LANNEN pase, plizyer milye frer partou dan lemonn ti ganny apwente konman ansyen ek serviter kongregasyon. Si ou enn parmi zot, sirman ou kontan ki ou kapab servi Zeova ek ou bann frer ek ser dan sa nouvo fason.

Kantmenm sa, i normal si ou santi ou en pe enkyet. En zenn ansyen ki apel Jason i dir: “Ler mon ti fek ganny apwente, mon pa ti konnen ki mannyer pour fer fas avek mon bann nouvo responsabilite.” Moiz ek Zeremi osi ti santi ki zot pa ti kalifye ler zot ti ganny bann nouvo responsabilite avek Zeova. (Egzod 4:10; Zeremi 1:6) Si ou santi parey, ki ou kapab fer pour vin pli konfidan e kontinyen fer progre? Ou kapab aprann en kantite avek legzanp Timote.​—Akt 16:1-3.

I tre probab ki Timote ti annan apepre 20 an ler i ti konmans vwayaz avek zapot Pol. Ler i ti fek ganny sa lenvitasyon, petet Timote ti santi ki i pa ti kalifye pour ansenny e konsey lezot akoz i ti ankor zenn. (1 Timote 4:11, 12; 2 Timote 1:1, 2, 7) Me i ti kontinyen progrese e di-z-an pli tar Pol ti dir avek bann Filipyen: “Mon swete anvoy Timote kot zot byento.” Akoz Pol ti santi koumsa? I ti eksplike: “Mon napa personn ankor ki annan en bon latitid parey Timote.”​—Filipyen 2:19, 20.

Akoz Timote i en bon legzanp pour bann ansyen? Annou vwar sis rezon.

1. I ti vreman annan lentere dimoun a ker. Pol ti dir bann frer Filip ki Timote ti pou “vreman enterese avek zot byennet.” (Filipyen 2:20) Timote ti oule ki bann frer ek ser i reste pros avek Zeova e i ti pare pour sakrifye son letan ek lenerzi pour ed zot.

William, ki’n servi konman en ansyen pour plis ki 20 an, i toultan dir bann frer ki fek ganny apwente konman ansyen pour “kontan bann frer ek ser. Konsantre plis lo zot bezwen ki lo bann keksoz ki bezwen ganny organize.” Pa bezwen vin parey en drayver bis ki pli enterese lo ariv a ler kot bann bestop ki lo pran pasaze.

2. I ti met servis Zeova premye. Pol ti dir ki Timote ti diferan avek bann ki ti pe “rod zot prop lentere, me pa sa ki pour Zezi Kri.” (Filipyen 2:21) Pol ti remarke ki bann frer otour li ti pe tro konsantre lo zot prop lavi. Par ler zot ti met zot prop lentere avan servi Zeova. Me Timote pa ti koumsa! Dek ki i ti ganny sa loportinite pour fer plis dan servis Bondye, i ti azir parey Izai ki ti dir: “La mon la! Anvoy mwan!”​—Izai 6:8.

Ki mannyer ou kapab annan en bon balans anmezir ki ou pran swen avek bann keksoz personnel ek bezwen kongregasyon? Premyerman, swiv konsey Pol: “Verifye sa ki pli enportan.” (Filipyen 1:10) Met servis Zeova premye dan ou lavi. Dezyenmman, evit bann aktivite ki pou pran tro bokou ou letan ek lenerzi. Pol ti dir Timote: “Sov lwen avek dezir bann zenn, me fer zefor pour devlop ladrwatir, lafwa, lanmour, lape.”​—2 Timote 2:22.

3. I ti travay dir dan servis Zeova. Pol ti dir sa lo Timote: “Parey en zanfan avek son papa, i’n servi parey en lesklav avek mwan pour propaz sa bon nouvel.” (Filipyen 2:22) Timote pa ti pares. I ti travay  dir ansanm avek Pol e sa ti fer zot vin bann pli bon zanmi.

I annan en kantite travay pour fer dan lorganizasyon Zeova ozordi. Sa travay i vreman satisfezan e i pou ed ou vin pli pros avek ou bann frer ek ser. Alor fer sir ki ou toultan annan “bokou keksoz pour fer dan travay Senyer.”​—1 Korentyen 15:58.

4. I ti aplik sa ki i ti aprann. Pol ti ekri Timote: “Ou’n swiv byen mon lansennyman, mon fason viv, mon lobzektif, mon lafwa, mon pasyans, mon lanmour, mon landirans.” (2 Timote 3:10) Timote ti aplik sa ki i ti aprann, alor i ti ganny plis responsabilite ankor.​—1 Korentyen 4:17.

Akoz ou pa swazir en ansyen eksperyanse ki kapab vin en legzanp pour ou swiv? Tom, ki’n servi konman en ansyen pour plizyer lannen i rapel ki en ansyen eksperyanse ti pran en lentere personnel dan li e donn li en bon formasyon. I dir: “Mon ti abitye demann li konsey e aplik son konsey. Sa ti fer ki vitman mon ti ganny plis konfidans.”

5. I ti kontinyen antrenn son lekor. Pol ti donn Timote sa konsey: “Antrenn ou lekor e fer li ou lobzektif pour devlop devosyon pour Bondye.” (1 Timote 4:7, not) Menm si en atlet i annan en lantrener, i ankor bezwen antrenn son lekor. Pol ti donn Timote sa lankourazman: “Kontinyen donn ou meyer ler ou lir an piblik, donn konsey e ansennyen. . . . Reflesir lo sa bann keksoz e pran zot aker, pour ki tou dimoun i a vwar byen ki ou pe progrese.”​—1 Timote 4:13-15.

Ou osi ou bezwen kontinyen amelyor ou bann abilite. Etidye Labib o profon e reste azour avek bann dernyen lenstriksyon ki nou gannyen avek lorganizasyon. Pa bezwen vin tro konfidan. I ti pou mal pour krwar ki ou telman annan bokou leksperyans ki ou kapab fer fas avek nenport sityasyon san ki ou bezwen fer byen ou resers. Parey Timote, “toultan vey ou fason viv ek ou lansennyman.”​—1 Timote 4:16.

6. I ti depan lo lespri sen Zeova. Ler Pol ti pe koz avek Timote konsernan son minister, i ti donn li sa rapel: “Protez sa keksoz presye ki’n ganny konfye avek ou gras a lespri sen ki dan nou.” (2 Timote 1:14) Timote ti bezwen depan lo lespri sen Bondye.

Donald, ki’n servi konman en ansyen pour plizyer lannen i dir: “Bann zonm responsab i bezwen apresye zot relasyon avek Bondye. Bann ki fer sa pou ‘pli for.’ Si zot priye pour ganny lespri sen Bondye e devlop fri lespri sen, zot pou vin en vre benediksyon pour zot bann frer ek ser.”​—Psonm 84:7; 1 Pyer 4:11.

I ankourazan pour vwar bann nouvo serviter kongregasyon ek ansyen, ki zis parey ou, zot pe kontinyen fer progre dan zot servis pour Zeova. Jason, ki nou’n koz lo la pli boner, i dir: “Pandan sa letan ki mon’n servi konman en ansyen, mon’n aprann en kantite e mon pli konfidan. Aprezan mon vreman kontan mon responsabilite e vwar li konman en zoli privilez!”

Eski ou pou kontinyen fer progre? Si ou swiv legzanp Timote, ou osi ou kapab vin en benediksyon pour ou bann frer ek ser.