parfwa nou kapab demande: ‘Eski zot pou ere? Eski zot pou nobou tenir?’ Larepons pour sa de kestyon pou tou depan lo si sa msye ek madanm i annan konfyans dan bann konsey ki Bondye i donnen lo maryaz e si zot aplik sa bann konsey. (Proverb 3:5, 6) Zot bezwen fer sa si zot anvi reste dan lanmour Bondye. Aprezan annou egzamin larepons ki Labib i donnen pour sa kat kestyon swivan: Akoz en dimoun i kapab deside pour marye? Si ou deside pour marye, lekel ki ou devret swazir konman ou konzwen? Ki mannyer ou kapab prepar ou lekor pour maryaz? E finalman, kwa ki pou ed en koup pour reste ere dan zot lavi maryaz?

3. Akoz i pa pou byen pour en dimoun marye pour bann rezon ki pa valab?

³ Serten i krwar ki fodre absoliman en dimoun i marye  pour li zwaye, ki si ou napa en konzwen ou pa pou kapab trouv satisfaksyon ek boner dan lavi. Sa i pa vre! Konman en selibater, Zezi ti dir ki en lavi selibater i en kado e i ti ankouraz sa bann ki nobou pour reste selibater. (Matye 19:11, 12) Zapot Pol osi ti koz lo lavantaz ki i annan pour reste selibater. (1 Korentyen 7:32-38) Me parkont, Zezi oubyen zapot Pol pa ti fer sorti en lareg ki dir en dimoun i bezwen reste selibater, anfet sa konsep “ki fodre pa marye” i ganny vwar konman “bann lansennyman demon.” (1 Timote 4:1-3) Toudmenm, sa bann ki deside pour reste selibater, ki anvi servi Bondye san okenn distraksyon, i annan en kantite byenfe ki zot kapab gannyen. Alors, i pa byen pour en dimoun marye pour bann rezon ki pa valab, parey akoz lezot pe met presyon lo li pour marye.

4. Ki kalite fondasyon en bon maryaz i etablir pour pran swen avek zanfan?

⁴ Me de lot kote, eski i annan rezon valab ki en dimoun i kapab deside pour marye? Wi. Maryaz osi i en kado sorti kot nou Bondye lanmour. (Zenez 2:18) Alors, maryaz i annan serten lavantaz e ou kapab ganny bokou benediksyon. Par egzanp, en bon maryaz i sa pli bon fondasyon pour form en fanmir. Bann zanfan i bezwen viv dan en lanvironnman ki stab, kot i posib pour paran pran swen avek zot, donn zot lanmour, disiplin e gid zot. (Psonm 127:3; Efezyen 6:1-4) Me pour pran swen avek zanfan i pa sa sel rezon akoz en dimoun i kapab marye.

5, 6. (a) Dapre Eklezyast 4:9-12, ki serten byenfe en lanmitye dan maryaz i kapab anmennen? (b) Ki mannyer en maryaz i kapab parey en lakord ki’n tres an trwa?

⁵ Aprezan annou egzamin sa verse ki tenm pour sa sapit e osi son konteks: “De i pli bon ki enn, akoz zot annan en bon rekonpans pour travay dir ki zot in fer. Akoz si enn i tonbe, sa lot i kapab lev son konpanyon. Me ki pou arive avek sa enn ki tousel e ki tonbe si napa en lot pour lev li? Deplis, si de dimoun i dormi ansanm, sirman zot pou  ganny sofe; me ki mannyer zis enn i kapab sof son lekor? Si en dimoun i pli for ki enn ki tousel, de ansanm pou kapab reziste kont li. En lakord ki’n tres an trwa pa fasil pour kas an de.”​—Eklezyast 4:9-12.

⁶ Premyerman, sa bann verse pe koz lo valer ki lanmitye i annan. Byensir sa lanmitye ki pli for i trouve dan maryaz. Parey sa bann verse i montre, sa kalite linyon i kapab anmenn led, rekonfor ek proteksyon. En maryaz i for, sirtou si i annan en lot keksoz ki ganny azoute avek sa linyon ant sa de dimoun. Parey nou kapab konpran dapre sa verse, en lakord ki’n tres an de i kapab kase, me si i’n tres an trwa i pli difisil pour kase. Kan fer plezir Zeova i vin sa premye keksoz dan lavi en koup, zot maryaz pou vin parey sa lakord ki’n tres an trwa. Kan Zeova i vreman form parti dan sa maryaz, alors sa linyon pou vin solid.

7, 8. (a) Ki konsey Pol ti donn bann selibater ki pe lit kont zot dezir seksyel? (b) Ki pwennvi realistik Labib i donn nou lo maryaz?

⁷ Maryaz i osi sa sel laranzman kot dimoun i kapab satisfer zot dezir seksyel dan en fason apropriye. Dan maryaz, relasyon seksyel i ganny vwar konman en keksoz ki anmenn lazwa. (Proverb 5:18) Kan en selibater in fini pas sa letan lazenes kot son dezir seksyel i vreman for, toudmenm i posib ki i ankor bezwen lit avek sa bann dezir. E si i pa kontrol zot i kapab fer keksoz ki sal oubyen annan en move kondwit. Pol ti ganny enspire pour ekrir sa konsey pour bann ki ankor selibater: “Si zot pa kapab kontrol zot lekor, zot devre marye, parski vomye zot marye ki zot brile avek pasyon.”​—1 Korentyen 7:9, 36, NW; Zak 1:15.

⁸ Pour nenport rezon ki en dimoun i deside marye, i devret realistik. Zapot Pol ti osi dir ki sa ki marye “pou ganny problenm dan son lavi.” (1 Korentyen 7:28) Sa ki’n marye i rankontre problenm ki bann selibater pa gannyen. Me si ou deside marye, ki mannyer ou kapab redwir lakantite problenm ki ou kapab gannyen e ganny plis benediksyon? En fason i kan ou byen swazir en konzwen.

9, 10. (a) Ki legzanp Pol ti servi pour montre ki danze i annan pour marye avek en non krwayan? (b) Ki souvan arive ler serten pa obeir konsey Bondye pour pa marye avek en non krwayan?

⁹ Zapot Pol ti ganny enspire pour ekrir en prensip tre enportan ki devret ganny aplike kan en dimoun pe swazir en konzwen. I ti dir: “Pa bezwen asosye zot avek bann non-krwayan.” (2 Korentyen 6:14) Kan i ti dir sa parol dan langaz Grek, Pol ti servi sa mo zoug ki fer nou mazin sa ki pase dan lagrikiltir. Si de zannimo, avek diferan groser ek lafors ti ganny mete ansanm anba en zoug, tou le de ti pou soufer. Pareyman, si en krwayan i marye avek en non krwayan, san okenn dout pou annan dezakor ek difikilte. Si enn ti a kontan reste dan lanmour Bondye e lot li i pa ni pe fatig li avek tousala, sa ki zot donn priyorite dan zot lavi pa pou parey e sa i kapab anmenn en kantite traka. Se pour sa rezon ki zapot Pol ti ankouraz Kretyen pour marye selman “selon Senyer.”​—1 Korentyen 7:39.

¹⁰ Parfwa serten Kretyen selibater in arive krwar ki si zot marye avek en non krwayan zot pou pli byen ki ler zot tousel. Alors, serten i deside pour pa ekout konsey ki Labib i donnen e zot marye avek en dimoun ki pa servi Zeova. Souvan sa in anmenn move rezilta. Zot vwar zot avek en dimoun ki zot pa kapab partaz bann keksoz pli enportan dan lavi. Zot santi zot pli tousel ki ler zot pa ti ankor marye. Me nou kontan pour dir ki i annan en kantite frer ek ser selibater ki annan konfyans dan konsey ki Bondye i donnen dan sa domenn e ki fidelman swiv sa bann konsey. (Psonm 32:8) Menm si zot ti a kontan marye en zour, zot reste selibater ziska ki zot trouv en konzwen parmi bann ki ador Zeova.

11. Kwa ki kapab ed ou pour byen swazir en konzwen? (Vwar osi bwat “ Ki kalite dimoun mon ti a kontan marye avek?”)

¹¹ Byensir, sa i pa vedir ki otomatikman tou serviter Zeova i kapab vin en bon konzwen. Si ou pe mazin marye, rod en  dimoun ki annan en personnalite ki ou kapab adapte avek, ki annan menm lobzektif spirityel e ki kontan Bondye parey ou. Lesklav fidel in donn nou en kantite lenformasyon lo sa size, i pou byen si ou egzamin sa bann konsey baze lo Labib e osi priy lo la, afen ki ou ganny gide par sa bann konsey ler ou pe fer sa desizyon enportan. a​—Psonm 119:105.

12. Ki koutim konsernan maryaz ki popiler dan bokou pei e ki legzanp dan Labib ki donn nou serten gidans?

¹² Dan bokou pei, i en koutim pour en paran swazir en konzwen pour son zanfan. An zeneral, dimoun ki swiv sa kalite kiltir, zot dakor ki paran i annan plis lasazes ek leksperyans pour nobou fer en desizyon enportan koumsa. Souvan bann maryaz ki ganny aranze i mars byen, zis parey bann maryaz dan letan Labib. Sa legzanp kot Abraam ti anvoy son serviter pour al rod en madanm pour Izaak i en bon legzanp pour bann paran ki kapab trouv zot dan menm sitiasyon ozordi. Abraam pa ti enterese avek larzan oubyen pozisyon en dimoun dan lasosyete. Plito i ti determinen pour fer tou sa ki i kapab pour rod en madanm pour Izaak parmi sa bann ki ador Zeova. b​—Zenez 24:3, 67.

13-15. (a) Ki mannyer sa prensip dan Proverb 24:27 i kapab ed en zennonm ki pe mazin marye? (b) Ki en zenn fiy i kapab fer an preparasyon pour maryaz?

¹³ Si ou pe mazin seryezman lo maryaz, i byen ki ou demann ou lekor sa kestyon: ‘Eski mon’n pare pour sa?’ Pour  konnen si ou’n pare, sa i pa zis depan lo ou santiman lo lanmour, seks, lanmitye oubyen zanfan. Plito, en fitir msye ek madanm i devret reflesir lo responsabilite ki maryaz i anmennen.

¹⁴ En zennonm ki pe rod en madanm i devret reflesir en kantite lo sa prensip: “Prepar ou travay an deor, e prepar li pour ou menm dan plantasyon. Apre ou devret osi batir ou lakour.” (Proverb 24:27) Ki pwen ki pe ganny fer resorti dan sa verse? Dan sa lepok, si en zonm ti anvi “batir [son] lakour,” oubyen en fanmir apre ki i’n marye, i ti pou bezwen demann son lekor sa kestyon: ‘Eski mon pare pour pran swen e siport en madanm ek zanfan ki pli tar nou kapab gannyen?’ Premyerman, i ti pou bezwen travay, pran swen avek plantasyon oubyen rekolt. Menm prensip i aplikab ozordi. En zonm ki anvi marye i bezwen met li pare pour desarz son responsabilite. Osi lontan ki i byen fizikman, i pou bezwen travay. Parol Bondye i fer resorti ki en zonm ki pa pran swen avek son fanmir fizikman, emosyonnelman e spirityelman, i pli pir ki en non krwayan.​—1 Timote 5:8.

¹⁵ Pareyman, en madanm ki deside pour marye i dakor pour osi pran serten gro responsabilite. Labib i koz an byen lo serten abilite ek kalite ki en madanm i kapab bezwen anmezir ki i ed son msye e pran swen avek son fanmir. (Proverb 31:10-31) En zonm oubyen fanm ki taye pour marye san ki i’n prepare pour desarz bann responsabilite ki enplike, i vreman egois e i pa pe arive vwar ki i kapab ofer son fitir konzwen. Pli enportan ankor, sa bann ki pe mazin marye i bezwen prepare spirityelman.

16, 17. Ki prensip dan Labib sa bann ki pe mazin marye i bezwen reflesir lo la?

¹⁶ Prepare pour maryaz i enplik reflesir lo bann responsabilite ki Bondye in donn msye ek madanm. En zonm i bezwen konnen ki savedir vin sef dan en fanmir Kretyen.  Me sa i pa devret konman en permi ki i’n gannyen pour azir parey en diktater. Plito i devret imit lafason ki Zezi i egzers son lotorite. (Efezyen 5:23) Dan menm fason, en madanm Kretyen i bezwen konpran sa rol presye ki i’n gannyen. Eski i pou pare pour soumet avek “lalwa son mari”? (Romen 7:2, NW) Deza i bezwen swiv lalwa Zeova ek Kris. (Galat 6:2) Lotorite ki son msye i annan dan lafanmir i reprezant en lot lalwa. Eski i pou kapab siport e soumet avek sa lotorite ki en zonm enparfe i annan? Si sa nide pa atir li, be i byen ki i pa mazin pour marye.

¹⁷ Deplis, tou le de konzwen pou bezwen pare pour pran swen avek bezwen spesyal ki sakenn i kapab annan. (Filipyen 2:4) Zapot Pol ti ekrir: “Fodre ki sak mari i kontan son madanm parey son prop lekor e ki sak madanm i respekte son mari.” Kan i ti pe ganny enspire, zapot Pol ti nobou rekonnet ki i vreman enportan pour en zonm santi ki son madanm i annan en profon respe pour li. E bann madanm osi zot vwar li vreman enportan pour santi ki zot msye i kontan zot.​—Efezyen 5:21-33.

18. Akoz bann ki anvizaze marye i bezwen demontre kontrol kan zot pe pwente?

¹⁸ Kan de dimoun pe pwente, la i pa zis en moman pour zot zwe. I en letan kot en zonm oubyen fanm i devret vwar konman zot pou byen azir anver kanmarad, vwar si i vreman en bon nide pour zot marye. Zot pou osi bezwen demontre kontrol lo zot lekor. Sa lanvi pour montre plis lafeksyon i kapab vreman for, apre tou sa santiman i toutafe normal. Me sa bann ki senserman kontan kanmarad pou evite fer okenn keksoz ki pou kapab spirityelman afekte sa enn ki zot kontan. (1 Tesalonisyen 4:6) Alors, si ou pe pwente, demontre kontrol lo ou lekor, sa i en kalite ki kapab anmenn bokou byenfe pour ou dan lavi ki swa ou’n marye oubyen non.

19, 20. Ki mannyer pwennvi en Kretyen lo maryaz i devret diferan avek lafason ki dimoun an zeneral i vwar maryaz? Donn en legzanp.

¹⁹ Si en koup i anvi ki zot maryaz i dire, zot pou bezwen annan en bon pwennvi lo langazman oubyen fidelite anver zot konzwen. Dan bann film ek roman, maryaz i en finisyon ki tou dimoun i kontan. Parkont dan lavi reel, maryaz i konmansman en keksoz ki Zeova in entrodwir avek lentansyon ki i dire. (Zenez 2:24) Me i fer lapenn pour dir ki sa i pa fason ki dimoun i mazinen an zeneral ozordi. Dan serten kiltir, dimoun i konpar maryaz avek ler ou “fer en nen avek lakord.” Petet zot pa realize ki sa i byen dekrir lafason ki dimoun an zeneral i vwar maryaz. Ki mannyer sa? I vre ki en bon nen i bezwen byen sere ziska ki i fini ganny servi, me en lot keksoz enportan se ki sa nen i kapab ganny anmare e delarge fasilman.

²⁰ Bokou dimoun i vwar maryaz konman en keksoz ki tanporer. San okenn problenm zot deside pour marye akoz zot mazinen ki sa pou konble zot bezwen, me an menm tan zot pe osi mazinen ki o moman keksoz i tay tord, zot pou sove. Pa bliye, Labib i servi en lakord pour konpar sa linyon ki egziste kan de dimoun i marye. Sa bann lakord ki’n ganny fer pour bann gro bato navigasyon, i sipoze toultan dirab, zanmen i pou ize oubyen kase, menm dan sa pli gro tanpet. Dan menm fason, maryaz in ganny fer avek bi pour dire. Pa bliye, Zezi ti dir: “Sa ki Bondye in ini ansanm zonm pa devre separe.” (Matye 19:6) Si ou marye, ou pou bezwen annan sa menm pwennvi lo maryaz. Eski sa kalite langazman i fer maryaz vin en fardo? Non.

21. Ki mannyer en msye ek madanm i bezwen toultan vwar kanmarad e kwa ki kapab ed zot fer sa?

²¹ En msye ek madanm i bezwen annan en bon pwennvi lo kanmarad. Si tou le de i esey konsantre lo bann bon  kalite ek zefor ki tou le de i fer, i pou annan lazwa dan zot maryaz e zot pou santi zot byen. Eski i enposib ler nou dir ki tou le de menm si zot enparfe zot bezwen konsantre lo sa ki byen dan kanmarad? Zeova i konnen sa ki nou vreman ete, pourtan nou annan konfyans ki i vwar sa ki byen dan nou. En psalmis ti demande: “Si ou ti vey bann fot, O Ya, O Zeova, lekel ki ti pou kapab debout devan ou?” (Psonm 130:3) Msye ek madanm i bezwen annan en bon pwennvi lo kanmarad e pare pour pardonnen.​—Kolosyen 3:13.

22, 23. Ki mannyer Abraam ek Sara in kit en bon legzanp pour bann ki’n marye ozordi?

 ²² Pli en koup i andire pour plizyer lannen, zot kapab ganny plis benediksyon dan zot maryaz. Labib i koz lo lavi maryaz Abraam ek Sara kan zot ti en koup aze. Me pa bezwen dir ou ki zot pa ti rankontre difikilte ek problenm. Zis esey mazinen ki mannyer Sara ti’n bezwen santi, ler i ti ganny demande pour kit son lakour byen konfortab dan en lavil byen ris parey Our e pour al reste dan latant pour larestan son lavi. E sa letan i probab ki i ti dan son 60 an anmontan. Me kantmenm sa, i ti soumet avek lotorite son msye. I ti en vre led ek sipor pour Abraam, avek respe i ti ed son msye pour ki desizyon ki i ti’n pran, ti marse. Ofon son leker i ti kontan pour soumet avek Abraam. Menm “dan li menm” i ti konsider son msye konman son senyer. (Zenez 18:12; 1 Pyer 3:6) I ti respekte Abraam avek tou son leker.

²³ Me byensir sa pa vedir ki toultan zot ti tonm dakor. En fwa i ti donn en sizesyon ki Abraam ti “vreman pa kontan.” Toudmenm, avek limilite e osi gidans Zeova, Abraam ti ekout son madanm e pli tar sa ti anmenn benediksyon pour zot fanmir. (Zenez 21:9-13) Bann msye oubyen madanm ozordi, menm si zot in marye pour plizyer lannen, zot kapab aprann en kantite avek sa koup ki ti fer plezir Bondye.

24. Ki kalite maryaz ki anmenn loner pour Zeova e akoz?

²⁴ Dan bann kongregasyon, i annan en kantite ki pe trouv lazwa dan zot maryaz. Sa i bann maryaz kot madanm i respekte zot msye en kantite, kot bann msye i kontan e onor zot madanm e zot tou le de zot travay ansanm pour fer sir ki lavolonte Zeova i vin premye dan zot lavi. Si en zour ou deside pour marye, nou swete ki ou byen swazir ou konzwen, byen prepare pour maryaz e ansanm dan lape ek lanmour fer tou pour ki ou maryaz i anmenn loner pour Zeova. Si ou fer sa, sirman ou maryaz pou ed ou pour reste dan lanmour Bondye.