1. Akoz Temwen Zeova i bann dimoun ere? (Vwar portre o konmansman sa lartik.)

 TEMWEN ZEOVA i bann dimoun ere. Sak fwa ki zot zwenn ansanm, ki swa dan renyon, lasanble ouswa dan en rankont, zot toultan pe koze e riye avek kanmarad. Akoz zot sitan ere? Rezon prensipal i akoz zot konn Zeova, “sa Bondye ere.” Zot servi li e esey imit li. (1 Timote 1:11; Psonm 16:11) Zeova i Sours lazwa, alor i anvi ki nou ere e i donn nou plizyer rezon pour zwaye.​—Deterononm 12:7; Eklezyast 3:12, 13.

2, 3. (a) Ki savedir ler en dimoun i ere? (b) Akoz i kapab difisil pour ere?

² Me ou, eski ou ere? Ler en dimoun i ere, sa i vedir ki i santi li byen, i satisfe avek son lavi ouswa i vreman zwaye. Labib i montre ki bann ki ganny benediksyon Zeova i kapab vreman ere. Me akoz alor i kapab difisil pour nou ere dan sa lemonn ozordi?

³ I kapab difisil pour ere ler nou pas atraver bann  sityasyon ki fer nou strese, tel parey ler nou perdi en dimoun ki nou kontan dan lanmor ouswa sa dimoun i ganny ekskli, ler nou maryaz i fini par divors oubyen ler nou perdi nou travay. I osi kapab difisil pour ere ler napa lape kot lakour akoz i toultan annan bann dezakor, ler nou bann koleg travay ouswa kanmarad lekol i sikann nou oubyen ler nou ganny persekite ouswa ganny met dan prizon akoz nou servi Zeova. Osi, i kapab ki nou lasante i deteryore, nou devlop en maladi kronik ouswa tonm dan depresyon. Me rapel ki Zezi Kri, “sa sel Dirizan ki ere,” ti kontan rekonfort dimoun e fer zot ere. (1 Timote 6:15; Matye 11:28-30) Dan Sermon lo Montanny, Zezi ti mansyonn serten kalite ki kapab ed nou pour ere menm ler nou annan en kantite problenm akoz nou pe viv dan lemonn Satan.

4, 5. Ki nou kapab fer pour vin ere e reste ere?

⁴ Sa premye keksoz ki Zezi ti mansyonnen i vreman enportan. I ti dir: “Ere bann ki rekonnet ki zot bezwen gidans Bondye, parski Rwayonm lesyel i pour zot.” (Matye 5:3) Si nou rekonnet ki nou bezwen gidans Bondye, nou rekonnet ki nou bezwen konn Bondye e ki nou osi bezwen son led. Ki mannyer nou montre sa? Ler nou etidye Labib, obei Bondye e fer son ladorasyon vin sa keksoz pli enportan dan nou lavi. Ler nou fer sa bann keksoz, sa pou fer nou ere. Osi, nou pou annan plis lafwa ki byento bann promes Bondye pou vin vre. Finalman, “sa lespwar ere” ki nou vwar dan Labib pou ankouraz nou.​—Tit 2:13, not.

⁵ Si nou anvi ere malgre nenport kwa ki arive dan nou lavi, nou bezwen kontinyen ranforsi nou lanmitye avek Zeova. Zapot Pol ti ekri: “Fodre zot toultan annan lazwa akoz Senyer. Ankor enn fwa mon dir zot, Fodre zot zwaye!” (Filipyen 4:4) Pour vin en bon zanmi avek Zeova, nou bezwen annan lasazes Bondye. Parol Bondye i dir: “I byennere sa enn ki’n trouv lasazes, sa enn ki’n ganny disernman. Pour sa enn ki sezi li, lasazes i en pye dibwa ki donn lavi; sa enn ki gard li byen, i ganny deklare byennere.”​—Proverb 3:13, 18.

6. Kwa ankor ki nou bezwen fer pour reste ere?

⁶ Par kont, pour nou reste ere, i vreman enportan ki nou kontinyen aplik sa ki nou aprann dan Labib. Zezi ti met lanfaz lo ki degre sa i enportan ler i ti dir: “Si zot konn sa bann keksoz, ere si zot fer li.” (Zan 13:17; lir Zak 1:25.) Alor, pour montre ki nou rekonnet ki nou bezwen gidans Bondye e pour nou reste ere, nou bezwen  aplik konsey Zezi. Me ki mannyer nou kapab ere ler i annan en kantite keksoz ki kapab anpes nou reste ere? Annou vwar sa ki Zezi ti dir apre dan son Sermon lo Montanny.

7. Ki mannyer bann ki dan en gran latristes i kapab ere?

⁷ “Ere bann ki dan en gran latristes, parski zot pou ganny rekonforte.” (Matye 5:4) Petet sa i fer nou demande, ‘Ki mannyer bann ki dan en gran latristes i kapab ere?’ Zezi pa ti pe koz lo tou dimoun ki dan en gran latristes. En kantite move dimoun i dan latristes parski zot annan bann gro problenm dan sa “bann dernyen zour” ki “vreman difisil.” (2 Timote 3:1) Me zot pa pe mazin Zeova, zot pe mazin zis zot prop lekor. Alor zot pa devlop en lanmitye avek li e zot pa kapab ere. Zezi ti pe koz lo bann ki rekonnet ki zot bezwen gidans Bondye. Zot dan en gran latristes parski zot vwar ki en kantite dimoun in rezet Bondye ouswa pa pe viv sa fason ki Bondye i anvi. Zot osi rekonnet ki zot fer pese e zot vwar bann keksoz terib ki pe arive dan sa lemonn. Zeova i remark bann ki vreman dan en gran latristes, i rekonfort zot atraver son Parol, fer zot ere e donn zot lavi.​—Lir Ezekyel 5:11; 9:4.

8. Ki mannyer ler ou en dimoun dous sa i fer ou ere?

⁸ “Ere bann ki dous, parski zot pou ganny donnen later.” (Matye 5:5) Ki mannyer ler ou en dimoun dous sa i fer ou ere? En kantite dimoun i brit e agresif e sa i kapab anmenn bokou problenm. Me ler zot aprann laverite, zot sanze e devlop “sa nouvo personnalite.” Aprezan, zot demontre “lafeksyon avek tandres ek konpasyon, labonte, limilite, ladouser ek pasyans.” (Kolosyen 3:9-12) Sa i fer ki zot anpe, zot annan en bon relasyon avek lezot e zot ere. Deplis, Bondye i promet dan son Parol ki zot pou “ganny donnen later.”​—Psonm 37:8-10, 29, NWT.

9. (a) Ki Zezi ti pe esey dir ler i ti dir ki bann dous pou “ganny donnen later”? (b) Akoz “bann ki lafen e swaf ladrwatir” i kapab ere?

⁹ Ki Zezi ti pe esey dir ler i ti dir ki bann dous pou “ganny donnen later”? Bann Kretyen swazir pou ganny donnen later ler zot diriz later konman lerwa ek pret. (Revelasyon 20:6) Plizyer milyon dimoun ki napa sa lespwar pour viv dan lesyel, pou ganny donnen later ler zot ganny sa drwa pour reste lo later pour touzour. Zot pou parfe e zot pou ere e anpe. Zezi ti pe koz lo sa de group dimoun ler i ti dir: “Ere bann ki lafen e swaf ladrwatir.” (Matye 5:6) Zeova pou satisfer zot dezir pour ganny ladrwatir ler I retir tou sa ki move. (2 Pyer 3:13) Dan nouvo lemonn, bann dimoun drwat pou ere e zot pa pou zanmen dan en gran latristes ankor akoz bann move keksoz ki bann move dimoun i fer.​—Psonm 37:17.

10. Ki savedir pran pitye?

¹⁰ “Ere bann ki pran pitye pour lezot, parski lezot pou pran pitye pour  zot.” (Matye 5:7) Pran pitye pour lezot i vedir annan lafeksyon, tandres ek konpasyon pour bann ki pe soufer. Par kont, pitye pa zis en santiman tandres. Labib i dir ki pran pitye i enkli fer keksoz pour ed lezot.

11. Ki nou aprann avek legzanp sa bon Samariten?

¹¹ Lir Lik 10:30-37. Sa zoli legzanp ki Zezi ti donnen lo sa bon Samariten i montre nou ki savedir pran pitye. Sa Samariten ti annan konpasyon e son leker ti fermal ler i ti vwar sa zonm pe soufer e sa ti pous li pour ed sa zonm. Apre ki Zezi ti’n donn sa legzanp, i ti dir: “Ale e fer parey ou osi.” Alor nou kapab demann nou lekor: ‘Eski mon pe fer parey? Eski mon pe fer sa ki sa bon Samariten ti fer? Ler lezot i soufer, eski mon kapab fer en keksoz pour ed zot? Par egzanp, dan kongregasyon, eski mon kapab ed bann aze, bann vev ouswa bann zanfan ki zot paran pa servi Zeova? Eski mon kapab “koz dan en fason ki pou konsol bann ki dan depresyon”?’​—1 Tesalonisyen 5:14; Zak 1:27.

12. Akoz nou ere ler nou pran pitye?

¹² Akoz nou ere ler nou pran pitye? Ler nou pran pitye pour lezot, nou pe donnen e Zezi ti dir ki donnen i fer nou ere. En lot rezon i akoz nou konnen nou pe fer plezir Zeova. (Akt 20:35; lir Ebre 13:16.) Lerwa David ti dir sa konsernan en dimoun ki pran pitye: “[Zeova] i protez li, i gard li vivan e rann li ere lo later.” (Psonm 41:1, 2) Si nou pran pitye e demontre konpasyon anver lezot, Zeova osi pou pran pitye pour nou e nou kapab ere pour touzour.​—Zak 2:13.

13, 14. Akoz i enportan pour “annan en leker pir”?

¹³ Zezi ti dir: “Ere bann ki annan en leker pir, parski zot pou vwar Bondye.” (Matye 5:8) Pour annan en leker pir, nou bezwen gard nou bann panse ek dezir pir ouswa prop. Sa i vreman  enportan si nou anvi ki Zeova i aksepte nou ladorasyon.​—Lir 2 Korentyen 4:2; 1 Timote 1:5.

¹⁴ Bann ki annan en leker pir i kapab annan en bon relasyon avek Zeova, ki ti dir: “Ere bann ki’n lav zot rob.” (Revelasyon 22:14) Ki savedir ki zot “lav zot rob”? Pour bann Kretyen swazir, sa i vedir ki Zeova i vwar zot konman prop, ki i pou donn zot lavi imortel dan lesyel e zot pou ere pour touzour. Pour sa gran lafoul ki annan lespwar pour viv lo later, sa i vedir ki Zeova i permet zot pour vin son zanmi akoz i vwar zot konman drwat. Labib i dir ki “zot in lav zot rob e fer zot rob vin blan dan disan Pti Mouton.”​—Revelasyon 7:9, 13, 14.

15, 16. Ki mannyer bann ki annan en leker pir i kapab “vwar Bondye”?

¹⁵ Zeova ti dir: “Personn pa kapab war mwan e kontinyen viv.” (Egzod 33:20) Alor ki mannyer bann ki annan en leker pir i kapab “vwar Bondye”? Sa mo Grek ki’n ganny tradwir “vwar” i kapab vedir pour imazinen, konpran oubyen konnen. Alor, “vwar Bondye” i vedir konpran sa kalite Bondye ki i ete e kontan son bann kalite. (Efezyen 1:18) Zezi ti imit bann kalite Bondye parfetman, alor i ti kapab dir: “Sa ki’n vwar mwan, i’n vwar mon Papa osi.”​—Zan 14:7-9.

¹⁶ An plis, nou “vwar Bondye” ler nou eksperyans lafason ki i ed nou dan nou lavi. (Zob 42:5) Nou osi kapab “vwar,” setadir konsantre lo bann keksoz merveye ki Zeova i promet pour fer pour bann ki reste pir e servi li fidelman. Osi, bann Kretyen swazir pou vreman vwar Zeova ler zot al dan lesyel apre ki zot in ganny resisite.​—1 Zan 3:2.

17. Akoz bann ki fer lape i ere?

¹⁷ Apre, Zezi ti dir: “Ere bann ki fer lape.” (Matye 5:9) Ler nou pran sa linisyativ pour fer lape avek lezot, nou kapab ere. Disip Zak ti ekri: “Fri ladrwatir i ganny senmen dan lape pour sa bann ki pe fer lape.” (Zak 3:18) Alor si ou vwar li difisil pour annan en bon relasyon avek en dimoun dan ou kongregasyon ouswa dan ou fanmir, sipliy Zeova pour ed ou fer lape. Apre, Zeova pou donn ou son lespri sen ki pou ed ou demontre bann kalite Kretyen e ou pou pli ere. Zezi ti met lanfaz lo ki degre i enportan pour pran sa linisyativ pour fer lape ler i ti dir: “Si ou pe anmenn ou lofrann devan lotel e laba ou mazinen ki ou frer i annan en keksoz kont ou, kit ou lofrann laba devan lotel, al fer lape avek ou frer avan tou, apre retournen e ofer ou lofrann.”​—Matye 5:23, 24.

18, 19. Akoz bann Kretyen i kapab zwaye menm si zot ganny persekite?

 ¹⁸ “Ere kan dimoun i ensilte zot, persekit zot, koz manti e dir tou sort move keksoz lo zot akoz mwan.” Ki Zezi ti pe esey dir? I ti azoute: “Zot devret kontan e dan lazwa, parski zot rekonpans i gran dan lesyel, akoz koumsanmenm ki zot ti persekit bann profet avan zot.” (Matye 5:11, 12) Ler bann zapot ti ganny bate e ganny lord pour aret prese, “zot ti kit Sannedren byen kontan.” Byensir, zot pa ti kontan sa bate. Me zot ti ere “akoz zot ti’n ganny konsidere diny pour ganny maltrete o non Zezi.”​—Akt 5:41.

¹⁹ Ozordi, pep Zeova osi i andir avek lazwa ler zot ganny persekite o non Zezi. (Lir Zak 1:2-4.) Parey bann zapot, nou pa kontan soufer ouswa ganny persekite. Me si nou reste fidel avek Zeova, i pou donn nou sa kouraz ki nou bezwen pour andire. Annou vwar sa ki ti arive avek Henryk Dornik ek son frer. An Out 1944, zot ti ganny anvoye dan en kan konsantrasyon. Sa bann ki ti pe persekit zot ti dir: “Ou pa kapab persyad zot pour fer nanryen. I en lazwa pour zot pas martir pour zot krwayans.” Henryk ti eksplike: “Menm si mon pa ti anvi soufer akoz mon krwayans, i ti en lazwa pour annan sa kouraz ek dinyite pour soufer akoz mon ti fidel anver Zeova.” I ti azoute: “Lapriyer senser ti fer mwan vin pli pros avek Zeova e i ti en Led ki mon ti vreman kapab depan lo la.”

20. Akoz nou ere ler nou servi “sa Bondye ere?”

²⁰ Ler nou fer plezir Zeova, “sa Bondye ere,” nou kapab ere menm si nou ganny persekite, nou fanmir i opoz nou, nou malad ouswa nou vin vye. (1 Timote 1:11) Nou osi kapab ere akoz nou Bondye “ki pa kapab koz manti” in promet nou en kantite keksoz merveye. (Tit 1:2) Ler Zeova i akonpli son bann promes, nou pa pou ni menm rapel bann problenm ki nou annan la konmela. Anfet, nou pa ni menm kapab imazinen ki degre merveye lavi pou ete dan Paradi e ki degre nou pou ere! Nou pou “viv dan lape total.”​—Psonm 37:11.