Nou kapab ganny pardonnen nou pese selman atraver sa sakrifis ki Zezi ti peye avek son disan. (Efe. 1:7) Kantmenm sa, Labib i dir: “Gras a son pasyans, Bondye in pardonn bann pese ki’n ganny fer dan lepase,” setadir bann pese ki’n ganny fer avan Zezi ti pey ranson. (Rom. 3:25) Ki mannyer Zeova ti kapab pardonn pese avan ki ranson ti ganny peye e an menm tan gard son standar konman en Bondye ki zis?

Zeova ti promet ki i ti pou annan en “desandans” ki ti pou sov bann ki ti pou annan lafwa dan Li ek son bann promes. Ler i ti fer sa promes, i ti konmsi sa ranson ti’n fini ganny peye. (Zen. 3:15; 22:18) Bondye ti asire ki ler sa letan ki i’n swazir ti pou arive, son Garson ti pou pare pour pey sa ranson. (Gal. 4:4; Ebr. 10:7-10) Ler Zezi ti lo later, Zeova ti donn li lotorite pour pardonn pese avan ki ranson ti ganny peye. Zezi ti kapab fer sa parski i ti konnen ki sa sakrifis ki i ti pou ofer, ti pou pardonn zot pese.—Mat. 9:2-6.