1. Kwa ki montre ki lanmour dan fanmir in diminyen ozordi?

 LABIB ti dir ki dan bann dernyen zour, “lanmour” parmi bann manm fanmir ti pou diminyen. (2 Tim. 3:1, 3) Nou vwar sa profesi pe ganny akonplir ozordi. Par egzanp, en kantite paran in divorse, zot ankoler avek kanmarad e sa i fer ki bann zanfan i santi ki personn pa kontan zot. Menm bann fanmir ki reste dan menm lakaz napa en bon relasyon antre zot. Par egzanp, en konseyer lafanmir ti dir: “Manman, papa ek zanfan pa koz avek kanmarad. Zot pas laplipar zot letan lo konpiter, tablet, telefonn oubyen pe zwe bann zwe video. Menm si zot reste dan menm lakaz zot pa vreman konn kanmarad.”

2-3. (a) Dapre Romen 12:10, pour lekel ki nou devret annan tandres ek lafeksyon? (b) Ki nou pou vwar dan sa lartik?

² Nou pa anvi vin parey bann dimoun dan sa lemonn ki napa lanmour pour lezot. (Rom. 12:2) O kontrer, nou bezwen devlop tandres ek lafeksyon pour nou bann manm fanmir e osi pour nou bann frer ek ser dan lafwa. (Lir Romen 12:10.) Kisisa tandres ek lafeksyon? Sa term i dekri sa lanmitye ki i annan ant bann fanmir pros. Sa i sa kalite lanmour ki nou devret devlope pour nou bann frer ek ser dan lafwa. Ler nou demontre tandres ek lafeksyon, nou kapab servi Zeova ansanm avek lezot dan lazwa.​—Mik. 2:12, NWT.

³ Pour ed nou devlop e demontre tandres ek lafeksyon, annou vwar sa ki nou kapab aprann avek bann legzanp dan Labib.

4. Ki Zak 5:11 i dir nou konsernan lanmour ki Zeova i annan pour nou?

⁴ Labib i dir nou konsernan bann zoli kalite ki Zeova i annan. Par egzanp, i dir ki “Bondye i lanmour.” (1 Zan 4:8) Ler nou konn sa, nou anvi vin son zanmi. Me Labib i osi dir nou ki Zeova “i annan en kantite lafeksyon ek tandres.” (Lir Zak 5:11, not.) Sa i en zoli fason pour montre ki kantite Zeova i kontan nou.

5. Ki mannyer Zeova i pran pitye pour nou e ki mannyer nou kapab swiv son legzanp?

⁵ Remarke ki Zak 5:11 i koz lo tandres ek lafeksyon ki Zeova i annan e osi son mizerikord. (Egz. 34:6) En fason ki Zeova i demontre mizerikord oubyen pran pitye pour nou, i ler i pardonn bann fot ki nou’n fer. (Ps. 51:1) Dapre Labib, en dimoun ki pran pitye pour en lot i fer plis ki zis pardonn li pour bann fot ki i’n fer. I osi enplik en santiman for ki en dimoun i annan ler i vwar en lot dimoun pe soufer e sa i pous li pour esey ed sa dimoun. Zeova i dir ki ler i vwar nou pe soufer i vreman anvi ed nou e sa santiman i pli for ki santiman ki en manman i annan pour son zanfan. (Iza. 49:15) Ler nou dan problenm Zeova i pran pitye pour nou e sa i motiv li pour ed nou. (Ps. 37:39; 1 Kor. 10:13) Nou pran pitye pour nou bann frer ek ser ler nou pardonn zot e pa gard rankin ler zot dezapwent nou. (Efe. 4:32) En lot fason enportan ki nou kapab fer sa, i ler nou siport nou bann frer ek ser ler zot pas dan problenm. Ler lanmour i motiv nou pour demontre mizerikord anver lezot, nou pe swiv legzanp Zeova parski napa personn ki demontre plis tandres ek lafeksyon ki Zeova.​—Efe. 5:1.

6. Ki mannyer Zonatan ek David ti demontre tandres ek lafeksyon pour kanmarad?

⁶ Labib i koz lo bann imen enparfe ki ti demontre tandres ek lafeksyon. Annou  vwar legzanp Zonatan ek David. Labib i dir: “Zonatan ek David ti vin bon zanmi e Zonatan ti konmans kontan li parey son prop lekor.” (1 Sam. 18:1, NWT) Zeova ti’n swazir David pour vin lerwa apre Sail. Apre sa, Sail ti konmans zalou David e i ti esey touy li. Me Zonatan garson Sail pa ti siport son papa ler Sail ti esey touy David. Zonatan ek David ti promet pour reste zanmi e pour toultan siport kanmarad.​—1 Sam. 20:42.

7. Kwa ki ti’n kapab anpes Zonatan ek David vin zanmi?

⁷ Sa tandres ek lafeksyon ki Zonatan ek David ti demontre anver kanmarad ti remarkab parski i ti annan plizyer keksoz ki ti’n kapab anpes zot vin zanmi. Par egzanp, Zonatan ti apepre 30 an pli vye ki David. Zonatan ti’n kapab mazinen ki i pa ti pou kapab vin zanmi avek en dimoun ki bokou pli zenn ki li e mwen eksperyanse ki li. Me Zonatan pa ti mazin koumsa. I pa ti krwar ki David ti pli enferyer ki li, o kontrer i ti annan bokou respe pour David.

8. Akoz ou krwar Zonatan ti sitan en bon zanmi pour David?

⁸ Zonatan ti’n kapab zalou David. Vi ki i ti garson Lerwa Sail, i ti’n kapab ensiste ki i vin prosen lerwa. (1 Sam. 20:31) Me Zonatan ti annan limilite e i ti fidel anver Zeova. Alor i ti siport desizyon Zeova pour fer David vin prosen lerwa. I ti osi fidel anver David menm si sa ti fer Sail vreman ankoler.​—1 Sam. 20:32-34.

9. Ki mannyer nou konnen ki Zonatan pa ti zalou David?

⁹ Zonatan ti annan tandres ek lafeksyon pour David, alor i pa ti zalou li. Zonatan ti en gerye kouraze ki ti kapab byen servi son fles. Dimoun ti dir ki li ek son papa Sail ti “pli rapid ki leg” e “pli for ki lyon.” (2 Sam. 1:22, 23) Alor Zonatan ti’n kapab fer vantar akoz tou sa bann keksoz ki i’n fer. Me i pa ti esey vin pli meyer ki David e i pa ti zalou bann bon keksoz ki David ti fer. O kontrer, Zonatan ti admir David pour son kouraz ek lafason ki i ti depan lo Zeova. Anfet, i ti apre ki David ti’n touy Golyat ki Zonatan ti konmans kontan David parey son prop lekor. Ki mannyer nou kapab montre ki nou kontan nou bann frer ek ser parey Zonatan ti kontan David?

10. Ki savedir “kontan kanmarad en kantite avek tou zot leker”?

¹⁰ Labib i dir: “Kontan kanmarad en kantite avek tou zot leker.” (1 Pyer 1:22) Zeova i en bon legzanp pour nou. I telman kontan nou ki si nou reste fidel avek li, i pa pou zanmen aret kontan nou. (Rom. 8:38, 39) Sa mo Grek ki’n ganny tradwir “en kantite” i fer nou mazin en dimoun ki pe fer en kantite zefor pour demontre lanmour. Parfwa nou bezwen fer zefor pour demontre tandres ek lafeksyon pour nou bann frer ek ser. Ler lezot i ofans nou, nou bezwen kontinyen “siport kanmarad avek lanmour. Fer bokou zefor pour gard sa linite ki [nou] annan gras a lespri sen e ki lape i ini [nou] tou ansanm.” (Efe. 4:1-3) Ler nou fer zefor pour gard lape avek nou bann frer ek ser, nou pa pou konsantre lo zot bann fot. Nou pou fer nou mye pour vwar nou bann frer ek ser parey Zeova i vwar zot.​—1 Sam. 16:7; Ps. 130:3.

11. Akoz parfwa i kapab difisil pour devlop tandres ek lafeksyon?

 ¹¹ I pa toultan fasil pour demontre tandres ek lafeksyon pour nou bann frer ek ser, sirtou ler nou konn zot defo. I paret ki bann Kretyen dan premye ti vwar li difisil pour fer sa. Par egzanp, Evodi ek Sentis ti kapab travay “kot a kot avek Pol akoz sa bon nouvel.” Me pour en rezon ou en lot, zot pa ti kapab travay avek kanmarad. Alor Pol ti ankouraz zot “pour annan menm fason panse an sa ki konsern Senyer.”​—Fili. 4:2, 3.

12. Ki mannyer nou kapab devlop tandres ek lafeksyon pour nou bann frer ek ser?

¹² Ki mannyer nou kapab devlop tandres ek lafeksyon pour nou bann frer ek ser ozordi? Ler nou konn nou bann frer ek ser pli byen, i pou pli fasil pour nou konpran zot e pour nou devlop tandres ek lafeksyon pour zot. Nou kapab vin zanmi avek zot menm si zot pli aze oubyen pli zenn ki nou ouswa menm si zot sorti dan en lot kiltir. Rapel ki Zonatan ti apepre 30 an pli vye ki David, me kantmenm sa i ti devlop en lanmitye pros avek David. Eski i annan en dimoun dan ou kongregasyon ki pli vye oubyen pli zenn, ki ou kapab fer zanmi avek? Ler ou fer sa, ou montre ki ou “annan lanmour pour lasosyasyon tou bann frer.”​—1 Pyer 2:17.

13. Akoz nou kapab santi nou pli pros avek serten dan kongregasyon?

¹³ Eski ler ou annan tandres ek lafeksyon pour bann frer ek ser sa i vedir ou pou annan en lanmitye pros avek tou dimoun dan kongregasyon? Non, sa i pa posib. I normal pour nou santi nou pli pros avek serten dimoun akoz zot annan menm lentere avek nou. Zezi ti apel tou son bann zapot son “zanmi” me i ti annan en lafeksyon spesyal pour Zan. (Zan 13:23; 15:15; 20:2) Me Zezi pa ti fer lapreferans pour Zan. Par egzanp, ler Zan avek son frer Zak ti demann Zezi pour donn zot en plas enportan dan Rwayonm Bondye, Zezi ti dir zot: “Pour asiz lo mon  kote drwat oubyen lo mon kote gos, sa pa mwan ki deside.” (Mark 10:35-40) Parey Zezi, nou pa devret fer lapreferans pour nou zanmi. (Zak 2:3, 4) Si nou fer sa, nou pou ede pour gard lape dan kongregasyon.​—Zid 17-19.

14. Dapre Filipyen 2:3, kwa ki kapab ed nou pour pa fer konpetisyon avek lezot dan kongregasyon?

¹⁴ Ler nou demontre tandres ek lafeksyon anver kanmarad, nou pa pou esey fer konpetisyon avek lezot dan kongregasyon. Rapel ki Zonatan pa ti zalou David e i pa ti esey vin lerwa dan plas David. Nou tou nou kapab swiv legzanp Zonatan. Pa zalou bann frer ek ser akoz abilite ki zot annan “me avek limilite konsider [zot] pli siperyer ki [ou].” (Lir Filipyen 2:3.) Gard antet ki nou tou nou kapab fer keksoz pour ede dan kongregasyon. Si nou annan limilite, nou pou kapab vwar bann bon kalite ki nou bann frer ek ser i annan e nou pou kapab aprann avek zot legzanp.​—1 Kor. 12:21-25.

15. Ki ou aprann avek legzanp Tanya ek son fanmir?

¹⁵ Ler bann move keksoz i arive avek nou, Zeova i rekonfort nou atraver nou bann frer ek ser. Zot donn nou bann led pratik e zot demontre tandres ek lafeksyon anver nou. Annou vwar sa ki ti arive avek en fanmir ki annan trwa zanfan, ki ti asiste lasanble enternasyonal 2019, ki ti fer Leta-z-ini e ki ti annan pour tenm, “Lanmour i reste pour touzour!” Tanya, manman sa trwa zanfan ti dir: “Ler nou ti pe retourn kot lotel, en loto ti tap avek nou loto. Personn pa ti ganny dimal me nou ti dan sok. Nou ti  sorti dan loto e debout dan semen. En dimoun ti dir nou vin lot kote semen kot son loto kot nou ti pou sen e sof. I ti enn nou bann frer ki ti’n fek sorti lasanble li osi e pa zis li ki ti arete. Senk Temwen ki sorti Laswed e ki ti’n vin asiste sa lasanble, ti osi arete. Bann ser ti anmay mwan ek mon fiy e sa ti rekonfort nou. Mon ti dir sa bann frer ek ser ki nou oke me zot pa ti oule kit nou. Zot ti reste avek nou menm ler lanbilans ti arive e zot ti fer sir ki nou annan tou sa ki nou bezwen. Pandan sa moman difisil, nou ti santi ki Zeova i kontan nou. Sa ki ti arive sa zour ti fer nou lanmour pour nou bann frer ek ser vin pli for e i ti osi ogmant nou lanmour ek lapresyasyon pour Zeova.” Eski ou mazin en letan ler ou ti bezwen led e en frer oubyen en ser ti demontre lafeksyon ek tandres anver ou?

16. Ki rezon nou annan pour demontre tandres ek lafeksyon anver kanmarad?

¹⁶ Mazin lo bann bon keksoz ki arive ler nou demontre tandres ek lafeksyon anver kanmarad. Nou rekonfort nou bann frer ek ser ler zot pas dan difikilte. Nou ed nou bann frer ek ser pour servi Zeova ansanm dan lazwa. Nou montre ki nou bann disip Zezi e sa i fer bann dimoun senser anvi servi Zeova. Sa ki pli enportan, nou onor Zeova nou “Papa ki pran lapenn e ki donn rekonfor dan tou sityasyon.” (2 Kor. 1:3) Alor nou tou nou anvi kontinyen devlop e demontre tandres ek lafeksyon!