1. Ki Bondye in donn nou dan son Parol?

 NOU kapab fer fas avek nenport problenm ki nou rankontre parski nou annan Zeova konman nou Gran Enstrikter. (Iza. 30:20, 21, NWT) Dan son Parol, i’n donn nou tou sa ki nou bezwen pour ki nou “byen konpetan e byen ekipe pour fer bann bon keksoz.” (2 Tim. 3:17) Ler nou met an pratik sa ki nou aprann dan Labib, nou vin pli saz ki bann dimoun ki ankouraz nou pour viv dapre “lasazes sa lemonn.”​—1 Kor. 3:19; Ps. 119:97-100.

2. Ki nou pou diskite dan sa lartik?

² Parey nou pou vwar, souvandfwa nou bann dezir egois i fer ki nou ganny atire par lasazes sa lemonn. Alor nou kapab vwar li difisil pour evite annan menm fason panse e menm konportman avek bann dimoun dan sa lemonn. I pour sa rezon ki Labib i dir: “Fer atansyon ki personn pa met zot dan pyez avek zot bann filozofi ek fo rezonnman ki pa baze lo Kris me lo bann tradisyon zonm.” (Kol. 2:8) Dan sa lartik, nou pou vwar akoz dimoun ti konmans krwar dan de mansonz ki Satan i ansennyen. Dan tou le de ka, nou pou vwar akoz lasazes sa lemonn i en enbesilite e ki mannyer lasazes ki sorti dan Parol Bondye i bokou pli siperyer ki okenn keksoz ki sa lemonn i annan pour ofer.

3-4. Ant lannen 1900 ziska 1930, ki bann dimoun Leta-z-ini ti konmans krwar lo sèks?

³ Dan bann lannen ant 1900 ziska 1930, bann dimoun Leta-z-ini ti konmans sanz zot pwennvi lo sèks. Avan sa, en kantite dimoun ti krwar ki sèks i devret ganny fer zis ler ou’n marye e i pa ti en keksoz ki ti ganny diskite an piblik. Me aprezan dimoun ti aret swiv sa bann standar e zot ti konmans krwar ki dimoun i ganny drwa fer sa ki zot anvi.

 ⁴ Ant lannen 1920 ziska 1929, dimoun ti konmans konsantre plis lo plezir ek larzan, sirtou apre tou sa difikilte ki zot ti’n pas ladan pandan Premye Lager Mondyal. En serser i dir: “Bann film, pyes teat, sanson, liv ek piblisite ti konmans montre bokou plis keksoz ki annan pour fer avek sèks.” Diran sa bann lannen, lafason ki dimoun ti danse ti fer zot mazin sèks e zot ti nepli sanz dan en fason respektab. Sa i annakor avek sa ki Labib ti’n predir, ki dan bann dernyen zour dimoun ti pou “kontan plezir.”​—2 Tim. 3:4.

5. Ki’n arive avek pwennvi dimoun lo sèks depi 1960?

⁵ Apre 1960, plis dimoun ti konmans viv ansanm san marye, omoseksyalite ti vin pli popiler e plis dimoun ti divorse. Zot ti nepli per pour montre sèks dan bann divertisman. Ki rezilta tousala in anmennen? En ekriven ti dir ki i annan en kantite move konsekans ler bann dimoun i aret viv dapre bann standar Labib lo sèks. Par egzanp, i annan plis fanmir kot bann paran pa viv ansanm ouswa kot en paran in abandonn lafanmir e plis dimoun i annan bann problenm emosyonnel e i annan plis dimoun ki adikt avek pornografi. En lot keksoz ki’n arive, se ki i annan plis maladi ki transmet par sèks, parey SIDA. Tousala i montre ki sa ki lemonn i konsider konman en bon fason viv, i an realite zis bet.​—2 Pyer 2:19.

6. Akoz nou kapab dir ki pwennvi sa lemonn lo sèks i annakor avek plan Satan?

⁶ Pwennvi sa lemonn lo sèks i annakor avek plan Satan. Nou kapab asire ki i kontan pour vwar dimoun fer sèks dan en fason ki pa ti dan plan Bondye e ki i kontan ki dimoun i mank respe pour maryaz, ki en kado sorti kot Bondye. (Efe. 2:2) Ler bann dimoun i viv dan en fason imoral, zot montre ki zot pa apresye ki Bondye in donn imen sa abilite pour fer zanfan. I osi fer ki zot kapab perdi sa loportinite pour viv pour touzour.​—1 Kor. 6:9, 10.

7-8. Akoz sa ki Labib i dir lo sèks i bokou pli saz ki sa ki lemonn i dir?

⁷ Bann dimoun ki aksepte sa ki lemonn i dir lo sèks, i riy sa ki Labib i dir akoz zot krwar ki i pa realistik pour bann imen viv koumsa. Sa bann dimoun i kapab demande, ‘Akfer Bondye ti pou kree nou avek bann dezir seksyel, apre dir nou pa  satisfer sa bann dezir?’ Me pa sa ki Labib i dir. Labib i dir ki nou pa bezwen satisfer tou dezir ki nou annan me ki nou kapab lager kont nou bann move dezir. (Kol. 3:5) An plis, Zeova in fer li posib pour nou satisfer nou bann dezir seksyel ki apropriye ler nou marye. (1 Kor. 7:8, 9) Koumsa, kontrerman avek bann dimoun ki fer imoralite seksyel, en msye ek en madanm marye i kapab vwar li gou pour fer sèks san okenn regre ek traka.

⁸ Kontrerman avek lasazes sa lemonn, Labib i ed nou pour annan en pli bon pwennvi lo sèks. Labib i dir ki i kapab gou pour fer sèks. (Prov. 5:18, 19) Par kont, Labib i osi dir: “Sakenn parmi zot i devret konnen ki mannyer pour kontrol son prop lekor dan en fason sen e avek respe. Zot pa devret fer parey dimoun lezot nasyon ki pa konn Bondye, ki pa zanmen satisfe avek zot bann dezir seksyel san kontrol.”​—1 Tesa. 4:4, 5.

9. (a) Apepre 100 an pase, kwa ki ti ed pep Zeova pour swiv lasazes Bondye? (b) Ki konsey saz nou trouve dan 1 Zan 2:15, 16? (c) Dapre Romen 1:24-27, ki bann pratik imoral nou devret evite swiv?

⁹ Apepre 100 an pase, pep Bondye pa ti ganny persyade pour swiv fo rezonnman bann dimoun ki ti’n “perdi tou sans moral.” (Efe. 4:19) Zot ti esey zot mye pour met an pratik standar Zeova lo sèks. Latour Veyer le 15 Me 1926 an Angle ti dir ki “en zonm oubyen en madanm i devret annan bann panse pir e konport li dan en fason pir sirtou an rapor avek en dimoun lot sèks.” Malgre tou sa ki ti pe arive dan lemonn, pep Zeova ti swiv lasazes Bondye ki sorti dan son Parol ki bokou pli siperyer. (Lir 1 Zan 2:15, 16.) Pa nou vreman kontan ki nou annan Labib! Nou osi rekonesan anver Zeova parski i donn nou bann manze spirityel aler ki ed nou pour pa ganny anbete par lasazes sa lemonn an rapor avek sèks. b​—Lir Romen 1:24-27.

10-11. Ki Labib ti dir pou arive dan bann dernyen zour?

¹⁰ Labib ti averti ki dan bann dernyen zour dimoun ti pou “egois” oubyen “zis kontan zot prop lekor.” (2 Tim. 3:1, 2, not) Nou pa sirprann ler nou vwar ki lemonn i ankouraz dimoun pour devlop sa kalite latitid. En ansiklopedi i dir ki dan bann lannen 1970, i ti konmans annan plis liv ki donn konsey lo konman pour reisi dan lavi. Serten sa bann liv ti dir ki en dimoun pa devret sanz son fason oubyen krwar ki i annan en keksoz mal avek li. Par egzanp, enn sa bann liv ti dir: “Kontan ou lekor parski ou sa dimoun pli zoli e pli enteresan ki’n deza egziste.” Sa liv ti dir ki en dimoun i devret desid pour li menm ki mannyer pour viv son lavi e ki i devret fer sa ki li i krwar i byen e dan son lavantaz.

¹¹ Eski ou’n deza tann sa nide avan? Satan ti ankouraz Ev pour fer en keksoz en pe parey. I ti dir Ev ki i ti kapab “vin parey Bondye, e . . . konn lebyen ek lemal.” (Zen. 3:5) Ozordi, en kantite dimoun i sitan annan en gran lopinyon lo zot lekor, ki zot krwar ki personn pa kapab dir zot kwa ki byen e kwa ki mal, ni menm Bondye. Par egzanp, nou kapab vwar sa kalite latitid dan lafason ki dimoun i vwar maryaz.

12. Ki mannyer bann dimoun dan lemonn i vwar maryaz?

¹² Labib i demann bann msye ek madanm marye pour demontre respe anver kanmarad e pour gard sa ve ki zot ti fer  ler zot ti marye. I dir: “En zonm i kit son papa ek son manman pour atas li avek son fanm, e tou le de zot vin en sel laser.” (Zen. 2:24) Sa konsey i ankouraz bann konzwen pour determinen pour reste avek kanmarad. Par kont, bann dimoun ki aksepte lasazes sa lemonn i annan en lot pwennvi. Zot dir ki sak konzwen i devret konsantre lo sa ki li i anvi. Dan serten pei, ler en koup i marye zot fer en promes devan lezot dimoun ki zot pou reste ansanm pour leres zot lavi. Me serten dimoun in sanz lafason ki zot dir sa promes, olye dir pour leres zot lavi, zot dir ki zot pou reste marye osi lontan ki zot tou le de zot kontan kanmarad. Vi ki bokou dimoun pa vwar maryaz konman en keksoz permanan, en kantite fanmir in kase e en kantite in ganny blese. I kler ki lafason ki dimoun dan lemonn i vwar maryaz i bet.

13. Akoz Zeova i deteste bann dimoun arogan?

¹³ Labib i dir: “[Zeova] i deteste dimoun arogan.” (Prov. 16:5) Akoz Zeova i santi koumsa? En rezon, se ki bann dimoun ki ankouraz lezot pour annan sa nide ki zot pli enportan, i vin arogan zis parey Satan. Zis mazinen ki mannyer Satan i sitan arogan ki i ti annan sa lodas pour demann Zezi pour tonm azenou devan li e ador li! Sa menm Zezi ki Zeova ti’n servi pour ed li kree tou keksoz. (Mat. 4:8, 9; Kol. 1:15, 16) Bann dimoun ki annan en sitan gran lopinyon lo zot lekor i prouve ki lasazes sa lemonn i en enbesilite pour Bondye.

14. Ki mannyer Romen 12:3 i ed nou pour annan en bon pwennvi lo nou lekor?

¹⁴ Labib i ed nou pour annan en bon pwennvi lo nou lekor. Dapre Labib, i apropriye pour nou kontan nou lekor. Zezi ti dir: “Kontan ou prosen parey ou kontan ou prop lekor,” ki montre ki i pa mal pour port latansyon lo sa ki nou nou bezwen. (Mat. 19:19) Par kont, Labib  i dir ki nou pa devret krwar ki nou pli enportan ki lezot. O kontrer, i dir: “Pa fer nanryen avek en leta lespri dispit oubyen egois, me avek limilite konsider lezot pli siperyer ki zot.”​—Fili. 2:3; lir Romen 12:3.

15. Ki ou’n vwar ki konvenk ou ki sa ki Labib i dir lo lafason ki nou devret vwar nou lekor i fer sans?

¹⁵ Ozordi, en kantite dimoun ki swadizan byen edike, i dir ki sa konsey ki Labib i donnen lo lafason ki nou devret konsider nou lekor i bet. Zot dir ki ler ou krwar ki lezot i pli enportan ki ou, sa i fer ki zot kapab fasilman abiz lo ou. Me ki’n arive vi ki bokou in adopte sa pwennvi ki popiler dan lemonn Satan e met zot lekor premye? Ki ou ou’n vwar? Eski bann dimoun egois i ere? Eski zot annan en bon lavi fanmir? Eski zot annan bann vre zanmi? Eski zot annan en bon relasyon avek Bondye? Dapre sa ki ou’n obzerve, kwa ki anmenn bann pli bon rezilta, ler dimoun i swiv lasazes sa lemonn oubyen ler zot swiv lasazes Bondye ki sorti dan son Parol?

16-17. Ki nou rekonesan pour annan e akoz?

¹⁶ Dimoun ki swiv konsey bann dimoun ki swadizan saz dan sa lemonn, i parey en touris ki demann en lot touris ki direksyon pour ale, ler zot tou le de zot in perdi. Zezi ti dir sa konsernan bann dimoun ki ti swadizan saz dan son letan: “Zot bann gid aveg. Alor, si en aveg i gid en lot aveg, tou le de pou tonm dan trou.” (Mat. 15:14) Vreman, lasazes sa lemonn i en enbesilite pour Bondye.

¹⁷ Leksperyans in montre ki konsey Labib in toultan “itil pour ansennyen, pour reprimande, pour korize, pour disiplinen dapre ladrwatir Bondye.” (2 Tim. 3:16, not) Nou vreman rekonesan ki Zeova i servi son lorganizasyon pour protez nou kont lasazes sa lemonn! (Efe. 4:14) Tou sa bann piblikasyon baze lo Labib ki Zeova in donn nou, i donn nou sa lafors ki nou bezwen pour kontinyen viv dapre bann standar ki sorti dan son Parol. I en gran privilez ki Zeova i donn nou sa pli bon lasazes ek gidans ki nou kapab depan lo la atraver son Parol Labib!