Dan lepase, nou ti pans koumsa akoz sa ki’n ganny ekrir dan Ebre 12:16. Dan sa verse i dir ki Ezai “pa [ti] apresye bann keksoz sakre” e i “ti vann son drwa konman premye ne pour en repa” avek Zakob. Alor, nou ti panse ki ler Zakob ti resevwar “drwa konman premye ne,” i ti osi ganny sa privilez pour vin zanset Mesi.​—Matye 1:2, 16; Lik 3:23, 34.

Par kont, par etidye o profon lezot resi dan Labib, nou’n vwar ki en zonm pa ti neseserman en premye ne pour li kapab vin zanset Mesi. Annou vwar serten sa bann resi Labib:

Garson premye ne Zakob avek son madanm Lea ti Ribenn. Son premye garson ki i ti fer avek Rasel ti Zozef. Ler Ribenn ti fer imoralite seksyel, i ti perdi son drwa konman premye ne e sa drwa ti ganny pase avek Zozef. (Zenez 29:31-35; 30:22-25; 35:22-26; 49:22-26; 1 Kronik 5:1, 2) Kantmenm sa, Mesi pa ti vin atraver ni Ribenn ni Zozef. I ti vin atraver Zida, katriyenm garson Zakob ek Lea.​—Zenez 49:10.

Lik 3:32 i mansyonn senk lezot zanset Mesi e i paret ki zot tou zot ti bann premye ne. Par egzanp, Boaz ti papa Obed e Obed ti papa Zese.​—Rit 4:17, 20-22; 1 Kronik 2:10-12.

David, garson Zese pa ti en premye ne. Anfet, i ti dernyen parmi wit garson. Par kont, Mesi ti sorti dan laliny desandans David. (1 Samyel 16:10, 11; 17:12; Matye 1:5, 6) Pareyman, lot zanset Mesi ti  Salomon, menm si i pa ti premye ne David.​—2 Samyel 3:2-5.

Sa pa vedir ki si en garson ti premye ne sa ti napa okenn lenportans. En garson premye ne ti ganny bann privilez ki lezot garson pa ti gannyen. Souvandfwa, i ti vin sef lakour apre son papa e i ti ganny doub par dan leritaz.​—Zenez 43:33; Deterononm 21:17; Zozye 17:1.

Me drwa en premye ne ti kapab ganny transfer avek en lot garson. Ler Abraam ti fer Ismael ale, son drwa konman premye ne ti ganny transfer avek Izaak. (Zenez 21:14-21; 22:2) Parey nou’n dir pli boner, drwa premye ne Ribenn ti ganny transfer avek Zozef.

Me ki pwen zapot Pol ti pe fer resorti dan Ebre 12:16? Sa verse i dir: “Veye ki napa personn parmi zot ki pe pratik imoralite seksyel oubyen ki pa apresye bann keksoz sakre, parey Ezai ki ti vann son drwa konman premye ne pour en repa.”

Dan sa verse, Pol pa ti pe koz lo bann zanset Mesi. Plito, i ti pe averti bann Kretyen. I ti dir zot: “Kontinyen mars lo sa bon semen” pour ki “Bondye pa aret demontre son labonte ekstraordiner anver zot.” Malerezman, sa ti kapab arive si zot ti komet imoralite seksyel. (Ebre 12:12-16) Dan sa ka, zot ti pou parey Ezai ki “pa [ti] apresye bann keksoz sakre” me ki ti anvi satisfer son prop dezir.

Dapre koutim sa letan, petet parfwa Ezai ti’n ganny sa privilez pour ofer bann sakrifis avek Zeova. (Zenez 8:20, 21; 12:7, 8; Zob 1:4, 5) Me Ezai ti sitan konsantre lo son prop dezir ki i ti vann son drwa konman premye ne pour en bol styou. Petet Ezai ti anvi evit sa soufrans ki Zeova ti’n predir ki bann desandans Abraam ti pou pas ladan. (Zenez 15:13) I ti osi montre ki i pa ti apresye bann keksoz sakre ler i ti marye avek de madanm payen, en keksoz ki ti fer son paran vreman sagren. (Zenez 26:34, 35) I ti konpletman diferan avek Zakob ki ti fer sir ki i ti marye avek en adorater sa vre Bondye!​—Zenez 28:6, 7; 29:10-12, 18.

Ki sa bann resi Labib i ansenny nou lo bann zanset Mesi? Serten ti bann garson premye ne e serten non. Sa ti en keksoz ki bann Zwif ti konpran e aksepte. Ki mannyer nou konn sa? Parski zot ti admet ki Kris ti pou en desandans David, sa dernyen garson Zese.​—Matye 22:42.