1. Akoz i ti annan sagrinasyon ek dey Silo?

 SAMYEL i kapab santi sa sagrinasyon ki i annan Silo. I paret konmsi sa lavil in inonde avek larm. Konbyen lakaz i annan kot bann madanm ek zanfan pe plere asodlarm e kriy lasasen akoz zot in tande ki zot papa, msye, garson ek frer pa pe retourn kot lakour? Izrael in perdi apepre 30,000 zonm dan en gro defet ki zot in sibir avek bann Filisten pa tro lontan apre ki zot in perdi 4,000 zonm dan en lot batay.​—1 Sam. 4:1, 2, 10.

2, 3. Ki seri maler ki ti anmenn laont e fer Silo perdi son laglwar?

² Sa ti zis en lensidan dan en seri maler. Ofni ek Fineas, sa de move garson Eli ti’n kit lavil Silo avek lars lalyans. Normalman, sa lars lalyans ki ti reprezant prezans Bondye ti ganny mete dan lasanm sen dan tabernak, en latant ki ti parey tanp. Apre sa, sa pep ti pran sa Lars e anmenn li kot batay an krwayan ki sa ti pou konman en portboner pour zot ganny laviktwar. Me sa ti vreman bet akoz bann Filisten ti pran sa Lars e touy Ofni ek Fineas.​—1 Sam. 4:3-11.

³ I fer plizyer syek depi ki sa Lars i dan tabernak Silo. La aprezan, i’n disparet. Ler i’n tann sa, Eli ki annan 98 an sa letan i tonm par ledo dan son sez e mor. Son belfiy ki’n vin vev sa menm zour i mor ler i pe donn nesans. Avan son lanmor, sa madanm i dir: “Laglwar in kit Izrael e i’n al an egzil.” Anfet, Silo pa pou zanmen parey avan.​—1 Sam. 4:12-22.

4. Ki nou pou egzaminen dan sa sapit?

⁴ Ki mannyer Samyel ti pou fer fas avek sa bann gran dezapwentman? Eski avek son lafwa, i ti pou reisi ed bann dimoun ki ti’n perdi proteksyon ek benediksyon Zeova? Par ler, nou tou nou fer fas avek difikilte ek dezapwentman ki kapab en danze pour nou lafwa, annou vwar ki nou kapab aprann ankor avek Samyel.

5, 6. Ki Labib i koz lo la pandan sa peryod 20 an e dan ki fason Samyel ti reste okipe pandan sa letan?

⁵ Sa resi Labib pa tro koz lo Samyel apre sa, me i plito koz  lo sa ki ti arive avek Lars e montre ki bann Filisten ti soufer en kantite akoz zot ti’n pran Lars e zot ti forse retourn avek li. Nek ven-t-an apre ki i koz ankor lo Samyel dan sa liv. (1 Sam. 7:2) Ki i ti pe fer pandan sa letan? Labib i ed nou konpran.

⁶ Nou aprann ki avan sa peryod 20 an ti konmanse, “bann Izraelit ti kontinyen antann parol Samyel.” (1 Sam. 4:1) Sa resi i montre ki apre ki sa 20 an ti’n pase, Samyel ti fer li en labitid pour al vizit sa trwa lavil Izrael, tou le lannen. I ti rezourd bann dispit e reponn bann kestyon. Apre sa, i ti retourn dan son lavil Rama. (1 Sam. 7:15-17) Alor, i kler ki Samyel ti touzour reste okipe. Nou kapab asire ki pandan sa 20 an, i ti annan bokou pour li fer.

7, 8. (a) Ki mesaz Samyel ti delivre avek sa pep apre ki i ti’n travay dir pour ven-t-an? (b) Ki mannyer lepep ti reazir anver parol Samyel?

⁷ Limoralite seksyel ek koripsyon bann garson Eli ti’n afeblir lafwa lepep. I paret ki bokou ti konmans ador zidol akoz sa. Me, apre ven-t-an travay dir, Samyel ti delivre sa mesaz avek sa pep: “Si zot pe retourn ver Zeova avek tou zot leker, tir sa bann bondye etranze parmi zot ek bann stati Astoret, answit, tourn zot leker ver Zeova avek determinasyon e servi li, zis li tousel, alor i pou delivre zot dan lanmen bann Filisten.”​—1 Sam. 7:3.

⁸ Bann Filisten ti abiz bann Izraelit en kantite. Lefet ki larme Izraelit ti’n sibir en gro defet, bann Filisten ti panse ki zot ti kapab abiz pep Bondye san sibir okenn konsekans. Me Samyel ti asir sa pep ki keksoz ti pou sanze si zot ti retourn kot Zeova. Eski zot ti pare pour fer sa? Samyel ti kontan akoz zot ti abandonn zot bann zidol e “konmans servi Zeova tousel.” Samyel ti fer zot rasanble Mitspa, en lavil anler dan montanny nor Zerizalenm. Sa pep ti rasanble, zennen e repantir akoz zot ti pe ador zidol.​—Lir 1 Samyel 7:4-6.

9. Bann Filisten ti trouv loportinite pour fer kwa e ki mannyer pep Bondye ti reazir ler zot ti’n tann sa?

⁹ Par kont, bann Filisten ti okouran konsernan sa gran rasanbleman e zot ti vwar li konman en loportinite pour vin lager avek pep Bondye. Zot ti anvoy zot larme Mitspa pour detri bann adorater Zeova. Bann Izraelit ti ganny nouvel konsernan sa danze. Zot ti per, alor zot ti demann Samyel pour priy pour zot.  Sanmenm ki i ti fer an menm tan ki i ti ofer sakrifis. Pandan sa seremoni sakre Mitspa, larme Filisten ti vin atak zot. Apre sa, Zeova ti reponn lapriyer Samyel. Anfet, Zeova ti tir son lakoler lo zot. Sa zour I ti fer “loraz fer en gro tapaz kont bann Filisten.”​—1 Sam. 7:7-10.

10, 11. (a) Akoz i kapab ki i ti annan en keksoz ekstraordiner avek sa loraz? (b) Ki ti arive apre sa batay ki ti konmans Mitspa?

¹⁰ Aprezan, eski nou pou mazin sa bann Filisten parey bann pti zanfan ki tay deryer zip zot manman akoz lafreyer apre ki zot tann loraz kriye? Non, sa bann solda ti for e eksperyanse. Me, i paret ki zot pa ti’n zanmen tann sa kalite loraz oparavan. Eski sa “gro tapaz” ti sitan for? Eski sa loraz ti ariv dan en letan kot lesyel ti byen ble ouswa eski sa tapaz ti rezonnen dan bann montanny? An tou le ka, bann Filisten ti konfize e per en kantite. Dan tou sa konfizyon, olye atake, zot ki ti ganny atake. Bann zonm Izraelit ti sorti Mitspa, defet zot e tay deryer zot pour plizyer kilomet ziska en landrwa dan sid was Zerizalenm.​—1 Sam. 7:11.

¹¹ Sa batay ti en gran sanzman pour pep Bondye. Tou dilon leres lannen ki Samyel ti ziz, bann Filisten ti konmans perdi kontrol dan bann teritwar Izraelit e pep Bondye ti repran kontrol bann lavil enn deryer lot.​—1 Sam. 7:13, 14.

12. Dan ki sans Samyel ti “etabli [“ladrwatir,” NW]” e ki kalite ki ti ed li reisi?

¹² Plizyer syek pli tar, zapot Pol ti mansyonn Samyel parmi bann ziz fidel ek profet ki ti “etabli [“ladrwatir,” NW].” (Ebr. 11:32, 33) Samyel ti fer sa ki byen e drwat devan Bondye e i ti ankouraz lezot pour fer parey. I ti reisi akoz i ti depan lo Zeova avek pasyans e i ti fidelman kontinyen fer son travay malgre dezapwentman par ler. I ti osi demontre ki i ti rekonesan. Apre sa laviktwar Mitspa, Samyel ti fer en moniman pour komemor lafason ki Zeova ti’n ed son pep.​—1 Sam. 7:12.

13. (a) Ki kalite nou devret annan si nou oule imit Samyel? (b) Kan ki ou panse i sa bon letan pour devlop bann kalite parey pour Samyel?

¹³ Eski ou osi ou anvi etabli ladrwatir? Si wi, i byen pour ou aprann atraver legzanp pasyans ek limilite Samyel e demontre rekonesans. (Lir 1 Pyer 5:6.) Lekel parmi nou ki pa bezwen sa  bann kalite? I ti byen pour Samyel devlop e demontre sa bann kalite depi son zenes akoz i ti eksperyans bann pli gran dezapwentman pli tar dan son lavi.

14, 15. (a) Ki dezapwentman Samyel ti fer fas avek ler i ti “vye”? (b) Kontrerman avek Eli, eski Samyel ti en bon papa? Eksplike.

¹⁴ Ler Labib i rekoz lo Samyel ankor, i ti’n fini vin “vye.” Sa letan, Samyel ti annan de gran garson, Yoel ek Abiya e i ti konfye zot sa responsabilite pour ed li dan son travay konman en ziz. Me malerezman, i pa ti merit annan konfyans dan zot. Menm si Samyel ti onnet e drwat, son de garson ti servi zot pozisyon dan zot prop lavantaz, zot ti pran gous e pa ziz dan en fason zis.​—1 Sam. 8:1-3.

¹⁵ En zour, bann zonm aze Izrael ti apros sa vye profet pour fer zot konplent. Zot ti dir: “Ou bann garson pa’n fer parey ou.” (1 Sam. 8:4, 5) Eski Samyel ti okouran sa problenm? Sa resi pa dir. Me, kontrerman avek Eli, Samyel ti sirman en bon papa. Zeova ti reprimann e pini Eli lefet ki i pa ti koriz son  bann garson pour zot move aksyon. Eli ti pe onor son bann garson plis ki Zeova. (1 Sam. 2:27-29) Zeova pa ti vwar sa kalite defo dan Samyel.

16. Ki mannyer paran ki annan zanfan rebel i kapab santi e ki mannyer zot kapab trouv rekonfor ek gidans atraver legzanp Samyel?

¹⁶ Sa resi pa dir ki Samyel ti onte, enkyet ouswa dezapwente apre ki i ti’n tann konsernan move kondwit son bann garson. Me, bokou paran i kapab konpran ki mannyer i ti santi. Dan sa bann moman difisil, i annan en kantite zanfan ki rebel kont lotorite ek disiplin zot paran. (Lir 2 Timote 3:1-5.) Paran ki bezwen siport sa kalite douler i kapab trouv rekonfor ek gidans atraver legzanp Samyel. I pa ti les enfidelite son de garson anpes li fer sa ki byen ni menm pour en segonn. Rapel byen ki menm si parol ek disiplin i kapab pa tous leker zot zanfan, en bon legzanp i touzour sa pli meyer ansenyan. Paran i touzour annan sa loportinite pour fer Zeova, zot Papa, fyer parey Samyel.

17. Ki bann ansyen Izrael ti demann Samyel e ki mannyer i ti reazir?

¹⁷ Bann garson Samyel pa ti realize ki lefe zot vorasite ek latitid egois ti pou annan lo lepep. Bann ansyen Izrael ti dir Samyel: “Apwent en lerwa pour nou pour ki i ziz nou parey tou lezot nasyon.” Eski sa ti fer Samyel santi ki i ti’n ganny rezete? Apre tou, pour plizyer dizenn lannen i ti’n ziz sa pep de lapar Zeova. La aprezan, zot pa ti oule en senp pti profet parey Samyel ziz zot, zot ti anvi en lerwa ziz zot. Tou bann nasyon dan zalantour ti annan lerwa e bann Izraelit osi ti oule enn! Ki mannyer Samyel ti reazir? Nou lir ki “sa ti en keksoz mal dan lizye Samyel.”​—1 Sam. 8:5, 6.

18. Ki mannyer Zeova ti rekonfort Samyel e an menm tan montre gravite pese Izrael?

¹⁸ Remarke ki mannyer Zeova ti reazir kan Samyel ti koz avek li dan lapriyer konsernan sa size: “Ekout lavwa sa pep konsernan tou sa ki zot dir ou; akoz i pa ou ki zot in rezete, me se mwan ki zot in rezete, pour ki mon nepli zot lerwa.” Pa Samyel ti’n vreman bezwen ganny rekonforte! Me eski pa sa pep ti pe ensilte sa Bondye Tou Pwisan? Zeova ti demann son profet pour averti son pep ki zot ti pou pey ser lefet ki zot ti oule en lerwa imen. Ler Samyel ti obei, zot ti ensiste: “Non, me en lerwa ki pou diriz nou.” Samyel ti kontinyen obei Bondye e i ti apwent en lerwa ki Zeova ti swazir.​—1 Sam. 8:7-19.

19, 20. (a) Dan ki fason Samyel ti obeir gidans Zeova pour apwent Sail konman lerwa Izrael? (b) Dan ki fason Samyel ti kontinyen ed pep Zeova?

 ¹⁹ Me, dan ki fason Samyel ti obeir? Eski i ti fer li kontreker? Eski i ti les dezapwentman anvair son leker e fer li vin anmer? Bokou ti pou’n azir dan sa fason dan en sityasyon parey, me pa Samyel. I ti apwent Sail e rekonnet ki Zeova ki ti’n swazir li. I ti anbras Sail e sa ti en fason pour akey li e montre ki i ti pe soumet avek sa nouvo lerwa. I ti dir lepep: “Eski zot in vwar sa enn ki Zeova in swazir, ki napa personn ankor parey li parmi lepep?”​—1 Sam. 10:1, 24.

²⁰ Samyel pa ti konsantre lo defo, me lo bon kote sa zonm ki Zeova ti’n swazir. I ti reste konsantre lo son repitasyon konman en dimoun ki gard son lentegrite anver Bondye olye laprouvasyon sa pep ki ti souvan sanz son lide. (1 Sam. 12:1-4) I ti fidelman akonpli son devwar, i ti konsey pep Bondye konsernan danze spirityel ki zot ti fer fas avek e ankouraz zot pour reste fidel avek Zeova. Son konsey ti tous zot leker e lepep ti sipliy Samyel pour priy pour zot. I ti reponn zot dan en zoli fason: “Zanmen mon ti pou fer pese kont Zeova par aret priy pour zot e mon devret enstri zot sa bon semen ki drwat.”​—1 Sam. 12:21-24.

21. Dan ki fason legzanp Samyel i kapab ed ou si ou santi ou dezapwente kan lezot i ganny pozisyon ouswa privilez?

²¹ Eski ou’n deza santi ou dezapwente ler en lot dimoun i ganny en privilez ouswa pozisyon? Legzanp Samyel i fer nou rapel ki nou pa devret zanmen les zalouzi ouswa rankin pran rasin dan nou leker. (Lir Proverb 14:30.) Bondye i annan ase travay enteresan pour sak son bann serviter fidel.

22. Akoz Samyel ti annan rezon trouv sa ki byen dan Sail?

²² Samyel ti annan rezon rod sa ki byen dan Sail akoz i ti en zonm remarkab. I ti gran e atiran, kouraze e malen, toudmenm o konmansman i ti modes e annan limilite. (1 Sam. 10:22, 23, 27) Apard sa bann bon kalite, i ti osi annan en kalite presye e sa se liberte pour swazir, sa abilite pour deside lafason ki i ti  anvi viv son lavi e fer son prop desizyon. (Det. 30:19) Eski i ti byen servi sa kalite presye?

23. Ki sa kalite enportan ki Sail ti perdi e dan ki fason i ti demontre ki i ti pe vin arogan?

²³ Malerezman, kan en dimoun i ganny berse avek laglwar akoz pouvwar ki i fek gannyen, i souvan perdi son modesti. Pa tro bokou letan apre, Sail ti konmans vin arogan. I ti swazir pour dezobei lord Zeova ki Samyel ti’n donn li. Enn fwa, Sail ti sitan enpasyan ki i ti ofer sakrifis ki Samyel ti sipoze ofer. Samyel ti bezwen konsey Sail severman e i ti predir ki i ti pou napa personn dan son fanmir ki ti pou vin lerwa. Olye abes son lekor e aksepte disiplin, Sail ti fer bann keksoz pli pir ankor.​—1 Sam. 13:8, 9, 13, 14.

24. (a) Dan ki fason Sail ti dezobei Zeova ler zot ti lager avek bann Amalekit? (b) Ki mannyer Sail ti reazir anver koreksyon e ki ti desizyon Zeova?

²⁴ Atraver Samyel, Zeova ti demann Sail pour al lager avek bann Amalekit. Parmi bann lenstriksyon ki Zeova ti donnen, i ti donn lord pour egzekit Agag, sa move lerwa. Me, Sail pa ti touy Agag, ensi ki tou sa ki i ti sipoze detrir. Kan Samyel ti vin koriz li, i ti vin evidan ki Sail ti’n sanz en kantite. Olye aksepte koreksyon avek limilite, i ti rod leskiz pour esey zistifye son aksyon, i ti fer konmsi sa ki i ti’n fer pa ti grav e i ti blanm tou lo lepep. Ler Sail ti esey rod leskiz e pa aksepte disiplin an dizan ki i ti pe al ofer sa bann zannimo konman sakrifis pour Zeova, Samyel ti dir li sa parol ki nou konn tre byen: “Ekoute! Obei Bondye i pli bon ki fer en sakrifis.” Avek kouraz, Samyel ti reprimann sa zonm e dir li konsernan desizyon Zeova: Rwayote pou ganny arase avek Sail e ganny donnen avek en lot, en zonm pli meyer. a​—1 Sam. 15:1-33.

25, 26. (a) Akoz Samyel ti dan en gran sagrinasyon akoz Sail e ki mannyer Zeova ti reprimann li zantiman? (b) Ki leson nou aprann avek Samyel ler i ti al kot lakour Zese?

²⁵ Samyel ti vreman dezapwente akoz Sail pa ti’n swiv lenstriksyon Zeova. I ti sipliy Zeova lannwit antye konsernan sa  sityasyon. I ti menm dan en gran sagrinasyon akoz sa zonm. Samyel ti’n vwar potansyel dan Sail, me la aprezan tou sa la ti’n fini. I ti nepli sa zonm ki i ti konnen, i ti’n perdi son bann zoli kalite e i ti’n vir kont Zeova. Samyel pa ti oule vwar Sail ankor. Me avek letan, Zeova ti reprimann Samyel zantiman: “Pour konbyen letan ou pou kontinyen dan dey pour Sail, tandis ki mwan lo mon kote, mon’n rezet li konman lerwa Izrael? Ranpli ou korn avek delwil e ale. Mon pou anvoy ou kot Zese Betleenm, akoz mon’n trouv en lerwa pour mwan parmi son bann garson.”​—1 Sam. 15:34, 35; 16:1.

²⁶ Plan Zeova pa depan lo bann imen enparfe ki pa touzour fidel. Si en zonm i vin enfidel, Zeova pou trouv en lot pour akonpli son plan. Alor, Samyel ki ti byen aze ti nepli tris akoz Sail. Anba gidans Zeova, Samyel ti al kot lakour Zese Betleenm, kot i ti zwenn detrwa garson Zese ki ti byen enpresyonan. Pourtan, ler premye garson Zese pa ti ganny swazir, Zeova ti rapel Samyel ki i pa ti pe get zis laparans. (Lir 1 Samyel 16:7.) Finalman, Samyel ti zwenn David, pli zenn garson Zese e se li menm ki Zeova ti swazir.

27. (a) Kwa ki ti ede pour ki lafwa Samyel i vin pli for? (b) Ki mannyer ou santi anver legzanp ki Samyel in kite?

²⁷ Avan ki i ti mor, Samyel ti kapab vwar pli klerman ki Zeova ti’n fer en bon desizyon pour ranplas Sail avek David. Akoz zalouzi, Sail ti anvi touy David e i ti menm vir kont vre ladorasyon. Me, David ti demontre bann zoli kalite parey kouraz, lentegrite, lafwa ek fidelite. Menm si i pa ti reste bokou letan pour Samyel viv, son lafwa ti vin touzour pli for. I ti realize ki napa okenn dezapwentman oubyen sityasyon negatif ki Zeova pa kapab amelyore, rezourd, oubyen menm fer li vin en benediksyon. Finalman, Samyel ti mor, i ti kit deryer en bon repitasyon ki ti al pour pros san-t-an. I pa drol alor ki tou dimoun Izrael ti plere akoz zot ti’n perdi sa zonm fidel. Ziska ozordi, i byen pour bann serviter Zeova demande: ‘Eski mon pou imit lafwa Samyel?’