1. Ki nou kapab dir lo bann zenn frer?

 ZENN frer, ou kapab vreman itil dan kongregasyon. Bokou parmi zot i for e zot annan bokou lenerzi. (Prov. 20:29) Ou vreman en gran led pour ou kongregasyon. Petet ou ti pou kontan pour vin en serviter kongregasyon. Par kont, ou kapab santi ki lezot i krwar ki ou tro zenn oubyen ki ou pa ankor pare pour ganny bann responsabilite enportan. Menm si ou ankor zenn, i annan serten keksoz ki ou kapab fer la konmela pour ganny respe ek konfyans lezot dan kongregasyon.

2. Ki nou pou vwar dan sa lartik?

² Dan sa lartik, nou pou vwar legzanp Lerwa David. Nou pou osi vwar serten keksoz ki ti arive dan lavi Aza ek Zeozafat, ki ti de lerwa Zida. Nou pou osi vwar serten problenm ki sa trwa zonm ti fer fas avek, ki zot ti fer pour rezourd sa bann problenm e ki bann zenn frer i kapab aprann avek zot legzanp.

3. Ki en fason bann zenn frer i kapab ed bann ki pli aze dan kongregasyon?

³ Ler David ti ankor zenn, i ti devlop bann abilite ki lezot ti apresye. I kler ki i ti annan en bon lanmitye avek Zeova. I ti fer bokou zefor pour vin en bon mizisyen e i ti servi sa abilite pour ed Sail, sa lerwa ki Bondye ti’n swazir. (1 Sam. 16:16, 23) Zenn frer, laplipar parmi zot i annan abilite ki zot kapab servi pour ed lezot dan kongregasyon. Par egzanp, ou kapab remarke ki bann frer ek ser  pli aze i apresye ler bann zenn frer i ed zot aprann servi zot lekipman elektronik pour fer zot letid personnel e pour renyon. Ou kapab ed bann pli aze parski ou konn byen ki mannyer pour servi bann lekipman elektronik.

4. Parey David, ki bann kalite bann zenn frer i bezwen devlope? (Vwar portre lo kouvertir.)

⁴ David ti montre ki i ti en dimoun diny konfyans. Par egzanp, ler David ti ankor en zenn garson, i ti travay dir pour pran swen avek mouton son papa. Sa ti en travay danzere. Pli tar, David ti eksplik Lerwa Sail: “Mon abitye vey troupo mon papa. Ler en lyon oubyen en lours ti vin pran en mouton dan troupo, mon ti tay deryer li, mon ti ansonm li e delivre sa mouton dan son lagel.” (1 Sam. 17:34, 35) David ti konnen ki i ti bezwen pran swen avek sa bann mouton e avek kouraz i ti lager pour protez zot. Bann zenn frer i kapab swiv legzanp David, par travay dir dan nenport ki travay zot in ganny demande pour fer.

5. Dapre Psonm 25:14, ki sa keksoz pli enportan ki bann zenn frer i kapab fer?

⁵ Ler David ti ankor zenn, i ti devlop en lanmitye pros avek Zeova. Son lanmitye avek Zeova ti pli enportan ki son kouraz oubyen son abilite pour zwe laarp. Zeova pa ti zis son Bondye me i ti osi son zanmi pros. (Lir Psonm 25:14, NWT.) b Zenn frer, sa keksoz pli enportan ki ou kapab fer, i vin pli pros avek Zeova. Si ou fer sa, ou pou ganny plis responsabilite dan kongregasyon.

6. Ki move lopinyon serten ti annan lo David?

⁶ Enn bann problenm ki David ti bezwen fer fas avek, i bann move lopinyon ki lezot ti annan lo li. Par egzanp, ler David ti demande pour li lager avek Golyat, Lerwa Sail ti esey anpes li e dir li: “Ou zis en zenn garson.” (1 Sam. 17:31-33) Pli boner, son prop frer ti’n dir li, ki i en dimoun ki pa responsab. (1 Sam. 17:26-30) Me Zeova pa ti panse ki David i tro zenn oubyen pa responsab. I ti konn David byen. Alor, David ti reisi touy Golyat parski i ti depan lo son Zanmi, Zeova.​—1 Sam. 17:45, 48-51.

7. Ki ou kapab aprann avek sa resi lo David?

 ⁷ Ki nou kapab aprann avek sa ki ti arive avek David? Nou aprann ki nou bezwen annan pasyans. I kapab pran letan pour bann ki ti konn ou ler ou ti ankor en zanfan realize ki ou’n vin en adilt. Me ou kapab asire ki Zeova pa vwar zis ou laparans. I konn ou byen e i konnen ki ou kapab fer. (1 Sam. 16:7) Vin pli pros avek Zeova. David ti fer sa par obzerv sa ki Zeova in kree. David ti reflesir lo ki sa bann keksoz ti ansenny li lo Kreater. (Ps. 8:3, 4; 139:14; Rom. 1:20) En lot keksoz ki ou kapab fer, i demann Zeova sa lafors ki ou bezwen. Par egzanp, eski serten ou bann kanmarad lekol i sikann ou akoz ou en Temwen Zeova? Si wi, priy Zeova pour li ed ou fer fas avek sa problenm. Ou kapab osi aplik bann konsey pratik ki ou trouve dan son Parol e osi dan bann piblikasyon ek video baze lo Labib. Sak fwa ou vwar ki Zeova i ed ou fer fas avek en problenm, ou pou devlop plis konfyans dan li. An plis, ler lezot i vwar ki ou depan lo Zeova, zot pou annan konfyans dan ou.

8-9. Kwa ki ti ed David esper avek pasyans ziska ki i ti vin lerwa e ki bann zenn frer i kapab aprann avek son legzanp?

⁸ Annou vwar en lot problenm ki David ti fer fas avek. Apre ki David ti’n ganny swazir pour vin lerwa, i ti bezwen esper plizyer lannen avan ki i ti konmans dirize konman lerwa Zida. (1 Sam. 16:13; 2 Sam. 2:3, 4) Kwa ki ti ed li esper avek pasyans pandan sa letan? Dan plas dekouraze, David ti konsantre lo sa ki i ti kapab fer. Par egzanp, ler David ti pe kasyet dan pei bann Filisten, i ti servi sa letan pour lager kont lennmi Izrael. Par fer sa, i ti protez teritwar Zida.​—1 Sam. 27:1-12.

⁹ Ki bann zenn frer i kapab aprann avek legzanp David? Fer sa ki ou kapab pour ed ou bann frer ek ser. Annou vwar legzanp en frer ki apel Ricardo. c Depi ler i ti en adolesan, i ti anvi vin en pionye ordiner. Me bann ansyen ti dir ki i pa ankor pare. Olye dekouraze oubyen ankoler, Ricardo ti pas plis letan dan predikasyon. I dir: “Ler mon mazin lepase, mon realize ki mon ti bezwen fer progre e ki mon ti kapab fer li. Mon ti fer sir ki mon retourn kot tou dimoun ki’n demontre lentere e mon ti prepar byen pour sak retourn vizit. Mon ti menm kondwir mon premye letid Labib. Anmezir mon ti pas plis letan dan predikasyon, mon ti vin pli alez.” Ozordi Ricardo pe servi konman en pionye ordiner e en serviter kongregasyon.

10. En fwa, ki David ti fer avan i ti fer en desizyon enportan?

¹⁰ Annou vwar en lot keksoz ki ti arive avek David. Ler David ti pe kasyet dan pei bann Filisten, li avek son bann zonm, ti kit zot fanmir kot lakour pour al lager. Ler zot ti’n ale, zot bann lennmi ti pran tou zot bann keksoz ek zot fanmir konman prizonnyen. Vi ki David ti en gerye eksperyanse, i ti’n kapab mazinen ki i kapab fasilman fer en bon plan pour al sers zot fanmir. O kontrer, David ti demann Zeova pour ed li. Avek led en pret, ki ti apel Abyatar, David ti demann Zeova: “Eski mon devret tay deryer sa group voler?” Zeova ti dir David ki i devret ale e i pou delivre son bann dimoun. (1 Sam.  30:7-10, NWT) Ki ou kapab aprann avek sa resi?

11. Ki ou kapab fer avan ou fer en desizyon?

¹¹ Rod konsey lezot avan ou fer en desizyon. Koz avek ou paran. Ou osi kapab ganny bann bon konsey avek bann ansyen eksperyanse. Zeova i annan konfyans dan sa bann zonm e ou osi ou kapab annan konfyans dan zot. Zeova in donn kongregasyon sa bann zonm konman “kado.” (Efe. 4:8) Ou pou fer bann bon desizyon si ou imit zot lafwa e ekout zot bann konsey saz. Aprezan, annou vwar ki nou kapab aprann avek legzanp Lerwa Aza.

12. Ki bann kalite ki Lerwa Aza ti annan ler i ti vin lerwa?

¹² Lerwa Aza ti annan limilite ek kouraz ler i ti ankor zenn. Par egzanp, apre lanmor son papa, Aza ti vin lerwa e i ti konmans retir bann zidol dan pei. I ti osi “ordonn bann zabitan Zida pour servi [Zeova], Bondye zot bann zanset, e obei son bann komannman e pratik son lalwa.” (2 Kron. 14:1-7) Ler Zera ansanm avek en milyon solda Etyopyen ti atak Zida, Aza ti demontre lasazes par demann Zeova led. I ti dir: “O Zeova, pour ou i pa enportan si sa ki ou pe ede i for oubyen i fay. Ed nou O Zeova nou Bondye akoz nou pe kont lo ou.” Sa bann zoli parol i montre ki Aza ti asire ki Zeova i kapab sov zot. Aza ti annan konfyans dan Zeova e “Zeova ti ganny laviktwar lo bann Etyopyen.”​—2 Kron. 14:8-12, NWT.

13. Ki i ti arive pli tar avek Aza e akoz?

¹³ Aza ti vreman per ler sa larme en milyon solda ti vin lager avek li. Me vi ki i ti depan lo Zeova, Aza ti reisi fer fas avek sa larme. Malerezman, i pa ti depan lo Zeova ler i ti fer fas avek en lot problenm. Ler Baasa, lerwa Izrael ti menas Aza, Aza ti al rod led avek lerwa Siri. Sa ti anmenn maler! Atraver profet Anani, Zeova ti dir Aza: “Akoz ou’n met ou konfyans dan lerwa Siri olye lo [Zeova], ou Bondye; larme Siri in sape anba ou kontrol.” Anfet, depi sa letan, Aza ti toultan pe lager avek Baasa. (2 Kron. 16:7, 9; 1 Rwa. 15:32) Ki nou aprann?

14. Ki mannyer ou kapab depan lo Zeova e dapre 1 Timote 4:12, ki i pou arive si ou fer sa?

 ¹⁴ Annan limite e kontinyen depan lo Zeova. Ler ou ti batize, ou ti montre ki ou annan lafwa ek konfyans dan Zeova. Zeova ti vreman kontan pour akeyir ou dan son fanmir. Sa ki ou bezwen fer aprezan, i kontinyen depan lo Zeova. I kapab fasil pour depan lo Zeova ler ou pe fer bann desizyon enportan me ki ou pou fer lezot fwa? I vreman enportan ki ou depan lo Zeova ler ou pe fer desizyon, menm ler ou pe swazir ou divertisman, ler ou pe deside ki travay ou pou aksepte e ler ou pe met bann lobzektif. Pa depan lo ou prop lasazes. O kontrer, rod bann prensip Labib ki pou ed ou fer ou desizyon e apre aplik li. (Prov. 3:5, 6) Si ou fer sa, ou pou fer Zeova kontan e ou pou ganny respe bann frer ek ser dan kongregasyon.​—Lir 1 Timote 4:12.

15. Dapre 2 Kronik 18:1-3; 19:2, ki fot Lerwa Zeozafat ti fer?

¹⁵ Nou tou nou enparfe e ou pou fer fot parfwa. Me sa pa devret anpes ou fer tou sa ki ou kapab dan servis Zeova. Annou vwar legzanp Lerwa Zeozafat. I ti annan en kantite bon kalite. Ler i ti ankor zenn, i ti rod gidans Zeova e obei son bann komannman. I ti osi anvoy bann prens dan bann lavil Zida pour ansenny bann dimoun konsernan Zeova. (2 Kron. 17:4, 7) Me parfwa Zeozafat ti fer bann move desizyon. Apre ki Zeozafat ti’n fer en move desizyon, en profet Zeova ti reprimann li. (Lir 2 Kronik 18:1-3; 19:2.) Ki ou kapab aprann avek sa resi?

16. Ki ou kapab aprann avek leksperyans Rajeev?

¹⁶ Aksepte e aplik bann konsey ki ou gannyen. Parey bann garson, petet ou vwar li difisil pour fer servis Zeova sa keksoz pli enportan dan ou lavi. Pa dekouraze. Annou vwar leksperyans en zenn frer ki apel Rajeev. Rajeev i mazin ler i ti ankor en adolesan e i dir: “Parfwa mon pa ti konnen ki mon anvi fer avek mon lavi. Parey bokou zenn, mon ti pli anvi fer sport e anmize, ki al renyon oubyen predikasyon.” Kwa ki ti ed Rajeev? En ansyen ki ti anvi ed li ti donn li konsey. Rajeev i dir: “I ti fer mwan reflesir lo sa prensip dan 1 Timote 4:8.” Rajeev ti  annan limilite, i ti aplik sa konsey e i ti sanz son priyorite. I dir: “Mon ti deside fer bann lobzektif spirityel vin sa keksoz pli enportan dan mon lavi.” Ki ti arive? Rajeev i dir: “Detrwa lannen apre ki mon ti’n ganny sa konsey, mon ti kalifye pour servi konman serviter kongregasyon.”

17. Ki mannyer bann frer ek ser dan kongregasyon i santi konsernan bann zenn frer ki servi Zeova?

¹⁷ Zenn frer, bann frer ek ser dan kongregasyon i vreman apresye ou parski ou pe servi Zeova “zepol kont zepol” avek zot. (Zef. 3:9, NWT) Zot kontan pour vwar lafason ki ou devoue dan bann travay ki ou’n ganny demande pour fer. Ou fer zot fyer.​—1 Zan 2:14.

18. Dapre Proverb 27:11, ki mannyer Zeova i santi konsernan bann zenn frer?

¹⁸ Zenn frer, pa zanmen oubliye ki Zeova i kontan ou e i annan konfyans dan ou. I ti dir ki pandan bann dernyen zour, i pou annan en larme bann zenn garson ki pou ofer zot lekor volonterman. (Ps. 110:1-3, NWT) I konnen ki ou kontan li e ou anvi fer tou sa ki ou kapab pour servi li. Alor, annan pasyans avek lezot e annan pasyans avek ou menm. Ler ou fer fot, aksepte konsey ek disiplin ki ou gannyen e konpran ki sa i sorti kot Zeova. (Ebr. 12:6) Donn tou pour tou dan okenn responsabilite ki ou gannyen. Me pli enportan ankor, dan tou sa ki ou fer, fer ou Papa ki dan lesyel fyer.​—Lir Proverb 27:11, NWT. d