1. Ki bann paran Kretyen i anvi asire avan ki zot zanfan i batize?

 “POUR plizyer mwan mon ti kontinyen dir Manmi ek Dadi ki mon anvi batize e souvandfwa zot ti koz avek mwan lo la. Zot ti anvi fer sir ki mon ti konnen ki degre mon desizyon ti serye. Le 31 Desanm 1934, sa zour ti’n arive pour sa levennman enportan dan mon lavi.” Sa i lafason ki Blossom Brandt ti dekrir sa ki ti arive ler i ti deside pour batize. Ozordi osi bann paran i anvi ed zot zanfan pour fer bann desizyon saz. Si en zanfan i espere pour batize san okenn rezon valab, sa i kapab gat son relasyon avek Zeova. (Zak 4:17) Avan ki zot zanfan i batize, bann paran ki saz i anvi fer sir ki sa zanfan i pare pour vin en disip Kris.

2. (a) Ki problenm serten sirveyan rezyonal in remarke? (b) Ki nou pou diskite dan sa lartik?

² Serten sirveyan rezyonal in remarke ki en kantite zenn  ki’n ariv ver lafen ladolesans oubyen ki dan zot bann 20 an pa ankor batize, menm si zot in grandi dan laverite. Laplipar ditan sa bann zenn i asiste renyon, al predikasyon e konsider zot lekor konman Temwen Zeova. Me kantmenm sa, pour en rezon ou en lot zot pa ankor dedye zot lavi avek Zeova e batize. Dan serten ka, sa i akoz bann paran i krwar ki zot zanfan pa ankor pare pour batize. Dan sa lartik, nou pou diskit lo kat keksoz ki’n anpes serten paran ankouraz zot zanfan pour batize.

3. Ki paran Blossom ti per?

³ Bann paran Blossom, ki nou’n koz lo la dan premye paragraf ti per ki zot fiy ti ankor tro zenn pour konpran ki savedir batenm e ki degre i serye. Ki mannyer bann paran i kapab konnen si zot zanfan in pare pour dedye son lavi avek Zeova?

4. Ki mannyer lord Zezi dan Matye 28:19, 20 i kapab ed bann paran ozordi?

⁴ Lir Matye 28:19, 20. Labib pa donn en laz spesifik ki en dimoun i devret batize. Me i byen pour bann paran mazin seryezman lo ki savedir fer disip. Dan langaz Grek, sa mo ki’n ganny tradwir konman ‘fer disip’ dan Matye 28:19, i vedir ansenny en dimoun avek sa lobzektif pour ed li vin en etidyan oubyen en disip. En disip i en dimoun ki aprann e konpran sa ki Zezi ti ansennyen e i anvi obei li. Alor depi ler bann zanfan i ne, bann paran i devret ansenny zot avek sa lobzektif pour ed zot dedye zot lavi avek Zeova e vin bann disip Kris. Byensir, bann pti baba pa kalifye pour batize. Me kantmenm sa, Labib i montre ki menm bann pti manrmay i kapab konpran e kontan laverite ki dan Labib.

5, 6. (a) Ki nou aprann lo batenm avek lafason ki Labib i dekrir Timote? (b) Ki sa pli bon fason pour bann paran saz ed zot zanfan?

⁵ Timote ti en disip ki ti deside pour servi Zeova ler i ti ankor byen zenn. Zapot Pol ti dir ki Timote ti konmans aprann laverite dan Parol Bondye “depi ptipti.” Papa Timote pa ti servi Zeova, me son manman ek granmanman ti ed li pour kontan Parol Bondye. Sa ti fer ki i ti annan en lafwa solid. (2 Timote 1:5; 3:14, 15) I posib ki i ti’n ariv ver lafen son ladolesans oubyen dan son 20 an ler i ti kalifye pour ganny bann responsabilite spesyal dan kongregasyon.​—Akt 16:1-3.

⁶ Sak zanfan i diferan. Pa zot tou ki vin matir menm laz. Serten zanfan i konpran laverite, pran bann desizyon saz e zot anvi batize ler zot ankor zenn. Petet lezot pa ankor pare pour batize ziska ler zot en pti pe pli vye. Bann paran saz pa met presyon lo zot zanfan pour batize. O kontrer, zot ed sak zanfan pour fer progre dapre zot prop vites. Bann paran i kontan ler zot zanfan i aplik Proverb 27:11. (Lir.) Me zot bezwen rapel ki zot lobzektif se pour ed zot zanfan vin bann disip. Avek sa nide antet, zot devret demann zot lekor, ‘Eski mon zanfan i konn ase pour dedye son lavi avek Bondye e batize?’

7. Eski en dimoun i bezwen konn sak pti detay lo tou lansennyman Labib avan ki i kapab batize? Eksplike.

⁷ Anmezir ki bann paran i ansenny zot zanfan, zot anvi ed zot zanfan konn laverite byen. Sa konnesans pou pous zot zanfan pour dedye zot lavi avek Bondye. Me sa pa vedir ki en zanfan i bezwen konn sak pti detay lo tou lansennyman Labib avan ki i kapab dedye son lavi e batize. Tou disip Kris i bezwen kontinyen aprann menm apre ki zot in batize. (Lir Kolosyen 1:9, 10.) Alor ki kantite en dimoun i bezwen konnen avan ki i batize?

8, 9. Ki ti arive avek en sef gard dan lavil Filip e ki nou kapab aprann avek son leksperyans?

⁸ Leksperyans en fanmir dan lepase i kapab ed bann paran ozordi. (Akt 16:25-33) Lannen 50, Pol ti al dan lavil Filip pandan son dezyenm vwayaz misyonner. Ler i ti laba, li ek Silas ti ganny akize konmkwa zot ti’n fer en keksoz mal, ganny arete e met dan prizon. Pandan lannwit, i ti annan en gran tranblemandter ki ti ouver tou bann baro prizon. Sa gard prizon ti krwar ki tou bann prizonnyen ti’n sove e i ti anvi touy son lekor. Me Pol ti anpes li fer sa. Apre sa, Pol ek Silas ti ansenny sa gard prizon ek son fanmir laverite lo Zezi. Zot ti krwar sa ki zot ti aprann lo Zezi e zot ti realize ki kantite i ti enportan pour zot obei li. Alor deswit zot ti batize. Ki nou kapab aprann avek zot leksperyans?

⁹ I posib ki sa gard prizon ti en solda Romen ki ti’n pran retret. I pa ti konn Parol Bondye. Alor pour li vin en Kretyen, i ti bezwen aprann bann laverite de baz sorti dan Labib, konpran sa ki Zeova i ekspekte avek son bann serviter e anvi obei bann lansennyman Zezi. Sa ki i ti aprann dan sa ptigin letan ti ed li pour anvi batize. Byensir, i ti pou’n kontinyen aprann plis apre ki i ti’n batize. Alor ler ou zanfan i dir ou ki i anvi batize akoz i kontan Zeova e anvi obei li, ki ou kapab fer? Petet ou kapab les li koz avek bann ansyen pour zot kapab deside si i kalifye pour batize. a (Vwar not.) Parey tou Kretyen ki’n batize, i pou kontinyen aprann plis lo Zeova pour leres son lavi, menm pour leternite.​—Romen 11:33, 34.

10, 11. (a) Ki serten paran i krwar? (b) Kwa ki pou vreman protez en zanfan?

¹⁰ Serten paran i krwar ki i ti pou pli byen pour zot zanfan fer letid avanse e ganny en bon karyer avan ki zot batize. Petet sa bann paran i annan en bon  lentansyon, me zot devret demann zot lekor: ‘Eski sa pou vreman ed mon zanfan reisi dan lavi? Eski sa i annakor avek sa ki Labib i dir? Ki mannyer Zeova i oule nou servi nou lavi?’​—Lir Eklezyast 12:1.

¹¹ I enportan pour rapel ki sa lemonn e bann keksoz ki dan lemonn i kont sa ki Zeova i oule e kont son fason panse. (Zak 4:7, 8; 1 Zan 2:15-17; 5:19) En bon relasyon avek Zeova i sa pli bon proteksyon ki en zanfan i kapab annan kont Satan, son lemonn ek move fason panse sa lemonn. Si bann paran i met ledikasyon ek en bon karyer premye dan zot lavi, i tre probab ki zot zanfan pou krwar ki bann keksoz dan lemonn i bokou pli enportan ki annan en bon relasyon avek Zeova. Sa i danzere. Konman en paran ki kontan ou zanfan, eski ou vreman anvi ki sa lemonn i ansenny ou zanfan sa ki i krwar pou fer li ere? Sa sel fason pour reisi e ganny vre lazwa se par met Zeova premye dan nou lavi.​—Lir Psonm 1:2, 3.

12. Akoz serten paran i santi ki i pli byen pour zot zanfan espere pour batize?

¹² En manman i eksplike akoz i pa ti’n oule ki son fiy i batize. I ti dir, “Mon onte pour dir ki rezon prensipal se akoz sa laranzman pour ekskli en dimoun dan kongregasyon.” Parey sa ser, serten paran i santi ki i pli byen pour zot zanfan espere pour batize ziska ki i ase gran pour evite fer bann fot bet. (Zenez 8:21; Proverb 22:15) Sa bann paran i kapab mazinen ki si zot zanfan pa batize, i pa pou kapab ganny ekskli dan kongregasyon. Me akoz i mal pour rezonn koumsa?​—Zak 1:22.

13. Si en dimoun pa ankor batize, eski sa i vedir ki i pa bezwen rann kont avek Zeova? Eksplike.

¹³ Byensir, bann paran pa oule ki zot zanfan i batize avan ki i pare pour  dedye son lavi avek Zeova. Me i ti pou en fot pour mazinen ki en zanfan pa bezwen rann kont avek Zeova ziska ler i’n batize. En zanfan i bezwen rann kont avek Bondye ler i konn sa ki Zeova i dir i byen e sa ki i dir i mal. (Lir Zak 4:17.) Bann paran ki saz pa dekouraz zot zanfan pour batize. Menm ler sa zanfan i ankor ptipti, zot ansenny li pour kontan sa ki Zeova i dir i byen e pour ay sa ki I dir i mal, zis parey zot zot fer. (Lik 6:40) Ler ou zanfan i kontan Zeova, sa pou protez li e anpes li fer en pese grav parski i pou anvi fer sa ki Zeova i dir i byen.​—Izai 35:8.

14. Ki mannyer bann ansyen i kapab siport zefor bann paran?

¹⁴ Bann ansyen i kapab siport zefor bann paran ler zot koz lo bann lobzektif dan servis Zeova dan en fason pozitif. En ser i rapel ki Frer Russell ti koz avek li ler i ti annan si-z-an. I dir, “I ti diskit mon bann lobzektif spirityel avek mwan pour 15 minit.” Ki lefe sa ti annan? Pli tar, sa ser ti vin en pionye e i ti fer pionye pour plis ki 70 an! I kler ki bann parol pozitif e ankourazan i kapab annan en lefe lo en dimoun tou dilon son lavi. (Proverb 25:11) Bann ansyen i osi kapab envit bann paran ek zanfan pour ede avek bann proze ki pe ganny fer kot Lasal Rwayonm. Zot kapab demann bann zanfan pour fer keksoz dapre zot laz ek abilite.

15. Ki mannyer lezot dan kongregasyon i kapab ed bann zenn?

¹⁵ Ki mannyer lezot dan kongregasyon i kapab ede? Zot kapab demontre lentere personnel dan bann zenn. Par egzanp, ou kapab fer zefor pour vwar bann keksoz ki bann zenn pe fer pour vin pli pros avek Zeova. Eski en zanfan ti fer en bon komanter dan renyon oubyen eski i ti annan en demonstrasyon  pandan renyon lasemenn? Eski i’n koz lo laverite avek en dimoun kot lekol oubyen eski i’n fer en bon desizyon ler i’n ganny tante pour fer en keksoz mal? Si wi, pa tarde pour felisit li! Nou kapab fer li en lobzektif pour koz avek bann zenn avan e apre bann renyon. Ler nou fer sa, bann zanfan pou santi ki zot form par sa “gran lasanble” oubyen kongregasyon.​—Psonm 35:18.

16, 17. (a) Akoz i enportan pour bann zanfan batize? (b) Ki lazwa bann paran Kretyen i kapab gannyen? (Vwar portre o konmansman sa lartik.)

¹⁶ Enn bann pli gran privilez pour bann paran se pour ansenny zot zanfan pour kontan Zeova. (Psonm 127:3; Efezyen 6:4) Dan nasyon Izrael, ler bann zanfan ti ne zot ti ganny dedye avek Zeova. Me i pa leka pour nou bann zanfan. Zis akoz bann paran i kontan Zeova ek laverite, sa pa vedir ki zot zanfan pou fer parey. Depi zour ki zot zanfan i ne, bann paran i bezwen annan sa lobzektif pour ed li vin en disip, pour dedye son lavi avek Bondye e batize. Napa nanryen ki pli enportan ki sa! Ler en dimoun i dedye son lavi avek Bondye, batize e reste fidel dan son servis pour Zeova, sa pou fer li posib pour li ganny sove pandan gran ladetres.​—Matye 24:13.

¹⁷ Ler Blossom Brandt ti anvi batize, son paran ti anvi fer sir ki i ti’n pare. Ler zot ti asire ki sa ti leka, zot ti siport son desizyon. Blossom i eksplik sa ki son papa ti fer sa zour swar avan i batize: “I ti fer nou tou azenou e i ti fer en lapriyer. I ti dir Zeova ki i ti byen kontan ki son pti fiy ti’n fer sa desizyon pour dedye son lavi avek Li.” Plis ki 60 an pli tar, Blossom i dir: “Ou kapab asire, ki dan tou bann lannen ki pou vini, mon pa pou zanmen oubliy sa zour swar!” Paran, nou ti a kontan ki ou osi ou ganny lazwa ek satisfaksyon ler ou vwar ou zanfan vin en serviter Zeova ki’n dedye son lavi avek li e batize.