1. Lekel ki ti ede form sa kongregasyon dan lavil Filip?

 LER zapot Pol, Silas, Lik ek Timote ti ariv dan lavil Filip ki ti en koloni Romen, i ti annan en kantite dimoun ki ti anvi aprann plis lo Rwayonm Bondye. Sa kat frer devoue ti ede form en kongregasyon e tou bann nouvo frer ek ser ti konmans zwenn ansanm. I tre probab ki zot ti zwenn kot lakour Lidi, en ser ki ti koni pour son lospitalite.​—Akt 16:40.

2. Ki difikilte sa kongregasyon ti pas atraver pa bokou letan apre ki i ti’n ganny formen?

² Pa bokou letan apre ki kongregasyon Filip ti’n formen, zot ti pas atraver en sityasyon difisil. Satan ti fer bann dimoun ki ti ay laverite opoz Pol ek son bann konpanyon akoz zot ti pe anons sa bon nouvel. Pol ek Silas ti ganny arete, bate avek baton e ganny met dan prizon. Ler zot ti sorti dan prizon, zot ti al vizit bann nouvo disip pour ankouraz zot. Apre sa, Pol, Silas ek Timote ti kit sa lavil me i paret ki Lik ti reste. Ki bann nouvo frer ek ser ti pou fer aprezan? Zeova ti donn zot son lespri sen e sa ti ed zot pour kontinyen servi li avek devouman. (Fili. 2:12) Pol ti annan rezon pour fyer akoz zot!

3. Dapre Filipyen 1:9-11, ki Pol ti priy lo la?

³ Apepre di-z-an pli tar, Pol ti ekri en let pour kongregasyon Filip. Anmezir ki ou lir sa let, i fasil pour vwar ki kantite Pol ti kontan sa bann frer ek ser. I ti ekri: “Bondye i konn byen ki kantite mon mank zot akoz mon annan lafeksyon ek tandres pour zot parey Kris Zezi.” (Fili. 1:8) Dan son let, i ti dir ki i priy pour zot. I ti priye ki  zot lanmour i vin deplizanpli gran, ki zot verifye sa ki pli enportan, ki zot san defo, ki zot pa fer lezot tonbe e ki zot kontinyen raport fri ladrwatir. Ozordi, nou osi nou kapab aprann en kantite leson avek sa bann parol senser ki Pol ti ekri. Alor, annou lir sa ki Pol ti dir bann Filipyen dan son let. (Lir Filipyen 1:9-11.) Apre sa, nou pou diskit lo bann pwen ki i ti fer resorti e vwar ki mannyer nou kapab aplik zot ozordi.

4. (a) Dapre 1 Zan 4:9, 10, ki mannyer Zeova in demontre son lanmour pour nou? (b) Ki kantite nou devret kontan Bondye?

⁴ Zeova in demontre son gran lanmour pour nou par anvoy son Garson lo later pour mor pour nou pese. (Lir 1 Zan 4:9, 10.) Son lanmour i pous nou pour kontan li an retour. (Rom. 5:8) Ki kantite nou devret kontan Bondye? Zezi ti reponn sa kestyon ler i ti dir en Farizyen: “Ou devret kontan Zeova ou Bondye avek tou ou leker, avek tou ou nanm e avek tou ou lespri.” (Mat. 22:36, 37) I pa ase pour kontan Bondye zis en ptigin. O kontrer, nou anvi ki nou lanmour pour li i vin pli for avek sak zour ki pase. Pol ti dir bann Filipyen ki zot lanmour i devret “vin deplizanpli gran.” Ki nou kapab fer pour devlop plis lanmour pour Bondye?

5. Ki nou kapab fer pour kontan Bondye plis?

⁵ Pour nou kapab kontan Bondye, nou bezwen konn li. Labib i dir: “Sa ki pa kontan lezot pa’n aprann konn Bondye parski Bondye i lanmour.” (1 Zan 4:8) Zapot Pol ti eksplike ki nou lanmour pour Zeova pou ogmante anmezir nou aprann laverite lo li e konpran son fason vwar keksoz. (Fili. 1:9) Ler nou ti fek konmans etidye Labib, nou ti konmans kontan Zeova menm si nou pa ti konn bokou keksoz lo li. Me anmezir ki nou ti aprann plis lo Zeova, nou lanmour pour li ti vin pli for. Sanmenm sa i sitan enportan ki nou etidye Labib regilyerman e reflesi byen lo sa ki nou lir!​—Fili. 2:16.

6. Dapre 1 Zan 4:11, 20, 21, lekel ankor ki nou bezwen kontan pour ki nou lanmour i vin deplizanpli gran?

⁶ Vi ki Bondye i kontan nou en kantite, sa i pous nou pour kontan nou bann frer ek ser. (Lir 1 Zan 4:11, 20, 21.) Nou kapab tant pour krwar ki i pou fasil pour kontan nou bann frer ek ser. Apre tou, nou tou nou ador Zeova e nou fer zefor pour devlop bann bon kalite. Nou osi swiv legzanp Zezi ki ti sitan kontan nou, ki i ti pare pour mor pour nou. Toudmenm, parfwa i kapab difisil pour obei sa lord pour kontan kanmarad. Annou vwar en keksoz ki ti arive dan kongregasyon Filip.

7. Ki nou aprann atraver sa konsey ki Pol ti donn Evodi ek Sentis?

⁷ Evodi ek Sentis ti de ser devoue ki ti travay “kot a kot” avek zapot Pol. Me i posib ki zot ti’n ganny en problenm avek kanmarad e sa ti’n fer zot aret zanmi. Sa de ser ti dan kongregasyon Filip. Alor, ler Pol ti ekri son let, i ti koz lo Evodi ek Sentis e i ti donn zot sa konsey “pour annan menm fason panse.” (Fili. 4:2, 3) Pol ti osi vwar li neseser pour dir kongregasyon antye: “Kontinyen fer tou keksoz san konplent e argimante.” (Fili. 2:14) Nou kapab asire ki sa konsey kler ti ed sa de ser fidel ensi ki lezot frer ek ser dan sa kongregasyon pour devlop plis lanmour pour kanmarad.

8. Kwa ki kapab fer li vreman difisil pour kontan nou bann frer ek ser? Ki nou kapab fer dan sa sityasyon?

 ⁸ Parfwa, i vreman difisil pour nou kontan nou bann frer ek ser parski parey Evodi ek Sentis, nou tant pour konsantre lo sa ki lezot i fer mal. Toulezour, nou tou nou fer fot. Si nou kontinyen mazin lo bann fot ki lezot in fer, sa pou fer li pli difisil pour nou kontan zot. Par egzanp, si en frer i oubliye ed nou ler i annan netwayaz Lasal Rwayonm, sa i kapab fer nou fristre. Si apre sa, nou konmans mazin lo tou lezot keksoz ki sa frer in fer mal, nou pou pli fristre e nou lanmour pour li pou diminyen. Si sa in arive avek en dimoun dan kongregasyon, i ti a byen ki ou reflesi lo sa pwen: Zeova i konn tou sa ki sa frer in fer mal, me i osi konn tou sa ki ou ou’n fer mal. Pourtan, i kontan nou tou. I pour sa rezon, ki nou bezwen aprann pour demontre lanmour parey Zeova e kontinyen konsantre lo bann bon kalite ki nou bann frer ek ser i annan. Ler nou fer bokou zefor pour kontan nou bann frer ek ser, nou vin pli ini avek kanmarad.​—Fili. 2:1, 2.

9. Ki serten keksoz “ki pli enportan” Pol i koz lo la dan son let pour bann Kretyen dan lavil Filip?

⁹ Zeova ti gid Pol pour dir bann Kretyen dan lavil Filip ki zot bezwen “verifye sa ki pli enportan.” Nou osi nou bezwen fer parey ozordi. (Fili. 1:10) Sa bann keksoz enportan ki nou bezwen verifye i enkli, bann fason ki nou kapab onor non Zeova, son bann promes ki vin vre e lape ek linite dan kongregasyon. (Mat. 6:9, 10; Zan 13:35) Ler nou fer sa bann keksoz en priyorite dan nou lavi, nou montre ki nou kontan Zeova.

10. Ki nou bezwen fer pour ki Zeova i vwar nou konman san defo?

¹⁰ Pol ti osi dir ki nou bezwen “san defo.” Sa pa vedir ki nou bezwen parfe. Nou pa kapab san defo dan menm fason ki Zeova i san defo. Par kont, Zeova pou vwar nou konman san defo si nou fer nou mye pour devlop plis lanmour pour li ek nou bann frer ek ser e si nou verifye sa ki pli enportan. Nou kapab demontre nou lanmour ler nou fer tou sa ki nou kapab pour pa fer lezot tonbe, andotmo, ler nou evite fer lezot fer pese.

11. Akoz nou bezwen fer sir ki nou pa fer lezot tonbe?

¹¹ Sa konsey pour pa fer lezot tonbe i en keksoz vreman serye. Ki mannyer nou ti kapab fer en dimoun tonbe? Par sa ki nou swazir pour gete, lir oubyen ekoute, par nou labiyman e menm sa kalite travay ki nou fer. I posib ki nou pa pe fer en keksoz ki Zeova i dir i mal. Me si sa ki nou swazir pour fer i fatig konsyans en dimoun e fer li tonbe, sa i en keksoz grav. Zezi ti dir ki si nou fer en keksoz ki fer enn nou frer oubyen ser fer pese e gat son relasyon avek Zeova, sa i pli pir ki si en gro ros i ganny anmare dan nou likou e nou ganny zete dan kannal!​—Mat. 18:6.

12. Ki nou aprann avek legzanp en koup pionye?

¹² Annou vwar ki mannyer en koup pionye ti aplik konsey Zezi. Zot ti pe servi dan en kongregasyon kot i ti annan en koup ki ti’n fek batize. Sa koup ti’n grandi dan en fanmir kot zot pa ti ganny drwa fer bokou keksoz. Sa koup ti krwar ki bann Kretyen pa devret al sinema menm pour get en film apropriye. Zot ti soke pour tande ki sa koup pionye ti’n al get en film. Ki sa koup pionye ti fer? Zot ti deside pour pa al sinema ankor ziska ki sa  lot koup ti kapab antrenn zot konsyans e pli konpran kwa ki byen e kwa ki mal. (Ebr. 5:14) Dan sa fason, sa koup pionye ti montre ki zot vreman kontan zot nouvo frer ek ser, pa zis an parol me an aksyon.​—Rom. 14:19-21; 1 Zan 3:18.

13. Ki mannyer nou ti kapab enfliyans en dimoun pour fer pese?

¹³ En lot fason ki nou kapab fer en dimoun tonbe, i ler nou enfliyans li pour fer pese. Ki mannyer sa i kapab arive? Mazin sa sityasyon. En etidyan Labib ki en alkolik i lager avek son problenm lalkol pour en bon pe letan e finalman i kapab kontrol son adiksyon. I realize ki i bezwen aret bwar net. I fer en kantite sanzman dan son lavi e i batize. Pli tar, en frer i envit li pour en pti rankont e sa frer i ofer li en bwar for. Sa frer i dir li: “Ou en Kretyen aprezan. Zeova in donn ou son lespri sen. E ou konnen, en laspe sa lespri sen i kontrol lo ou lekor. Si ou annan kontrol lo ou lekor, ou devret kapab bwar en ptigin.” I ti pou tris si sa nouvo frer ti ekout sa move konsey e rekonmans adikt avek bwar!

14. Ki mannyer nou bann renyon i ed nou pour aplik sa konsey dan Filipyen 1:10?

¹⁴ Sa ki nou aprann dan renyon i ed nou pour vwar diferan fason ki nou kapab aplik sa konsey dan Filipyen 1:10. Premyerman, sa ki nou diskite dan renyon i montre nou kwa ki pli enportan pour Zeova. Dezyenmman, nou aprann ki mannyer nou kapab aplik sa ki nou aprann pour ki nou san defo. Trwazyenmman,  nou ganny ankouraze pour “demontre lanmour e fer bann bon aksyon.” (Ebr. 10:24, 25) Ler nou ganny ankouraze par nou bann frer ek ser, sa i ed nou pour devlop plis lanmour pour Bondye e osi pour nou bann frer ek ser. Ler nou kontan Zeova ek nou bann frer ek ser avek tou nou leker, nou pou fer nou mye pour pa fer okenn keksoz ki pou fer zot tonbe.

15. Ki savedir “raport en kantite fri ladrwatir”?

¹⁵ Pol ti priye ki bann Filipyen i “raport en kantite fri ladrwatir.” (Fili. 1:11) San dout, sa “fri ladrwatir” ti enkli zot lanmour pour Zeova ek son pep. I ti osi enkli koz avek lezot lo zot lafwa dan Zezi ek sa zoli lespwar ki zot ti annan. Dan Filipyen 2:15, Pol i servi en lot legzanp. I dir ki bann Filipyen i “parey bann lalimyer ki pe briye dan sa lemonn.” Sa i fer nou rapel ki Zezi ti dir ki son bann disip i “lalimyer lemonn.” (Mat. 5:14-16) Zezi ti osi donn son bann disip sa lord pour “fer . . . disip” e i ti dir ki zot ti pou “bann temwen . . . ziska dan bann landrwa pli elwannyen lo later.” (Mat. 28:18-20; Akt 1:8) Nou raport “fri ladrwatir” ler nou donn tou pour tou dan sa travay vreman enportan.

16. Ki mannyer Filipyen 1:12-14 i montre ki nou kapab parey bann lalimyer ki pe briye menm si nou sityasyon pa fasil? (Vwar portre lo kouvertir.)

¹⁶ Nenport ki sityasyon nou ladan, nou kapab parey bann lalimyer ki pe briye. Parfwa, bann keksoz ki paret i anpes nou anons sa bon nouvel, i an realite en loportinite pour prese. Par egzanp, zapot Pol ti en prizonnyen dan son lakaz Ronm ler i ti ekri son let pour bann Filipyen. Me menm si Pol ti dan lasenn, sa pa ti anpes li anons sa bon nouvel avek bann gard ki  ti pe vey li e avek bann dimoun ki ti vin vizit li. Menm dan sa sityasyon, Pol ti pres avek devouman e sa ti donn bann frer ek ser sa konfyans ek kouraz ki zot ti bezwen “pour koz lo parol Bondye san okenn lafreyer.”​—Lir Filipyen 1:12-14; 4:22.

17. Ki mannyer serten frer ek ser pe kontinyen prese menm si i difisil?

¹⁷ En kantite frer ek ser i demontre kouraz parey Pol. Zot viv dan bann pei kot zot pa lib pour pres an piblik oubyen kazankaz, alor zot rod lezot fason pour anons sa bon nouvel. (Mat. 10:16-20) Dan enn sa bann pei, en sirveyan rezyonal ti dir ki dan en sans sak proklanmater i annan son prop teritwar. I ti ankouraz zot pour pres avek zot fanmir, vwazen, kanmarad lekol, koleg travay ek lezot dimoun ki zot konnen. Dan lespas de-z-an, i ti annan bokou plis kongregasyon ki ti’n formen dan sa rezyon. Kekfwa, nou pa pe viv dan en pei kot nou travay in ganny enterdi. Par kont, nou kapab aprann en bon leson avek sa bann frer ek ser: Toultan rod fason pour partisip plennman dan predikasyon e annan konfyans ki Zeova pou donn ou sa abilite pour kontinyen prese menm ler i difisil.​—Fili. 2:13.

18. Ki nou devret determinen pour fer?

¹⁸ Ozordi, plis ki zanmen oparavan, nou bezwen determinen pour aplik sa konsey ki nou lir dan sa let ki Pol ti ekri bann Filipyen. Alor annou verifye sa ki pli enportan. Annou fer zefor pour san defo. Annou pa fer lezot tonbe e annou raport fri ladrwatir. Ler nou fer sa bann keksoz, nou pou devlop plis lanmour e onor nou Papa Zeova ki kontan nou en kantite.