1, 2. Ki mannyer Romen 5:12 i kapab ed nou?

 ROMEN 5:12 i dir: “Pour sa rezon, zis parey atraver en sel zonm pese in antre dan lemonn e pese in anmenn lanmor, alor tou dimoun i mor parski tou dimoun in fer pese.” Sa i enn bann verse ki nou konn tre byen e nou servi souvan pour ansenny dimoun lo Labib.

² Sa verse i ganny servi plizyer fwa dan liv Ki Labib i vreman dir? ek Ki Labib i dir? Ler nou etidye sapit 3, 5, ek 6 avek nou zanfan ek lezot, nou pou normalman lir Romen 5:12. Petet nou servi sa verse pour ed zot konpran akoz later i pa en paradi, akoz nou bezwen en ranson e akoz nou mor. Me sa verse i osi kapab ed nou pour ogmant nou lapresyasyon pour sa lanmitye ki nou annan avek Zeova. I kapab ed nou pour pli determinen pour fer li plezir e kontinyen esper avek enpasyans bann keksoz ki i’n promet.

3. Ki nou devret rapel konsernan nou sityasyon?

 ³ Malerezman, nou tou nou fer pese. Toulezour nou fer fot. Me Zeova i kontan pardonnen. I konnen ki nou enparfe e i pare pour pardonn nou. (Psonm 103:13, 14) Zezi ti dir nou ki nou devret demann Bondye pour pardonn nou bann pese. (Lik 11:2-4) Ler Zeova i pardonn bann fot ki nou’n fer dan lepase, nou pa bezwen kontinyen mazin lo zot. Annou vwar ki mannyer Zeova i kapab pardonn nou.

4, 5. (a) Kwa ki ed nou konpran Romen 5:12? (b) Ki savedir “labonte ekstraordiner”?

⁴ Liv Romen, espesyalman sapit 6, i ed nou konpran lafason ki Zeova i kapab pardonn nou bann pese. Dan sapit 3, nou aprann ki “tou dimoun in fer pese.” Apre sa, Pol ti eksplike: “Zot ganny aprouve konman drwat parski zot in ganny libere gras a sa ranson ki Kris Zezi in peye. Sa i en kado ki Bondye i donnen akoz son labonte ekstraordiner.” (Romen 3:23, 24) Sa mo Grek ki’n ganny tradwir “labonte ekstraordiner” i donn sa nide ki en keksoz i ganny fer zantiman san ekspekte nanryen an retour, en keksoz ki ou pa’n fer zefor pour gannyen e ki ou pa merite.

⁵ En spesyalis ti eksplike ki sa mo Grek i souvan pe refer avek sa ki zot Bondye ek Kris in fer pour sov limanite dan pese ek lanmor. Alor, New World Translation an Angle i tradwir sa mo Grek konman “labonte ekstraordiner.” Annou vwar sa ki Bondye in fer pour nou e ki mannyer son labonte ekstraordiner in benefisye nou la konmela e donn nou en lespwar pour lavenir.

6. Lekel ki kapab benefisye avek labonte ekstraordiner Bondye e konman?

⁶ Vi ki Adan in fer pese, pese ek lanmor in afekte tou imen enparfe ki’n egziste. Sanmenm sa Labib i dir ki “par pese en sel zonm, lanmor in dominen parey en lerwa.” Me Zeova in demontre en gran labonte ekstraordiner e in donn en fason pour sov tou limanite “gras a Zezi Kri.” (Romen 5:12, 15, 17) “Atraver lobeisans en sel zonm, en kantite pou vin drwat.” Alor, zot kapab enpasyan pour ganny “lavi eternel gras a Zezi Kri.”​—Romen 5:19, 21.

7. Akoz sa ranson i bon e i en kado ki nou pa merite?

⁷ Reflesir lo sa: Zeova pa ti bezwen donn son Garson konman en ranson. Me i ti demontre en gran labonte par donn nou en mwayen pour sov nou  dan pese ek lanmor. Napa personn parmi nou ki merit sa ki Zeova ek Zezi in fer pour nou. Pa nou vreman rekonesan ki zot in fer li posib pour nou ganny pardonnen e viv pour touzour! Alor, annou montre Bondye nou lapresyasyon par lafason ki nou viv nou lavi.

8. Ki latitid nou devret rezete?

⁸ Nou konnen ki Bondye i pare pour pardonn bann pese, menm bann pese grav. Kantmenm sa, nou pa devret servi labonte ekstraordiner Zeova konman en leskiz pour fer en keksoz mal e mazinen ki ‘Zeova pou pardonn mwan.’ Dan premye syek, menm ler serten zapot ti ankor vivan, ti annan serten Kretyen ki ti annan sa latitid. (Lir Zid 4.) Ozordi, nou bezwen fer byen atansyon ki nou pa ganny enfliyanse par lezot e dousman dousman konmans mazin parey sa bann Kretyen.

9, 10. Ki mannyer Pol ek lezot ti ganny libere dan pese ek lanmor?

⁹ Pol ti dir avek bann Kretyen ki i pou mal pour zot mazinen ki si zot kontinyen fer pese, Bondye pou pardonn zot. Pol ti dir ki zot devret rezet sa kalite panse akoz zot in “mor an sa ki konsern pese.” (Lir Romen 6:1, 2.) Ki Pol ti pe sey dir?

¹⁰ Par ranson, Bondye ti pardonn bann pese Pol ek lezot Kretyen dan premye syek. Zeova ti swazir zot avek lespri sen pour vin son bann garson. Si zot reste fidel, zot pou viv dan lesyel e dirize avek Kris. Vi ki zot ti ankor vivan lo later, alor, ki mannyer zot in “mor an sa ki konsern pese”? Pol ti servi en konparezon pour montre ki zot fason viv ti’n sanz konpletman. I ti dir ki apre ki Zezi ti’n mor, i ti resisite konman en lespri imortel. Sa i rezon akoz lanmor ti “nepli annan pouvwar lo li.” Pareyman, i ti konmsi bann Kretyen osi ti’n mor. Zot lavi ti’n sanz konpletman parski zot ti nepli les zot bann dezir peser kontrol zot. Depi sa zour, zot ti fer zot mye pour viv en lavi ki ti fer plezir Bondye. Zot ti’n “mor an sa ki konsern pese me vivan an sa ki konsern Bondye gras a Kris Zezi.”​—Romen 6:9, 11.

11. Ki mannyer bann Kretyen ozordi i “mor an sa ki konsern pese”?

¹¹ Me nou? Ki mannyer nou’n “mor an sa ki konsern pese”? Dan lepase, i kapab ki nou’n fer en kantite move keksoz san realize ki mannyer Zeova ti vwar nou bann aksyon. Nou ti parey “lesklav lenpirte ek lemal,” savedir “lesklav pese.” (Romen 6:19, 20) Ler nou ti aprann dan Labib ki mannyer Bondye i anvi nou viv, nou ti fer bann sanzman, dedye nou lavi avek li e nou ti batize. Nou annan en profon dezir pour obeir Zeova e pour viv dan en fason ki fer li plezir. Nou’n “ganny libere avek pese” e nou’n “vin lesklav ladrwatir.”​—Romen 6:17, 18.

12. Ki swa ki sakenn parmi nou i bezwen fer?

¹² Par kont, nou annan en swa. Pol ti dir: “Pa les pese kontinyen domin lo  zot lekor mortel pour ki zot pa obei dezir zot lekor mortel.” (Romen 6:12) Nou kapab swa les nou ganny kontrole par nou bann move panse ek dezir, ouswa nou kapab kontrol zot. Demann ou lekor: ‘Eski mon les mon bann move dezir vin sitan for ki mon fer sa ki mal? Ouswa, eski mon rezet zot deswit?’ Si nou vreman apresye labonte ekstraordiner Bondye, nou pou fer nou mye pour fer li plezir.

13. Akoz nou asire ki nou kapab fer sa ki byen?

¹³ Dan premye syek, serten dimoun dan lavil Korent ti bann voler, omoseksyel, adilter, adorater zidol ek bann soular. Me ler zot ti arive konn Zeova e kontan li, zot ti sanz zot lavi. Zot ti onte pour sa ki zot ti abitye fer. (Romen 6:21; 1 Korentyen 6:9-11) Bann Kretyen Ronm osi ti bezwen fer bann menm sanzman. Pol ti dir zot: “Zot ki’n mor me ki aprezan vivan, pa les pese servi zot lekor konman bann zarm pour fer sa ki mal, me les Bondye servi zot lekor konman bann zarm pour fer sa ki drwat.” (Romen 6:13) Pol ti asire ki zot ti kapab fer sa ki byen e kontinyen profit labonte ekstraordiner Bondye.

14, 15. Ki nou devret demann nou lekor?

¹⁴ I menm parey ozordi. Petet, serten nou bann frer ek ser ti viv parey bann ki ti reste Korent. Me apre ki zot in konn Zeova, zot in sanze. I konmsi zot in ganny lave e zot prop. Pour fer plezir Zeova, nou tou nou’n fer sanzman dan nou lavi. Menm konmela nou anvi montre nou lapresyasyon pour labonte ekstraordiner Bondye. Alor, nou determinen pour lager avek nou bann move dezir e servi Zeova tou nou lavi.

¹⁵ Byensir, nou bezwen evite komet bann pese grav parey serten ki ti reste Korent ti fer. Nou pa kapab kontinyen fer sa bann keksoz e an menm tan ekspekte ki Bondye pou demontre son labonte ekstraordiner e pardonn nou. Me ki arive avek bann pese ki serten i krwar i pa sitan grav? Eski nou determinen pour fer tou zefor pour obei Zeova dan tou keksoz?​—Romen 6:14, 17.

16. Ki mannyer nou konnen ki nou devret evit bann pese ki pa ganny mansyonnen dan 1 Korentyen 6:9-11?

¹⁶ Mazin zapot Pol. I ti ekrir: “Mon en imen enparfe ki’n ganny vann konman en lesklav pese. Parski mon pa konpran akoz ki mon pe fer sa. Mon pa pe fer sa ki mon ti a kontan fer, me mon fer sa ki mon pa ti a kontan fer.” (Romen 7:14, 15) Menm si i pa ti pe fer sa bann keksoz ki ganny mansyonnen dan 1 Korentyen 6:9-11, Pol ti admet  ki i ti ankor fer pese. I ti anvi fer plezir Zeova, alor i ti lager kont bann move keksoz. (Lir Romen 7:21-23.) Annou imit son legzanp e fer tou sa ki nou kapab pour obeir Zeova.

17. Akoz ou anvi vin en dimoun onnet?

¹⁷ Par egzanp, nou konnen ki nou bezwen onnet pour servi Zeova. (Lir Proverb 14:5; Efezyen 4:25.) Nou pa anvi vin parey Satan, ki “papa mansonz.” Nou rapel ki Ananyas e son madanm ti mor akoz zot ti koz manti. Alor, annou pa koz manti. (Zan 8:44; Akt 5:1-11) I vre ki i en bon keksoz pou pa koz mansonz, me lonnekte i plis ki sa. Si nou vreman annan lapresyasyon pour labonte ekstraordiner Bondye, nou pou osi onnet dan lezot keksoz.

18, 19. Ki savedir lonnekte?

¹⁸ En dimoun i kapab dezonnet san koz mansonz. Par egzanp, Zeova ti dir avek bann Izraelit: “Zot pa devret vole, zot pa devret anbet kanmarad e zot pa devret tronp kanmarad.” Akoz zot ti bezwen fer sa? Zeova ti dir: “Zot devret sen, akoz mwan, Zeova zot Bondye, mon sen.” (Levitik 19: 2, 11, NWT) Menm si nou pa koz en mansonz, si nou fer lezot krwar dan en keksoz ki pa vre, sa osi i montre ki nou dezonnet.

¹⁹ Par egzanp, en zonm i dir avek son sef oubyen avek lezot ki i travay avek, ki i bezwen sorti boner dan travay akoz i annan en lapwentman medikal. Me sa i pa sa vre rezon. I zis anvi aret travay pli boner. Son swadizan lapwentman medikal i sipoze zis en pti vizit kot farmasi ouswa pour al pey son bil medikal. Eski sa zonm i onnet ouswa i pe anbet lezot? Sa zonm i’n fer lezot krwar dan en keksoz ki pa vre. Par ler, dimoun i anbet lezot pour ganny en keksoz ki zot anvi ouswa pour evit pinisyon. Me nou obeir Zeova ki ti dir: “Zot pa devret anbet kanmarad.” Nou anvi fer sa ki drwat e sen parey i dir nou fer.​—Romen 6:19.

20, 21. Si nou apresye labonte ekstraordiner Bondye, kwa ankor ki nou devret evite?

²⁰ Byensir, nou evite bwar konman en soular, fer adilter e lezot pese grav. Apard sa, nou anvi evite fer nenport keksoz ki pou depler Zeova. Par egzanp, nou pa zis evit limoralite seksyel, me nou osi evit bann divertisman ki imoral. Nou pa zis evite bwar pour sou, me nou osi pa bwar ziska ki nou pros pour sou. Petet nou pou bezwen travay dir pour reziste sa bann tel tantasyon, me i posib.

²¹ Nou fer li nou lobzektif pour fer parey Pol ti dir: “Pa les pese kontinyen domin lo zot lekor mortel pour ki zot pa obei dezir zot lekor mortel.” (Romen 6:12; 7:18-20) I vre ki nou pa kapab evit tou pese, me ler nou lager kont toudsort kalite pese, nou montre ki nou vreman apresye labonte ekstraordiner ki Bondye ek Kris i’n demontre anver nou.

22. Ki rekonpans ki nou enpasyan pour gannyen si nou vreman apresye labonte ekstraordiner Zeova?

²² Zeova in pardonn nou bann pese e i kapab kontinyen pardonnen. Pa nou apresye son labonte ekstraordiner! Alor, annou travay dir pour evite fer bann keksoz ki i dir i mal, menm si lezot pa konsider zot konman bann pese. Ki rekonpans ki nou enpasyan pour gannyen si nou fer sa? Pol ti dir: “Aprezan ki zot in ganny libere avek pese e vin lesklav Bondye, zot pe raport fri, sa i sentete e rekonpans se lavi eternel.”​—Romen 6:22.