Anviron sis mwan apre ki Zan ki batize in konmans prese, Zezi ki annan apepre 30 an, i vin kot li kot Larivyer Zourden. Akoz? I pa zis en pti vizit pour vwar en zanmi e i pa senpleman akoz Zezi i anvi konnen ki mannyer travay Zan pe progrese. Zezi i vin kot Zan pour demann li pour batiz li.

Larepons Zan pa sirprann nou. I dir: “Mwan ki bezwen ganny batize par ou e ou ki pe vin kot mwan?” (Matye 3:14) Zan i konnen ki Zezi i Garson Bondye. Mazinen ki Zan ti bouze dan vant son manman, akoz i ti kontan ler Mari, ki ti ansent sa letan ti vin vizit Elizabet manman Zan. San dout manman Zan ti rakont li tousala pli tar. I ti pou’n osi aprann konsernan sa lanz ki ti anons nesans Zezi e bann lanz ki ti aparet avek bann berze sa zour swar ki Zezi ti ne.

Zan i konpran ki i pe batiz dimoun pour montre ki zot in repantir pour zot bann pese. Me Zezi pa’n zanmen fer pese. Menm si Zan pa oule batiz Zezi, Zezi i ensiste: “Les li safwasi, parski dan sa fason nou akonpli tou sa ki drwat.”​—Matye 3:15.

Akoz i byen pour Zezi ganny batize? Zezi pa pe ganny batize pour montre ki i’n repantir pour son bann pese. Son batenm i montre ki i’n pare pour fer lavolonte son Papa. (Ebre 10:5-7) Ziska prezan Zezi ti pe travay konman en sarpantye, me la i’n ariv ler pour li konmans sa minister ki son Papa in anvoy li pour fer lo later. Eski ou krwar ki Zan pe ekspekte en keksoz spesyal pour arive ler i batiz Zezi?

Pli tar Zan i dir: “Sa Enn ki’n anvoy mwan batiz dimoun dan delo ti dir mwan: ‘Sa enn ki ou vwar lespri sen desann e reste lo li, li menm ki batiz avek lespri sen.’” (Zan 1:33) Alor Zan pe ekspekte ki lespri sen pou desann lo en dimoun ki i batize. I kapab ki Zan pa sirprann ler Zezi i sorti anba delo e i vwar “lespri sen Bondye parey en kolonm, pe desann lo [Zezi].”​—Matye 3:16.

Me pa se tou, Labib i dir ki ‘Lesyel i ouver.’ Ki sa i vedir? I paret ki ler Zezi i ganny batize,  i rapel son lavi dan lesyel avan i ti vin lo later. Alor, aprezan Zezi i rapel sa ki i ti fer ler i ti en garson spirityel Zeova e tou keksoz ki Bondye ti’n ansenny li dan lesyel avan i vin lo later.

An plis, ler Zezi i ganny batize en lavwa dan lesyel i dir: “Sa i mon Garson ki mon kontan ki mon’n aprouve.” (Matye 3:17) Lavwa lekel sa? I pa kapab lavwa Zezi parski i lanmenm la avek Zan. I lavwa Bondye. I kler ki Zezi i Garson Bondye, pa Bondye.

I enportan pour note ki konman en imen, Zezi i en garson Bondye, zis parey sa premye zonm Adan. Apre ki disip Lik ti dekrir batenm Zezi, i ti ekri: “Zezi ti annan apepre 30 an ler i ti konmans son minister. Parey dimoun ti krwar, i ti garson Zozef, garson Eli, . . . garson David, . . . garson Abraam, . . . garson Noe, . . . garson Adan, garson Bondye.”​—Lik 3:23-38.

Adan ti en “garson Bondye” lo later, zis parey Zezi ler i ti lo later. Ler Zezi i ganny batize, i konmans en nouvo relasyon avek Bondye e vin son Garson spirityel. Alor Zezi i kapab ansenny laverite lo Bondye e montre nou semen ki anmenn ver lavi. Zezi i konmans en lot letap dan son lavi ki pou permet li pour sakrifye son lavi konman en imen pour sov limanite dan pese.