1, 2. (a) Ki mannyer serten paran i santi ler zot zanfan i anvi batize? (b) Akoz bann ki anvi batize i ganny demande si zot in dedye zot lavi avek Zeova? (Vwar portre o konmansman sa lartik.)

 PARAN en zenn fiy ki apel Maria, ti get li anmezir i ti debout ansanm avek lezot ki ti pe al batize. Sa orater ti demann de kestyon. Maria ti reponn avek en lavwa byen for e kler. Apre sa, i ti batize.

² Paran Maria ti fyer ki zot fiy ti’n dedye son lavi avek Zeova e batize. Me avan sa, manman Maria ti en pti pe enkyet. I ti demann son lekor: ‘Eski Maria i tro zenn pour batize? Eski i vreman konpran ki son dedikasyon avek Zeova i en keksoz serye? Eski i devret esper ankor en pe letan pour li batize?’ Plizyer paran ki kontan zot zanfan i demann zot lekor sa bann kestyon ler zot zanfan i dir ki i anvi batize. (Eklezyast 5:5) Apre tou, desizyon pli enportan ki en dimoun i kapab fer, se dedye  son lavi avek Zeova e batize.​—Vwar sa bwat “ Eski ou’n dedye ou lavi avek Zeova?”

3, 4. (a) Ki mannyer zapot Pyer ti ansenny nou ki batenm i vreman enportan? (b) Akoz Pyer ti konpar batenm avek lars Noe?

³ Zapot Pyer ti konpar batenm avek ler Noe ti pe konstri lars. I ti dir: “Batenm i parey e i pe sov zot.” (Lir 1 Pyer 3:20, 21.) Lars ti en laprev konkret pour tou dimoun ki Noe ti anvi fer lavolonte Bondye avek tou son leker. Noe ti fidelman fer sa travay ki Zeova ti donn li pour fer. Gras a son lafwa, Zeova ti sov Noe ansanm avek son fanmir pandan Deliz. Ki Pyer ti pe esey ansenny nou?

⁴ Ler dimoun ti vwar lars, zot ti konnen ki Noe ti annan lafwa dan Bondye. Pareyman, ler lezot i vwar en dimoun pe batize, zot konnen ki i’n dedye son lavi avek Bondye parski i annan lafwa dan Kris ki’n resisite. Parey Noe, bann ki batize i obei Bondye e fer sa travay ki i’n donn zot pour fer. Deplis, zis parey Zeova ti sov Noe pandan Deliz, i pou sov son bann serviter fidel ki’n batize ler i detri sa move lemonn. (Mark 13:10; Revelasyon 7:9, 10) I kler alor, ki i vreman enportan pour dedye nou lavi avek Zeova e batize. Anfet, si en dimoun i anvoy batenm pour pli tar, i kapab perdi sa loportinite pour viv pour touzour.

5. Ki nou pou aprann dan sa lartik?

⁵ La ki nou konnen ki degre batenm i serye, nou bezwen konn larepons sa  trwa kestyon: Ki Labib i dir lo batenm? Ki en dimoun i bezwen fer avan ki i kapab batize? Akoz nou devret toultan rapel lenportans batenm ler nou pe ansenny nou zanfan ouswa enn nou letid?

6, 7. (a) Akoz dimoun ti al kot Zan pour ganny batize? (b) Lekel ki son batenm ti diferan avek tou lezot e akoz?

⁶ Dan Labib, nou vwar ki Zan ki batize ti sa premye dimoun ki ti batiz lezot. (Matye 3:1-6) Akoz dimoun ti vin kot li pour batize? Zot ti fer sa pour montre ki zot ti’n repantir. Sa i vedir ki zot ti admet ki zot ti’n fer pese ler zot ti dezobei Lalwa Moiz e ki zot ti vreman regrete. Me sa batenm pli enportan ki Zan ti fer, ti vedir en keksoz konpletman diferan. Zan ti annan sa gran loner pour batiz Zezi, Garson parfe Bondye. (Matye 3:13-17) Zezi pa ti’n zanmen fer pese. I pa ti bezwen repantir. (1 Pyer 2:22) Alor, akoz Zezi ti batize? Pour montre ki i ti pare pour servi son lavi pour fer lavolonte Bondye.​—Ebre 10:7.

⁷ Apre ki Zezi ti konmans prese, son bann disip ti konmans batiz lezot dimoun. (Zan 3:22; 4:1, 2) Sa bann dimoun osi ti batize akoz zot ti’n repantir pour zot bann pese kont Lalwa Moiz. Me apre ki Zezi ti’n mor e resisite, bann ki ti anvi vin son disip ti pou bezwen batize pour en lot rezon.

8. (a) Ki lord Zezi ti donnen apre son rezireksyon? (b) Akoz bann Kretyen i bezwen batize?

⁸ En pti pe letan apre ki Zezi ti’n resisite an lannen 33, i ti koz avek plis ki 500 zonm ek madanm e tre probab menm avek bann zanfan. Petet i sa menm letan ki i ti dir: “Alor, al kot bann dimoun dan tou nasyon e fer zot vin mon disip, batiz zot o non Papa, o non Garson e o non lespri sen, ansenny zot pour obei tou sa ki mon’n donn zot lord pour fer.” (Matye 28:19, 20; 1 Korentyen 15:6) Zezi ti donn son bann disip lord pour fer lezot disip. Tou dimoun ki oule vin son “disip” i bezwen batize. (Matye 11:29, 30) Pour servi Bondye dan lafason ki fer Li plezir, en dimoun i bezwen aksepte ki Bondye i servi Zezi pour akonpli Son lavolonte. Apre sa, sa dimoun i kapab batize e ganny laprouvasyon Bondye. Dan Labib, i annan en kantite levidans ki bann disip Zezi dan premye syek ti konnen ki i ti enportan pour batize. Zot pa ti krwar ki zot ti devret espere e batize pli tar.​—Akt 2:41; 9:18; 16:14, 15, 32, 33.

9, 10. Ki nou kapab aprann lo batenm avek sa zonm Etyopyen e avek Sol?

⁹ Lir Akt 8:35, 36. En zonm Etyopyen ki ti’n aksepte larelizyon Zwif ti lo semen pe retourn kot li apre ki ti’n al ador Bondye kot tanp Zerizalenm. Lanz Zeova ti anvoy Filip pour anons e ansenny “sa bon nouvel konsernan Zezi” avek li. Ki mannyer sa Etyopyen ti reazir? I ti konpran lenportans pour aksepte Zezi konman Senyer e i ti anvi fer sa ki Zeova i  ekspekte avek bann Kretyen. Alor i pa ti espere pour batize, i ti fer li deswit.

¹⁰ En lot legzanp i en zonm Zwif ki ti apel Sol. Nasyon Zwif antye ti’n dedye avek Bondye, me Zeova ti’n rezet bann Zwif akoz zot pa ti obei li. Sol ti krwar ki bann Zwif ti ankor pe servi Zeova dan sa bon fason, alor i ti persekit bann Kretyen. Sol ti krwar ki Zezi ti’n mor, me en zour i ti tann en lavwa sorti dan lesyel pe koz avek li. Sa ti Zezi ki ti’n resisite. Ki mannyer Sol ti reakte? I ti kontan pour aksepte led avek en disip Kris ki ti apel Ananyas. Labib i dir: “I ti leve e i ti ganny batize.” (Akt 9:17, 18; Galat 1:14) Pli tar, i ti ganny apele zapot Pol. Eski ou’n remarke ki Sol ti fer dek ki i ti konpran ki Bondye ti pe servi Zezi pour akonpli Son lavolonte? Olye espere pour batize, i ti fer li deswit.​—Lir Akt 22:12-16.

11. (a) Ozordi, kwa ki fer bann etidyan Labib deside batize? (b) Ki mannyer nou santi ler en dimoun i batize?

¹¹ Ozordi osi i menm parey pour en kantite etidyan Labib, ki swa zot zenn ouswa aze. Vi ki zot kontan e annan konfyans dan sa ki Labib i dir, zot enpasyan pour dedye zot lavi avek Zeova e batize. Anfet, diskour batenm i toultan en moman spesyal dan bann lasanble. Temwen Zeova i kontan ler en etidyan Labib i aksepte laverite e deside batize. Bann paran i dan en gran lazwa ler zot zanfan i fer parey. Pandan lannen servis 2017, plis ki 284,000 dimoun ti batize pour montre ki zot ti’n dedye zot lavi avek Zeova. (Akt 13:48) I kler ki zot ti konpran ki i neseser pour bann Kretyen batize. Me ki zot ti bezwen fer avan ki zot ti kapab batize?

12. Ki bann etidyan Labib i bezwen fer avan ki zot batize?

¹² Avan ki bann etidyan Labib i kapab batize, zot bezwen aprann laverite lo Bondye, son plan pour bann imen ek later e sa ki i ti fer pour sov limanite. (1 Timote 2:3-6) Zot osi bezwen devlop lafwa ki pou ed zot obei bann lalwa Bondye e aret fer sa ki i deteste. (Akt 3:19) Sa i enportan, parski Zeova pa pou aksepte dedikasyon en dimoun ki kontinyen fer bann keksoz ki I deteste. (1 Korentyen 6:9, 10) Me i annan plis ki sa. Bann ki anvi dedye zot lavi avek Zeova i bezwen asiste bann renyon, anons sa bon nouvel regilyerman e ansenny lezot. Sa i en nesesite pour tou bann ki anvi vin en disip Zezi. (Akt 1:8) En etidyan i bezwen fer tou sa bann keksoz avan. Apre, an prive i kapab dedye son lavi avek Zeova dan lapriyer e batize.

13. Ler nou ansenny lezot, akoz nou devret rapel ki zot bezwen batize pour vin en vre Kretyen?

¹³ Ler nou ed nou zanfan ek lezot etidyan Labib pour fer sa bann keksoz neseser, nou bezwen rapel ki bann ki anvi vin en vre disip Zezi i bezwen batize. Koumsa, dan bann moman apropriye nou pa pou per pour dir zot ki degre dedikasyon ek batenm i enportan. Nou anvi ki nou bann zanfan ek lezot etidyan Labib i kontinyen fer progre e batize!

14. Akoz nou pa met presyon lo personn pour batize?

¹⁴ Byensir, personn pa devret fors ouswa met presyon lo en zanfan ouswa en letid Labib pour batize. Zeova pa fors personn pour servi li. (1 Zan 4:8) Ler nou ansenny lezot, nou bezwen ed zot konpran lenportans pour devlop en relasyon personnel avek Zeova. Koumsa, si en etidyan Labib i vreman rekonesan pour konn laverite lo Bondye e vreman anvi fer tou sa ki en vre Kretyen i devret fer, i pou anvi batize.​—2 Korentyen 5:14, 15.

15, 16. (a) Eski en dimoun i bezwen annan en laz spesifik pour batize? Eksplike. (b) Akoz en etidyan Labib i bezwen batize konman en Temwen Zeova menm si i ti’n deza batize dan en lot relizyon?

¹⁵ I napa en laz spesifik ki en dimoun i sipoze batize. Tou dimoun i diferan e serten etidyan i fer progre pli vit ki lezot. Plizyer i batize ler zot ankor zenn e zot reste fidel avek Zeova anmezir zot grandi. Tandis ki  i annan lezot ki bokou pli vye ler zot aprann laverite ki dan Labib e batize. Serten i menm annan plis ki 100 an!

¹⁶ En madanm ki ti etidye Labib ti’n deza batize dan diferan larelizyon. Sanmenm rezon i ti demann sa dimoun ki ti pe etidye Labib avek li si i ti vreman neseser pour batiz ankor. Son ansenyan Labib ti montre li serten verse Labib ki ti reponn son kestyon. Enn fwa ki sa madanm ti konpran sa ki neseser dapre Labib, i ti batize menm si i ti annan preski 80 an. Ki nou aprann avek sa legzanp? Zeova pou aksepte nou batenm zis ler nou konn laverite konsernan son lavolonte. Alor menm si nou ti’n batize dan en lot larelizyon, nou ankor bezwen batize konman en Temwen Zeova.​—Lir Akt 19:3-5.

17. Ki en dimoun i devret mazin lo la zour son batenm?

¹⁷ Sa zour ki en dimoun i batize i en zour vreman zwaye. I osi en moman pour reflesi seryezman lo sa ki dedikasyon ek batenm i enplike. I demann bokou zefor pour fer tou sa ki ganny ekspekte avek en vre Kretyen. Bann disip Zezi pa devret “viv pour zot prop lekor, me pour sa enn ki’n mor e resisite pour zot.”​—2 Korentyen 5:15; Matye 16:24.

18. Ki kestyon nou pou diskit lo la dan sa lot lartik?

¹⁸ Parey nou’n aprann dan sa lartik, sa desizyon pour vin en vre Kretyen i en keksoz vreman serye. Sanmenm sa, manman Maria ti demann son lekor bann kestyon ki ganny mansyonnen o konmansman sa lartik. Si ou en paran, petet ou’n demann ou lekor: ‘Eski mon zanfan i vreman pare pour batize? Eski mon zanfan i konn ase lo Zeova pour li dedye son lavi avek Li? Eski mon zanfan i devret ganny en bon ledikasyon e en bon travay avan i batize? Ki pou arive si mon zanfan i fer en pese grav apre ki i’n batize?’ Nou pou diskit lo sa bann kestyon dan sa prosen lartik e nou pou aprann ki mannyer bann paran Kretyen i kapab annan sa bon pwennvi lo batenm.