Mary ek son msye, John, a i reste dan en pei kot en kantite dimoun ki sorti Filipin i vin reste e travay. Alor zot servi sa loportinite pour anons sa bon nouvel avek sa bann dimoun. Pandan pandemi COVID-19, Mary ti konmans fer letid Labib avek bann dimoun dan sa pei kot i pe reste e osi avek dimoun ki reste dan lezot pei. Ki mannyer i ti fer sa?

Mary ti demann son bann etidyan Labib: “Eski ou konn en lot dimoun ki ti pou kontan etidye Labib?” Si zot ti dir li wi, i ti demann zot pour entrodwir li avek zot. Sa i en senp kestyon ki anmenn bon rezilta. Akoz? Parski normalman dimoun ki kontan sa ki zot pe aprann dan Parol Bondye i anvi koz lo sa ki zot pe aprann avek zot bann manm fanmir ek zanmi pros. Alor ki ti arive ler Mary ti demann sa kestyon?

En etidyan Labib Mary ki apel Jasmin, ti entrodwir Mary avek kat dimoun ki zot osi zot ti anvi etidye Labib. Enn parmi zot ki apel Kristine, ti telman kontan son letid Labib ki i ti demann Mary pour fer son letid de fwa par semenn. Ler Mary ti demann li si i konn okenn dimoun ki anvi etidye Labib, Kristine ti dir: “Wi mon pou entrodwir ou avek mon bann zanmi.” Dan zis detrwa semenn, Kristine ti entrodwir Mary avek kat son bann zanmi ki ti anvi etidye Labib. Pli tar, Kristine ti entrodwir Mary avek lezot son bann zanmi e serten parmi zot ti osi donn non lezot dimoun ki zot krwar ti pou kontan etidye Labib.

Kristine ti osi anvi ki son bann fanmir ki reste Filipin i etidye Labib. Alor i ti koz avek son fiy, Andrea. O konmansman, Andrea ti krwar ki larelizyon Temwen Zeova i drol, ki nou pa krwar dan Zezi e ki nou servi zis Ansyen Testaman. Me apre zis en letid, i ti realize ki sa ki i ti krwar lo Temwen Zeova pa ti vre. Sak fwa i ti aprann en nouvo keksoz dan Labib, i ti dir: “Si Labib ki’n dir i bezwen ki i laverite!”

Avek letan, Andrea ti entrodwir Mary avek de son zanmi ek enn son koleg travay. Zot osi zot ti konmans etidye Labib. Andrea ti osi annan en tantin ki pa ti vwar kler, ki ti apel Angela. I ti toultan pe ekoute ler Mary ti pe fer letid avek Andrea. Me Mary pa ti konnen ki Angela ti pe ekoute. En zour, Angela ti demann Andrea pour entrodwir li avek Mary e i ti demande pour li ganny en letid Labib. Angela ti kontan sa ki i ti pe aprann. Dan en mwan, i ti konn en kantite verse Labib parker e i ti anvi etidye Labib  kat fwa par semenn! Avek led Andrea, i ti konmans swiv renyon regilyerman atraver video konferans.

Ler Mary ti aprann ki Joshua, msye Kristine ti toultan akote Kristine ler i ti pe fer son letid, Mary ti demann li si i ti pou kontan etidye Labib ansanm avek zot. Joshua ti dir: “Mon pou zis ekoute me pa demann mwan okenn kestyon parski si ou fer sa mon pou ale.” Zis pandan sa premye senk minit letid, i ti demann plis kestyon ki Kristine e i ti anvi etidye Labib li osi.

Atraver en senp kestyon ki Mary ti demande, i ti ganny plizyer letid Labib. Mary ti fer laranzman pour ki serten parmi zot i ganny led avek lezot frer ek ser. An tou, Mary ti konmans 28 letid Labib dan kat diferan pei.

Jasmin, ki ti son premye etidyan ki nou’n koz lo la, ti batize an Avril 2021. Kristine ti batize Me 2022 e in retourn Filipin kot son fanmir. De lezot etidyan ki Kristine ti’n entrodwir avek Mary ti osi batize. Angela ti batize detrwa mwan pli tar e aprezan i en pionye ordiner. Joshua, msye Kristine ansanm avek zot fiy Andrea e avek lezot etidyan, pe byen progrese.

Dan premye syek, sa bon nouvel ti propaz vitman parmi bann manm fanmir ek zanmi. (Zan 1:41, 42a; Akt 10:24, 27, 48; 16:25-33) Alor, demann ou bann etidyan Labib ek lezot ki enterese: “Eski ou konn en lot dimoun ki ti pou kontan etidye Labib?” Si ou demann sa senp kestyon petet ou osi ou pou ganny plis dimoun ki pou anvi etidye Labib.