Zezi in vin Zerizalenm pour Lafet Pirifikasyon Tanp (ki osi ganny apele Hanukkah). Sa lafet i ganny selebre pour komemor ler tanp ti ganny dedye pour en dezyenm fwa. Plis ki en syek avan sa, Lerwa Siryen Antyokis Epifann 4 ti konstri en lotel par lao sa gran lotel dan tanp Bondye. Pli tar, bann garson en pret Zwif ti repran lavil Zerizalenm e dedye tanp pour Zeova en dezyenm fwa. Depi sa letan, zot ti fer en selebrasyon en fwa par an le 25 Kislev pour komemor sa levennman. Sa mwan ti koresponn avek lafen Novanm ek konmansman Desanm.

I pandan liver e i fer fre. Zezi pe marse dan tanp kot bann kolonn Salomon. Bann Zwif i antour li e demann li: “Ziska kan ou pou kit nou dan dout? Si ou menm Kris, dir nou fran.” (Zan 10:22-24) Ki mannyer Zezi pou reponn? I reponn: “Mon’n dir zot me kantmenm sa zot pa krwar.” Zezi pa’n dir zot direkteman ki i Kris, parey i ti dir sa madanm Samariten kot pwi. (Zan 4:25, 26) Me anfet, Zezi in fer zot konnen lekel li ler i’n dir: “Mon ti deza la avan Abraam ti vin an egzistans.”​—Zan 8:58.

Zezi i anvi ki bann dimoun i vwar pour zot menm ki i Kris. Zot pou konpran sa si zot konpar sa ki Zezi pe fer avek sa ki bann profesi ti dir lo Kris. Sanmenm sa, i ti demann plizyer fwa son bann disip pour pa dir personn ki i Mesi. Me la aprezan, i dir direkteman sa bann Zwif ki pe opoz li: “Sa ki mon pe fer o non mon Papa i rann temwannyaz lo mwan. Me zot pa krwar.”​—Zan 10:25, 26.

Akoz zot pa krwar ki Zezi i Kris? I dir: “Zot pa krwar parski zot pa mon bann mouton. Mon bann mouton i ekout mon lavwa. Mon konn zot e zot swiv mwan. Mon donn zot lavi eternel e zot pa pou zanmen ganny detrir e personn pa pou aras zot dan mon lanmen. Sa ki mon Papa in donn mwan i annan plis valer ki tou lezot keksoz.” Apre, Zezi i montre zot ki kantite i pros avek son Papa ler i dir: “Mwan ek mon Papa nou en sel.” (Zan 10:26-30) Zezi i la lo later e son Papa i dan lesyel, alor i pa kapab ki i pe dir ki li ek son Papa i vreman en sel dimoun. Plito, zot en sel dan sa sans ki zot annan menm lobzektif e zot ini.

Parol Zezi i fer bann Zwif telman ankoler ki ankor enn fwa zot anmas bann ros pour touy li. Sa pa fer Zezi per, i dir: “Mon’n fer devan zot en kantite bon keksoz ki mon Papa in dir mwan fer. Pour ki bon keksoz ki mon’n fer ki zot pe saboul mwan?” Zot reponn: “Nou pe saboul ou, pa pour bann bon keksoz ki ou’n fer, me akoz ou pe dir bann keksoz mal kont Bondye. Parski . . . ou fer krwar ou en bondye.” (Zan 10:31-33) Zezi pa’n zanmen dir ki i en bondye, alor akoz zot pe fer sa lakizasyon?

Zezi pe dir ki i annan en pouvwar ki bann Zwif i krwar zis Bondye i annan. Par egzanp, Zezi fek dir zot: “Mon donn . . . lavi eternel” “mon bann mouton,” me pour bann Zwif, sa i en keksoz ki imen pa kapab fer. (Zan 10:28) Bann Zwif pa aksepte ki Zezi in dir an piblik ki i’n ganny lotorite avek son Papa.

Pour montre ki zot lakizasyon i fo, Zezi i demande: “Pa i’n ganny ekrir dan zot Lalwa [dan Psonm 82:6], ‘Mon’n dir, “Zot bann bondye”’? Sa bann ki ti ganny kondannen i ganny apele ‘bann bondye’ dan parol Bondye. . . . Be mwan, mon Papa in sanktifye mwan e anvoy mwan dan lemonn, eski zot pe dir mwan, ‘Ou pe dir bann keksoz mal kont Bondye’ parski mon’n dir, ‘Mon Garson Bondye’?”​—Zan 10:34-36.

Labib i menm refer avek bann ziz imen ki enparfe konman “bann bondye.” Alor ki mannyer sa bann Zwif i kapab vwar li mal ki Zezi i dir “Mon Garson Bondye”? I koz lo en keksoz ki devret  konvenk zot: “Si mon pa pe fer travay mon Papa, pa bezwen krwar mwan. Me si mon pe fer li, menm si zot pa krwar dan mwan, omwen krwar dan sa bann keksoz ki mon pe fer, koumsa zot a konnen e kontinyen krwar ki mon Papa i ini avek mwan e mwan mon ini avek mon Papa.”​—Zan 10:37, 38.

Ankor enn fwa, zot esey tyonbo Zezi, me ankor enn fwa i sap zot. I kit Zerizalenm e al lot kote Larivyer Zourden kot Zan ti batiz dimoun apepre kat-r-an pase. I paret ki sa landrwa pa tro lwen avek sid Lanmer Galile.

Lafoul i vin kot Zezi e dir: “Zan pa ti fer ni menm en mirak, me tou sa ki Zan ti dir lo sa zonm i vre.” (Zan 10:41) Alor, bokou Zwif i annan lafwa dan Zezi.