Zezi fek repet son lenstriksyon konsernan lapriyer, me sa pa sa sel size ki i’n mansyonn plizyer fwa dan son minister. Ler i ti pe fer bann mirak Galile, Zezi ti ganny akize konmkwa i fer son bann mirak atraver pouvwar bann demon. La i ganny sa menm lakizasyon Zide.

Lafoul i enpresyonnen ler Zezi i sas en demon ki anpes en zonm koze. Me sa pa enpresyonn bann dimoun ki kritik li. Zot fer sa menm fo lakizasyon: “Se avek pouvwar Belzebib, sef bann demon ki i sas demon.” (Lik 11:15) Lezot dimoun ki pe rod plis levidans konsernan lidantite Zezi i demann li pour fer en siny sorti dan lesyel.

Zezi i realize ki zot pe esey teste li, alor i reponn zot parey i ti fer ler i ti ganny kritike Galile. I dir ki si i annan en divizyon dan en rwayonm, i pa pou reisi. I rezonn avek zot: “Si Satan i annan divizyon dan li menm, ki mannyer son rwayonm pou kapab reisi?” Apre Zezi i dir zot klerman: “Si se par ledwa Bondye ki mon sas demon, zot pa’n realize ki Rwayonm Bondye in arive.”​—Lik 11:18-20.

Ler Zezi i mansyonn “ledwa Bondye,” sa i devret fer sa bann dimoun mazin sa ki ti arive dan listwar Izrael. Bann ki ti dan lakour rwayal Faraon ler Moiz ti fer en mirak ti dir: “Sa i ledwa Bondye.” I ti osi “ledwa” Bondye ki ti ekri sa Dis Komannman lo sa de plak ros. (Egzod 8:19, NWT; 31:18) Pareyman, se “ledwa Bondye,” setadir i gras a lespri sen oubyen lafors aktif Bondye ki Zezi i kapab sas demon e geri bann dimoun malad. Alor, vreman Rwayonm Bondye in arive san ki son bann opozan in realize parski Zezi, sa Lerwa ki Bondye in swazir pour diriz son Rwayonm i la avek zot pe fer bann mirak.

Lefet ki Zezi i kapab sas bann demon i montre ki i annan pouvwar lo Satan, zis parey en zonm i kapab pli for e ranport laviktwar lo en zonm arme ki pe vey en pale. Ankor enn fwa Zezi i repet son legzanp konsernan en demon ki sorti dan en dimoun. Si sa dimoun pa ranpli sa lespas avek bann bon keksoz, sa demon pou tournen avek set lezot demon e finalman sityasyon sa dimoun i vin pli pir ki avan. (Matye 12:22, 25-29, 43-45) Sanmenm sa ki pe arive avek nasyon Izrael.

En madanm ki pe ekout Zezi i dir: “Ere sa madanm ki’n anmenn ou dan son vant e ki’n donn ou tete!” Bann madanm Zwif ti a swete vin manman en profet, sirtou manman Mesi. Alor sa madanm i kapab pe mazinen ki Mari i bezwen vreman ere vi ki i manman en ansenyan koumsa. Par kont Zezi i koriz sa madanm e montre li kwa ki vreman fer en dimoun ere: “Non, plito, ere sa bann ki tann parol Bondye e obei li!” (Lik 11:27, 28) Zezi pa’n zanmen dir ki Mari i devret ganny loner spesyal. O kontrer, en msye oubyen madanm i kapab vreman ere si i en serviter fidel Bondye, pa akoz son fanmir ouswa akoz sa ki i’n akonpli.

Parey Zezi ti fer Galile, i koz severman avek bann dimoun ki demann li en siny sorti dan lesyel. I dir ki zot pa pou ganny okenn siny eksepte “siny profet Zonas.” Zezi pe koz lo ler Zonas ti pas trwa zour dan vant en pwason e ler i ti pres avek lardyes ki ti pous bann dimoun Niniv pour repantir. Zezi i dir: “Me la, i annan enn ki pli enportan ki Zonas.” (Lik 11:29-32) Zezi i osi pli enportan ki Salomon, sa enn ki larenn Seba ti vwayaze pour al ekout son lasazes.

Zezi i azoute: “Apre ki en dimoun i alim en lalanp, i pa kasyet li oubyen met li anba en  pannyen, me i met li anler lo en keksoz.” (Lik 11:33) Petet, Zezi pe esey dir ki ansenny e fer bann mirak pour sa bann dimoun rebel i parey kasyet en lalanp akoz zot pa pe konsantre lo sa ki enportan e zot pa konpran sinifikasyon son bann mirak.

Zezi fek sas en demon e i’n osi geri en zonm ki pa ti kapab koze. Sa i devret pous sa bann dimoun pour glorifye Bondye e dir lezot sa ki Zeova pe akonpli. Alor i averti sa bann dimoun ki kritik li: “Fer sir ki lalimyer ki dan ou i pa fernwanr. Alor, si ou lekor antye i dan lalimyer e napa okenn parti ou lekor ki dan fernwanr, i pou briye parey en lalanp ki kler ou.”​—Lik 11:35, 36.