1, 2. (a) Ki Zezi ti diskit lo la avek son bann disip sa zour swar avan i mor? (Vwar portre o konmansman sa lartik.) (b) Akoz i enportan pour nou rapel rezon ki nou anons sa mesaz lo Rwayonm? (c) Ki nou pou diskite dan sa lartik?

 SA ZOUR swar avan Zezi i mor, i ti koz avek son bann zapot pour en bon pe letan. I ti asir zot ki i kontan zot en kantite. I ti osi donn zot legzanp sa pye rezen ki nou’n diskit lo la dan sa lartik avan. Zezi ti anvi ankouraz son bann disip pour “kontinyen raport bokou fri,” setadir, andire dan sa travay pour anons sa mesaz lo Rwayonm.​—Zan 15:8.

² Par kont, Zezi pa ti zis dir son bann disip kwa ki zot bezwen fer, me osi akoz ki zot bezwen fer li. I ti donn zot bann rezon akoz ki zot ti bezwen kontinyen anons sa mesaz. I enportan pour nou rapel akoz ki nou osi nou bezwen kontinyen prese. Ler nou reflesi lo sa rezon, sa pou motiv nou pour andire anmezir ki nou donn “en temwannyaz avek tou nasyon.” (Matye 24:13, 14) Dan sa lartik, nou pou diskit lo kat rezon dan Labib ki montre akoz nou  anons sa mesaz lo Rwayonm. Nou pou osi diskit lo kat kado sorti kot Zeova ki ed nou pour kontinyen raport fri.

3. (a) Dapre Zan 15:8, ki sa rezon pli enportan ki nou anons sa mesaz? (b) Dan sa legzanp ki Zezi ti donnen, ki bann rezen i reprezante e akoz sa konparezon i apropriye?

³ Sa rezon pli enportan ki nou anons sa mesaz i akoz nou anvi glorifye Zeova e sanktifye son non. (Lir Zan 15:1, 8.) Ler Zezi ti donn sa legzanp pye rezen, i ti konpar Zeova avek en fermye ki plant rezen. Zezi ti dir ki li i sa pye rezen e ki son bann disip i bann brans. (Zan 15:5) Alor dan sa legzanp, bann rezen i reprezant sa fri ki bann disip Zezi i prodwir, setadir sa travay predikasyon ki zot fer. Zezi ti dir son bann zapot: “Mon Papa i ganny glorifye ler zot kontinyen raport bokou fri.” Ler bann pye rezen i prodwir bann bon rezen, sa i anmenn loner lo sa fermye. Pareyman, ler nou fer nou mye pour anons sa mesaz lo Rwayonm, nou anmenn loner oubyen laglwar lo Zeova.​—Matye 25:20-23.

4. (a) Ki mannyer nou sanktifye non Bondye? (b) Ki mannyer ou santi lefet ki ou annan sa privilez pour sanktifye non Bondye?

⁴ Non Bondye i deza sen. Napa nanryen ki nou kapab fer pour fer li vin pli sen. Alor ki mannyer nou sanktifye non Bondye ler nou anons sa mesaz? Remark sa ki profet Izai ti dir: “[“Zeova bann larme,” NWT] ki ou pou rekonnet koman sen.” (Izai 8:13) Nou sanktifye non Bondye, Zeova, ler nou konsider son non konman sa pli gran non e ler nou ed lezot pour konpran ki sa non i sen. (Matye 6:9, not) Par egzanp, ler nou ansenny dimoun laverite lo bann zoli kalite Zeova ek son plan pour imen viv pour touzour dan Paradi, nou ed zot pour vwar ki tou bann move keksoz ki Satan in dir lo Zeova i bann mansonz. (Zenez 3:1-5) Nou osi sanktifye non Bondye ler nou ed dimoun pour konnen ki Zeova i merit “laglwar, loner ek pwisans.” (Revelasyon 4:11) Rune, ki’n fer pionye pour 16 an, i dir: “Lefet ki mon konnen ki mon’n ganny sa loportinite pour rann temwannyaz lo Kreater liniver, sa i fer mwan annan bokou rekonesans. I donn mwan sa dezir pour kontinyen prese.”

5. (a) Dapre Zan 15:9, 10, akoz nou anons sa mesaz? (b) Ki mannyer Zezi ti ed son bann disip pour konpran ki zot ti pou bezwen andire?

⁵ Lir Zan 15:9, 10. En dezyenm rezon ki nou anons sa mesaz lo Rwayonm i akoz nou kontan Zeova ek Zezi. (Mark 12:30; Zan 14:15) Zezi ti dir son bann disip ki zot devret ‘reste dan son lanmour.’ Akoz Zezi ti dir sa? Parski i ti konnen ki son bann disip ti pou bezwen landirans pour zot viv  konman bann vre Kretyen. Anfet, dan Zan 15:4-10, nou vwar ki Zezi ti servi sa mo “reste” plizyer fwa pour ed son bann disip konpran ki zot ti pou bezwen andire.

6. Ki mannyer nou montre ki nou anvi reste dan lanmour Kris?

⁶ Ki mannyer nou montre ki nou anvi reste dan lanmour Kris e ganny son laprouvasyon? Par obei li. Zezi pe zis demann nou pour fer sa ki li i ti fer. I ti dir: “Mon’n obei komannman mon Papa e mon reste dan son lanmour.” Zezi in kit en legzanp pour nou swiv.​—Zan 13:15.

7. Ki mannyer lobeisans i relye avek lanmour?

⁷ Zezi ti fer kler ki lobeisans i relye avek lanmour ler i ti dir: “Sa ki kontan mwan i aksepte mon bann komannman e obei zot.” (Zan 14:21) Bann komannman ki Zezi ti donnen i sorti kot son Papa, alor ler nou obei komannman Zezi pour anons sa mesaz, nou osi montre ki nou kontan Zeova. (Matye 17:5; Zan 8:28) Osi, ler nou montre Zeova ek Zezi ki nou kontan zot, zot gard nou dan zot lanmour.

8, 9. (a) Donn en lot rezon ki nou prese. (b) Ki mannyer parol Zeova dan Ezekyel 3:18, 19 ek 18:23 i motiv nou pour kontinyen prese?

⁸ En trwazyenm rezon ki nou anons sa mesaz i akoz nou anvi averti lezot konsernan zour Zeova ki pe vini. Labib i dir ki Noe ti ‘prese.’ (Lir 2 Pyer 2:5.) Dan sa mesaz ki Noe ti anonse avan Deliz, i bezwen ki i ti osi averti bann dimoun lo sa destriksyon ki ti pe vini. Akoz nou dir sa? Parski Zezi ti dir: “Parey dan letan avan Deliz, dimoun ti pe manze e bwar, bann zonm ti pe marye e bann madanm ti pe ganny donnen an maryaz, ziska zour ki Noe ti antre dan lars e zot pa ti pran kont nanryen ziska ki Deliz ti vini e balye zot tou. I pou parey ler Garson zonm pou la.” (Matye 24:38, 39) Menm si bann dimoun pa ti ekout Noe, i ti fidelman anons sa mesaz lavertisman ki Zeova ti’n donn li.

⁹ Ozordi, nou anons sa mesaz lo Rwayonm pour donn dimoun sa loportinite pour aprann sa ki Bondye pou fer pour limanite a lavenir. Parey Zeova, nou vreman anvi ki bann dimoun  i ekout sa mesaz pour “ki zot viv.” (Ezekyel 18:23) Ler nou pres kazankaz e dan bann landrwa piblik, nou averti maksimonm dimoun posib ki Rwayonm Bondye pou vini e detri sa move lemonn.​—Ezekyel 3:18, 19; Danyel 2:44; Revelasyon 14:6, 7.

10. (a) Dapre Matye 22:39, ki rezon nou annan pour prese? (b) Ki mannyer Pol ek Silas ti ed en gard prizon dan lavil Filip?

¹⁰ En katriyenm rezon ki nou kontinyen anons sa mesaz i akoz nou kontan dimoun. (Matye 22:39) Sa lanmour i ed nou pour kontinyen prese akoz nou konnen ki latitid dimoun i kapab sanze ler zot sirkonstans i sanze. Par egzanp, bann ki ti opoz sa mesaz ti met Pol ek Silas dan prizon dan lavil Filip. Me dan milye lannwit, i ti annan en tranblemandter ki ti sekwe sa prizon e son bann baro ti ouver. Gard prizon ti sitan per ki bann prizonnyen ti’n sove ki i ti anvi touy son lekor. Me Pol ti anpes li e kriye: “Pa bezwen fer sa!” Sa gard ti demande: “Ki mon bezwen fer pour ganny sove?” Pol ek Silas ti dir li: “Krwar dan Senyer Zezi e ou . . . pou ganny sove.”​—Akt 16:25-34.

11, 12. (a) Ki sa resi konsernan sa gard prizon i ansenny nou lo nou travay predikasyon? (b) Akoz nou anvi kontinyen prese?

¹¹ Ki sa resi konsernan sa gard prizon i ansenny nou lo travay predikasyon? Remarke ki i ti apre sa tranblemandter ki sa gard prizon ti sanz son latitid e demann led. Pareyman, serten dimoun ki pa anvi ekout mesaz Labib i kapab sanz zot latitid e rod led ler en maler i arive dan zot lavi. Par egzanp, serten i kapab tris akoz zot in perdi zot travay oubyen akoz zot in divorse. Lezot i kapab dan lapenn akoz zot annan en maladi grav oubyen akoz en dimoun ki pros avek zot in mor. Ler bann keksoz koumsa i arive, dimoun i kapab konmans demann kestyon lo lavi, bann kestyon ki zot pa’n zanmen mazin lo la avan. Zot menm kapab demande, ‘Ki mon bezwen fer pour ganny sove?’ Petet zot pou anvi ekout nou mesaz lespwar pour premye fwa dan zot lavi.

¹² Alor si nou fidelman kontinyen anons sa mesaz, nou pou disponib ler dimoun i pare pour aksepte sa mesaz rekonfor ki nou anmennen. (Izai 61:1) Charlotte, ki’n fer pionye pour 38 an i dir: “Bann dimoun ozordi in perdi semen. Zot bezwen en loportinite pour tann sa bon nouvel.” Ejvor, ki’n fer pionye pour 34 an, i dir: “Ozordi, plis ki zanmen oparavan, bokou dimoun i dan depresyon. Mon vreman anvi ed zot. Sa i motiv mwan pour prese.” I kler alor ki lanmour pour dimoun i en bon rezon pour kontinyen prese!

13, 14. (a) Ki kado ki ganny mansyonnen dan Zan 15:11? (b) Ki mannyer nou kapab ganny sa lazwa ki Zezi i annan? (c) Ki mannyer lazwa i ed nou dan predikasyon?

¹³ Sa zour swar avan Zezi ti mor, i ti osi koz lo bann kado ki ti pou ed son bann zapot pour kontinyen raport fri. Ki sa bann kado ki Zezi ti koz lo la e ki mannyer zot kapab ed nou ozordi?

¹⁴ Nou ganny lazwa konman kado. Eski i en fardo pour nou prese? Non.  Apre ki Zezi ti koz lo legzanp sa pye rezen, i ti dir ki ler nou prese nou pou ganny son lazwa. (Lir Zan 15:11.) Ki mannyer sa i posib? Rapel byen ki dan sa legzanp, Zezi ti dir ki li i sa pye rezen e ki son bann disip i bann brans. Bann brans i ganny delo ek mineral ki zot bezwen avek sa pye rezen si selman zot reste atase avek sa pye rezen. Dan menm fason, nou osi nou kapab annan menm kantite lazwa ki Zezi ti annan si selman nou reste ini avek li e swiv son lepa fidelman. Apre nou pou annan sa lazwa ki li i ti annan, sa lazwa ki nou gannyen ler nou fer lavolonte Bondye. (Zan 4:34; 17:13; 1 Pyer 2:21) Hanne, ki’n fer pionye pour plis ki 40 an, i dir, “Sa lazwa ki mon toultan gannyen apre predikasyon, i motiv mwan pour kontinyen dan servis Zeova.” Lazwa pou donn nou lafors pour kontinyen prese menm ler laplipar dimoun pa ekoute.​—Matye 5:10-12.

15. (a) Ki kado ki ganny mansyonnen dan Zan 14:27? (b) Ki mannyer lape i ed nou pour kontinyen raport fri?

¹⁵ Nou ganny lape konman kado. (Lir Zan 14:27.) Pli boner pandan sa zour swar avan Zezi ti mor, i ti dir son bann zapot: “Mon donn zot mon lape.” Ki mannyer lape Zezi i kapab ed nou pour kontinyen prese? Ler nou kontinyen prese, nou anpe akoz nou konnen ki nou pe fer Zeova ek Zezi ere. (Psonm 149:4; Romen 5:3, 4; Kolosyen 3:15) Ulf, ki’n fer pionye pour 45 an, i dir, “Sa travay predikasyon i fer mwan fatige, me i osi donn mwan vre satisfaksyon ek en vre bi dan lavi.” Nou rekonesan ki nou’n ganny lape ki dire!

16. (a) Ki kado ki ganny mansyonnen dan Zan 15:15? (b) Ki mannyer bann zapot ti kapab reste zanmi avek Zezi?

¹⁶ Nou ganny lanmitye konman kado. Apre ki Zezi ti’n dir son bann zapot ki i anvi ki zot annan lazwa, i ti eksplike akoz i enportan pour zot demontre lanmour ki pa egois. (Zan 15:11-13) Apre i ti dir: “Mon apel zot zanmi.” Pa i en zoli kado ki nou zanmi avek Zezi! Me ki mannyer bann zapot ti kapab reste zanmi avek li? Zezi ti dir zot “kontinyen raport fri.” (Lir Zan 15:14-16.) Andotmo, kontinyen prese.  Apepre de-z-an avan sa, Zezi ti’n dir son bann zapot al prese e dir: “Rwayonm lesyel in aprose.” (Matye 10:7) I pour sa rezon, ki sa zour swar avan i mor, Zezi ti ankouraz son bann disip pour andire dan sa travay predikasyon. (Matye 24:13; Mark 3:14) Byensir, Zezi ti konnen ki i pa ti pou fasil pour swiv sa lord. Me zot ti kapab fer li e reste son zanmi. Ki mannyer sa? Avek led en lot kado.

17, 18. (a) Ki kado ki ganny mansyonnen dan Zan 15:7? (b) Ki mannyer sa kado ti ed bann disip Zezi? (c) Ki bann kado ki ed nou ozordi?

¹⁷ Nou ganny larepons nou lapriyer konman kado. Zezi ti dir: “Tou sa ki zot demande zot pou gannyen.” (Zan 15:7, 16) Promes Zezi ti’n bezwen vreman batir bann zapot! a (Vwar not.) Bann zapot pa ti konpletman konpran ki Zezi ti pou mor byento. Me son lanmor pa ti vedir ki zot ti pou napa okenn led. Zeova ti pare pour reponn zot lapriyer e ed zot dan sa travay predikasyon. Sanmenm sa ki i ti fer. Pa bokou letan apre ki Zezi ti’n mor, bann zapot ti sipliy Zeova pour donn zot kouraz e Zeova ti reponn zot lapriyer.​—Akt 4:29, 31.

¹⁸ I menm parey ozordi. Ler nou andire dan predikasyon, nou reste zanmi avek Zezi. Nou osi kapab asire ki Zeova i pare pour reponn nou lapriyer ler nou demann li led kan nou vwar li difisil pour prese. (Filipyen 4:13) Nou vreman rekonesan ki Zeova i reponn nou lapriyer e ki nou annan Zezi konman nou zanmi. Sa bann kado sorti kot Zeova i donn nou lafors pour kontinyen raport fri.​—Zak 1:17.

19. (a) Akoz nou kontinyen prese? (b) Kwa ki ed nou pour fini sa travay ki Bondye in donn nou?

¹⁹ Dan sa lartik, nou’n aprann lo kat rezon akoz nou kontinyen prese: pour glorifye Zeova e sanktifye son non, pour demontre nou lanmour pour Zeova ek Zezi, pour averti dimoun e pour montre ki nou kontan dimoun. Nou’n osi aprann lo kat kado: lazwa, lape, lanmitye ek larepons nou lapriyer. Sa bann kado i donn nou lafors pour fini sa travay ki Zeova in donn nou. Zeova i vreman kontan ler i vwar nou pe travay dir pour “kontinyen raport bokou fri”!