1, 2. Ki ti arive sa zour inoubliyab dan lavi Eliya?

 ELIYA i ankor pe taye dan sa lapli anmezir letan i vin pli fernwanr. I nepli sitan zenn e i ankor annan en bon pti zistans pour li ale avan i ariv Yizreel. Malgre sa, i kontinyen taye menm, akoz “lanmen Zeova” i lo li. Sa lafors ki i annan i sirman plis ki i’n deza gannyen avan. Zis mazinen, i fek depas bann seval ki pe trenn saret Lerwa Aab!​—Lir 1 Lerwa 18:46.

² Aprezan, i tousel dan en gran semen vid. Zis mazin Eliya pe bat bat son lizye anmezir i pe taye dan sa lapli e pe mazin tou sa ki’n pase pandan sa lazournen inoubliyab. San okenn dout, Zeova, Bondye Eliya ensi ki vre ladorasyon in ranport en gran laviktwar. Lo Montanny Karmel ki aprezan deryer li, divan pe soufle e bann gro nyaz lapli in kouver li. Se laba menm ki Zeova in servi Eliya pour defet ladorasyon Baal, dan en fason pwisan e mirakile. Plizyer santenn profet Baal in ganny ekspoze konman bann manter e ganny egzekite parey zot merite. Apre sa, Eliya in priy Zeova pour ki sa lasesres ki’n dire pour trwa-z-an edmi i arete. Finalman, lapli i tonbe!​—1 Rwa. 18:18-45.

3, 4. (a) Akoz Eliya ti’n kapab annan lespwar ler i ti lo semen pour al Yizreel? (b) Ki kestyon nou pou egzaminen?

³ Dan sa gro lapli, Eliya i bezwen tay 30 kilomet pour ariv Yizreel. I annan en gran lespwar e dwatet i pe mazinen ki tou keksoz pe al sanze aprezan apre sa ki fek arive sa zour. Aab pou bezwen sanze li osi! Apre sa ki Aab in vwar avek son de lizye, sirman i pou bezwen aret ador Baal, koz avek son madanm Zezabel e aret persekit bann serviter Zeova.

⁴ I pa drol ki Eliya i pans koumsa, akoz i toutafe normal ki nou lespwar i ogmante si keksoz i dan nou faver. Nou menm kapab krwar ki nou sirkonstans pou kontinyen amelyore, petet menm mazinen ki nou problenm grav pou finalman disparet. Anfet, nou kapab konpran akoz Eliya i pans koumsa, akoz apre tou, i ti en “zonm ki ti annan menm natir [oubyen  “santiman,” NW] ki nou.” (Zak 5:17) Me an realite, problenm pa ankor fini pour Eliya. Anfet, zis detrwa erdtan apre sa, Eliya pou sitan per e dekouraze, ki i anvi mor. Ki ti arive e ki mannyer Zeova ti ed son profet pour reganny son lafwa ek kouraz? Annou vwar.

5. Eski Aab ti devlop okenn respe pour Zeova apre sa ki ti’n pase lo Montanny Karmel e ki mannyer nou konnen?

⁵ Ler Aab ti ariv kot son pale Yizreel, eski i ti donn laprev ki i ti’n sanze? Nou lir: “Aab ti dir Zezabel tou sa ki Eliya ti’n fer e lafason ki i ti’n touy tou sa bann profet avek lepe.” (1 Rwa. 19:1) Remarke ki lafason ki Aab ti rakont bann levennman ki ti’n arive sa zour, i pa ti mansyonn ditou Zeova, Bondye Eliya. Malgre sa bann mirak, Aab ti rezonn parey en zonm ki pa spirityel akoz i pa ti koz lo sa ki Zeova ti’n fer me lo sa ki “Eliya ti’n fer.” Menm si Aab ti vwar tou sa bann mirak, i pa ti’n devlop okenn respe pour Zeova. Ki mannyer son madanm ti reazir?

6. Ki mesaz Zezabel ti anvoy pour Eliya e ki sa ti vedir?

⁶ Zezabel ti vreman ankoler. Dan son lakoler, i ti anvoy sa mesaz pour Eliya: “Ki bann bondye i fer parey e ki zot ava azout lo la, si sa ler demen mon pa’n fer avek ou parey ou’n fer avek sakenn ant zot!” (1 Rwa. 19:2) Zezabel pa ti pe zwe, lavi sa profet ti vreman an danze. Anfet, Zezabel ti pe fer en ve ki li menm i ava mor si i pa arive touy Eliya avan son lannmen pour revanz bann profet Baal. Imazin Eliya pe dormi dan en senp lakaz Yizreel e en gro lapli pe tonbe. En sel kou, i leve dan son sonmey zis pour li tann sa parol sorti kot larenn ki ay li. Ki lefe sa ti annan lo li?

7. Ki lefe sa menas ti annan lo Eliya e ki i ti fer?

⁷ Si Eliya ti konmans krwar ki lager avek bann adorater Baal ti’n fini, ler i ti tann sa nouvel, en sel kou, i ti perdi lespwar. Zezabel pa ti’n sanze apre tou sa ki ti’n arive. Bokou lezot profet fidel parey Eliya ti’n ganny egzekite par lord larenn e la i ti paret ki i ti sa lot ki ti pou swiv. Ki lefe sa menas ti annan lo Eliya? Labib i dir nou: “I ti per.” Eski Eliya ti pe mazin sa lanmor martir ki Zezabel ti’n plàn pour li? Si i ti kontinyen mazin tousala, san dout i ti pou dekouraze. An tou le ka, Eliya ti taye pour sov son lavi.​—1 Rwa. 18:4; 19:3.

8. (a) Ki mannyer problenm Pyer ti parey avek pour Eliya? (b) Ki leson nou kapab aprann avek Eliya ek Pyer?

 ⁸ Eliya pa ti sa sel zonm ki ti annan lafwa e ki apre ti les lafreyer kontrol li. Pli tar, zapot Pyer ti annan menm problenm. Par egzanp, kan Zezi ti demann Pyer pour mars lo delo, sa zapot ti konmans “remark divan” e i ti perdi kouraz e konmans pran fon. (Lir Matye 14:30.) Legzanp Eliya ek Pyer i ansenny nou bann leson ki annan bokou valer. Si nou anvi gard nou kouraz, nou pa devret les nou lespri konsantre lo bann danze ki kapab fer nou per. Nou devret reste konsantre lo Zeova, Sours nou lespwar ek lafors.

9. Dekrir traze Eliya e son santiman anmezir i ti pe sove.

⁹ Akoz son lafreyer, Eliya ti sov dan sid was apepre 150 kilomet avek Beer-Seba en lavil dan sid Zida. La i ti kit son serviter deryer e sov dan dezer li tousel. Sa resi i dir ki i ti mars pandan en lazournen. Nou kapab mazin li pe konmans marse depi soley leve e aparaman i pa ti anmenn okenn provizyon avek li. I ti dezespere e per. An plis ki sa, i ti bezwen lalit pour marse dan sa gran dezer e dan sa gro ker soley. Ler soley ti kouse aswar, Eliya ti nepli annan okenn kouraz. Epwize, i ti asiz lanmenm anba en pti pye dibwa, sel landrwa kot i ti kapab kasyet dan sa dezer.​—1 Rwa. 19:4.

10, 11. (a) Ki sa lapriyer ki Eliya ti fer avek Zeova ti vedir? (b) An servan bann verse ki’n ganny site, dekrir santiman lezot serviter fidel Bondye ki ti dekouraze.

¹⁰ Dan son dezespwar, Eliya ti priye. I ti demann Bondye pour li mor. I ti dir: “Mon pa pli bon ki mon bann zanset.” I ti konnen ki son bann zanset ti’n vin lapousyer e ki leskelet dan latonm pa kapab fer dibyen personn. (Ekle. 9:10) Eliya ti santi ki i ti napa okenn valer parey zot. Nou pa vwar li drol alor ki i ti kriye: “Ase!” Akfer mon bezwen kontinyen viv?

¹¹ Eski nou devret soke pour aprann ki en profet Bondye parey Eliya ti sitan dekouraze? Pa neseserman. Labib i koz lo detrwa fanm ek zonm fidel ki ti sitan sagren ki zot ti menm demande pour mor. Parmi zot, i annan Rebeka, Zakob, Moiz ek Zob.​—Zen. 25:22; 37:35; Nom. 11:13-15; Zob 14:13.

12. Si ou santi ou dekouraze, dan ki fason ou kapab imit legzanp Eliya?

 ¹² Ozordi, nou pe viv dan en “letan difisil,” alor i pa etonan pour vwar ki bokou dimoun, menm bann serviter Bondye fidel i santi zot dekouraze par ler. (2 Tim. 3:1) Si zanmen ou trouv ou dan en sityasyon difisil, swiv legzanp Eliya par devid ou leker avek Bondye. Apre tou, Zeova i en “Bondye ki touzour donn konsolasyon.” (Lir 2 Korentyen 1:3, 4.) Eski i ti rekonfort Eliya?

13, 14. (a) Ki mannyer Zeova ti servi en lanz pour demontre son konsern anver Son profet? (b) Akoz i rekonfortan pour konnen ki Zeova i konn sakenn ant nou, enkli nou bann limitasyon?

¹³ Ki mannyer ou panse Zeova ti santi kan i ti vwar son profet byenneme anba en pye dibwa dan en dezer pe demande pour mor? I fasil konnen. Apre ki Eliya ti’n tonm dormi, Zeova ti anvoy en lanz kot li. Sa lanz ti tous Eliya e dir: “Leve, manze.” Eliya ti fer sanmenm, sa lanz ti’n prepar en keksoz pour li manze, dipen so ek delo. Eski i ti remersye sa lanz? Sa resi i zis dir nou ki Eliya ti manz sa dipen, bwar sa delo e apre redormi ankor. Eski i ti tro dekouraze pour li remersye sa lanz? An tou le ka, sa lanz ti lev li pour en dezyenm fwa, petet lo granmaten. Ankor enn fwa i ti ankouraz li pour: “Leve, manze.” Apre i ti dir sa parol remarkab: “Akoz sa traze i tro long pour ou.”​—1 Rwa. 19:5-7.

¹⁴ Zeova ti’n fer sa lanz konnen kote Eliya ti anvi ale. I ti menm konnen ki sa traze ti pou tro bokou pour Eliya fer avek son prop lafors. Pa i rekonfortan pour konnen ki nou pe servi en Bondye ki konn nou lobzektif ek nou bann limitasyon plis ki nou! (Lir Psonm 103:13, 14.) Ki dibyen sa repa ti fer Eliya?

15, 16. (a) Ki sa manze sorti kot Zeova ti permet Eliya pour fer? (b) Akoz nou devret apresye lafason ki Zeova i soutenir son bann serviter ozordi?

¹⁵ Nou lir: “I ti leve, manze e bwar e i ti kapab kontinyen ale pour karant zour ek karant nwit ziska kot montanny sa vre Bondye, Oreb.” (1 Rwa. 19:8) Parey Moiz ki ti viv sis syek avan li e Zezi apepre dis syek apre li, Eliya ti zennen pour 40 zour ek 40 nwit. (Egz. 34:28; Lik 4:1, 2) Sa repa pa ti fer disparet tou son bann problenm, me i ti soutenir li dan en fason mirakile. Zis mazin sa msye ki ti annan en bon pti laz pe marse dan dezer zour apre zour, semenn apre semenn pour apepre en mwan edmi!

¹⁶ Zeova i soutenir son bann serviter ozordi osi. Pa atraver  bann manze mirakile me dan en fason pli enportan. I donn son bann serviter nouritir spirityel. (Mat. 4:4) Ler nou aprann lo Bondye atraver son Parol ek nou bann piblikasyon ki baze lo Labib, sa i soutenir nou spirityelman. Si nou pran sa nouritir spirityel, sa pa pou rezourd tou nou bann problenm, me i kapab ed nou pour andir sa ki nou pa ti pou kapab andire. De plis, sa manze spirityel i kapab ed nou ganny “lavi eternel.”​—Zan 17:2, 3.

17. Kote Eliya ti ale e akoz sa landrwa ti enportan?

¹⁷ Eliya ti mars apepre 320 kilomet ziska ki finalman i ti ariv kot Montanny Oreb. I ti en landrwa vreman enportan, akoz i ti lanmenm kot Zeova, atraver en lanz, ti aparet avek Moiz dan en brousay dife e ki pli tar i ti fer lalyans Lalwa avek pep Izrael. Eliya ti rod en landrwa kasyet dan en kavern.

18, 19. (a) Ki kestyon sa lanz ti demande e ki Eliya ti reponn? (b) Donn trwa rezon ki ti fer Eliya dekouraze.

¹⁸ Lo Montanny Oreb, en lanz ti anmenn “parol” Zeova e i ti demann li sa kestyon senp: “Ki ou pe vin fer la Eliya?” Sa kestyon ti’n bezwen ganny demande dan en fason dous, akoz Eliya ti vwar sa konman en lokazyon pour li devid son leker. Sanmenm ki i ti fer! I ti dir: “Mon’n vreman zalou pour Zeova bann larme, akoz bann garson Izrael in kit ou lalyans, zot in kas ou lotel e zot in touy ou bann profet avek lepe e zis mwan ki reste e zot pe rod mwan pour touy mwan.” (1 Rwa. 19:9, 10) Eliya ti mansyonn omwen trwa rezon akoz i ti dekouraze.

¹⁹ Premyerman, i ti santi ki son travay ti anven. Menm si pour plizyer lannen, i ti’n “vreman zalou” dan son servis pour Zeova, par met non sakre Bondye ek son ladorasyon avan tou lezot keksoz, Eliya ti vwar ki sityasyon dan pei ti pe deplizanpli vin pli difisil. Bann dimoun ti ankor enfidel, rebel e fo ladorasyon ti pe kontinyen ogmante. Dezyenmman, Eliya ti santi li tousel. I ti dir: “Zis mwan ki reste,” konmsi i ti dernyen dimoun dan sa nasyon ki ti pe servi Zeova. Trwazyenmman, Eliya ti per. Bokou lezot profet ti’n fini ganny touye e i ti konvenki ki li ki ti pou swiv. I pa ti fasil pour Eliya admet son santiman, me i pa ti les lorgey oubyen lanbarasman anpes li dir son santiman. Par devid son leker avek Zeova dan lapriyer, Eliya in kit en bon legzanp pour bann serviter fidel Bondye ozordi.​—Ps 62:8.

20, 21. (a) Eksplike ki Eliya ti vwar kan i ti dan larantre sa kavern. (b) Ki Zeova ti ansenny Eliya atraver son pwisans?

 ²⁰ Ki Zeova ti fer ler i ti vwar Eliya per e enkyet? Sa lanz ti demann Eliya pour debout dan larantre sa kavern. I ti obei menm si i pa ti konnen ki ti pe al arive. En gro divan ti soufle. I ti’n bezwen fer en ta tapaz akoz i ti fann bann montanny ek glasi. Imazin Eliya pe esey bar son lizye e pe tyonbo son lenz lapo zannimo anmezir divan pe soufle. Apre sa, apenn si i ti kapab reste debout akoz later ti pe bouze e tranble parski i ti annan en tranblemandter! Epi, en gro dife ti pase ki ti fer Eliya bezwen kasyet dan kavern pour li pa ganny brile avek sa gro lasaler.​—1 Rwa. 19:11, 12.

²¹ Apre sak sa bann mirak, sa resi i dir ki Zeova pa ti dan sa bann fenomenn natirel ekstraordiner. Eliya ti konnen ki Zeova pa ti en bondye lanatir ki pa ni egziste parey fo bondye Baal ki ti ganny dekrir par son bann adorater konman “sa enn ki lo nyaz” oubyen sa enn ki anmenn lapli. Bann lafors ekstraordiner ki dan lanatir i sorti kot Zeova me Bondye i osi bokou pli pwisan ki okenn keksoz ki i’n kree dan liniver. Menm lesyel i tro ptipti pour Bondye reste ladan. (1 Rwa. 8:27) Ki mannyer tou sa la ti ed Eliya? Mazinen ki sa profet ti per. Me avek en Bondye parey Zeova dan son kote, Eliya pa ti bezwen per Aab ek Zezabel akoz Zeova ti kapab servi tou sa bann lafors pwisan ki egziste dan liniver.​—Lir Psonm 118:6.

22. (a) Ki mannyer sa “lavwa” ti reasir Eliya ki i ti annan valer? (b) Lekel ki ti kapab sours sa “lavwa”? (Vwar not anba lo paz.)

²² Apre ki dife ti’n disparet, i ti annan en gran silans en sel kou e Eliya ti tann “en lavwa kalm” ki ti pe koz dousman e envit li pour eksprim son lekor ankor enn fwa. Eliya ti fer sanmenm e i ti eksprim son konsern en dezyenm fwa e sa ti’n bezwen soulaz li plis ankor. a Me san dout, Eliya ti ganny plis rekonfor dan sa ki sa “lavwa” ti dir li. Zeova ti asir Eliya ki i ti annan bokou valer. Ki mannyer sa? Bondye  ti donn li bann detay lo son plan pour elimin ladorasyon Baal Izrael. I kler ki travay Eliya pa ti anven akoz plan Bondye ti pe al annavan. De plis, Eliya ti ankor annan en rol pour zwe dan sa plan akoz Zeova ti donn li bann lenstriksyon spesifik pour kontinyen travay konman profet.​—1 Rwa. 19:12-17.

23. Ki sa de keksoz ki Zeova ti fer pour ankouraz Eliya ler i ti santi li tousel?

²³ Ki Zeova ti fer pour ed Eliya ki ti santi li tousel? Zeova ti fer de keksoz. Premyerman, i ti dir Eliya apwent Elisa konman en profet ki ti pou vin son sikseser. Sa zenn onm ti pou vin konpanyon Eliya e ed li pour plizyer lannen. Pa sa ti en bon fason pour rekonfort li! Dezyenmman, Zeova ti dir li sa nouvel eksitan: “Mon ankor annan set mil dimoun ki reste Izrael, ki pa’n tonm azenou devan Baal e ki zot labous pa’n anbras li.” (1 Rwa. 19:18) Eliya pa ti tousel. Pa sa ti’n bezwen tous son leker kan i ti tann koz lo sa set mil dimoun fidel ki’n refize ador Baal! Sa bann dimoun ti bezwen ki Eliya i reste fidel dan son servis e ki i kontinyen donn en bon legzanp fidelite dan sa moman difisil. Eliya ti’n bezwen vreman ganny touse ler i ti tann “lavwa” son Bondye atraver mesaze Zeova.

24, 25. (a) Dan ki sans nou kapab ekout “lavwa” Zeova ozordi? (b) Akoz nou kapab asire ki Eliya ti aksepte rekonfor ki Zeova ti donn li?

²⁴ Parey Eliya, nou annan tou rezon pour nou enpresyonnen par sa lafors ekstraordiner ki egziste dan liniver. Sa liniver i montre nou dan en fason reel lafors nou Kreater. (Rom. 1:20) Zeova i ankor kontan pour servi son pwisans ki napa limit pour ed son bann serviter fidel. (2 Kron. 16:9) Toudmenm, Bondye i koz klerman avek nou atraver son Parol Labib. (Lir Izai 30:21.) Dan en sans, Labib i kapab parey sa “lavwa” si nou les li gid nou ozordi. Dan son bann paz presye, Zeova i koriz nou, ankouraz nou e reasir nou ki i kontan nou.

²⁵ Eski Eliya ti aksepte rekonfor ki Zeova ti donn li lo Montanny Oreb? Wi! Deswit, i ti reazir, ankor enn fwa, sa profet fidel byen ardyese ti rekonmans lalit avek fo ladorasyon. Si nou osi nou pran aker parol enspire Bondye ki donn “konsolasyon,” nou pou kapab imit lafwa Eliya.​—Rom. 15:4.