1. Ki mannyer bann adorater Zeova i montre ki zot kontan kanmarad?

 BANN adorater Zeova partou dan lemonn i form parti en sel fanmir. Zot bann frer ek ser ki kontan kanmarad. (1 Zan 4:16, 21) Parfwa zot fer bann gran sakrifis pour zot bann frer ek ser, me laplipar ditan, zot demontre zot lanmour par fer en kantite pti keksoz pour zot. Par egzanp, zot kapab dir en keksoz ankourazan avek zot bann frer ek ser ouswa tret zot avek labonte. Ler nou demontre konsiderasyon anver lezot, nou swiv legzanp nou Papa ki dan lesyel.​—Efezyen 5:1.

2. Ki mannyer Zezi ti swiv legzanp son Papa par demontre lanmour?

² Zezi ti swiv legzanp son Papa parfetman. I ti toultan tret lezot avek labonte. I ti dir: “Vin kot mwan, zot tou ki pe rente e fatige e mon pou redonn zot lafors.” (Matye 11:28, 29) Ler nou swiv legzanp Zezi e demontre  “konsiderasyon anver sa enn ki pli pti,” nou pou fer Zeova ere e nou osi nou pou ere. (Psonm 41:1, NWT) Dan sa lartik, nou pou vwar ki mannyer nou kapab demontre konsiderasyon anver bann manm nou fanmir, nou bann frer ek ser ek bann dimoun ki nou zwenn dan predikasyon.

3. Ki mannyer en msye i kapab demontre konsiderasyon anver son madanm? (Vwar portre o konmansman sa lartik.)

³ Bann msye i devret donn legzanp e montre ki kantite zot pran aker lentere zot fanmir. (Efezyen 5:25; 6:4) Labib i dir ki bann msye i bezwen konpran e demontre konsiderasyon anver zot madanm. (1 Pyer 3:7) En msye ki konpran son madanm i konnen ki menm si zot diferan dan plizyer fason, i pa pli meyer ki son madanm. (Zenez 2:18) I pran an konsiderasyon santiman son madanm e tret li avek dinyite ek loner. En madanm ki reste Kanada i dir sa lo son msye: “I pa zanmen abes mwan akoz mon bann santiman oubyen dir, ‘Ou pa devret santi koumsa.’ I osi ekout mwan byen. Ler i ed mwan pour vwar keksoz dan en lot fason, i fer li avek labonte.”

4. Ki mannyer en msye i kapab montre ki i pran an konsiderasyon santiman son madanm dan lafason ki i tret lezot madanm?

⁴ En msye ki pran an konsiderasyon santiman son madanm pa pou zanmen rod latraksyon avek lezot madanm ouswa montre en lentere ki pa apropriye dan zot, ki swa an personn, lo rezo sosyal ouswa lo Enternet. (Zob 31:1) I pa servi rezo sosyal pour rod latraksyon e i pa al lo bann sit Enternet ki pa apropriye. I reste fidel avek son madanm parski i kontan li e i kontan Zeova e i ay sa ki mal.​—Lir Psonm 19:14; a 97:10. (Vwar not.)

5. Ki mannyer en madanm i kapab demontre konsiderasyon anver son msye?

⁵ Ler en msye i swiv legzanp son sef Zezi Kri, i pou pli fasil pour son madanm annan “en gran respe” pour li. (Efezyen 5:22-25, 33) Ler en madanm i annan respe pour son msye, i pou esey konpran santiman son msye e tret li avek labonte ler i okipe avek bann zafer kongregasyon ouswa ler i bezwen fer fas avek bann problenm. En msye ki reste Grannbretanny i dir: “Par ler, mon madanm pou remark en sanzman dan mon konportman e i pou konnen ki i annan en keksoz ki pe fatig mwan. Apre i pou aplik sa prensip ki trouve dan Proverb 20:5 (NWT), menm si sa i vedir ki i pou bezwen esper sa moman apropriye pour ‘retir’ mon bann panse si i en keksoz ki mon kapab koz lo la avek li.”

6. Ki mannyer nou kapab ankouraz bann zanfan pour mazin lezot e demontre labonte? Ki mannyer bann zanfan pou benefisye?

⁶ Ler bann paran i demontre konsiderasyon  anver kanmarad, zot kit en bon legzanp pour zot zanfan. Zot osi bezwen ansenny zot zanfan pour mazin lezot e demontre labonte anver lezot. Par egzanp, bann paran i kapab ansenny zot zanfan pour pa taye dan Lasal Rwayonm. Osi, dan bann rankont, zot kapab dir zot zanfan pour esper bann aze servi manze premye. Byensir, tou dimoun i kapab siport bann paran. Alor nou devret felisit en zanfan ler i fer en keksoz ki montre ki i’n mazin lezot, parey ler i ouver laport pour nou. Sa pou fer sa zanfan santi li byen e pou ed li aprann ki “i annan plis lazwa pour donnen ki pour resevwar.”​—Akt 20:35.

7. Ki mannyer Zezi ti demontre konsiderasyon anver en zonm sourd e ki nou kapab aprann avek legzanp Zezi?

⁷ En zour ler Zezi ti dan rezyon Dekapol, bann dimoun ti “anmenn kot li en zonm sourd ki pa ti kapab koz byen.” (Mark 7:31-35) Zezi ti geri li, me pa devan lezot. Akoz? Vi ki sa zonm ti sourd, i tre probab ki i pa ti santi li konfortab dan bann gran lafoul. Zezi ti konpran son santiman e i “ti anmenn li a lekar” dan en landrwa kot i ti napa personn otour li e i ti geri li. Byensir, nou pa kapab fer mirak, me nou devret mazin bezwen ek santiman nou bann frer ek ser e demontre labonte anver zot. Zapot Pol ti ekri: “Annou demontre en lentere senser dan lezot pour ki nou kapab ankouraz kanmarad pour demontre lanmour e fer bann bon aksyon.” (Ebre 10:24) Zezi ti konpran lafason ki sa zonm sourd ti santi e i ti tret li avek labonte. Pa sa i en bon legzanp pour nou!

8, 9. Ki mannyer nou montre ki nou enterese avek bann aze ek bann ki annan dezabilite? (Donn bann legzanp.)

⁸ Demontre konsiderasyon pour bann aze ek bann ki annan dezabilite. Laspe pli enportan dan kongregasyon Kretyen se lanmour, pa si nou pe fer keksoz pli vit posib oubyen dan sa pli bon fason. (Zan 13:34, 35) Lanmour i fer nou fer tou sa ki nou kapab pour ed nou bann frer ek ser ki pli aze ouswa ki annan dezabilite pour al renyon ek predikasyon. Nou ed zot menm si i pa tonm byen pour nou ouswa menm si zot pa kapab fer bokou. (Matye 13:23) En frer ki apel Michael ki dan en wiltyer, i vreman rekonesan pour led ki i gannyen avek son fanmir e avek bann frer ek ser dan son kongregasyon. I dir: “Gras a tou zot led, mon kapab asiste laplipar mon bann renyon e al predikasyon regilyerman. Mon vreman kontan fer temwannyaz an piblik.”

⁹ Dan plizyer Betel, i annan bann frer ek ser fidel ki aze oubyen annan dezabilite. Bann sirveyan dan Betel i demontre lanmour anver sa bann frer ek ser par  fer laranzman pour ki zot kapab ekri bann let e servi telefonn pour prese. Bill ki annan 86 an e ki ekri bann dimoun ki reste lwen avek li, i dir: “Nou apresye sa privilez ki nou annan pour ekri bann let.” Nancy ki pros pour ganny 90 an, i dir: “Mon pa vwar ekri let konmsi ou pe zis met papye dan lanvlop. Sa i predikasyon. Dimoun i bezwen konn laverite!” Ethel ki ti ne an 1921, i dir: “Douler i form parti mon lavi. I annan zour ki i menm difisil pour mwan met mon lenz lo mwan.” Kantmenm sa, i kontan servi telefonn pour prese e i annan detrwa bon retourn vizit. Barbara ki annan 85 an, i eksplike: “Vi ki mon lasante pa tro tro bon, mon vwar li vreman difisil pour sorti souvan dan predikasyon. Me rann temwannyaz par telefonn i ed mwan pour koz avek lezot. Mersi Zeova!” Dan mwens ki enn an, en group bann frer ek ser aze ti pas 1,228 erdtan dan predikasyon, ekri 6,265 let, fer plis ki 2,000 koud telefonn e plas 6,315 piblikasyon! Nou kapab asire ki zot zefor in fer Zeova vreman ere!​—Proverb 27:11.

10. Ki mannyer nou kapab ed nou bann frer ek ser pour tir maksimonm profi dan bann renyon?

¹⁰ Demontre konsiderasyon dan bann renyon Kretyen. Ler nou demontre konsiderasyon, nou ed nou bann frer ek ser pour tir maksimonm profi dan bann renyon. Ki mannyer? En fason ki nou fer sa i ler nou ariv aler pour ki nou pa enteronp zot. Parfwa, bann keksoz san ekspekte i kapab fer nou ariv an retar. Me si nou abitye ariv an retar, nou devret mazin lo fason ki sa i afekte nou bann frer ek ser e lo sanzman ki nou kapab fer pour montre ki nou annan zot lentere aker. Rapel osi ki se Zeova ek son Garson ki envit nou pour asiste renyon. (Matye 18:20) Alor nou devret montre respe pour zot par ariv aler!

11. Akoz bann frer ki annan partisipasyon dan renyon i devret swiv sa konsey dan 1 Korentyen 14:40?

 ¹¹ Si nou annan konsiderasyon pour nou bann frer ek ser, nou pou swiv sa konsey Labib: “Fer tou keksoz annord e avek dinyite.” (1 Korentyen 14:40) Bann frer ki annan partisipasyon dan renyon i swiv sa konsey ler zot fini aler. Dan sa fason, zot pa zis demontre konsiderasyon pour sa frer ki vin apre zot, me osi pour tou dimoun dan kongregasyon. Zis mazin ki mannyer lezot pou ganny afekte si renyon i fini tar. Serten frer ek ser i bezwen dray en gran zistans pour ariv kot zot. Lezot i bezwen pran bis pour al kot zot. I annan lezot ankor ki zot konzwen pa Temwen e ki ekspekte ki zot ariv kot lakour a en serten ler.

12. Akoz bann ansyen i merit ganny nou respe ek lanmour? (Vwar sa bwat “ Demontre konsiderasyon anver bann ki pe diriz kongregasyon.”)

¹² Bann ansyen i travay dir dan kongregasyon e dan predikasyon, alor zot merit nou respe ek lanmour. (Lir 1 Tesalonisyen 5:12, 13.) Sirman ou vreman rekonesan pour tou sa ki zot fer pour ou. Ou kapab montre sa ler ou pare pour obei e siport zot parski “zot pe vey lo [ou] e zot pou rann kont pour sa.”​—Ebre 13:7, 17.

13. Ki nou kapab aprann avek lafason ki Zezi ti tret bann dimoun?

¹³ Dan en profesi konsernan Zezi, Izai ti dir: “I pa pou kas en pti banbou kraze e i pa pou tenny en lanmes ki ankor pe sorti lafimen.” (Izai 42:3, NWT) Sa lanmour ki Zezi ti annan pour bann dimoun ti fer li konpran zot douler. I ti konpran santiman bann ki ti dekouraze e santi zot feb parey en “pti banbou kraze” ouswa “en lanmes ki ankor pe sorti lafimen.” Alor, i ti tret zot avek labonte ek pasyans. Menm bann zanfan ti anvi al kot Zezi. (Mark 10:14) Byensir, nou pa kapab konpran ouswa ansenny dimoun parey Zezi ti fer! Me nou kapab demontre konsiderasyon pour bann dimoun dan teritwar par lafason ki nou koz avek zot, moman ki nou koz avek zot e lakantite letan ki nou reste.

14. Akoz nou devret mazin lo lafason ki nou koz avek dimoun?

¹⁴ Ki mannyer nou devret koz avek bann dimoun? Plizyer milyon dimoun ozordi in “ganny maltrete e rezete” par bann biznesmenn, politisyen ek sef larelizyon ki kriyel e koronpi. (Matye 9:36) Akoz sa, en kantite dimoun napa konfyans dan personn e zot napa okenn lespwar. I pour sa rezon ki bann mo ki nou servi ek nou ton lavwa i bezwen montre zot ki nou annan labonte e ki nou enterese avek zot! En kantite dimoun i anvi ekout nou mesaz pa zis akoz nou servi Labib byen, me osi akoz nou vreman enterese avek zot e demontre respe pour zot.

15. Ki serten fason nou kapab demontre konsiderasyon anver bann dimoun dan nou teritwar?

 ¹⁵ I annan plizyer fason ki nou kapab demontre konsiderasyon anver bann dimoun dan nou teritwar. Nou bezwen demann bann kestyon dan en fason ki demontre labonte ek respe. En frer ti fer pionye dan en teritwar kot en kantite dimoun ti timid, alor i ti evite servi bann kestyon ki ti pou fer zot anbarase si zot pa ti konn larepons. Olye demann zot, “Eski ou konn non Bondye?” ouswa “Eski ou konnen kisisa Rwayonm Bondye?” i ti pou dir, “Mon’n aprann dan Labib ki Bondye i annan en non. Eski mon kapab montre ou ki mannyer i apele?” Sa metod pa pou marse partou, parski dimoun i diferan e zot annan diferan kiltir. Me nou devret toultan tret bann dimoun dan nou teritwar avek labonte ek respe. Pour fer sa, nou bezwen konn zot byen.

16, 17. Ki mannyer nou kapab demontre labonte ler nou deside (a) keler pour vizit dimoun? (b) ki kantite letan nou pou koz avek zot?

¹⁶ Ki moman nou devret vizit bann dimoun? Ler nou al kazankaz, dimoun pa pe ekspekte nou parski zot pa’n envit nou. Alor, i vreman enportan ki nou vizit zot dan en moman kot zot pou pli pare pour koze. (Matye 7:12) Par egzanp, eski bann dimoun dan ou teritwar i kontan lev tar dan wikenn? Si wi, petet ou kapab konmans predikasyon par fer temwannyaz lo semen, temwannyaz an piblik ouswa par fer bann retourn vizit kot bann dimoun ki ou konnen pou disponib pour koze.

¹⁷ Ki kantite letan ou devret reste? En kantite dimoun i vreman okipe, alor i ti a byen ki nou pa pran bokou zot letan espesyalman ler nou fek zwenn zot. I pli bon ki nou fini nou konversasyon vitman olye ki nou reste tro lontan. (1 Korentyen 9:20-23) Ler dimoun i vwar ki nou konpran ki zot okipe, petet zot pou pli pare pour koz avek nou laprosenn fwa ki nou zwenn zot. Si nou demontre bann kalite ki lespri sen Bondye i ed nou pour devlope, nou pou vreman pe “travay ansanm avek Bondye.” Zeova i menm kapab servi nou pour ed en dimoun aprann laverite!​—1 Korentyen 3:6, 7, 9.

18. Ler nou demontre konsiderasyon anver lezot, ki bann benediksyon nou pou kapab gannyen?

¹⁸ Alor, annou fer tou sa ki nou kapab pour demontre konsiderasyon anver nou bann manm fanmir, nou bann frer ek ser ek bann dimoun ki nou zwenn dan predikasyon. Koumsa nou pou ganny en kantite benediksyon, la konmela e dan lavenir. Parey Psonm 41:1, 2 (NWT) i dir: “Ere nenport ki dimoun ki demontre konsiderasyon anver sa enn ki pli pti. Zeova pou delivre li pandan zour maler. Zeova pou protez li e gard li vivan. I pou ere lo later.”