1. Ki David ti dir konsernan limilite Zeova?

 ESKI i byen pour nou dir ki Zeova i annan limilite? Wi, nou kapab dir sa. En fwa David ti dir: “Ou donn mwan ou boukliye delivrans, e ou limilite i fer mwan gran.” (2 Sam. 22:36, NWT; Ps. 18:35, NWT) I kapab ki ler David ti dir sa, i ti pe mazin sa zour ler profet Samyel ti vin kot lakaz son papa pour swazir li konman prosen lerwa Izrael. David ti pli zenn parmi wit garson me kantmenm sa, Zeova ti swazir li pour ranplas Lerwa Sail.​—1 Sam. 16:1, 10-13.

2. Ki nou pou diskite dan sa lartik?

² Nou kapab asire ki David ti pou dakor avek sa ki Psonm 113 i dir lo Zeova: “I abes li pour get lesyel ek later, I lev sa dernyen dimoun dan lapousyer. I elev sa enn pov . . . pour fer li asiz avek bann sef.” (Ps. 113:6-8, NWT) Dan sa lartik, nou pou premyerman vwar serten leson enportan konsernan limilite par diskit lo lafason ki Zeova i demontre sa kalite. Nou pou osi vwar atraver legzanp Lerwa Sail, profet Danyel ek Zezi, ki mannyer nou kapab vin en dimoun modes setadir en dimoun ki konn son limit.

3. Ki mannyer Zeova i tret nou e ki sa i montre?

³ Zeova i montre ki i annan limilite par lafason ki i tret bann imen enparfe. I pa zis aksepte nou ladorasyon me i osi vwar nou konman son bann zanmi. (Ps. 25:14, NWT) I ti fer sa premye pa pour nou kapab vin son zanmi ler i ti donn son Garson konman sakrifis pour nou pese. Pa sa i montre ki Zeova i demontre konpasyon e i pran pitye!

4. Ki Zeova in donn nou e akoz?

 ⁴ Annou vwar en lot fason ki Zeova i montre ki i annan limilite. Konman nou Kreater, Zeova ti’n kapab kree nou san sa abilite pour swazir sa ki nou anvi fer avek nou lavi. Me i pa ti fer sa. I’n kree nou dan son resanblans e i’n donn nou sa liberte pour swazir. Menm si nou ptipti e feb konpare avek Zeova, sa ki nou swazir pour fer i enportan pour li. I anvi ki nou swazir pour servi li akoz nou kontan li e nou konnen ki ler nou obei li sa i bon pour nou. (Det. 10:12; Iza. 48:17, 18) Nou vreman rekonesan ki Zeova i annan limilite!

5. Ki mannyer Zeova i ansenny nou pour demontre limilite? (Vwar portre lo kouvertir.)

⁵ Zeova i ansenny nou ki mannyer pour demontre limilite par lafason ki i tret nou. Zeova i sa Personnaz pli saz dan liniver. Kantmenm sa, i pare pour aksepte sizesyon lezot. Par egzanp, Zeova ti permet son Garson pour ed li ler i ti kree tou keksoz. (Prov. 8:27-30, NWT; Kol. 1:15, 16) Menm si Zeova i Tou Pwisan, i donn lezot serten responsabilite. Par egzanp, i’n swazir Zezi pour vin Lerwa dan Son Rwayonm e I pou donn lotorite sa 144,000 imen ki pou diriz ansanm avek Zezi. (Lik 12:32) Byensir, Zeova in form Zezi pour vin Lerwa ek Granpret. (Ebr. 5:8, 9) I osi form sa bann ki pou dirize ansanm avek Zezi pour zot kapab fer zot travay me i pa esey kontrol lafason ki zot fer sa travay. O kontrer, i annan konfyans ki zot pou fer son lavolonte.​—Rev. 5:10.

6-7. Ki nou kapab aprann avek nou Papa ki dan lesyel konsernan donn responsabilite lezot?

⁶ Si nou Papa ki dan lesyel, ki pa bezwen led avek personn, i donn lezot  lotorite, pa nou osi nou devret fer parey! Par egzanp, eski ou en sef fanmir oubyen en ansyen dan kongregasyon? Ou kapab swiv legzanp Zeova par donn lezot serten travay e pa esey kontrol lafason ki zot fer sa travay. Ler ou swiv legzanp Zeova, ou pa pou zis reisi fini ou travay me ou pou osi form lezot e ed zot pour annan plis konfidans. (Iza. 41:10) Kwa ankor ki bann dimoun ki annan lotorite i kapab aprann avek Zeova?

⁷ Labib i montre ki Zeova i enterese avek sa ki son bann lanz i annan pour dir. (1 Rwa. 22:19-22) Paran, ki mannyer ou kapab swiv legzanp Zeova? Ler i apropriye, demann ou zanfan zot pwennvi lo lafason ki en louvraz i devret ganny fer. Si pwennvi ou zanfan i bon, fer dapre sa ki zot in dir.

8. Ki mannyer Zeova ti demontre pasyans anver Abraam ek Sara?

⁸ En lot fason ki Zeova i demontre limilite i atraver son pasyans. Par egzanp, Zeova i demontre pasyans ler son bann serviter i kestyonn son bann desizyon avek respe. I ti ekoute ler Abraam ti dir ki i pa krwar i byen pour Zeova detri Sodonm ek Gomor. (Zen. 18:22-33) Osi, rapel ki mannyer Zeova ti tret Sara, madanm Abraam. I pa ti ankoler avek Sara ler Sara ti riye apre ki i ti’n tann sa promes konmkwa ki i ti pou tonm ansent dan son vye zour. (Zen. 18:10-14) O kontrer i ti tret Sara avek respe.

9. Ki bann paran ek ansyen i kapab aprann avek legzanp Zeova?

⁹ Paran ek ansyen, ki ou kapab aprann avek legzanp Zeova? Ki ou fer ler ou zanfan oubyen serten dimoun dan kongregasyon pa dakor avek ou desizyon? Eski ou taye pour koriz zot? Oubyen eski ou esey konpran zot pwennvi? Ler bann ki annan lotorite i swiv legzanp Zeova, sa i sirman benefisye bann fanmir ek kongregasyon. Ziska la, nou’n diskit lo sa ki nou kapab aprann avek legzanp Zeova konsernan limilite. Aprezan, nou pou aprann avek lezot legzanp dan Labib lo ki mannyer nou kapab vin en dimoun modes.

10. Ki mannyer Zeova i servi legzanp lezot pour ansenny nou?

¹⁰ Konman nou “Gran Enstrikter,” Zeova i ansenny nou atraver bann legzanp dan Labib. (Iza. 30:20, 21, NWT) Dan Labib, nou aprann konsernan bann dimoun ki ti modes e ki ti annan lezot kalite ki ti fer plezir Bondye. Nou osi aprann sa ki ti arive avek bann ki pa ti demontre sa bann zoli kalite.​—Ps. 37:37, NWT; 1 Kor. 10:11.

11. Ki nou aprann avek move legzanp Sail?

¹¹ Mazin sa ki ti arive avek Lerwa Sail. Ler i ti ankor zenn, i ti en dimoun modes e i ti menm ezite pour pran plis responsabilite. (1 Sam. 9:21; 10:20-22) Me avek letan Sail ti vin arogan e i ti fer bann keksoz ki i pa ti annan drwa fer. I ti konmans azir dan sa fason zis apre ki i ti’n vin lerwa. En fwa, i ti perdi pasyans ler i ti pe esper profet Samyel. Olye annan konfyans ki Zeova pou azir an faver Son pep, Sail pa ti modes. I ti ofer en sakrifis menm si i ti napa drwa fer li. Pour fini kont, Sail ti perdi laprouvasyon Zeova e avek letan Zeova ti rezet li konman lerwa. (1 Sam. 13:8-14) I saz pour nou aprann avek sa lavertisman e evite fer bann keksoz ki nou napa drwa fer.

12. Ki mannyer Danyel ti montre ki i ti en dimoun modes?

 ¹² Annou vwar bon legzanp profet Danyel ki ti diferan avek legzanp Sail. Danyel ti en serviter Bondye ki ti modes, demontre limilite e ki ti toultan rod gidans Zeova. Par egzanp, ler Zeova ti servi li pour enterpret rev Neboukadnezar, Danyel pa ti dir ki i’n enterpret sa rev li tousel. Plito, i ti donn tou loner ek laglwar Zeova. (Dan. 2:26-28) Ki nou kapab aprann avek sa? Si bann frer ek ser i kontan nou bann diskour oubyen si nou annan bann bon leksperyans dan predikasyon, nou bezwen donn tou laglwar Zeova. Avek limilite, nou bezwen admet ki nou pa kapab fer sa bann keksoz san led Zeova. (Fili. 4:13) Ler nou fer sa, nou pe osi swiv bon legzanp Zezi. Ki mannyer sa?

13. Ki nou aprann konsernan limilite dan sa ki Zezi ti dir dan Zan 5:19, 30?

¹³ Menm si Zezi ti Garson parfe Bondye, i ti depan lo Zeova. (Lir Zan 5:19, 30.) I pa ti zanmen esey pran plas son Papa. Filipyen 2:6 i dir nou ki Zezi “pa ti zanmen mazinen pour pran plas Bondye e fer li vin egal avek li.” Zezi ti konnen ki i ti annan son limit e i ti respekte lotorite son Papa.

14. Ki mannyer Zezi ti reazir ler i ti ganny demande pour fer en keksoz ki i ti napa drwa fer?

¹⁴ Mazin lo sa ki Zezi ti fer ler Zak ek Zan ansanm avek zot manman ti vin demann li en keksoz ki i ti napa drwa donnen. Deswit Zezi ti dir, ki zis son Papa dan lesyel ki kapab deside lekel ki pou asiz lo son kote drwat e lo son kote gos dan Rwayonm. (Mat. 20:20-23) Zezi ti modes. I ti montre ki i ti konn byen son bann limit. I pa ti zanmen fer keksoz ki Zeova pa ti’n donn li lord pour fer. (Zan 12:49) Ki mannyer nou kapab swiv legzanp Zezi?

15-16. Ki mannyer nou kapab aplik sa konsey Labib ki dan 1 Korentyen 4:6?

¹⁵ Nou demontre limilite parey Zezi par aplik sa konsey Labib ki trouve dan 1 Korentyen 4:6. Sa verse i dir: “Pa bezwen al pli lwen ki sa ki’n ganny ekrir.” Alor, ler en dimoun i demann nou konsey, nou pa devret zanmen fors lezot pour aksepte nou prop nide oubyen nou  pa zis koze san reflesir. O kontrer, nou devret montre li sa ki Labib ek nou bann piblikasyon i dir. Ler nou fer sa, nou montre ki nou pa konn tou keksoz. Nou osi montre ki nou modes e nou konpran ki bann konsey Zeova i toultan pli bon ki sa ki pour nou.​—Rev. 15:3, 4.

¹⁶ Apard donn loner Zeova, i annan lezot bon rezon pour demontre limilite. Aprezan, nou pou vwar ki mannyer ler nou annan limilite e nou modes, sa i kapab fer nou ere e ed nou annan en bon relasyon avek lezot.

17. Akoz dimoun ki annan limilite e ki konn son limit i ere?

¹⁷ I tre probab ki ler nou annan limilite e nou konn nou limit, sa pou fer nou pli ere. Akoz nou dir sa? Ler nou konn nou limit, nou pou rekonesan pour nenport led ki nou gannyen avek lezot. Par egzanp, mazin ler Zezi ti geri dis lepre. Zis enn parmi zot ki ti retournen pour remersye Zezi pour geri li. Sa zonm ti konnen ki i pa ti pou’n zanmen kapab geri son maladi san led Zezi. Alor i ti rekonesan pour sa led ki i ti’n gannyen e i ti glorifye Bondye.​—Lik 17:11-19.

18. Akoz bann dimoun ki annan limilite e ki konn zot limit i kapab annan bann bon lanmitye avek lezot? (Romen 12:10)

¹⁸ Dimoun ki annan limilite e ki konn zot limit i kapab annan bann bon lanmitye avek lezot. Akoz sa? Zot pare pour aksepte ki lezot dimoun i annan bann bon kalite e zot demontre ki zot annan konfyans dan sa bann dimoun. Bann dimoun koumsa i kontan ler zot vwar lezot reisi. Zot pa ezite pour felisit e onor lezot.​—Lir Romen 12:10.

19. Akoz nou devret evite vin orgeye?

 ¹⁹ De lot kote, bann dimoun ki orgeye i vwar li difisil pour felisit lezot parski zot pli kontan ler zot ki ganny felisite. Zot tant pour konpar zot lekor avek lezot e zot esey fer pli byen ki lezot. Olye form lezot e donn zot serten responsabilite, zot oule fer keksoz dan zot fason e zot pou plito dir: “Si ou anvi ki en keksoz i ganny fer byen, ou bezwen fer li ou menm.” En dimoun orgeye i souvan anvi vin pli enportan ki lezot e i zalou ler lezot i fer keksoz pli byen li. (Gal. 5:26) I rar ki bann dimoun koumsa i annan bann bon lanmitye. Si nou remarke ki nou pe konmans vin orgeye, nou devret sipliy Zeova pour ed nou ‘sanz nou fason panse’ pour ki sa move tre pa anrasinen dan nou.​—Rom. 12:2.

20. Akoz nou devret modes e annan limilite?

²⁰ Nou vreman rekonesan ki Zeova in kit en bon legzanp pour nou! Nou vwar limilite Zeova dan lafason ki I tret son bann serviter e nou anvi swiv son legzanp. Osi, nou anvi swiv legzanp bann dimoun modes dan Labib ki’n annan sa privilez pour mars avek Bondye. Nou anvi toultan donn Zeova sa loner ek laglwar ki i merite. (Rev. 4:11) Si nou fer sa bann keksoz, nou pou zanmi Zeova pour touzour parski i kontan bann dimoun ki modes e ki annan limilite.