1-2. (a) Kan ki i kapab difisil pour nou pardonn en dimoun? (b) Ki mannyer Denise ti montre ki i ti’n pardonn sa drayver?

 ESKI ou vwar li difisil pour pardonn lezot? En kantite nou i santi koumsa sirtou ler en dimoun in dir oubyen fer en keksoz ki’n vreman bles nou santiman. Me i annan serten keksoz ki nou kapab fer ki pou ed nou pour aret ankoler e pour pardonnen. Par egzanp, annou vwar leksperyans en ser ki apel Denise a ki ti reisi pardonn en dimoun dan en sityasyon vreman difisil. An 2017, Denise ek son fanmir ti al vizit Biro prensipal Temwen Zeova ki ti’n fek ouver. Ler zot ti pe retourn kot zot, en drayver ti perdi kontrol son transpor e tap avek zot transpor. Ler sa ti arive, Denise ti perdi konnesans. Ler i ti leve, i ti aprann ki son bann zanfan ti’n ganny dimal grav e ki son msye Brian ti’n mor dan sa aksidan. Ler Denise i mazin lo sa ki ti arive, Denise i dir: “Mon ti santi mwan vreman sagren e konfize.” Pli tar, Denise ti aprann ki sa drayver pa ti anba lenfliyans drog oubyen lalkol e i pa ti’n ganny distrer. Denise ti priye pour li ganny lape lespri.

² Sa drayver ki ti tap zot ti ganny arete e ganny sarze pour touy msye Denise par aksidan. Si sa drayver ti ganny trouve koupab, i ti kapab al prizon me lakour ti enform Denise ki sa ki i dir pour annan en gran lefe lo si sa zonm ti pou al prizon oubyen non. Denise i dir: “Mon ti bezwen koz lo sa moman pli difisil dan mon lavi e i ti konmsi en dimoun in vid disel dan mon boubou.” Detrwa semenn pli tar, Denise ti al ankour e la i ti bezwen koz lo sa ki ti’n arive devan sa zonm ki ti’n fer son fanmir soufer en kantite. Ki Denise ti dir? Denise ti demann sa ziz pour pran pitye pour sa zonm. b Ler Denise ti fini  koze, sa ziz ti konmans plere. Sa ziz ti dir: “I fer 25 an depi ki mon en ziz. Dan tou bann ka ki’n pas devan mwan, zanmen mon’n deza tann en keksoz koumsa. Mon pa’n zanmen tann fanmir sa viktim sipliy mwan pour pran pitye pour sa akize. Mon pa zanmen tann dimoun koz lo lanmour ek pardon ankour.”

 3. Kwa ki ti ed Denise pour pardonnen?

³ Kwa ki ti ed Denise pour pardonnen? I ti medit lo lafason ki Zeova i pardonnen. (Mik. 7:18) Ler nou apresye lefet ki Zeova in pardonn nou, sa pou motiv nou pour nou pardonn lezot.

 4. Ki Zeova i anvi nou fer? (Efezyen 4:32)

⁴ Zeova i anvi nou pardonn lezot volonterman parey li i’n pardonn nou. (Lir Efezyen 4:32.) I ekspekte ki nou pare pour pardonn bann ki’n ofans nou. (Ps. 86:5; Lik 17:4) Dan sa lartik, nou pou vwar trwa keksoz ki pou ed nou pour pardonn lezot.

PA INYOR OU BANN SANTIMAN

 5. Dapre Proverb 12:18, ki mannyer nou kapab santi ler en dimoun i ofans nou?

⁵ I kapab arive ki en dimoun i dir oubyen fer en keksoz ki vreman bles ou santiman. Ou kapab santi koumsa sirtou si sa dimoun i enn ou zanmi pros oubyen en manm ou fanmir. (Ps. 55:12-14) Parfwa nou kapab sitan ankoler oubyen ofanse ki nou santi konmsi nou’n ganny pike avek en zouti. (Lir Proverb 12:18.) I kapab ki nou esey inyor sa santiman. Me si nou fer sa, i pou konmsi nou’n ganny pike avek en kouto e nou pa tir sa kouto dan sa blesir. Pareyman, nou pa kapab ekspekte ki nou santiman i sanze si nou inyor zot.

 6. Ler en dimoun i ofans nou, ki mannyer sa i kapab fer nou reazir?

⁶ Ler en dimoun i ofans nou, i kapab ki nou premye reaksyon i pour pran lakoler. Labib i dir ki i kapab arive ki nou ankoler me i osi dir ki nou pa devret reste ankoler. (Ps. 4:4; Efe. 4:26) Akoz? Parski lafason ki nou santi i souvan kapab fer nou azir dan en serten fason e lakoler pa souvan anmenn bon rezilta. (Zak 1:20) Rapel ki parfwa i kapab arive ki nou ankoler me nou ki deside si nou pou reste ankoler avek sa dimoun.

 7. Ler en dimoun i bles nou santiman, ki lezot santiman nou kapab annan?

⁷ Ler nou ganny trete dan en move fason, i kapab ki nou annan lezot santiman ki fer nou soufer. Annou vwar legzanp en ser ki apel Ann. Ann i dir: “Ler mon ti ankor en zanfan, mon papa ti kite avek mon manman e i ti marye avek sa madanm ki zot ti pe peye pour pran swen avek mwan. Mon ti santi ki mon’n ganny abandonnen. Ler zot ti ganny zot zanfan, mon ti santi ki mon ti’n ganny ranplase. Anmezir mon ti pe grandi, mon ti santi ki personn pa kontan mwan.” En ser ki apel Georgette i dekrir lafason ki i ti santi ler son msye ti tronp li. Georgette i dir: “Nou ti de zanmi depi nou ti ankor zanfan. Nou ti fer pionye ansanm. I’n kas mon leker.” En lot ser ki apel Naomi i dir: “Mon pa ti zanmen imazinen ki mon msye ti pou bles mon santiman. Alor ler i ti dir mwan ki i ti pe get pornografi an kasyet, mon ti santi ki mon ti’n ganny anbete e trai.”

 8. (a) Ki serten rezon akoz nou devret pardonn lezot? (b) Ki bann byenfe nou gannyen ler nou pardonn lezot? (Vwar bwat “ Si en dimoun in tromatiz nou.”)

⁸ Nou pa kapab kontrol sa ki lezot i dir nou oubyen lafason ki zot tret nou. Me nou  kapab esey kontrol lafason ki nou reazir. Souvandfwa, sa pli bon fason pour reazir i pour pardonnen. Akoz? Parski nou kontan Zeova e Zeova i anvi ki nou pardonn lezot. Si nou reste ankoler e nou pa pardonnen, i tre probab ki nou pou fer en keksoz bet e petet menm fer ditor nou prop lekor. (Prov. 14:17, 29, 30) Annou vwar legzanp en ser ki apel Christine. I dir: “Ler mon ankoler oubyen ofanse, mon pa tro sourir. Mon tant pour manz bann manze ki pa tro bon pour mon lasante. Mon pa dormi ase e i pli difisil pour kontrol mon lemosyon. Sa i annan en lefe lo mon maryaz e lo mon lanmitye avek lezot.”

 9. Akoz nou devret fer zefor pour aret gard rankin?

⁹ Menm si sa dimoun ki’n bles ou santiman pa zanmen demann leskiz, ou kapab anpese ki sa sityasyon i kontinyen fer ou santi ou dan en move fason. Ki mannyer? Georgette, ki’n ganny mansyonnen pli boner, i dir: “I ti pran en pe letan me apre mon ti aret gard rankin e aret ankoler avek mon msye avan. Sa ti fer mwan annan lape lespri.” Ler nou aret gard rankin, sa i anpes nou tret lezot avek lakoler. Nou osi fer nou lekor dibyen parski nou aret mazin sa sityasyon e nou kapab reganny nou lazwa. (Prov. 11:17) Me ki ou devret fer si apre sa, ou pa ankor pare pour pardonnen?

FER ZEFOR POUR ARET ANKOLER

10. Ler en dimoun i ofans nou, akoz nou devret les en pe letan pase? (Vwar portre.)

¹⁰ Ki ou kapab fer pour aret ankoler? En fason ki ou kapab fer sa i par les en pe letan pase. En dimoun ki’n ganny en blesir grav i bezwen letan pour li geri apre ki i’n ganny swen medikal. Dan menm fason, i kapab ki ou pou bezwen les en pe letan pase, avan ki ou kapab senserman pardonn sa dimoun ki’n bles ou santiman.—Ekle. 3:3; 1 Pyer 1:22.

11. Ki mannyer lapriyer i kapab ed ou pardonnen?

¹¹ Priye e demann Zeova pour ed ou pardonnen. c Ann, ki’n ganny mansyonnen pli boner, i eksplike ki mannyer lapriyer ti ed li. I dir: “Mon ti demann Zeova pour pardonn sak dimoun dan mon fanmir pour bann keksoz mal ki zot in dir oubyen fer.  Apre mon ti ekri en let pour mon papa ek son nouvo madanm e mon ti dir zot ki mon’n pardonn zot.” Ann i admet ki i pa ti fasil pour li fer sa. Me Ann i dir: “Mon swete ki lefet ki mon pe esey pardonnen parey Zeova i pardonnen, sa i motiv mon papa ek son madanm pour aprann plis konsernan Zeova.”

12. Akoz nou devret annan konfyans dan Zeova olye krwar ki lafason ki nou pe santi i byen? (Proverb 3:5, 6)

¹² Annan konfyans dan Zeova olye krwar ki lafason ki ou pe santi i byen. (Lir Proverb 3:5, 6.) Zeova i toultan konnen kwa ki pli bon pour nou. (Iza. 55:8, 9) I pa pou zanmen demann nou pour fer en keksoz ki pou fer nou ditor. Alor nou kapab asire ki ler Zeova i ankouraz nou pour pardonnen, sa i pour nou prop byenfe. (Ps. 40:4; Iza. 48:17, 18) De lot kote, si nou krwar lafason ki nou santi i byen, i kapab ki nou pa pou zanmen kapab pardonnen. (Prov. 14:12; Zer. 17:9) Naomi, ki’n ganny mansyonnen pli boner, i dir: “O konmansman mon ti krwar ki mon annan rezon pour pa pardonn mon msye pour lefet ki i ti’n get pornografi. Mon ti per ki i ti pou bles mon santiman ankor e ki i ti pou oubliye ki kantite ditor son aksyon in anmennen. Mon ti krwar ki Zeova ti konpran mon santiman. Apre mon ti konmans realize ki zis akoz Zeova i konpran mon santiman, sa pa vedir ki i dakor avek lafason ki mon ti pe santi. Zeova i konnen ki mannyer mon pe santi e i konnen ki i pran letan pour aret ankoler me i osi anvi ki mon pardonnen.” d

DEVLOP BANN BON SANTIMAN

13. Dapre Romen 12:18-21, ki nou bezwen fer?

¹³ Ler nou pardonn en dimoun ki’n bles nou en kantite, nou deside pour pa koz lo sa ki’n arive. Me nou anvi fer plis ki sa. Si sa dimoun ki’n bles nou santiman i en frer oubyen en ser dan kongregasyon, nou lobzektif i pour fer lape avek li. (Mat. 5:23, 24) Olye reste ankoler, nou swazir pour demontre konpasyon e pardonnen. (Lir Romen 12:18-21; 1 Pyer 3:9) Kwa ki kapab ed nou pour fer sa?

14. Ki nou devret fer zefor pour fer e akoz?

 ¹⁴ Nou devret fer zefor pour vwar sa dimoun ki’n ofans nou parey Zeova i vwar sa dimoun. Zeova i swazir pour rod bann bon kalite dan dimoun. (2 Kron. 16:9; Ps. 130:3) Souvandfwa si nou rod bann bon kalite dan lezot, nou pou vwar sa bann kalite e si nou rod bann move kalite ki lezot i annan, sanmenm ki nou pou vwar. Ler nou rod bann bon kalite ki lezot i annan, sa pou fer li pli fasil pour nou pardonn zot. Par egzanp, en frer ki apel Jarrod i dir: “Mon vwar li pli fasil pour pardonn en frer ler mon mazin sa kantite keksoz ki mon apresye avek li olye mazin sa fot ki in fer.”

15. Ki byenfe i annan pour dir en dimoun ki ou’n pardonn li?

¹⁵ En lot keksoz enportan ki ou kapab fer i pour dir sa dimoun ki ou’n pardonn li. Akoz? Annou vwar sa ki Naomi, ki’n ganny mansyonnen pli boner, i dir: “Mon msye ti demann mwan, ‘Eski ou’n pardonn mwan?’ Ler mon ti ouver mon labous pour dir li, ‘Mon pardonn ou,’ mon pa ti kapab dir sa  bann parol. Sa ti fer mwan realize ki mon pa ti’n vreman pardonn li. Apre en pe letan, mon ti kapab dir li sa trwa mo vreman pwisan, ‘Mon pardonn ou.’ Ler mon ti pardonn mon msye, larm ti marse dan son lizye. Mon ti sirprann ki sa ti soulaz mon msye e mon ti santi mwan pli byen mwan osi. Apre sa, mon’n aprann pour annan konfyans dan li ankor e nou’n vin de bon zanmi ankor.”

16. Ki ou’n aprann konsernan pardonn lezot?

¹⁶ Zeova i anvi ki nou pardonn lezot. (Kol. 3:13) Kantmenm sa, nou kapab vwar li difisil pour fer sa. Me nou kapab fer li, si nou pa inyor nou santiman e nou fer zefor pour aret ankoler. Nou kapab osi fer zefor pour devlop bann bon santiman.—Vwar sa bwat “ Trwa keksoz ki pou ed nou pardonnen.”

REFLESIR LO BYENFE KI NOU GANNYEN LER NOU PARDONNEN

17. Ki byenfe nou gannyen ler nou pardonnen?

¹⁷ I annan en kantite rezon pour pardonn lezot. Annou vwar zis detrwa rezon. Premyerman, nou swiv legzanp nou Papa ki demontre konpasyon e nou fer li plezir. (Lik 6:36) Dezyenmman, nou montre ki nou vreman rekonesan ki Zeova in pardonn nou. (Mat. 6:12) Trwazyenmman, ler nou pardonnen, nou annan en bon lasante e nou kapab kontinyen annan bann bon lanmitye avek lezot.

18-19. Ki i arive ler nou pardonn lezot?

¹⁸ Ler nou pardonn lezot, nou kapab ganny bann byenfe ki nou pa ti pe ekspekte. Par egzanp, annou vwar sa ki ti arive avek Denise, ki’n ganny mansyonnen pli boner. Ler Denise ti demann sa ziz pour pran pitye pour sa zonm ki ti responsab pour sa aksidan ki son fanmir ti ladan, Denise pa ti konnen ki sa zonm ti pe plàn pour swiside apre ki i ti’n pas ankour. Sa zonm ti sitan rekonesan pour lefet ki Denise ti’n pardonn li, ki i ti konmans etidye Labib avek Temwen Zeova.

¹⁹ Nou kapab santi ki pardonn en dimoun i enn bann keksoz pli difisil ki nou pou bezwen fer dan nou lavi. Me i kapab osi enn bann keksoz pli satisfezan ki nou kapab fer. (Mat. 5:7) Alor, nou tou annou fer nou mye pour pardonn lezot parey Zeova.