Zezi i ankor dan rezyon Pere pe al Zerizalenm. En zenn onm ris i tay kot li e tonm azenou devan li. Sa zonm i “en sef Zwif,” petet i pe servi konman en zofisye sinagog oubyen en manm Sannedren. I dir: “Bon Ansenyan, ki mon devret fer pour ganny lavi eternel?”​—Lik 8:41; 18:18; 24:20.

Zezi i reponn: “Akoz ou apel mwan bon? Napa personn ki bon eksepte Bondye.” I tre probab ki sa zenn onm i servi sa mo “bon” konman en tit, parey bann ansenyan Zwif i annan labitid fer. Menm si Zezi i en bon ansenyan, i fer sa zonm konnen ki sa tit “Bon” i devret ganny servi zis pour Bondye.

Zezi i donn li sa konsey: “Me si ou anvi ganny lavi, kontinyen obei bann komannman.” Alor sa zenn onm i demande: “Ki komannman?” Zezi i sit senk parmi sa Dis Komannman, konsernan mert, adilter, vole, fo temwannyaz e onor son paran. Apre i mansyonn en lot komannman pli enportan ankor: “Ou devret kontan ou prosen parey ou kontan ou prop lekor.”​—Matye 19:17-19.

Sa zonm i reponn: “Mon’n fer tousala, kwa ki mon devret fer ankor?” (Matye 19:20) I kapab ki i krwar ki i bezwen fer en keksoz ekstraordiner pour demontre ki i bon e kouraze pour li ganny lavi eternel. Zezi i santi ki son demann i senser e i “kontan” sa zonm. (Mark 10:21) Par kont, i annan en lobstak ki anpes sa zonm progrese.

Sa zonm i kontan son bann byen materyel, alor Zezi i dir li: “I ankor annan en keksoz ki ou bezwen fer: Ale, vann tou sa ki ou annan e donn sa larzan bann pov e ou pou ganny trezor dan lesyel e apre vin mon disip.” Sa zonm ti kapab partaz son larzan avek bann pov ki pa kapab  rann li e vin en disip Zezi. I tre probab ki Zezi i pran pitye pour li ler i vwar li leve e ale dan sagrinasyon. Vi ki sa zonm i kontan tou son bann “byen,” setadir son larises, sa i fer li pa vwar sa vre trezor. (Mark 10:21, 22) Zezi i dir: “I pou vreman difisil pour sa bann ki annan larzan antre dan Rwayonm Bondye!”​—Lik 18:24.

Bann disip i etonnen ler zot tann sa parol e sa ki Zezi i dir apre: “Anfet, i pli fasil pour en samo pas dan trou en zegwir ki pour en zonm ris antre dan Rwayonm Bondye.” Sa i pous bann disip pour demande: “Be lekel ki vreman kapab ganny sove?” Eski i telman difisil pour en dimoun ganny sove ki sa i preski enposib? Zezi i get zot dan zot figir e i dir: “Sa ki enposib pour zonm i posib pour Bondye.”​—Lik 18:25-27.

Pyer i fer resorti ki zot in fer en swa diferan avek sa zonm ris. I dir: “Gete! Nou’n kit tou sa ki nou ti annan e nou’n swiv ou, alor ki nou pou gannyen?” Zezi i dir ki i pou arive a lavenir akoz zot in fer sa bon swa: “Ler Bondye pou fer tou keksoz nouvo, Garson zonm pou asiz lo son tronn glorye e zot ki’n swiv mwan pou asiz lo 12 tronn pour ziz sa 12 tribi Izrael.”​—Matye 19:27, 28.

I kler ki Zezi pe mazin sa letan a lavenir ler tou keksoz lo later pou’n vin nouvo parey i ti ete dan zarden Edenn. Pyer ek lezot disip pou ganny zot rekonpans pour renny avek Zezi lo sa Paradi lo later. I vreman vo lapenn pour fer bann sakrifis pour en rekonpans koumsa.

Par kont, i pa zis a lavenir ki zot pou ganny en rekonpans. Bann disip i ganny serten benediksyon la konmela menm. Zezi i dir: “Napa personn ki’n kit lakaz, madanm, frer, paran oubyen zanfan akoz Rwayonm Bondye ki pa pou ganny bokou plis konmela menm e dan sa lemonn ki pe vini, lavi eternel.”​—Lik 18:29, 30.

Nenport landrwa kot bann disip pou ale, zot pou kapab vin plis pros avek lezot disip Zezi ki avek zot prop fanmir. Malerezman, i paret ki sa zenn dirizan ris pa pou ganny sa benediksyon e osi sa rekonpans pour ganny lavi dan lesyel dan Rwayonm Bondye.

Zezi i osi dir: “Me bokou ki premye pou vin dernyen e sa ki dernyen pou vin premye.” (Matye 19:30) Ki sa i vedir?

Sa zenn dirizan ris i parmi bann “premye” akoz i en sef relizye Zwif. Sa zonm i swiv bann komannman Bondye, alor i paret ki i ti’n kapab vin en disip Zezi e fer en kantite bon keksoz pour li. Par kont, i pe donn larises ek bann byen materyel premye plas dan son lavi. De lot kote, bann dimoun ordiner i vwar ki Zezi pe ansenny zot konman pour ganny lavi eternel ek laverite. Dan en sans, zot “dernyen” me la aprezan zot pe vin “premye.” Dan lavenir, zot pou asiz lo bann tronn avek Zezi dan lesyel e diriz later ki’n vin en paradi.