1. Ki loner nou annan?

 I EN gran loner pour nou form parti kongregasyon Zeova! Nou dan en paradi spirityel kot nou ador Zeova dan lape ek lazwa, ansanm avek nou bann frer ek ser. Ki ou rol dan kongregasyon?

2. Ki legzanp zapot Pol ti servi dan plizyer son bann let ki dan Labib?

² Nou kapab aprann bokou konsernan rol ki nou annan dan kongregasyon atraver en legzanp ki zapot Pol ti servi dan plizyer son bann let. Dan sa bann let, Pol ti konpar kongregasyon avek lekor imen. I ti osi konpar bann dimoun dan kongregasyon avek diferan parti lekor.​—Rom. 12:4-8; 1 Kor. 12:12-27; Efe. 4:16.

3. Ki trwa leson nou pou vwar dan sa lartik?

³ Dan sa lartik, nou pou vwar trwa leson enportan ki nou kapab aprann avek legzanp ki Pol ti servi. Premyerman, nou pou aprann ki nou tou nou annan nou plas b dan kongregasyon Zeova. Dezyenmman, nou pou diskit lo sa ki nou kapab fer si nou vwar li difisil pour vwar nou plas dan kongregasyon. Trwazyenmman, nou pou vwar akoz nou bezwen reste okipe dan sa travay ki Zeova in donn sakenn ant nou dan kongregasyon.

4. Ki nou aprann avek Romen 12:4, 5?

⁴ Premye leson ki nou aprann avek sa legzanp ki Pol i koz lo la, i ki nou tou nou annan en plas enportan dan fanmir Zeova. Dan son legzanp Pol i dir: “Zis parey dan en sel lekor, i annan plizyer parti me pa tou parti lekor ki annan menm fonksyon, nou osi, menm si i annan bokou nou, nou en sel lekor ki ini avek Kris, me endividyelman nou bann diferan parti lekor ki ini ansanm.” (Rom. 12:4, 5) Ki Pol ti pe esey dir? Nou tou nou annan diferan rol dan kongregasyon me kantmenm sa nou tou nou enportan.

5. Ki “kado” Zeova in donn kongregasyon?

⁵ Ler nou mazin bann ki annan en plas dan kongregasyon, i kapab ki nou vitman asosye sa avek bann ki pe diriz kongregasyon. (1 Tesa. 5:12; Ebr. 13:17) I vre ki atraver Kris, Zeova in donn kongregasyon “bann zonm konman kado.” (Efe. 4:8) Sa “bann zonm konman kado” i enkli bann manm Konsey Direkter, bann asistan Konsey Direkter, bann manm Komite Biro Brans, bann sirveyan rezyonal, enstrikter bann lekol teokratik, bann ansyen ek serviter kongregasyon. Tou sa bann frer in ganny apwente par lespri sen Zeova pour ranforsi kongregasyon e pour zot pran swen avek bann mouton Zeova ki presye.​—1 Pyer 5:2, 3.

6. Dapre 1 Tesalonisyen 2:6-8, ki bann frer ki’n ganny apwente par lespri sen i esey fer?

⁶ Bann frer i ganny apwente par lespri sen pour desarz plizyer responsabilite. Zis parey diferan parti lekor, tel parey lanmen ek lipye, i travay ansanm pour byennet lekor antye, sa bann frer i travay dir pour byennet kongregasyon antye. Zot pa esey rod laglwar pour zot menm. O kontrer, zot esey batir e ranforsi zot bann frer ek ser. (Lir 1 Tesalonisyen 2:6-8.) Nou remersye Zeova pour sa bann frer kalifye ki met lentere lezot avan sa ki pour zot!

7. Ki benediksyon bann ki dan servis a plen tan i gannyen?

⁷ Serten dan kongregasyon i kapab ganny apwente konman misyonner, pionye spesyal oubyen pionye ordiner. Anfet, bann frer ek ser partou dan lemonn in deside pour anons sa bon nouvel e fer disip a plen tan. Vi ki zot in fer sa desizyon, zot in ed en kantite dimoun pour vin disip Kris. Menm si laplipar bann ki servi Zeova a plen tan napa en kantite larzan oubyen keksoz materyel, Zeova in donn zot en kantite bon keksoz. (Mark 10:29, 30) Nou apresye sa bann frer ek ser e nou kontan ki zot form parti kongregasyon!

8. Akoz tou sa ki anons sa bon nouvel i enportan pour Zeova?

⁸ Eski zis bann frer ki’n ganny apwente ek bann serviter a plen tan ki annan en plas dan kongregasyon? Non. Tou sa ki anons sa bon nouvel i enportan pour Bondye e pour kongregasyon. (Rom. 10:15; 1 Kor. 3:6-9) Anfet, en lobzektif enportan ki kongregasyon i annan, i pour fer dimoun vin disip nou Senyer Zezi. (Mat. 28:19, 20; 1 Tim. 2:4) Tou sa ki anons sa bon nouvel, ki swa bann ki’n batize ouswa bann ki pa ankor batize, i esey fer sa travay pour fer disip en priyorite.​—Mat. 24:14.

9. Akoz nou apresye nou bann ser?

⁹ Zeova i onor bann ser par donn zot bann travay enportan dan kongregasyon. Bann madanm, manman, vev e ser  selibater ki pe servi li fidelman i presye pour li. Dan Labib i annan legzanp bann madanm remarkab ki ti fer plezir Bondye. Zot ganny felisite pour zot bon legzanp parski zot in demontre lasazes, lafwa, devouman, kouraz, zenerozite e zot in fer bann bon travay. (Lik 8:2, 3; Akt 16:14, 15; Rom. 16:3, 6; Fili. 4:3; Ebr. 11:11, 31, 35) Nou vreman rekonesan anver Zeova ki dan kongregasyon i annan bann ser ki annan sa bann zoli kalite!

10. Akoz bann frer ek ser aze i vreman presye pour nou?

¹⁰ Nou vreman kontan ki i annan bann frer ek ser aze dan nou kongregasyon. Dan serten kongregasyon i annan bann frer ek ser aze ki’n fidelman servi Zeova tou zot lavi. I kapab ki lezot frer ek ser aze in konn laverite pli resaman. En kantite sa bann frer ek ser i annan bann problenm lasante akoz laz pe antre. Sa bann problenm lasante i kapab anpes zot fer bokou dan predikasyon ek kongregasyon. Kantmenm sa, zot fer sa ki zot kapab dan predikasyon e zot servi tou zot lenerzi pour ankouraz e form lezot. Nou osi aprann bokou avek zot leksperyans. Pour Zeova e pour nou, sa bann frer ek ser aze i vreman zoli.​—Prov. 16:31.

11-12. Ki mannyer bann zenn dan ou kongregasyon in ankouraz ou?

¹¹ Nou pa kapab oubliy nou bann zenn. Zot fer fas avek bokou problenm parski zot pe grandi dan sa lemonn ki pe ganny kontrole par Satan e enfliyanse par son bann move lansennyman. (1 Zan 5:19) Kantmenm sa, i vreman ankourazan pour vwar nou bann zenn pe reponn dan renyon, pe partisip dan predikasyon e pe defann zot lafwa. Bann zenn i annan en plas enportan dan kongregasyon Zeova!​—Ps. 8:2.

¹² Par kont, serten nou bann frer ek ser i vwar li difisil pour krwar ki zot itil dan kongregasyon. Kwa ki kapab ed nou santi ki nou annan en plas dan kongregasyon? Annou vwar.

13-14. Akoz serten i kapab santi ki zot pa itil pour kongregasyon?

¹³ Sa dezyenm leson ki nou aprann dan sa legzanp ki Pol ti koz lo la, i fer nou mazin en problenm ki en kantite frer ek ser i fer fas avek ozordi. Zot vwar li difisil pour krwar ki zot annan zot plas dan kongregasyon. Pol ti ekri: “Meton lipye i dir: ‘Vi ki mon pa lanmen, mon pa form parti lekor,’ sa pa vedir ki i pa form parti lekor. Fer konmsi zorey i dir, ‘Vi ki mon pa lizye, mon pa form parti lekor,’ sa pa vedir ki i pa form parti lekor.” (1 Kor. 12:15, 16) Ki Pol ti pe esey dir?

¹⁴ Si ou konpar ou avek lezot dan kongregasyon, ou kapab konmans krwar ki ou pa itil pour kongregasyon. I kapab ki serten dan kongregasyon i bann bon ansenyan, bann bon organizater oubyen zot bann bon berze. Petet ou santi ki ou pa kapab fer sitan byen parey zot. Sa i montre ki ou annan limilite e ou modes. (Fili. 2:3) Me fer atansyon. Si ou kontinyen konpar ou lekor avek bann ki annan bann bon abilite, ou pou dekouraze. Ou kapab konmans krwar ki ou napa en plas dan kongregasyon. Kwa ki kapab ed ou sirmont bann santiman koumsa?

15. Dapre 1 Korentyen 12:4-11, ki nou bezwen rekonnet konsernan bann abilite ki nou annan?

¹⁵ Annou vwar en pwen enportan. Dan premye syek, Zeova ti servi son lespri sen pour donn bann Kretyen diferan abilite ekstraordiner. Me pa tou Kretyen ki ti ganny menm abilite. (Lir 1 Korentyen 12:4-11.) Zeova ti donn zot diferan abilite me tou sa bann Kretyen ti presye pour li. Ozordi, lespri sen pa donn nou bann abilite ekstraordiner parey dan premye syek. Menm si nou napa bann menm abilite, nou tou nou presye pour Zeova.

16. Ki konsey zapot Pol i donnen ki nou bezwen aplike?

¹⁶ Dan plas konpar nou avek lezot Kretyen, nou bezwen aplik sa konsey ki  zapot Pol ti donnen: “Sakenn i devret egzamin son prop aksyon e apre sa, i pou kontan akoz sa ki li menm in fer e pa akoz i pe konpar li avek en lot dimoun.”​—Gal. 6:4.

17. Ki byenfe nou pou gannyen si nou swiv konsey Pol?

¹⁷ Si nou swiv konsey Pol e egzamin nou prop aksyon, nou kapab konmans vwar ki nou annan bann abilite ki lezot napa. Par egzanp, i kapab ki en ansyen pa en bon orater me i en bon proklanmater ki ansenny byen. Oubyen i kapab ki sa ansyen pa sitan en bon organizater parey lezot ansyen me kantmenm sa, i kapab en bon berze e bann frer ek ser i konfortab pour demann li konsey baze lo Labib. Oubyen i kapab ki i byen koni konman en dimoun ki kontan demontre lospitalite. (Ebr. 13:2, 16) Ler nou rekonnet ki nou annan nou prop abilite, nou pou vwar ki nou pe kontribye dan kongregasyon e sa pou fer nou zwaye. Osi, i tre probab ki sa pou anpes nou zalou nou bann frer ek ser ki annan bann abilite ki diferan avek sa ki pour nou.

18. Ki mannyer nou kapab vin bann pli bon ansenyan?

¹⁸ Nenport ki rol nou annan dan kongregasyon, nou tou nou devret anvi amelyor nou servis e devlop nou bann abilite. Atraver son lorganizasyon, Zeova i donn nou bann bon formasyon ki kapab ed nou amelyore. Par egzanp, dan nou renyon lasemenn, nou ganny bann lenstriksyon ki ed nou pour vin pli efikas dan predikasyon. Eski ou pe aplik sa ki ou pe aprann dan renyon lasemenn?

19. Ki ou kapab fer si ou anvi asiste Lekol pour bann Predikater Rwayonm?

¹⁹ Lekol pour bann Predikater Rwayonm i en lot fason ki nou ganny formen. Sa lekol i pour bann frer ek ser ki deza dan servis a plen tan e ki aze ant 23 a 65 an. Petet ou mazinen ki ou pa pou zanmen kapab al sa lekol. Olye fer en lalis bann rezon akoz ou pa kapab asiste sa lekol, fer en lalis lo akoz ou anvi asiste sa lekol. Apre sa, fer en plan ki pou ed ou kalifye pour fer en laplikasyon. Avek led Zeova e avek bokou determinasyon, ou pou kapab fer sa ki ti paret enposib pour ou fer.

20. Ki nou aprann dan Romen 12:6-8?

²⁰ Sa trwazyenm leson ki nou kapab aprann avek sa legzanp ki Pol ti koz lo la, i dan Romen 12:6-8. (Lir.) Ankor enn fwa, Pol i montre ki bann dimoun dan kongregasyon i annan diferan abilite. I osi dir ki nou devret servi abilite ki nou annan pour batir e ranforsi kongregasyon.

21-22. Ki leson nou aprann avek Robert ek Felice?

²¹ Annou vwar legzanp en frer ki nou pou apel Robert. Apre ki Robert ti’n servi dan en pei etranze, i ti ganny demande pour al servi dan Betel dan son prop pei. Menm si bann frer ti reasir li ki i pa ti’n fer nanryen mal, i ti dir: “Pour plizyer mwan, mon ti sagren akoz mon ti krwar ki mon pa ti’n byen fer dan mon servis. I ti annan letan ki mon ti anvi kit Betel.” Ki mannyer i ti reganny son lazwa? En lot ansyen ti fer li rapel ki Zeova i form nou atraver bann servis ki nou pas ladan, pour nou kapab vin pli itil dan sa servis ki nou ladan aktyelman. Robert ti realize ki i ti bezwen aret mazin lepase e konmans konsantre lo sa ki i pe fer.

 ²² Frer Felice Episcopo ti fer fas avek en defi en pe parey. Apre ki li avek son madanm ti fini Lekol Gilead an 1956, zot ti al servi konman sirveyan rezyonal Bolivi. An 1964, zot ti ganny en zanfan. Felice i dir: “I ti difisil pour kit nou servis ki nou ti kontan. Mon admet ki pour enn an, mon ti santi mwan dekouraze. Me avek led Zeova, mon ti sanz mon latitid e konsantre lo mon nouvo responsabilite konman paran.” Eski ou santi parey Robert oubyen Felice? Eski ou dekouraze akoz ou nepli annan menm privilez ki ou ti annan avan? Si wi, ou pou santi ou pli ere si ou konsantre lo sa ki ou kapab fer la konmela pour servi Zeova ek ou bann frer ek ser. Reste okipe par servi ou bann abilite pour ed lezot e ou pou trouv lazwa anmezir ki ou batir kongregasyon.

23. Ki nou devret pran letan pour fer e ki nou pou diskit lo la dan sa lartik ki swiv?

²³ Nou tou nou presye pour Zeova. I anvi ki nou form parti son fanmir. Si nou pran letan pour reflesir lo sa ki nou kapab fer pour batir nou bann frer ek ser e apre fer zefor pour fer sa, i tre probab ki nou pa pou santi ki nou napa en plas dan kongregasyon. Me ki mannyer nou vwar lezot dan kongregasyon? Ki mannyer nou kapab montre ki nou kontan e nou annan respe pour zot? Nou pou diskit lo la dan sa lartik ki swiv.