1. Ki mannyer lavi zapot Zan ti ete ver lannen 95?

 VER lannen 95, zapot Zan ti trouv li dan en sityasyon vreman difisil. I ti’n vye e i ti’n ganny egzile lo zil Patmos. I tre probab ki i ti sa sel zapot ki ti ankor vivan sa letan. (Rev. 1:9) Zan ti konnen ki bann aposta ti pe ansenny bann mansonz e zot ti pe kree divizyon dan kongregasyon. I ti kapab paret ki byento i ti pou nepli annan bann vre Kretyen.​—Zid 4; Rev. 2:15, 20; 3:1, 17.

2. Dapre Revelasyon 7:9-14, ki vizyon Zan ti gannyen konsernan lavenir? (Vwar portre lo kouvertir.)

² Pandan sa bann moman difisil, Bondye ti donn Zan en vizyon konsernan sa ki ti pou arive dan lavenir. Dan sa vizyon, bann lanz i ganny demande pour tenir divan destriksyon, andotmo, gran ladetres, ziska ki en group lesklav i ganny zot dernyen sele. (Rev. 7:1-3) Dan sa group, i annan 144,000 dimoun ki pou diriz ansanm avek Zezi dan lesyel. (Lik 12:32; Rev. 7:4) Apre sa, Zan i koz lo en lot group ki sitan gran ki i dir: “Gete, mon ti vwar en gran lafoul ki personn pa ti kapab konte ki sorti dan tou nasyon, tribi, pep ek langaz pe debout devan tronn e devan Pti Mouton.” (Lir Revelasyon 7:9-14.) Zis mazinen ki kantite Zan ti kontan pour konnen ki a lavenir i ti pou annan bokou dimoun ki ador Bondye dan sa bon fason!

3. (a) Akoz sa vizyon ki Zan ti gannyen i devret ranforsi nou lafwa? (b) Ki nou pou aprann dan sa lartik?

³ Nou kapab asire ki sa vizyon ti ranforsi lafwa Zan. Sa vizyon i devret ranforsi nou lafwa plis ankor vi ki i pe ganny akonplir dan nou letan. Dan nou letan, i annan plizyer milyon dimoun ki’n konmans ador Zeova e ki annan lespwar pour pas atraver sa gran ladetres e viv pour  touzour lo later. Dan sa lartik, nou pou aprann ki mannyer plis ki 80 an pase Zeova ti ed son pep konpran lekel sa gran lafoul. Apre, nou pou vwar de keksoz konsernan sa lafoul: (1) sa lafoul i vreman gran e (2) bann ki form parti sa group i sorti partou dan lemonn. Sa bann pwen i devret ranforsi lafwa tou bann ki anvi form parti sa group.

4. Ki laverite dan Labib bann larelizyon swadizan Kretyen pa konpran e ki mannyer bann Etidyan Labib ti diferan avek zot?

⁴ Bokou larelizyon swadizan Kretyen pa ansenny dimoun ki Labib i dir ki en zour bann imen obeisan pou viv pour touzour lo later. (2 Kor. 4:3, 4) Ozordi, laplipar sa bann larelizyon i ansennyen ki tou bon dimoun i al dan lesyel apre ki zot in mor. Me bann Etidyan Labib ki ti pe pibliy Latour Veyer an Angle depi lannen 1879 ti diferan. Sa pti group ti konpran ki Bondye ti pou fer later vin en paradi e ki plizyer milyon imen obeisan ti pou viv isi lo later e pa dan lesyel. Par kont, i ti pran letan pour zot byen konpran lekel sa bann imen obeisan.​—Mat. 6:10.

5. Ki bann Etidyan Labib ti krwar konsernan sa 144,000?

⁵ Byensir, bann Etidyan Labib ti osi konpran ki en group dimoun ti pou “ganny aste lo later” pour al diriz ansanm avek Zezi dan lesyel. (Rev. 14:3) Dan sa group, i ti pou annan 144,000 Kretyen devoue ki’n dedye zot lavi avek Bondye e ki’n servi li fidelman lo later. Me ki zot ti krwar konsernan sa gran lafoul?

6. Ki bann Etidyan Labib ti krwar konsernan sa gran lafoul?

⁶ Dan sa vizyon ki Zan ti gannyen, i ti vwar sa gran lafoul “pe debout devan tronn e devan Pti Mouton.” (Rev. 7:9) Sa bann parol ti fer bann Etidyan Labib krwar ki sa gran lafoul ti pou al dan lesyel parey sa 144,000. Me si sa 144,000 ek sa gran lafoul ti pou viv dan lesyel, ki diferans i annan ant sa de group? Bann Etidyan Labib ti krwar ki bann Kretyen ki ti pou form parti sa gran lafoul pa ti totalman obeisan anver Bondye ler zot ti lo later. Menm si zot ti pe swiv bann standar moral ki dan Labib, i kapab ki serten parmi zot ti ankor form parti bann larelizyon swadizan Kretyen. Alor, bann Etidyan Labib ti krwar ki sa group ti kontan Bondye me pa ase pour zot kapab dirize ansanm avek Zezi. Vi ki sa gran lafoul pa ti kontan Bondye ase, zot ti pou al dan lesyel devan tronn me pa pou asiz lo bann tronn.

7. Dapre bann Etidyan Labib, lekel ki ti pou viv lo later pandan Renny Mil an Kris? Ki zot ti krwar konsernan bann zonm fidel ki ti mor avan Kris?

⁷ Be alor, lekel ki ti pou viv lo later? Bann Etidyan Labib ti krwar ki apre ki sa 144,000 ek sa gran lafoul ti’n al dan lesyel, plizyer milyon lezot dimoun ti pou ganny sa posibilite pour viv lo later kot zot ti pou ganny bann byenfe pandan Renny Mil an Kris. Zot ti krwar ki sa plizyer milyon dimoun pa ti pou’n servi Zeova avan sa Renny Mil an Kris. O kontrer, zot ti krwar ki sa group ti pou aprann konsernan Zeova pandan sa mil an. Apre sa, bann ki obei bann standar Zeova ti pou kapab viv pour touzour lo later, tandis ki bann ki rebele ti pou ganny detrir. Bann Etidyan Labib ti osi krwar ki petet serten ki ti pou servi konman “bann prens” lo later pandan Renny Mil an Kris, ti pou al dan lesyel apre sa mil an. Zot ti krwar ki sa “bann prens” ti pou enkli bann zonm fidel ki ti mor avan Kris e ki ti  pou ganny resisite pandan sa mil an.​—Ps. 45:16, NWT.

8. Ki trwa group bann Etidyan Labib ti krwar i form parti plan Bondye?

⁸ Alor, dapre bann Etidyan Labib i ti annan trwa group: (1) sa 144,000 ki ti pou diriz ansanm avek Zezi dan lesyel, (2) sa gran lafoul Kretyen ki pa ti ase devoue, ki ti pou debout devan tronn Zezi dan lesyel e (3) sa plizyer milyon lezot dimoun lo later ki ti pou aprann konsernan Zeova pandan Renny Mil an Kris. b Me dan sa moman ki Zeova ti swazir, laverite ki dan Labib ti vin pli kler.​—Prov. 4:18.

9. (a) Dan ki fason sa gran lafoul lo later i kapab “debout devan tronn e devan Pti Mouton”? (b) Akoz sa nouvo leksplikasyon konsernan Revelasyon 7:9 i fer sans?

⁹ An 1935, Temwen Zeova ti ganny leklersisman lo lekel sa gran lafoul ki Zan ti vwar dan son vizyon. Zot ti realize ki sa gran lafoul pa ti bezwen dan lesyel pour zot kapab debout “devan tronn e devan Pti Mouton.” O kontrer, zot fer sa dan en sans senbolik. Menm si zot pou reste lo later, sa gran lafoul i debout “devan tronn” ler zot rekonnet ki Zeova i Dirizan liniver e ler zot obei li. (Iza. 66:1) Zot debout “devan Pti Mouton” ler zot demontre lafwa dan sakrifis Zezi. Pareyman, Matye 25:31, 32, i dir ki “tou nasyon,” enkli bann ki move, i “ganny rasanble devan” tronn glorye Zezi. Alor, i kler ki tou sa bann nasyon i lo later, pa dan lesyel. Sa nouvo leksplikasyon an 1935 i fer sans. I eksplike akoz Labib pa dir ki sa gran lafoul i ganny anmennen dan lesyel. Zis en group, setadir sa 144,000, ki annan sa lespwar pour viv pour touzour dan lesyel pour zot “diriz lo later antye konman lerwa” ansanm avek Zezi.​—Rev. 5:10.

10. Akoz sa gran lafoul i bezwen aprann konn Zeova avan ki Renny Mil an Kris i konmanse?

¹⁰ Depi 1935, Temwen Zeova in konpran ki sa gran lafoul ki Zan ti vwar dan son vizyon i en group Kretyen fidel ki annan sa lespwar pour viv lo later pour touzour. Pour sa gran lafoul kapab pas atraver gran ladetres, zot ti pou bezwen aprann konn Zeova e konmans servi li avan ki Renny Mil an Kris i konmanse. Zot ti pou bezwen demontre en lafwa for pour zot kapab “sap tou sa bann keksoz ki devret arive” avan Renny Mil an Kris.​—Lik 21:34-36.

11. Akoz bann Etidyan Labib ti krwar ki serten dimoun ti pou al dan lesyel apre Renny Mil an Kris?

¹¹ Me ki nou pou dir konsernan sa krwayans ki serten ki egzanpler pandan Renny Mil an Kris ti pou al dan lesyel apre sa mil an? Bann Etidyan Labib ti mazinen, ‘Akoz bann serviter fidel Bondye ki’n mor avan Kris pou senpleman ganny drwa viv lo later tandis ki bann Kretyen ki pa’n vreman fidel pou ganny loportinite pour al dan lesyel?’ Alor Latour Veyer le 15 Fevriye 1913 an Angle ti dir ki sa i kapab arive. Byensir, zot ti krwar sa akoz zot ti mal konpran de keksoz: (1) ki sa gran lafoul ti pou al dan lesyel e (2) ki sa gran lafoul ti pou bann Kretyen ki pa konpletman devoue.

12-13. Ki bann Kretyen swazir ek sa gran lafoul i konnen konsernan zot rekonpans?

¹² Par kont, parey nou’n vwar, depi 1935 Temwen Zeova in konpran ki sa gran lafoul ki Zan ti vwar dan son vizyon i bann ki pa pou ganny detrir pandan lager Armagedon. Zot pou “pas atraver sa gran  ladetres” isi lo later e zot pou “kontinyen kriye: ‘Nou’n ganny sove gras a nou Bondye, sa Enn ki lo tronn e gras a sa Pti Mouton.’” (Rev. 7:10, 14) Zot ti osi konpran ki bann zonm fidel ki’n mor avan Kris pa ti pou al dan lesyel. Anfet, Labib i dir ki bann ki pou resisite pour al dan lesyel i ganny “en keksoz pli meyer” ki sa bann zonm fidel. (Ebr. 11:40) Sa leklersisman an 1935 ti pous nou bann frer pour konmans envit dimoun pour servi Zeova pour zot kapab annan sa lespwar pour viv pour touzour lo later.

¹³ Bann ki form parti sa gran lafoul i vreman kontan ki zot annan sa lespwar. Zot konpran ki Zeova ki swazir kote son bann serviter fidel pou servi li, ki swa dan lesyel oubyen lo later. Bann Kretyen swazir ek sa gran lafoul i konnen ki zot kapab ganny zot rekonpans zis akoz Zeova in demontre son labonte ekstraordiner par donn Zezi Kri konman en ranson.​—Rom. 3:24.

14. Apre 1935, akoz bokou ti mazinen ki mannyer sa profesi konsernan sa gran lafoul ti pou ganny akonplir?

¹⁴ Apre ki pep Zeova ti ganny sa leklersisman an 1935, bokou ti mazinen ki mannyer bann dimoun ki annan lespwar pour viv lo later ti pou vin en gran lafoul. Par egzanp, Ronald Parkin ti annan 12 an ler i ti annan sa leklersisman konsernan sa gran lafoul. I dir: “Sa letan, i ti annan apepre 56,000 proklanmater partou dan lemonn e bokou, petet menm laplipar ti bann Kretyen swazir. Alor i ti paret ki i ti napa bokou ki ti form parti sa gran lafoul.”

15. Ki mannyer sa gran lafoul i ankor pe kontinyen ganny rasanble?

¹⁵ Par kont, dan bann lannen apre 1935, bokou misyonner ti ganny anvoye dan plizyer pei e avek letan, lakantite Temwen Zeova ti ogmante. Apre, an 1968, bann proklanmater ti konmans servi liv The Truth That Leads to Eternal Life pour etidye Labib avek bann dimoun. Sa liv ti eksplik laverite dan en fason senp ki ti fer bokou plis dimoun ganny atire ver Zeova. Dan lespas kat-r-an, plis ki 500,000 nouvo disip ti batize. Avek letan, bokou dimoun dan Lanmerik Latin ek lezot pei ti nepli swiv Legliz Katolik. Osi, nou travay ti nepli ganny restrikte Les Lerop ek dan serten landrwa Lafrik. Sa ti fer ki plizyer milyon lezot dimoun ti batize. (Iza. 60:22) Resaman, lorganizasyon Zeova in  fer en kantite zouti efikas pour ed bann dimoun aprann sa ki Labib i dir. Napa okenn dout ki Zeova in rasanble en gran lafoul ki ozordi i annan plis ki wit milyon dimoun.

16. Kote sa gran lafoul pou sorti?

¹⁶ Ler Zan ti pe ekri son vizyon, i ti dir ki sa gran lafoul ti pou sorti dan “tou nasyon, tribi, pep ek langaz.” Pli boner, profet Zekarya ti’n predir en keksoz en pe parey. I ti ekri: “Dan sa bann letan, dis etranze ki koz diferan langaz pou vin anpandan avek en Zwif. Zot pou atrap son lenz e dir li: Nou oule vin avek ou, nou’n tande ki Bondye i avek ou.”​—Zek. 8:23.

17. Kwa ki pe ganny fer pour ed dimoun sorti dan tou nasyon ek langaz?

¹⁷ Temwen Zeova i realize ki sa bon nouvel i bezwen ganny anonse dan plizyer langaz pour ki bann dimoun sorti dan tou langaz i ganny rasanble. Pour plis ki 130 an nou pe tradwir bann piblikasyon baze lo Labib, me ozordi nou pe tradwir dan bokou plis langaz ki zanmen oparavan. Anfet, nou bann piblikasyon i disponib dan plis ki 900 langaz. I kler ki Zeova pe fer en mirak dan nou letan, setadir i pe rasanble en gran lafoul sorti  dan tou nasyon. Vi ki Labib ek bann piblikasyon baze lo Labib i disponib dan plizyer langaz, bann ki form parti sa gran lafoul i kapab ador Zeova dan linite menm si zot reste partou lo later. Osi, dimoun i konn Temwen Zeova konman bann ki anons sa bon nouvel avek devouman e ki kontan kanmarad parey bann frer ek ser. Pa sa i ranforsi nou lafwa!​—Mat. 24:14; Zan 13:35.

18. (a) Dapre Izai 46:10, 11, akoz nou pa sirprann ki Zeova in akonpli sa profesi konsernan sa gran lafoul? (b) Akoz bann ki annan lespwar pour viv lo later pa santi ki zot pe mank keksoz?

¹⁸ Nou vreman kontan pour konn sa profesi konsernan sa gran lafoul! Nou pa sirprann ki Zeova in akonpli sa profesi dan en fason merveye. (Lir Izai 46:10, 11.) Bann ki form parti sa gran lafoul i rekonesan ki Zeova in donn zot sa lespwar. Zot pa santi ki zot pe mank keksoz akoz zot pa’n ganny swazir par lespri sen Bondye pour al dan lesyel ansanm avek Zezi. Dan Labib, nou lir konsernan bann zonm ek fanm fidel ki ti ganny gide par lespri sen, me kantmenm sa, zot pa form parti sa 144,000. Par egzanp, Zan ki batize ek David. (Mat. 11:11; Akt 2:34) Zot ek plizyer lezot serviter fidel pou ganny resisite pour viv dan Paradi lo later. Zot tou, ensi ki sa gran lafoul, pou ganny sa loportinite pour demontre zot fidelite anver Zeova e siport son drwa pour dirize.

19. Si nou konpran sa vizyon ki Zan ti gannyen konsernan sa gran lafoul, ki nou pou fer?

¹⁹ I premye fwa dan listwar imen ki Bondye in rasanble plizyer milyon dimoun sorti dan tou nasyon pour ador li ansanm. Ki swa nou annan lespwar pour viv dan lesyel oubyen lo later, nou tou nou bezwen ed maksimonm dimoun posib pour form parti sa gran lafoul “lezot mouton.” (Zan 10:16) Parey in ganny predir, byento pandan gran ladetres, Zeova pou detri bann gouvernman ek larelizyon ki’n fer bann imen soufer. Tou bann ki form parti sa gran lafoul i annan en zoli loportinite. Zot pou kapab servi Zeova pour touzour lo later!​—Rev. 7:14.