ESKI i annan en privilez dan kongregasyon ki ou ti a kontan gannyen, me ki ou pa kapab pour le moman? Petet i en privilez ki en lot dimoun i annan. Oubyen kekfwa i en privilez ki ou ti annan dan lepase. Par kont, i kapab ki akoz ou laz, problenm lasante, problenm finansyel oubyen responsabilite fanmir, ou pa kapab fer sa kantite ki ou ti a kontan. Oubyen i kapab ki akoz bann sanzman dan lorganizasyon, ou’n bezwen aret fer en servis ki ou ti pe fer pour en kantite letan. Nenport ki rezon ki ou napa sa privilez, ou kapab santi ki ou pa pe fer tou sa ki ou ti a kontan fer dan servis Bondye. Dan bann sityasyon koumsa, nou kapab konpran si ou santi ou en pe dezapwente. Me kwa ki kapab ed ou pour pa gard rankin, pa dekouraze oubyen ankoler? Ki mannyer ou kapab gard ou lazwa dan ou servis?

Nou kapab aprann en leson enportan lo ki mannyer pour gard lazwa avek legzanp Zan ki batize. Zan ti annan bann privilez remarkab, pourtan i tre probab ki i pa ti pe ekspekte sa ki ti arive dan son lavi. Petet i pa ti’n zanmen mazinen ki i ti pou pas plis letan dan prizon ki dan son minister. Kantmenm sa, Zan ti gard son lazwa e i ti santi koumsa pour larestan son lavi. Kwa ki ti ed li? Ki mannyer nou, nou kapab gard nou lazwa menm ler nou dezapwente?

Prentan lannen 29, Zan ti konmans sa travay ki Zeova ti’n donn li. I ti prepar bann dimoun pour larive Mesi e dir: “Repantir, parski Rwayonm lesyel in aprose.” (Mat. 3:2; Lik 1:12-17) En kantite dimoun ti ekoute. Anfet, bann dimoun ti vwayaz en gran zistans pour ekout son mesaz e bokou parmi zot ti ganny pouse pour repantir e batize. Avek kouraz, Zan ti osi averti bann sef relizye arogan, ki zot ti pou ganny zize si zot pa sanze. (Mat. 3:5-12) Zan ti fer sa keksoz pli enportan dan son minister ler i ti batiz Zezi lotonn lannen 29. Depi sa letan, Zan ti konmans ankouraz dimoun pour swiv Zezi ki ti sa Mesi ki ti’n ganny promet.​—Zan 1:32-37.

Vi ki Zan ti annan en rol ki zis li ki ti annan, Zezi ti kapab dir: “Napa personn ki’n ne lo later ki pli gran ki Zan ki batize.” (Mat. 11:11) Nou  kapab asire ki bann benediksyon ki Zan ti gannyen ti fer li zwaye. Parey Zan, en kantite frer ek ser ozordi in ganny bann zoli benediksyon sorti kot Bondye. Pran par egzanp, en frer ki apel Terry. Li ek son madanm Sandra, in fer plis ki 50 an dan servis a plen tan. Terry i dir: “Mon’n ganny bann zoli privilez. Mon’n servi konman en pionye, en Betelit, en pionye spesyal, en sirveyan rezyonal, en sirveyan distrik e la ankor enn fwa, mon pe servi konman en pionye spesyal.” Nou kontan ler nou ganny en privilez dan servis Zeova, me parey nou pou vwar atraver legzanp Zan, i demann zefor pour gard sa lazwa ler nou sirkonstans i sanze.

Sa keksoz prensipal ki ti ed Zan ki batize pour gard son lazwa, se ki i pa ti zanmen perdi lapresyasyon pour bann privilez ki i ti annan. Annou vwar en legzanp. Apre ki Zezi ti batize, lakantite disip ki Zezi ti annan ti ogmante, tandis ki lakantite disip ki Zan ti annan ti diminyen. Bann disip Zan ti enkyet ler zot ti remark sa e zot ti dir Zan: “Ansenyan, get sa zonm ki ti avek ou lot kote Larivyer Zourden, . . . i pe batiz dimoun e zot tou zot pe al kot li.” (Zan 3:26) Me Zan ti dir zot: “Se nouvo marye ki annan nouvel marye. Me ler zanmi nouvo marye i o bor li e i tann li koze, i dan en gran lazwa akoz i tann lavwa nouvo marye. Pareyman mwan osi mon dan en gran lazwa.” (Zan 3:29) Zan pa ti pe fer konpetisyon avek Zezi e i pa ti krwar ki son travay ti napa okenn valer zis akoz travay Zezi ti pli enportan. O kontrer, Zan ti gard son lazwa parski i ti kontinyen apresye son rol konman “zanmi nouvo marye.”

Sa bon latitid ki Zan ti annan ti ed li pour reste ere menm si sa travay ki i ti annan pour fer pa ti fasil. Par egzanp, depi ler Zan ti ne, i ti en Nazareen e alor i pa ti ganny drwa bwar diven. (Lik 1:15) Ler Zezi ti pe koz lo lefet ki Zan ti viv en lavi senp, i ti dir: “Zan pa ti manze ni bwar parey tou dimoun.” De lot kote, Zezi ek son bann disip pa ti bann Nazareen, alor zot ti napa sa bann restriksyon e zot ti kapab viv parey tou lezot dimoun. (Mat. 11:18, 19) Osi, Zan pa ti ganny sa abilite pour fer mirak me i ti konnen ki bann disip Zezi, enkli serten ki ti son bann disip oparavan, ti ganny sa abilite pour fer mirak. (Mat. 10:1; Zan 10:41) Olye konsantre lo tou sa bann diferans, Zan ti reste okipe dan sa travay ki Zeova ti’n donn li.

Si nou swiv legzanp Zan e apresye sa privilez ki nou deza annan, sa pou ed nou pour gard nou lazwa dan nou servis. Terry, ki’n ganny mansyonnen pli boner, i dir: “Mon ti konsantre lo sak responsabilite ki mon ti gannyen.” Ler i mazin lo son lavi dan servis a plen tan, i dir: “Mon napa okenn regre, zis bann zoli souvenir.”

Nou kapab ganny plis lazwa dan nou servis si nou mazin lo kwa egzakteman ki fer nou servis pour Zeova spesyal. I lefet ki nou annan sa privilez pour “travay ansanm avek Bondye.” (1 Kor. 3:9) En pyer presye pou reste zoli si selman nou pran byen swen avek li. Pareyman sel fason ki nou kapab gard nou lazwa dan servis Zeova, i si nou kontinyen reflesi lo lefet ki i en loner pour servi Zeova. Nou pou evite konpar bann sakrifis ki lezot in fer avek bann sakrifis ki nou nou’n fer. Nou pa pou krwar ki sa travay ki Zeova in donn nou pour fer i annan mwens valer ki sa travay ki i’n donn lezot pour fer.​—Gal. 6:4.

I kapab ki Zan ti konnen ki son minister pa ti pou dir pour lontan, me kekfwa i pa ti’n realize ki son minister ti pou aret en sel kou. (Zan 3:30) Lannen 30, apepre sis mwan apre ki Zan ti’n batiz Zezi, Lerwa Erod ti fer li ganny met dan prizon. Kantmenm sa, Zan ti kontinyen fer sa ki i kapab pour rann temwannyaz. (Mark 6:17-20) Kwa ki ti ed li pour gard son lazwa dan sa sityasyon? I ti kontinyen konsantre lo bann keksoz ki enportan pour Zeova.

Ler Zan ti dan prizon, i ti tann konsernan sa ki Zezi ti pe fer dan son minister. (Mat. 11:2; Lik 7:18) Zan ti konvenki ki Zezi ti Mesi, me i kapab ki i ti pe mazinen ki mannyer Zezi ti  pou akonpli tou bann profesi ki ti’n ganny predir dan Labib konsernan Mesi. Par egzanp, vi ki Mesi ti pou vin Lerwa, eski sa ti vedir ki Zezi ti pou konmans dirize byento? Eski Zezi ti pou fer Zan ganny large prizon? Zan ti anvi konn plis lo sa ki Zezi ti pe al fer, alor i ti anvoy de son bann disip pour demann Zezi en kestyon: “Eski ou sa Enn ki nou pe espere oubyen nou bezwen esper en lot?” (Lik 7:19) Ler zot ti retourn kot Zan, nou kapab mazinen ki Zan ti ekout atantivman anmezir zot ti dekrir ki Zezi ti pe fer bann mirak pour geri bann dimoun e ki Zezi ti’n demann zot pour dir Zan: “Bann aveg pe vwar aprezan, bann ki bwete pe marse, bann ki annan lalep pe vin pir, bann sourd pe tande, bann mor pe ganny resisite e bann pov pe ganny anonse sa bon nouvel.”​—Lik 7:20-22.

Sirman, sa ki bann disip Zan ti dir li ti ankouraz li en kantite. I ti konfirmen ki Zezi ti pe akonpli bann profesi konsernan Mesi. Menm si Zezi pa ti liber Zan prizon, Zan ti konnen ki son servis pa ti anven. Malgre son sityasyon, i ti annan rezon pour zwaye.

Zis parey Zan, si nou konsantre lo servi Zeova menm si i difisil, nou pou annan plis pasyans e nou pou kapab gard nou lazwa. (Kol. 1:9-11) Pour nou kapab andire, nou bezwen lir Labib e medit lo la parski sa pou ed nou rapel ki tou sa ki nou fer pour Zeova i annan valer. (1 Kor. 15:58) Sandra i dir: “Lefet ki mon lir en sapit Labib toulezour, sa in ed mwan pour vin pli pros avek Zeova. Mon lektir Labib i ed mwan pour konsantre lo Zeova e pa lo mwan menm.” Nou osi kapab konsantre lo bann bon nouvel ki nou gannyen konsernan sa travay ki nou bann frer ek ser pe fer pour Zeova, koumsa nou pou aret konsantre zis lo nou lekor. Sandra i dir: “Bann progranm tou le mwan ki nou gannyen lo Televizyon JW i ed nou pour santi nou pli pros avek lorganizasyon e pour gard nou lazwa dan nou servis.”

Pandan sa ptigin letan ki Zan ki batize ti prese, i ti fer li “avek menm devouman ek lafors ki Eliya ti annan” e zis parey Eliya i “ti en zonm ki ti annan bann santiman parey nou menm.” (Lik 1:17; Zak 5:17) Si nou apresye sa privilez ki nou deza annan e reste konsantre lo sa ki pli enportan pour Zeova parey Zan ti fer, nou osi nou pou kapab gard nou lazwa dan nou servis malgre nenport kwa ki arive.