Zezi Kri i Garson Bondye ensi ki son zanmi prefere e pli pros. Avan ki i ti viv lo later konman en zonm, Zezi ti viv dan lesyel konman en kreatir spirityel pwisan. (Zan 17:5) Apre i ti vin lo later pour ansenny dimoun laverite konsernan Bondye. (Zan 18:37) I ti osi donn son lavi imen pour sov bann dimoun obeisan dan pese ek lanmor. (Romen 6:23) Aprezan, Zezi i Lerwa Rwayonm Bondye, en gouvernman dan lesyel ki pou anmenn Paradi lo sa later.—Revelasyon 19:16.

Bann lanz osi zot bann zanmi Bondye. Bann lanz pa ti konmans zot lavi konman bann imen lo later. Zot ti ganny kree dan lesyel avan ki Bondye ti kree later. (Zob 38:4-7) I annan plizyer milyon lanz. (Danyel 7:10) Sa bann zanmi seles Bondye i oule ki bann dimoun i aprann laverite lo Zeova.—Revelasyon 14:6, 7.

Bondye i osi annan bann zanmi lo later; i apel zot son bann temwen. Ankour, en temwen i dir sa ki i konnen konsernan en dimoun oubyen en keksoz. Bann Temwen Zeova i dir sa ki zot konnen lo Zeova ek son plan. (Izai 43:10) Parey bann lanz, bann Temwen i anvi ed ou konn laverite konsernan Zeova. Zot oule ki ou vin zanmi Bondye ou osi.